Kufuma 26
26
Kukuula Tabernakulo
(Kufuma 36.8-38)
1“Bakakite Tabernakulo yakua Leza na bipempe lyanondo bya kitani kiweme kipyatilue bwino na nyunzi ya mukumino wa lyulu, ni ya mukumino wa bulumbi pamo ni ya mukumino wa kasi. Balia bamanine kulenga bakalengemo makerubi. 2Kubalua kipempe kikabe kyaleepele metre lyanondo ni ina, ni mu bukata kyatanine metre ibili. Bipempe byonse bikabe byalingheene. 3Bipempe bisaano bakabilundanie kuti kikabe kimo, ni binge bisaano kubilundania kuti kikabe kimo. 4Bakakite mikobelo ya ngubo ya mukumino wa lyulu ku mpeleezio ibili ya kipempe kimo, ni ku kinge kipempe bakakite evio vyenka. 5Bakakite mikobelo 50 ku kipempe kimo, ni inge mikobelo 50 ku kipempe kinge. Ezio mikobelo ikabe yakenteene. 6Bakabiike bikobo 50 bya oro bya kulundania kumo bipempe bibili pakuti Tabernakulo ikabe kintu kimo.
7“Bakakite bipempe lyanondo ni kimo bya masako a mbuzi ni kubivimba peulu Tabernakulo. 8Kubalua kipempe kikabe kyaleepele metre lyanondo ni isaano, ni mu bukata metre ibili. Bebio bipempe lyanondo ni kimo bikabe byalingheene. 9Bipempe bisaano bakabilundanie kumo, ni binge mutanda ni byo kumo. Kelia kipempe kya mutanda bakakipete lya ku ntanzi pakuti Tabernakulo ikabe kintu kimo. 10Bakakite mikobelo 50 lya ku mpeleezio ya kipempe kimo, ni inge mikobelo 50 lya ku mpeleezio ya kipempe kinge. 11Kabili bakakite bikobo 50 bya mukuba ni kwingiziamo mikobelo pakuti bipempe bikabe byalundeene, evi Tabernakulo ikabe kintu kimo. 12Ni kelia kiputu kya kipempe kyaakapulamo, ukakikupe ku kyamba kya Tabernakulo. 13Kiputu kya kipempe kyaakasyalako mu kuleepa, kelia kyaakaba kyali santimetre 50 ku bwala bumo, ni ku bunge bwala santimetre 50, i kyaakaba kyakupiliile Tabernakulo.
14“Bakakite mpapa ya mpanga isubilueko mukumino wa kasi ya kuvimba peulu Tabernakulo, kabili bakakite ni inge mpapa ya bipomo ni yo bakavimbe peulu mpapa ya mpanga.
15“Bakeemike kipuupa kya Tabernakulo na mbao ya kasiiya. 16Kubalua lubao lukabe lwaleepele metre isaano, kabili lukabe lwatanine santimetre 75. 17Kubalua lubao lukabe lwali na matui abili kwinsina, matui a kukwatania mulongo wa mbao. Evi i vyakuti bakakite mbao yonse ya ku Tabernakulo. 18Bakakite mbao 20 lya ku nkungulua ya Tabernakulo, 19ni kukita bintu 40 bya mutofue bya kwimikuamo mbao 20. Mu bintu bibili mukabe mwaimikua matui abili a lubao lumo, ni mu binge bibili ni mo evio vyenka. 20Ni ku bunge bwala bwa Tabernakulo, lya ku nkungua ni ko kukabe mbao 20, 21ni bintu 40 bya mutofue bya kwimikuamo. Bya kwimikuamo bibili ni byo mukengiziiwe matui abili a lubao lumo. 22Kumusana wa Tabernakulo, lya ku mboosi bakeemikeko mbao mutanda, 23ni mbao ibili ikeemikue mu tufuli twa Tabernakulo ku kyamba. 24Ezio mbao ibili ya mutufuli ipalile ikeemikue yakuminkeene kutula pansi, ni pa muulu ikakuminkaniiwe na kikobo, bakakite evio mu tufuli tonse tubili. 25Ni pakako, yaakaba yali mbao mwanda, ni bintu bya mutofue bya kwimikuamo byakaba byali lyanondo ni mutanda. Bya kwimikuamo bibili bikabe byaingiziwamo matui abili a lubao lumo, ni binge evio vyenka.
26“Bakakite mbango ya kimuti kya kasiiya, mbango isaano pa mbao ili ku lubali lumo lwa Tabernakulo, 27ni inge isaano pa mbao ili ku bunge bwala bwa Tabernakulo, kabili inge isaano pa mbao ili ku kyamba kya Tabernakulo ku mboosi. 28Lubango lwa pa bukata bwa mbao lwene lukabe lwapulilemo koku ni koku. 29Ezio mbao bakakupeko oro, kabili bakakite ni bikobo bya oro bya kukwatizia mbango, ni ezio mbango bakakupeko oro. 30Bakeemike Tabernakulo nga viwakilangisiiwa ku lupili.
31“Kabili bakakite kipempe kya nyunzi ya mukumino wa lyulu, ni wa bulumbi pamo ni wa kasi, pamo ni ngubo ya kitani kiweme kya nyunzi ipyatilue, ni kukifwanizia na kubilamo nkebu ya makerubi. Ezio miilo ikabombue na bantu bamaniisie. 32Bakakobeke kipempe ku mapumpu ana a kimuti kya kasiiya akupilueko oro. Bikobo byakue bikabe byali bya oro pa bintu bina bya mutofue bya kwimikuamo. 33#Bae 6.19; 9.3-5Bakakobeke kipempe ku bikobo evi Lisanduku lya Kipingo likabe ku kyamba kya kipempe, pantu kipempe i kyakaba kyalekenkaniizie Kifuka Kizuukiisie. 34Bakabiike ntupiko peulu Lisanduku lya Kipingo mu kifuka kizuukiisie. 35Kunze ya kipempe kikingiliile Kifuka Kizuukiisie bakabiikeko meza lya ku nkungua ya Tabernakulo, kusyali kubiika kinara lya ku nkungulua kyakenteene ni meza.
36“Bakakite kipempe kya pa mulyango wa Tabernakulo, kipempe kya nyunzi ya mukumino wa lyulu, ni ya mukumino wa bulumbi, ni ya mukumino wa kasi pamo ni kitani kiweme kipyatilue. Ikabe yaali miilo ya muntu amaniisie kubila. 37Bakakite mapumpu asaano a kimuti kya kasiiya ni kukupako oro, koko i kuwaakakobeka kipempe na bikobo bya oro. Bakasungulule ni bya kwimikuamo bisaano bya mukuba pa mulandu wa mapumpu.
Currently Selected:
Kufuma 26: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
