Kutendeka 43

Bakuluube kwa Yusufu baya ku Misri ni Benyamina

1Ozo musita, nzala yaakilile kubiipa mu kyalo. 2Lubaapwile bilio byonse bibaile kusita ku Misri, sibo waabaanine evi, “Endo mutusitileko binge bilio.”

3Yuda waamwanine evi, “Olia muntu waatwaanine nangue, ‘Kine temukeeza ni mwalawenu, tekuti tukamonane nenu.’ 4Kine ulikutupeela mwalawetu kuti tuye nakue, tulikukooka kuya ku kusitila bilio. 5Inzi kine wakaana kuti tuye nakue, fwefue tetukookelako pantu olia muntu waatwaanine nangue, ‘Kine temukeeza pamo ni mwalawenu, tekuti tukamonane nenu.’”

6Izraeli waalandile evi, “Mwandeetela bwavia bukata sana. Ale mwaamubwiliileki nangue muli ni unge mwalawenu?”

7Baamwasukile nangue, “Ozo muntu waatwipuziizie biipuzio bingi sana palua lupua lwetu nangue, ‘Sinue akikosele? Temuli na mwalawenu?’ Fwefue twaamwasukile kukonkana ni vikili, inzi tetwaali twamanine nangue kuti watwana tukeeze ni mwalawetu.”

8Yuda waamwanine se Izraeli, “N'mpeele mulumendo ngie nakue, ni fwe tulikuya, tetukafua na nzala, inzi twaakaba twakosele, fwefue ni wewe pamo ni baana betu. 9Nene naakaba kikwatizi kyakue. Kine nsikamubwezia wakosele, ukansonze, ni kilubo kyaakaba kyali kyane muyayaya. 10Pantu kabenge tekukokola, evi nga tetusyabweleleko ni lya bubili.”

11Sibo Izraeli waabaanine evi, “Kine ni evio, kite evi: Twame mazabo awamiisie a mu keno kyalo mu bitwamo byenu mumutwalile ozo muntu byabupe: Zeri iniini, ni kapelo kaniini, ni manukato, ni manemane, ni batani, pamo ni lozi. 12Mutwame nfolanga ya kuya kusitamo bilio ni ya kuya kubweziizia pa elia nfolanga i mwaiziliile nayo mu masaaka enu pantu pange baalabiliile kubiikamo. 13Mumutwame ni mwalawenu muye nakue kuli ozo muntu. 14Leza wa Maka onse akalengie ozo muntu kumyunvwila nkumbu, evi mukabwele ni Benyamina pamo ni mukuluube. Kine kufwilua na baana bonse, nkafwilue sie.”

15Kupwako, babo baana batwama byabupe ni Benyamina pamo ni nfolanga ya kusitamo bilio ni ya kuya kubwezia. Baabambile lwendo, bakookela ku Misri ni kuya kwimana pa ntanzi yakua Yusufu. 16Yusufu lu-aabamwene bali pamo ni Benyamina, waamwanine mubombi wakue nangue, “Bengizie mu nghanda yane, sinza nama uteanie pantu baba bantu lelo ndikulia nabo bilio bya musita wa koba.” 17Mubombi waabengiziizie mu nghanda mwa Yusufu nga mwa-aniinue.

18Bakuluube baatiinine pantu baingiziiziwe mu nghanda mwa Yusufu. Baalandile evi, “Twaingiziiwa mono pa mulandu wa nfolanga i twatwaaminiine mu masaaka etu lolia lutwaizile kusita bilio lwa mambo, evi atupeele mulandu ni kutupingula, apoke punda yetu ni kutwalula bazia bakue.” 19Baamupaleeme kalinda wa nghanda yakua Yusufu, babamba kulanda nakue pa mulyango nangue, 20“We mukulu, kisinka twaakookele kono lwa mambo kukusita bilio. 21Lutwaafikile pa nkendo ya kulaala, twaakakwile masaaka etu, kubalua muntu waamwene nfolanga yakue elia itwaasitilemo bilio yali mu lisaaka lyakue nga muyaali yabeeleele. Nfolanga ezi i twabwela nayo. 22Kabili twaiza ni inge nfolanga ya kusitilako binge bilio. Fwefue tetumanine muntu waabiikile nfolanga yetu mu masaaka etu.”

23Mubombi waalandile evi, “Mutende ube nenu, tekutiine. Leza wenu, Leza wakua sinue i waamipeele nfolanga mu masaaka enu. Pantu nene mwan'mpeele yakumeene.” Kupwako, wabaleetela Simeoni.

24Mubombi waabengiziizie mu nghanda yakua Yusufu, wabapeela menda a kusamba ku makasa, kabili waya kuliisia ni punda yabo. 25Baateaniizie byabupe bya kupeela Yusufu, pantu waabaanine kwiza kulia nabo musita wa koba. 26Yusufu lu-aizile kwakue, baamupeele byabupe bibaizile nabio mu nghanda ni kumukontamina. 27Waabeepuziizie wabaana nangue, “Ale sinue mukote umwaalandile palwakua wene, ali sie bwino? Ni lenu kumo akikosele?”

28Baamwasukile nangue, “Mubombi obe, situe, ali sie bwino, ni lenu kumo akikosele.” Kabili baafukeeme ni kumukontamina.

29Lu-aamumwene mwalawakue Benyamina, mwana mwina nghina, waalandile evi, “Ati, ozu i mwalawenu umwan'mbwilile? Waalandile evi, ‘We mwana wane, Leza akunvwile nkumbu.’” 30Kupwako, Yusufu wafumapo pantu waali wasyakeba kulila na nsansa ya kumona mwalawakue. Waingiile mu nghanda ku kati ni kubamba kulila. 31Pa kyamba, waasambile ku menso, wafuma waisipikiizie ni kubaana bateanie bilio. 32Yusufu waateaniiziiziwe pa bunke, ni bakuluube pa bunke, Bamisri baali balia koko ni bo pa bunke pantu kyaali kya busoni Bamisri kuliila pamo ni Baebrania. 33Balupua bakua Yusufu baikeele pa ntanzi yakue bakonkeene, libeli pa nsambu yakue ya bubeli, ni mukala pa nsambu yakue ya bumukala. Ni bo, baali basyaipapa sie. 34Waabapeele bilio byaali byafuma pa ntanzi yakue. Benyamina waatuulikiiluepo lisaano kukila bakuluube. Baaminine ni kuwaminua pamo nakue.

Currently Selected:

Kutendeka 43: KBTP

Highlight

Copy