Kufuma 27
27
Kitale
(Kufuma 38.1-7)
1“Bakakite kitale kya mbao ya kimuti kya kasiiya. Kitale kikabe kyaleepele metre ibili ni kitika, ni mu bukata kikabe kyali metre ibili ni kitika. Kekio kitale peulu kikabe kyalingheene monse monse, kabili kikabe kyatuulukile metre imo ni kitika. 2Mu tufuli tuna bakabiikemo mbao ituulukile nga masengo, mbao yakuti ikabe yalundanizie kitale. Kekio kitale kikabe kyakupilueko mukuba. 3Bakakite bya kuzoolelapo mito, ni bipawa, ni bibakuli, ni bikobo, ni bya kubiikapo mulilo. Bebi bibombelo byonse bya ku kitale bikabe byali bya mukuba. 4Bakakite kasaaso ka mukuba ka ku kitale ni kubiika bikobo bina bya mukuba ku tufuli tuna twa kasaaso. 5Bakabiike kako kasaaso mukati kitale, kwinsina lubao luzyungulukiile kitale, evi kako kasaaso kakabe kafikile pa bukata mu kutuuluka. 6Bakakite mipingo ya kimuti kya kasiiya, mipingo ya kupingilako kitale. Bakakupeko mukuba ku ezio mipingo. 7Ezio mipingo yaakengiziiwa mu bikobo evi ikabe yali mumbali ibili ya kitale musita wa kukipinga. 8Kekio kitale kikakitue kyazikukile mukati. Ukabaane bakakite nga viwakilangisiiwa ku lupili.
Musolo wa Tabernakulo
(Kufuma 38.9-20)
9“Kabili bakakite musolo wa Tabernakulo. Ku lubali lwa ku nkungulua bakakite luuba lwa kipempe kya kitani kiweme kipyatilue. Kekio kipempe kikabe kyaleepele metre 50 bwala bumo. 10Bakakite mapumpu 20 ni bintu bya kwimikuamo 20 bya mukuba, bikobo bya ku mapumpu ni mikobelo yakue bikabe bya mutofue. 11Ku lubali lwa ku nkungua ni ko bakakiteko evio vyenka. Kukabe kipempe kya kitani kileepele metre 50, ni mapumpu akue 20, ni bintu bya kwimikuamo 20 bya mukuba. Bikobo bya ku mapumpu ni mikobelo yakue bikabe bya mutofue. 12Lya ku mboosi kukabe luuba lwa kipempe kileepele metre 25, kukabe mapumpu lyanondo ni bya kwimikuamo lyanondo. 13Bukata bwa musolo lya ku kabanga kukabe metre 25 mu bukata. 14-15Ni luuba lwa kipempe ku lubali lumo lwa mulyango lukabe lwaleepele metre kilooba ni kitika, mapumpu akue atatu, ni bya kwimikuamo bitatu. Ni ku bunge bwala kukabe luuba lwa kipempe luleepele metre kilooba ni kitika, mapumpu akue atatu, ni bya kwimikuamo bitatu. 16Ku mulyango wa musolo kukabe luuba lwa kipempe kileepele metre lyanondo, kya mukumino wa lyulu, ni wa bulumbi, ni wa kasi pamo ni kitani kiweme kipyatilue. Ezio miilo ikabombue na bantu bamaniisie. Kekio kipempe kikabe kyakwatiliilue na mapumpu ana ni bya kwimikuamo bina. 17Mapumpu onse a musolo mumbali monse akabe ni mikobelo ya mutofue, bikobo byonse ni byo bikabe bya mutofue, ni bya kwimikuamo bikabe byali bya mukuba. 18Ozo musolo ukabe waleepele metre 50, ni mu bukata ukabe watanine metre 25 kubalua lubali. Luuba lwa musolo lukabe lwaatuulukile metre ibili ni kitika. Lukabe lwali lwa kitani kiweme kipyatilue, ni bya kwimikuamo bikabe bya mukuba. 19Bibombelo byonse bya kubombiiwa ku Tabernakulo mu miilo ilekenkeene, pamo ni bikili byonse bya ku Tabernakulo ni ku luuba lwa musolo, bikabe bya mukuba.
Kulabukila matala
(Balawi 24.1-4)
20“Ukabaane Baizraeli bakabe bakuleetela mafuta aweme a mizeituni pa mulandu wa kisue, evi matala akabe aleemene musita onse. 21Azo matala ali mu Tabernakulo kunze ya kipempe kili ku ntanzi ya Lisanduku lya Kipingo, Haruni ni baana bakue balalume i baakaba ba-awamia evi akabe aleemene ntanzi yane kutula kyungulo mpaka lukeelekeele. Leli i lifunde lya muyayaya ku nvyalo ya ku ntanzi.
Currently Selected:
Kufuma 27: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
