Kufuma 39
39
Kukitua kwa bivwalo bya bakitambua
(Kufuma 28.1-14)
1Bivwalo bya kuvwala pa kubomba mu kifuka kizuuke byaakitilue na nyunzi ya mukumino wa lyulu, ni ya mukumino wa bulumbi pamo ni ya mukumino wa kasi. Bebi bivwalo byaali byasukilue bwino. Kabili baakitile ni bivwalo bizuuke byakua Haruni nga mwa-aniinue Musa na Yawe.
2Besaleli ni bakwasi bakue baakitile efodi ya nyunzi ya mukumino wa oro, ni ya mukumino wa lyulu, ni ya mukumino wa bulumbi, ni ya mukumino wa kasi pamo ni kitani kiweme kipyatilue. 3Baatilile oro mpaka yasyala kamutika kakeepeesie, kusyali kuteeta kuba nyunzi evi isukililue pamo ni nyunzi ya mukumino wa lyulu, ni ya mukumino wa bulumbi, ni ya mukumino wa kasi, ni ya kitani kiweme. Yaakitilue na muntu amanine ozo mwilo. 4Baamukitiile mikobelo ibili ya kupisia pa nkombe kuti iye yalundaniizie kya ku ntanzi ni kya ku musana. 5Ni musipi waali wasukilue bwino na bintu bikitiilueko efodi kuti uye wali kimo nakio, ni o waakitilue na nyunzi ya mukumino wa oro, ni ya mukumino wa lyulu, ni ya mukumino wa bulumbi, ni ya mukumino wa kasi pamo ni ya kitani kiweme kipyatilue kukonkana ni mwa-aniinue Musa na Yawe. 6Baakitile mabue abili a oniksi ni ku-abiika mu tukwatililo twa oro. Azo mabue aali alembeluepo meena a bena Izraeli nga evelia vilivyalembua kamanino. 7Baabililiile azo mabue peulu mikobelo ipitile pa nkombe yafumine ku efodi pakuti aye aimaniineko mikowa lyanondo ni ibili ya Baizraeli nga mwa-aniinue Musa na Yawe.
Mufuko wa pa nkulo
(Kufuma 28.15-30)
8Besaleli ni bakwasi bakue baakitile mufuko wa pa nkulo na bintu bibaakitiileko efodi: Na nyunzi ya mukumino wa oro, ni ya mukumino wa lyulu, ni ya mukumino wa bulumbi, ni ya mukumino wa kasi, pamo ni kitani kiweme kipyatilue nga vyaakitilue efodi. Ozo mwilo waakitilue na bantu bamaniisie. 9Ozo mufuko waali wapimpiluemo limo walingheene monse monse. Mu kuleepa ni mu bukata waali wali na santimetre 25. 10Ku ozo mufuko baabiikileko milongo ina ya mabue a mutengo ukata. Mu mulongo wa mambo baabiikilemo libue lya akiki, ni libue lya topazi pamo ni libue lya emerodi. 11Mulongo wa bubili baabiikilemo libue lya zumaridi, ni libue lya yakuti lya mukumino wa lyulu, ni libue lya almasi. 12Mulongo wa butatu baabiikilemo libue lya yakinto, ni libue lya agata ni libue lya ametisti. 13Ni mulongo wa buna baabiikilemo libue lya berile, ni lya oniksi, ni lya yaspi. Azo mabue onse aali akwatiliilue na tukwatililo twa oro. 14Azo mabue aali ali lyanondo ni abili. Kubalua libue paalembelue liina limo lya pa meena a bena Izraeli. Kubalua libue limo paalembelue liina limo liimaniineko mukowa umo wa pa mikowa lyanondo ni ibili ya Baizraeli. 15Ku ozo mufuko wa pa nkulo baakitiileko mikufu ya oro isambikile yaali yali nga nkamba ipyatilue. 16Baakitile tukwatililo twa oro tubili ni tuzele tubili twa oro, ni kutubiika ku tufuli tubili twa ozo mufuko wa pa nkulo. 17Baakobekele ezio mikufu ibili ya oro mu tuzele tubili tuli ku tufuli twa mufuko wa pa nkulo. 18Mpeleezio inge ibili ya ezio mikufu baakobekele ku tukobo tubili twa oro ni ku-ilundania ku elia mikobelo ya pa nkombe ya ku efodi lya pa ntanzi. 19Kabili waakitile tuzele tubili twa oro ni kutubiika ku tufuli tubili twa ku mufuko wa pa nkulo kwinsina lya mukati pepi ni efodi. 20Kabili waakitile ni tunge tuzele tubili twa oro ni kutukobeka lya kwinsina mikobelo ya pa nkombe lya ku ntanzi ya efodi pepi ni kilundilo peulu musipi usukilue. 21Baalundaniizie tuzele twa ku mufuko wa pa nkulo ku tuzele twa ku efodi na mikobelo ya nyunzi ya mukumino wa lyulu, evi mufuko wikale lya peulu musipi wa efodi usukilue bwino, ni ozo mufuko wa pa nkulo tekuti uye walekenkana na efodi nga mwa-aniinue Musa na Yawe.
