Mātaiō 7
7
Auyē wakavā i te toe kau
(Luka 6:37-38, 41-42)
1“Auyē kōtou e wakavā atu i te toe kau, kē yē wakavāngia mai kōtou e te Atua. 2Ka wakavā lāi te Atua ia kōtou kē weolo ki a kōtou wakavānga i te toe kau. Ko te ango a kōtou e wakavā ai i te toe kaú, ka peia lāi te ango a te Atua ka wai atu kia kōtou.#Māleko 4:24
3E wea koe e kakalo ai ki te kālewu lākau i loto o te mata o tō tainá, ko yē au manatua lā te potonga lākau tongi e i loto o tō mata nā? 4E wea ka maua ai ia koe e te mea ki tō taina, ‘Yau ke aku yeua ki vao te kālewu i tō mata nā!’, ēnei te potonga lākau tongi e tike loa wakalelei i tō mata nā? 5Tiāi koe ka ngutulua ai! Taumua koe e te ūnu ki vao i te potonga lākau tongi i loto o tō mata nā, eia lā, koa maepa lelei ai i ō mata kē yeu atu ki vao i te kālewu i te mata o tō tainá.
6Auyē tuku i a kōtou mea yayā ki nā kulī́, ko te wuwuli mai lātou kakati ia kōtou. Auyē oki e tili i a kōtou poe lā mua o nā puaká, ko te wuwuli mai lātou yoliyoli ki te vae i nā mea ia.
Wakavale, ulupango ma te tukituki atu
(Luka 11:9-13)
7“Wakavale atu, ka avatua lāi kia kōtou; ulupango atu, ka kitea lāi e kōtou; tukituki atu i te pū, ka yūkena mai lāi kia kōtou. 8Ko te wī tāngata oki e wakavale atú, ka maua mai; ia ana e ulupangó, ka kitea ēna, peia kia ana e tukituki i te pū́, ka yūkena mai lāi kia ana.
9Ko ai ia kōtou nā kē talikai mai tana tama e walaoa, ka avatu e watu ki ai? 10Pēkole, mē talikai te tama e ika, ka avatu ki ai e ōvī? 11Nō kiai, wua atu kōtou ko kikino, yaulā ko mātau ia kōtou e te tuku atu i nā mea lelei ki a kōtou tama. Ke a kōtou iloa oki, ka yika ongo atu nā mea aloa lelei a tō kōtou Matua i te Langi ka avatu ki te kau e talikai atu kia aná! 12Nō kiai, i te wī mea loa pau, wai atu koe ki te toe kau i au mea lāi e manatu ai kē wai mai lātou kia koe. Ko te manatunga wolo oki teia o te Tule a Mōte ma nā akoakonga a nā pelovetá.#Luka 6:31
Te pū koyiiti ma te pū lapalapa
(Luka 13:24)
13“Ūlu kōtou lā loto o te pū koyiití. E lapalapa oki te pū ma te ngutuwolo o te ala e wano atu ai ki te maté, ūtutua oki te tangata ko wō lā kiai. 14Yaulā, e koyiiti te pū ma te ngutulewu o te ala e wano atu ai ki te olá, e tokalewu wua oki te tangata ko kitea te ala ia.
Te lākau ma tona wua
(Luka 6:43-44)
15“Onoono wakalelei kōtou i nā peloveta ngutu vativatí, ka lōmamai lātou kia kōtou i loto o nā wakakawu māmoe, kāleka ia loto o lātou, ni luko kaitāngangata. 16Ka mailonga ia kōtou nā wua o a lātou yanga. Ko waki lā te tangata i nā vine mai lunga o nā lākau wai aú, peia i nā tuke mai nā lākau talatala? 17Ko te wī lākau lelei ko pua mai lāi ni wua lelei, yaulā te lākau kino, ko pua mai lāi ni wua kikino. 18Ko yē pua mai oki te lākau lelei i te wua kino, peia te lākau kino i te wua lelei. 19Ko te wī lākau e yē wua mai ni wua leleí, ka yemutia ki lalo, tili atu ai ki loto o te awi.#Mātaiō 3:10; Luka 3:9 20Nō kiai, ka taka lelei ia kōtou nā peloveta ngutu vativati ia mai nā wua o a lātou yanga.#Mātaiō 12:33
Ko yē aku iloa ko ai kōtou
(Luka 13:25-27)
21“E kiai oki ko te wī tāngata e mea mai kia akú, ‘E te Atu, e te Atu,’ ka ūlu ki loto o te Pātileia o te Langi; ko te kau wua lā e wai i te winangalo o toku Matua i te Langí. 22E tokawolo te kau ka mea mai kia aku i te ayo ia, ‘E te Atu, e te Atu ē, e kiai lā mātou nā yivayiva wakapono i tō ingoa, nā tutuli oki i nā tēmoni ki vao ma te wai i nā yanga mana i tō ingoa?’ 23Eia lā au koa wakapono atu ai kia lātou, ‘Ko yē aku iloa ko ai kōtou. Wō ki nā kongá maia aku, e te kau waiva kikino ia!’#Talamo 6:8
Te tokalua tāne wowou wale
(Luka 6:43-44)
24“Nō kiai, ko te tangata e wakalongo i aku muna loa tākatoa e talatala nei, eia, wai loa i nā mea ia, ka akaweolo au ia ana ki te tangata māwutu na wowou i tona wale ki lunga o te papa makeke. 25Lutu loa ki te ua, puke te yua kī kakale te wī kauvai, ma te matangi ongo i te papaki mainga ki lunga o te wale ia; e kiai loa te wale ia na yinga ki lalo, nō tēlā, ko i lunga tona tango o te papa. 26Yaulā te tangata e wakalongo wua i aku muna nei ma te yē wai peia, ka akaweolo au ia ana ki te kovi pāioio na wowou i tona wale ki lunga o nā kelekelé. 27Lutu loa ki te ua, puke te yua kī kakale nā kauvai, ma te matangi ongo i te papaki mainga ki lunga o te wale ia; eia, yinga loa te wale ia pakakina wua ki lunga te pangulunga ki lalo, pupua wua.”
Te mana o Iētū
28Oti loa te yalu a Iētū i ana muna ia, na kamuloa te maliunga tangata ia mīmīngutu wua i ana akoakonga ia, 29nō tēlā, nā akoako iāna kia lātou ma te mana, ko yē mea oki peia o lātou akoako tulé.#Māleko 1:22; Luka 4:32
Currently Selected:
Mātaiō 7: PKP
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau