Psalms 37
37
PSALM XXXVII.
Nae need till flee the lan’, nor nae fore o’ wrang-doen: the rightous sal ay fa’ their ain, an’ wrang-doers sal be sned aff for evir; bot a’ that lippen till the Lord sal thrive.
Ane o’ David’s.
1Fash yersel nane for ill-doers, nor sigh for the warkers o’ wrang:#Ps 73:3; Prov 23:17; 24:1, 19
2For like gerss they ’ll be glegly snedden; an’ like fother-blume they sal gang.
3Lippen the Lord an’ do weel; bide ay on the lan’, an’ thrive at will.
4Be blythe i’ the Lord, an’ yer heart’s content he sal wair on thee:
5Deval on the Lord yer gate;#Ps 55:22; Prov 16:3; Mat 6:25; Luke 12:22; 1 Peter 5:7 lippen him, an’ do a’ sal he:
6For yer right he sal clear like the light;#Job 11:17 an’ like height o’ the day, yer plea.
7Be lown wi’ the Lord, #Ps 62:1 an’ thole for him:#Lam 3:26 fash nane for ill-doers’ thrivan-gate; for the loon that can wark mischieffs.
8Awa wi’ angir, an’ quat frae lowe; fash yersel nane wi’ the wrang.#Ps 73:3; Eph 4:26
9For warkers o’ wrang sal be clean sned-awa;#Job 27:13, 14 bot wha wait on the Lord, themlane the lan’ sal fa’.
10For syne, but a gliff, an’ the ill-doer ’s dune: tho’ ye leuk for his place, thar’s nae mair o’ him. #Job 7:10; 20:9 Ver. 35
11Bot lown-livin folk sal ay haud the lan’;#Mat 5:5 an’ be blythe wi’ nae en’ o’ gude-nieboran!
12The ill-man, he thinks on the rightous for ill; an’ grushes again him his teeth:#Ps 35:16
13 Bot the Laird#37:13 Anither word nor Jehovah. Ps 2:4 o’ the lan’ sal laugh at him, for he kens his ain day sal be niest.#Ps 2:4
14The warkers o’ wrang, they lows’d the swurd, an’ eke they stentit their bow; the feckless an’ needy, till ding them baith, an’ till fell the aefauld sae free.#37:14 Heb. even on, straught ganger.
15Their swurd sal gang ben i’ their ain heart then, an’ their bows till flinders sal flie.#Micah 5:6
16Ay better ’s a nirl wi’ the right, nor the rowth o’ mae warkers o’ wrang:#1 Tim 6:6
17For the arms o’ wrang-doers sal breinge in bits;#Job 38:15; Ps 10:15; Ezek 30:21 & c. bot the rightous the Lord sal mak strang.
18The Lord kens weel the days o’ the leal; an’ their heirskip sal stan’ for evir:
19They sal ne’er be down-cuisten in time o’ ill; an’ in days o’ hungir sal stegh their fill:#Job 5:20; Ps 33:19
20Bot the warkers o’ wrang till naething sal gang; an’ faes o’ the Lord, like the creesh o’ lams, sal thowe i’ the reek#Ps 102:3 thegither!#37:20 Heb. they sal thowe i’ the reek, they sal thowe; or, they sal thowe i’ the reek, the hail o’ them.
21The ill-doer taks, an’ he ne’er brings hame; bot the rightous will len’ an’ lat lye:#Ps 112:5, 9
22Syne, whasae he bids sal ay bide the lan’;#Prov 3:33 them he bans, they sal e’en be shot-by.
23Frae the Lord, the wide#37:23 Heb. gates, or out-gates, on the heigh road; or firm roddins. yett o’ the mighty man’s set;#Prov 16:9 an’ he fuhres on his gate fu’ blythe:
24Tho’ he stacher a wee, he sal nane down gae;#Ps 34:19, 20; 91:12; Prov 24:16; 2 Cor 4:9 for the Lord hauds his han’ fu’ stythe.
25A wean I hae been, an’ an auld man am e’en; bot the rightous for-lied, or his bairns seekin bread, I ne’er saw:#Job 15:23; Ps 59:15; 109:10
26Ilk day he cou’d gie or cou’d len’;#Ps 112:5, 9 an’ his outcome was blythe an’ a’.
27 Syne, awa frae mischieff, an’ do weel;#Ps 34:14 an’ bide evir mair whar ye min’:
28For the Lord, he lo’es right-rechtin weel, an’ will ne’er lea’ his ain till pine: for evir an’ ay sal they be stay; bot the stok o’ ill-doers sal dwine.#Ps 21:10; Isaiah 14:20
29The rightous sal fa’ the yird; an’ sal bide on’t, the lenth o’ langsyne.#Prov 2:21
30The mouthe o’ the rightous, it sets-furth sense; an’ his tongue o’ right-rechtin can tell:
31His God’s ain law is weel ben i’ his heart;#Deut 6:6; Ps 40:8; 119:98; Isaiah 51:7 an’ his gate,#37:31 Heb. his gangins. it sal ne’er swak itsel.
32The ill-man, he glaums at the rightous; an’ fain wad be his dead:
33The Lord winna lea’ him intil his han’; nor at rightin, gie him nae remede.
34Bide ye on the Lord, an’ haud weel by his gate; till fa’ the lan’ he sal heize ye yet: wi’ wrang-doers sned-aff, ye sal see ’t. #Ps 91:8
35I hae seen the wrang-doer thrive;#Job 5:3 an’ braid like the braw green-tree:#37:35 Wi plenty o’ skowth, but nae haudin, growe whar he likes.
36He gae’d, an’ he was-na; I sought him belyve, bot funden he cou’d-na be.
37Tak tent till the aefauld, an’ leuk till the straught; for the en’ o’ siclike is the lown:
38Bot owre-gangers sal whamle thegither themlane; an’ the en’ o’ wrang-doers gae dune.
39Bot right folks’ heal-ha’din, it comes frae the Lord; their strenth i’ the time o’ strett:
40An’ the Lord sal stoop them, an’ redd them out; frae wrangdoers’ han’s, he sal redd them but: an’ them, for they lippen till him, fu’ sikker an’ soun’ he sal set.
Currently Selected:
Psalms 37: SCOWAD
Highlight
Share
Compare
Copy
Want to have your highlights saved across all your devices? Sign up or sign in
Published as The Psalms: frae Hebrew intil Scottis in 1871.