Kukitua kwa bivwalo binge bya bukitambua
(Kufuma 28.31-43)
22Besaleli ni bakwasi bakue baakitile kazula ka kuvwalilapo efodi ka mukumino wa lyulu. 23Kazula kaali ni lipulo pa bukata lya kupuziamo mutue, kabili kaali kasukilue bwino mumbali lipulo, evi tekuti kakazabuke. 24-26Kwinsina kazula kwaali kwafukilue, kabili baabiikileko komamanga isukilueko nyunzi ya mukumino wa lyulu, ni wa bulumbi, ni wa kasi, ni kitani kiweme kipyatilue. Ni bo baakitile ndibu ya oro isambikile ni ku-ibiika kwinsina kazula yatolokele komamanga imo imo. Evi ivibaabiikile ndibu ni komamnga yazyungulukile kwinsina kazula konse, kuti kaye kavwalua musita wa kubomba mukati nga mwa-aniinue Musa na Yawe.
27Baakitile makanzu a kitani kiweme, akuvwalua na Haruni ni baana bakue balalume, 28ni kitambala kya kitani kiweme ni kisote kya kitani kiweme ni kaputula ka ngubo ya kitani kiweme kipyatilue, 29ni musipi wa kitani kiweme kipyatilue, na nyunzi ya mukumino wa lyulu, ni ya mukumino wa bulumbi, pamo ni ya mukumino wa kasi. Byaakitilue na bantu bamanine ozo mwilo, nga mwa-aniinue Musa na Yawe. 30Baakitile kalilata kazuuke ka oro isambikile ni kulembapo nangue, “Muzuuke wakua Yawe.” Baalembele nga vilivyalembua kamanino. 31Baakakakile na mikobelo ya mukumino wa lyulu kuti kaye kali peulu kitambala lya pa mpala nga mwa-aniinue Musa na Yawe.
Mpwilililo ya miilo
(Kufuma 35.10-19)
32Evi i vyaapwile miilo yonse ya Tabernakulo, liema lya kusaakaaninamo. Baizraeli baakitile byonse nga mwa-aniinue Musa na Yawe. 33Baamuleeteele Musa bibombelo bya liema, liema ni bibombelo byakue byonse: Bikobo byakue, ni mbao yakue, ni mbango yakue, ni mapumpu akue, ni bya kwimikuamo byakue, 34ni nkupo ya mpapa ya mpanga isubilueko mukumino wa kasi, ni nkupo ya mpapa ya kipomo, ni kipempe kya kukingako, 35ni Lisanduku lya Kipingo, ni mipingo yakue, ni ntupiko, 36ni meza pamo ni bibombelo byakue byonse, ni mikate ya kilangililo, 37ni kinara kya oro isambikile pamo ni matala akue, ni bibombelo byakue byonse pamo ni mafuta a mu matala, 38ni kitale kya oro, ni mafuta azuuke, ni bubaani bwa bunu buweme, ni kipempe kya pa mulyango wa liema, 39ni kitale kya mukuba ni kasaaso ka mukuba, ni mipingo yakue pamo ni bibombelo byakue byonse, ni musambilo pamo ni kya kuteekapo. 40Luuba lwa kipempe lwa musolo, mapumpu akue ni bya kwimikuamo byakue, ni kipempe kya pa mulyango wa musolo, ni nkamba yakue, ni bikili byakue, pamo ni bibombelo byonse bya kubombiiwa mu mwilo wa mu Tabernakulo, mu liema lya kusaakaaninamo, 41ni bivwalo bya mwilo uweme bya kubomba nabyo pa kifuka kizuuke, bivwalo bizuuke byakua kitambua Haruni, pamo ni bivwalo bya baana bakue bya kubomba nabyo mu mwilo wa bukitambua. 42Baizraeli baakitile miilo yonse nga mwa-aniinue Musa na Yawe. 43Musa lu-aamwene nangue miilo yonse yapua nga mwa-aniinue na Yawe, waabapaalile.
Currently Selected:
Kufuma 39: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
