Kutendeka 44
44
Kikombe kyakua Yusufu kyabiikua mu lisaaka lyakua Benyamina
1Yusufu wa-anine mubombi wa mu nghanda yakue nangue, “Izuzia bilio mu masaaka a baba bantu kukonkana ni vibalikuvinda kutwama, ubabiikilemo ni nfolanga yabo. 2Kabili ubiike ni kikombe kyane kya mutofue mu lisaaka lyakua ozu mwanike, ubiikemo ni nfolanga yakue.” Ni ye waakitile mwa-aniinue na Yusufu. 3Lukeele lwakue paakili ba-aninue kuti baye pamo ni punda yabo. 4Lubaali tebanafike kule ni muzi, Yusufu waamwanine mubombi wa mu nghanda yakue nangue, “Lenga ubakonke balia bantu bayanga. Pauya kubasanga, uye ubeepuzie evi, ‘Mwakitilangaki bibiipile ku muntu waamikitiile biweme? 5Temuli na kikombe kyakua tawelenzi?#44.5 Bwaluzi bumo bwa kale buli na Temuli na kikombe kyakua tawelenzi? Kiebrania tekikwete totu twebo. ki-aliwamininamo ni kubukilako? Mwaluvia sana.’”
6Lu-aabasangile, waabaanine totu twebo. 7Baamwanine evi, “We mulopue, walandilaki evio? Kulanda kisinka tetwakitanga kintu kya ozu musango. 8Unvua, lolia lutwaatwaminiine nfolanga mu masaaka etu mpaka ku Kanaani, twakikubweziizia. Eba, ale tulikwibilaki mutofue ao oro yakua solenzi? 9Ewe, kansi kine pa fwefue babombi bobe palikusangua umo ali nakio, afue, ni fwefue bange bonse tukabe bazia benu.”
10Waalandile evi, “Kibe nga mumwalandila. Olia alikusangua nakio, alikuya wali muzia wane, ni mwe bange temuya mwali na kilubo.” 11Kupwako, penka papo bakoosiizia masaaka abo pansi, kubalua muntu wabamba kukakula lisaaka lyakue. 12Waabambiile kukeba mu lisaaka lyakua mukulu mpaka wapeleezia mu lisaaka lyakua mwanike. Kikombe kyaamonekele mu lisaaka lyakua Benyamina. 13Kupwako, bonse bazabula ngubo yabo, kubalua muntu wabiika lisaaka lyakue pa punda wakue ni kubwelela ku Misri.
14Yuda ni bakuluube baile mu nghanda yakua Yusufu, ni ye waali wakili penka palia. Bonse baaleele kyuba. 15Yusufu waabaanine evi, “Mwakitilangaki evi? Temumanine nangue muntu nga nene kuti nabuka ni kumana bintu byonse?”
16Yuda waamwasukile evi, “We mukulu, tulikukwanaki? Kabili tulikulandaki? Tulikukaana syani kibalo? Leza mwine i-amwene bubi bwa babombi bobe. Evi fwe bonse tuli bazia bobe pamo ni olia wakwatwanga watweme kikombe.”
17Yusufu waalandile evi, “Ata, nene nsivinda kukita evio! Nalanda evi, olia wenka wakwatwanga wali ni kikombe i muzia wane. Inzi mwemue bange ilepo bwino kuli sinue.”
Yuda wapaapaata palwakua Benyamina
18Yuda waamupaleeme ni kumwana nangue, “We mulopue, napaapaata nandepo keebo kamo ka kunvwika ku matui akua tawelenzi. Tekufiitilua mubombi obe pantu wewe uli nga Farao. 19We Tawelenzi, waatwipuziizie fwe babombi bobe nangue, ‘Kubako muli ni sinue ao mwalawenu?’ 20Fwefue twa-asukile evi, ‘Ee, tuli ni situe mukote ni mwana wa mu bukote bwakue, inzi mukuluube kwa ozo mwanike waafwile. Ozo mwana i asyelepo sie wakosele mu livumo lyabo, ni se amutonene.’ 21Wewe waatwanine fwe babombi bobe tumuleete umumone, 22Inzi fwefue twa-asukile nangue, ‘Mulumendo tavinda kumusia se, pantu kine wamusia, se kuti wafua.’ 23Wewe wa-anine babombi bobe nangue, ‘Kine temukeeza ni mwalawenu, tekuti tukamonane nenu.’
24“Lutwaabweleele kuli situe, twaamubwilile byonse bitwa-aninue na tawelenzi. 25Situe waalandile evi, ‘Kabili endo mwaye mutusitileko binge bilio.’ 26Fwefue twaalandile evi, ‘Tetuvinda kukookelako. Inzi kine tulikuya ni mwalawetu, tulikukookelako, pantu tetuvinda kuya kumonana na olia muntu kine tetuiile ni mwalawetu.’ 27Mubombi obe, tawe, waatwanine, ‘Mumanine nangue mukazi wane Rakeli wanvyaliile sie baana babili balalumenke. 28Umo nsikili nakue, kisinka waaputwilue sie tuniini tuniini, kabili nsyamumwene. 29Kine mwantwamina ni ozu, ni ye waya kukitikilua na kibiipile, kuti mwangipailila sie na bulanda bwa mu bukote bwane.’
30“Ni pakako kine naya kuli tawe, mubombi obe, tekuba nali na ozu mulumendo, pantu maswapi a bukose bwakua tawe ali mu ozu mwana, 31pa-akaba kumona nangue mulumendo tetuli nakue wakaba kufua. Ni babombi bobe baakeepaizia sibo mukote wali ni bulanda. 32Pantu mubombi obe waikitile kikwatizi kuli se walanda nangue, ‘Kine nsikaba kumubwezia kuli wewe, naakaba ni kilubo kya muyayaya kuli we tawe.’ 33Kansi evi ne mubombi obe nakulomba nsyale nali muzia kuli we tawelenzi pa kifuka kyakua ozu mulumendo, inzi ozu mulumendo asele aye pamo ni bakuluube. 34Ale ndikubwela syani kuli tawe tekuba namutweme ozu mulumendo? Nsitonene kuya kumona kyakaba kumukitikila tawe.”
Currently Selected:
Kutendeka 44: KBTP
Highlight
Share
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
