Kufuma 14
14
Kwabuka Lyezi lya Kasi
1Yawe i lu-aamwanine Musa nangue, 2“Baane Baizraeli babwele baye bakuule mitanda ku ntanzi ya Pi-Hahiroti, pa bukata bwa Migidoli ni lyezi, pepi ni Bali-Sefoni mumbali lyezi. 3Farao wakaba kulangakana nangue Baizraeli bakilinghaniwa na kaseeba, ni kwandua kufuma mu kyalo. 4Nene nakaba kufinia paakale mutima wakua Farao, ni ye wakaba kumikonka. Inzi nakaba kuipeela mukinzi na kuuma Farao ni libumba lyakue lyonse. Ni Bamisri bonse baakeenika nangue nene ndi Yawe.” Ni pakako, Baizraeli baakuulile mitanda ni kutuuzia nga muba-aniinue.
5Farao lu-aabwililue nangue Baizraeli babutuka, wene pamo ni babombi bakue ba-alulwile malanga abo bai-ipuzia nangue, “Ati emue! Twakitapoki pa kulekelela Baizraeli baye tekuti batubombele?” 6Ni pakako, Farao waateaniiziiziwe tyakala yakue ya bului ni kuya pamo ni balukale bakue. 7Waatweme matyakala 600 awamiisie mu Misri. Kubalua tyakala mwaali mwali mukulu ni balukale besapiile. 8Yawe waafiniizie mutima wakua Farao likolo wa ku Misri. Ni pakako Farao waile wabakonkele Baizraeli baali baya bapamine. 9Bamisri ni bafarasi babo bonse pamo ni matyakala onse akua Farao, ni baseli ba pa farasi pamo ni balukale, baile babakonkele pa kyamba mpaka baya kubasanga ku mitanda lya kumbali lyezi ku ntanzi ya Pi-Hahiroti pepi ni Bali-Sefoni.
10Baizraeli lubaikebukile ni kumona Farao walimukwiza wabakonkele pamo ni balukale bakue, baunvwile mwezo ukata. Kupwako, batendeka kumulilila Yawe. 11Baamwanine Musa nangue, “Ewe, ni pa mulandu wa kubulua bilibu mu Misri i kiwakitufumiiziamo evi twize tufwile mu kaseeba? Ni kiki kyakikulengia utufumie mu Misri? 12Lolia lutwakiba twakili mu Misri tetwakikwana nangue tuleke fwe bene tubombele Bamisri? Pantu kuti kyawama kubombela Bamisri kukila kufwila mu kaseeba.”
13Inzi Musa waabaanine nangue, “Tekutiine! Sipe sie, ni mwe mulikumona Yawe vi-alikumipususia bono bukiile, pantu baba Bamisri bamumwene lelo temukikabamona kabili. 14Teekamane sie Yawe mwine alikumilwila.”
15Yawe i lu-aamwanine Musa nangue, “Ulimukundililaki? Baane Baizraeli baye baya. 16Ni we lendula kabango kobe, uolwele kuboko kobe pa lyezi ni kulikasania, evi Baizraeli bapite mu lyezi pa musili uume. 17Nene ndikufinia mitima ya Bamisri, ni bo balikwiza bamikonkele. Nene ndikuipeela mukinzi na kuuma Farao ni libumba lyakue lyonse, ni matyakala akue pamo ni baseli bakue ba pa farasi. 18Bamisri bonse balikwinika nangue nene ndi Yawe musita undikuipeela mukinzi na kuuma Farao ni matyakala akue pamo ni baseli bakue ba pa farasi.”
19Ni pakako, malaika wakua Leza waali watangiliile libumba lya Baizraeli, waabweleele ku kyamba kyabo, ni lilezi lyaali lyali nga lipumpu lyaafumine ku ntanzi ni kuya kwimana ku kyamba kyabo. 20Lilezi lyaile kwimana pa bukata bwa libumba lya Bamisri ni Baizraeli. Lelio lilezi lyaaleetele nfinzi ku lubali lwa Bamisri, ni kuleeta kisue ku lubali lwa Baizraeli. Ni pakako, tekwaali libumba lyaapalamiine liinakue.
21Kabili Musa waolwele kuboko kwakue pa lyezi, ni Yawe waatintile lyezi na mwela wa maka kufuma ku kabanga busiku bonse. Menda aakasanikile, ni palia paali menda paumine. 22#1 Bak 10.1-2; Bae 11.29Baizraeli baile mu lyezi pa musili uume. Menda aimeene nga kibumba kuso ni kulio pa mulandu wabo. 23Bamisri baakonkelemo, baingila mu lyezi ni farasi yonse yakua Farao, ni matyakala akue onse, pamo ni baseli bakue ba pa farasi. 24Inzi lubwaali bwasyakia, Yawe mu lipumpu lya mulilo ni lya lilezi, waakentele pansi pa libumba lya Bamisri ni kubavulunghania. 25Waafumiizie mipeto ku matyakala abo mpaka a-andua ni kwenda. Ni Bamisri baalandile evi, “Emwe, tumubutuke Izraeli, pantu Yawe alimukubalwila.”
26Baizraeli bonse lubaafikile ku bunge bwala, Yawe waamwanine Musa nangue, “Ale olwela kuboko kobe paakale pa lyezi, evi menda abwele ni kubakupa Bamisri pamo ni matyakala abo, ni baseli ba farasi yabo.” 27Ni kiine musita wa lukeelekeele paakili, Musa waolweleele kuboko kwakue pa lyezi, lyezi lyaabwelele na maka. Bamisri baeziizie kubutuka, inzi Yawe waabakupiliile mu lyezi. 28Menda i lu-abwelele ni kukupilila matyakala a bului, ni baseli ba pa farasi pamo ni libumba lyonse lyakua Farao lyaali lyakonkele Baizraeli mu lyezi. Pakati kabo tepaali muntu waapusukile. 29Inzi Baizraeli bene baile baenda mu lyezi pa musili uume, ni azo menda aali ali kibumba ku kuboko kwabo kwa kulio ni kwa kuso.
30Evi Yawe i vi-aapususiizie Baizraeli bobo busiku mu maboko a Bamisri. Baizraeli baamwene Bamisri bafwile mumbali lyezi. 31Baizraeli lubaamwene maka akata akua Yawe pa Bamisri, baamukindikile Yawe. Baamuketekeele Yawe pamo ni Musa mubombi wakue.
Currently Selected:
Kufuma 14: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
