1 कुरिन्थियो 13

परैम सबां ऊं उतम है

1जे म्हैं मिनखौ, अर सरगदूतो री बोलियां बोलूं अर परैम नीं राखूं, तो म्हैं ठनठनाता पीतळ ज्यूं, अर झंझनाती झांझ रै ज्यूं हूं। 2#मत 17:20; 21:21; मरकु 11:23अर जे म्हैं भविसयवांणी कर सकूं, अर सगळै भेदों अर सगळै तरैह रै ग्यांन नै समझूं, अर म्हनै एठै तांई पूरौ विसवास हो, की म्हैं भाखर नै हटा दूं, पण परैम नीं राखूं, तो म्हैं कीं भी कोनीं। 3जे म्हैं म्हारौ पूरौ धन कंगालो नै बांट दूं, या अपणी देह जळाणे रै लियै बलिदान कर दूं, अर परैम नीं राखूं, तो म्हनै कीं भी फायदो कोनीं।

4परैम धीरजवन्त है, अर दयाळु है। परैम जळण कोनीं राखै, परैम आपरी बड़ाई कोनीं करै, अर घंमड कोनीं करै। 5वो गळत व्यवहार कोनीं करै, वो आपरी बड़ाई कोनीं चावै, झुंझलावै कोनीं, परैम बुराई रौ कोई हिसाब कोनीं राखै। 6उणरौ आंणंद पाप में कोनीं, पण सचाई में है। 7परैम हरैक वगत रूखाळी करै है, सगळी बातां माथै विसवास करै है, सगळी बातां री आसा राखै है, परैम सगळौ सहन कर लेवे है।

8परैम कदैई टळै कोनीं। पण भविसयवांणी रौ वरदान खतम हो जावैला। भासाओं रौ वरदान खतम हो जावैला। ग्यांन रौ वरदान मिट जावैला। 9क्यूंकै म्हौरौ ग्यांन अधूरो है, अर म्हौरी भविसयवांणी अधूरी, 10पण जद सर्वसिद्ध आवैला, तो अधूरो मिट जावैला।

11जद म्हैं टाबर हो, तो म्हैं टाबरौ रै ज्यूं बोलतौ हो, टाबरौ रै ज्यूं मन हो, टाबरौ जैड़ी समझ ही। पण जद जवान हो गियौ, तो टाबरौ री बातां छोड़ दी। 12इण वगत तो म्हौ नै कांच में धुंधळौ दिखाई दैवै है, पण उण वगत आंमै सांमै देखोला। इण वगत म्हारौ ग्यांन अधूरो है, पण उण वगत ऐड़ी पूरी रीति ऊं पिछांणू ला, ज्यौ परमेसर म्हनै पिछांणयौ है।

13पण इण वगत विसवास, आसा, परैम ऐ तीनो बण्यौड़ा है, पण इणमे सगळौ मोटो परैम है।

Currently Selected:

1 कुरिन्थियो 13: RWR

Highlight

Copy