Lōma 4
4
Na wakayakongia ia Āpelaama e tona tū lotokono
1Ka talatala ai mātou pēwea ia Āpelaama tō mātou tupuna, i tana mea na kite nō lunga i te tū lotokono? 2Mē na wakayakongia ia Āpelaama e ana yanga, na kaleka wua iāna kē wakatietie – auyē lā i mua o te Atua. 3Na tala mai pēwea te Puka Yā? “Nā nunumi ia Āpelaama ki te Atua, nō kiai iāna na meaina ai e tangata tū tautonu.”#Kēnete 15:6; Kālātia 3:6
4Mē yanga oki e tangata, ko te tali o tana yanga ia e kiai i te mea aloa, e oko lā nō te yanga āna na wai. 5Yaulā, ki te tangata e yē yangá, ko nunumi wua lā ki te Atua e wakatautonuina te kau kikinó, ko tona lotokono ia na meangia e tū tautonu i mua o te Atua. 6Na talatala oki ia Tāvita i nā muna ia nō te vēvēia na maua i te tangata a te Atua na āliki wai tangata tū tautonu, e kiai oki nō ana yanga. 7Na mea oki peia,#Talamo 32:1-2
“Valea loa te kau na yuangia o lātou takayala,
na ūwingia oki ma a lātou yala.
8Valea loa te tangata
na yē malawia wakawōu e te Atu ana yalá.”
9Ko te vēvēia e langakia nei nō te kau wua lā na pelitomengiá, mē lā nō te kau oki e kiai na pelitomengiá? Nā tala atu oki mātou nō te tū lotokono o Āpelaama na meangia ai iāna e tangata tū tautonu. 10Na mea lā pēwea na tupu ai te mea nei? Nō muli lā o tona pelitomenga, pē nō mua atu? Kāle ai nō muli, nō mua atu lā na popole ai te Atua kia ana. 11Na tukuina oki kia Āpelaama te wakamailonga o te pelitome nei wai wakapono i tona tū tautonu na maua lā loto o te lotokono ki te Atua, wua atu iāna e kiai na pelitomengia. Nō kiai ia Āpelaama na lilo ai wai matua nō te wī tāngata e nunumí, wua atu lātou e kiai na pelitomengia, kē maua ai ia lātou te tū tautonu.#Kēnete 17:10 12Ko ona oki te matua o te kau na oti e te pelitomé, e kiai wua nō tēlā na pelitomengia lātou, yaulā, ko yāele lātou i nā lakainga o te tū lotokono o tō tātou tupuna ia Āpelaama, i mua ake iāna ka pelitomengia ai.
13E kiai nō te tū māmalu ki te Tule na maua ai ia Āpelaama ma tona ulaula te wakapononga a te Atua kē lilo iāna wai ao nō te ao nei, na lā loto lā i te tū tautonu e yau mai te lotokono ki te Atua.#Kēnete 17:4-6; 22:17-18; Kālātia 3:29 14Mē lā ko te kau i lalo o te Tulé nā tāngata ao, kāe kalu loa lewu o te tū lotokono, ko te wakapononga okí na lilo wai mea wua.#Kālātia 3:18 15Nō te Tule oki na tupu ai te lili o te Atua i te kau watiwati tulé. I te vāia kāe ai tulé, kāe yala loa na alawia.
16Nō kiai, nō te lotokono na tupu ai te wakapononga ia, na lilo oki wai mea aloa nā te Atua kē wakatika ai i te wī tama tākatoa a Āpelaama, e kiai wua nō lātou i lalo o te Tulé, nō te kau oki e wekiki o lātou lotokono pē Āpelaamá. E matua oki iāna nō tātou tākatoa.#Kālātia 3:7 17Nō kiai na tutingia ai pēnei, “Na wakalilo au ia koe wai matua nō te wainga wenua tangata.”#Kēnete 17:5 Ko ona tō tātou matua i mua o te aloalo o te Atua nā wakamoe ai ana lolokunga – ko te Atua e aumaia te ola ki te kau na mamaté, ko ona oki ko tauvalongia nā mea nā kākolé, kē lilo wai mea tika.
18Wua atu oki kāe mea ko takoto i te olānga nei kē manaki atu iāna, i loto lā o ana nunuminga na manaki lāi ia Āpelaama, ka lilo mai iāna wai matua nō te wainga wenua tangata, kē tautonu ki te talatala na wakaponoa mai kia aná, “Ka peia lāi te ūtutua o tō ulaula tangata.”#Kēnete 15:5 19E kiai loa tona lotokono na wakapapalu, wua atu tona tino na pōvī ongo, koa talivave oki tona matawiti ki te lau, peia ki tana wawine ko Tala, na pā oki tona vailanga tamaliki.#Kēnete 17:17 20Yaulā ia Āpelaama, e kiai loa na maneke ana lolokunga ki te wakapononga a te Atua, nā tāwi wua lāi te māloyi o tona lotokono ma te kave i te yilatū ki te Atua. 21Na pono ngaleka oki ia Āpelaama ka maua i te mana o te Atua e te wakatupu i ana mea na wakaponó. 22Nō kiai oki iāna “na meangia ai e tangata tū tautonu.” 23Ko nā talatala “na meangia iāna” nō tona lotokono, e kiai wua nā talatala ia na tutingia nō ona wua tokotayi, 24yaulā nō tātou, nō te kau e meangia e te Atua ni tāngata tū tautonu, nō tātou oki e nunumi kia ana na wakatūina ia Iētū mai te maté. 25Na tukuna iāna ki te mate nō a tātou yala, na wakatūngia oki mai te mate kē wakayakongia ai tātou ki mua o te Atua.#Ītaia 53:4-5
Currently Selected:
Lōma 4: PKP
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau