Kufuma 40
40
Kwimika Tabernakulo
1Kabili Yawe waamwanine Musa nangue, 2“Pa busiku bwa mambo bwa mwezi wa mambo, ukeemike Tabernakulo, liema lya kusaakaaninamo. 3Ukabiikemo Lisanduku lya Kipingo, mane ukakobeke ni kipempe kya kukingilila lisanduku. 4Ukengiziemo meza ni kubiikapo bintu bya pa meza, kabili ukengizie kinara mukati ni kubiikapo matala akue. 5Ukeemike kitale kya oro kya kufunkiiziapo bubaani ntanzi ya Lisanduku lya Kipingo ni kubiika kipempe kya pa mulyango wa Tabernakulo. 6Ukabiike kitale kya kuziziiziapo ngelelo pa ntanzi ya nghingililo ya Tabernakulo, liema lya kusaakaaninamo. 7Kabili ukabiike musambilo pa bukata bwa Tabernakulo ni kitale ni kubiikamo menda. 8Ukeemike luuba luzyungulukile musolo ni kukobeka kipempe pa mulyango.
9“Ukabuule mafuta azuuke, ukasube ku Tabernakulo pamo ni ku bintu byonse bilimo. Ni byo byaakaba bizuuke. 10Kabili ukasube mafuta ku kitale kya kuziziiziapo ngelelo ni kuizuukia pamo ni bibombelo byakue byonse. Ni yo yaakaba yazuukiisie. 11Ukasube mafuta ku musambilo ni ku kya kuteekapo, ni byo ukabizuukie.
12“Ukamuleete Haruni ni baana bakue balalume pa mulyango wa liema lya kusaakaaninamo, ni kubasamba na menda. 13Kabili ukamuvwike Haruni bivwalo bizuuke, ukamusube mafuta ni kumuzuukia, evi akan'mombele mu mwilo wa bukitambua. 14Ni baana balalume bena Haruni ukabaleete ni kubavwika makanzu, 15kabili ukabasube mafuta nga viwakasuba sibo pakuti bakabe ban'mombela mwilo wa bukitambua. Bobu busubo bwa mafuta bwaakabaalula kuba babitambua ba muyayaya mu nvyalo yabo yonse.”
16Musa waafikiliziizie byonse mwa-aniinue na Yawe. Evi i vi-aakitile. 17Pa busiku bwa mambo bwa mwezi wa mambo mu mwaka wa bubili pa kyamba kya kufuma ku Misri, Tabernakulo yaimikilue. 18Musa lu-aimikile Tabernakulo, waabiikile bya kwimikuamo, kusyali waimikamo mbao ni kwalapo mbango, ni kwimika mapumpu. 19Kabili waakobekele maema ku Tabernakulo ni kubiika nkupo ya liema peulu nga mwa-aniinue Musa na Yawe. 20Pa kyamba, waabuulile bibazu bya mabue bya busininkizio ni kubibiika mu lisanduku. Kusyali kubiika mipingo ku Lisanduku lya Kipingo, ni kutupikilapo ntupiko. 21Kabili waingiziizie Lisanduku lya Kipingo mu Tabernakulo, ni kukobeka kipempe kya kukingilila Lisanduku lya Kipingo nga mwa-aniinue Musa na Yawe.
22Musa waingiziizie meza mu Tabernakulo, waibiika lya ku nkungua ntanzi ya kipempe 23ni kubiikapo mikate ya kilangililo ntanzi yakua Yawe, nga mwa-aniinue na Yawe. 24Waabiikile kinara mu Tabernakulo lya ku nkungulua kyakenteene ni meza, 25ni kulemia matala ntanzi yakua Yawe nga mwa-aniinue na Yawe. 26Waabiikile kitale kya oro kya kufunkiiziapo mu Tabernakulo ntanzi ya kipempe 27ni kufunkiiziapo bubaani bwa manukato a bunu buweme nga mwa-aniinue na Yawe. 28Waakobekele kipempe kya pa nghingililo ya Tabernakulo. 29Pa kyamba, waabiikile kipempe pa nghingililo ya liema, wabiika kitale kya kuziziiziapo ngelelo pepi ni pa nghingililo ya Tabernakulo. Kusyali waziziiziapo ngelelo ya nama ni ngelelo ya bunga nga mwa-aniinue na Yawe. 30Musa waabiikile musambilo pa bukata bwa Tabernakulo ni kitale kya kwelelapo ngelelo ya kuzizia, kusyali wabiika menda mu musabilo kuti babitambua baye basambamo. 31Musa, ni Haruni pamo ni baana bakue, i mu baali baisambila ku minue ni ku makasa. 32Baali baisamba musita ubaali baingila mu liema lya kusaakaaninamo, ni musita ubaali bapalamina ku kitale nga mwa-aniinue Musa na Yawe. 33Kabili Musa waimikile luuba lwa musolo luzyungulukiile Tabernakulo ni kitale, kusyali wakobeka kipempe kya pa nghingililo ya musolo. Musa i vi-aapwile miilo.
Lilezi lya bulumba lyaikala peulu Tabernakulo
(Mpendua 9.15-23)
34 #
1 Mak 8.10-11; Isa 6.4; Eze 43.4-5; Nfy 15.8 Kupwako, lilezi lyakupa kale Tabernakulo, ni bulumba bwakua Yawe bwaizulamo. 35Ni pakako, Musa wa-andilue kwingila mu Tabernakulo pantu yaali yakupiliilue na lilezi, ni bulumba bwakua Yawe bwaali bwaizwile mu Tabernakulo. 36Lyonse Baizraeli mu lwendo lwabo, baali bateluluka sie kine lilezi lyalendulua kufuma pa Tabernakulo. 37Inzi kine lilezi telinalendulue tebaali baya, baali bapempa sie mpaka busiku bulyaakalendulua. 38Mu lwendo lwabo lonse baali bamona lilezi lyakua Yawe peulu Tabernakulo musita wa koba, ni musita wa busiku baali bamona mulilo waleemene peulu Tabernakulo.
Currently Selected:
Kufuma 40: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
