Mātaiō 14
14
Te mate o Ioane Pāpetītō
(Māleko 6:14-29; Luka 9:7-9)
1I te vāia ia, langona loa e Ēlota te aliki#14:1 aliki: Ēleni, tētelāleka. E aliki nō te tuanga tai wā o te pātileia. Ko Ēlota Anetipa tēnei, ko ona te toe tama a Ēlota Wolo. o Kalilea nā tala o Iētū, 2mea loa iāna peia ki ona tāvini, “Ko Ioane Pāpetītō tēnei, na tū wakawōu lāi iāna mai te mate! Nō kiai na maua ai te mana i loto ōna kē wai i nā yanga wakawotu ia.”
3Na manatu ia Ēlota peia, nō tēlā ko ona na ungaina kē likoa ia Ioane kē yelengia ki te vivi, tuku atu ai ia ana ki loto o te waleāuli. Nō Ēlōtia oki, te wawine a tona taina ko Pilipa na wai ai iāna peia.#Luka 3:19-20 4Nā mea oki ia Ioane peia kia Ēlota, “Ko yē wakatikaina koe e te tule kē wakaao koe ia ana.”#Levitiku 18:16; 20:21 5Nā luluta te ngākau o Ēlota kē patu ia Ioane kē mate, yaulā nā mataku iāna i te kakai, nō tēlā ko nunumi lāi lātou ē, e peloveta ia Ioane.
6I te imukai o te ayo wānau o Ēlota, na kamuloa te ngākau o Ēlota lele wua i te vēvēia i te ula mainga a te tamāwine a Ēlōtia lā mua o lātou. 7Eia, wakapono loa iāna lā loto o te tuku tika, ka avatu iāna ki te tamāwine ia i tana mea wua ka wakavale mai kia ana. 8Na wakauyuina oki iāna e tona matua wawine kē mea peia, “Aumai koe kia aku nei i te ulu o Ioane Pāpetītō, ava mai ki lunga o te meleki.” 9Na kamuloa te ngākau o te aliki yōyātia, nō tana tukungā-tika lā, ma ana tāngata oki na valo e i tana kaingākai ia, wakaunga ai loa iāna i te talikainga a te tamāwine ia kē wakatupungia, 10yemutia mai ai te ulu o Ioane i te waleāulí. 11Aumaingia loa tona ulu ko ava ki te meleki, tuku atu ai ki te tamāwine ia, eia, kave ai ēna ki tona matua wawine. 12Lōmamai ai nā pipi a Ioané, kave i tona tino, tanu. Eia, wō atu ai lātou tala kia Iētū.
Na wāngai ia Iētū i te patanga tangata tokawolo
(Māleko 6:30-44; Luka 9:10-17; Ioane 6:1-14)
13I te longonga a Iētū i te mea na tupu kia Ioane ia, maka loa iāna i te konga ia, wano nanā wua loa lā lunga o te poti ki e konga ngaongao. I te mumuyunga a te kakai i tana wanonga ia, wealu vae mai loa lātou ia ana mai o lātou ōile. 14Kē tau atu ia Iētū ki ngāuta, kakalo atu iāna ko wakalulu te maliunga tangata tokawolo i kiai. Kamuloa tona ngākau wakaaloa ia lātou, wakaola oki iāna i te kau o lātou e mamakí.
15Koa akaawiawi te ayo ia, lōmamai loa nā pipi kia ana, mea loa ki ai, “E konga ngaongao te mea nei, koa wano loa ka pō. Tukuna te kau nei kē wō ki nā yikuanga wua lā kineí kē oko ai ni popoa mā lātou.”
16Kākole lā te meanga a Iētū kia lātou, “E wea te kau nei ka wō ai? E kave kōtou ni popoa mā lātou kē taumamaya ai.”
17Pau atu loa lātou peia, “E lima wua a mātou walaoa i kinei ma lua ika.”
18Mea atu ai ia Iētū peia, “Aumai nā mea nā kia aku.” 19Wakaunga loa iāna i te wī tāngata kē nōnō ki lalo o nā vayavaya. Liko loa iāna i te lima ngaua walaoa ma lua ika ia, kakalo loa ki te Langi, wakaatawai loa i te Atua ma te vayivayi i nā walaoa ia. Eia, tuku atu ai ki nā pipi kē tau ki te wī tāngata, 20taumamaya ai lātou tākatoa, yāngingia ngaleka. Opoopo loa nā pipi i te toetoenga o nā popoa ia, wawao ai ki nā kete tāpola, kikī te laungaulu mā lua kete i te toetoenga kai. 21Ko te tokawolo o te wī tāne nā taumamaya ia e limanga mano, e kiai oki te tiniu ma te tamaliki na kauwia.
Na yaele ia Iētū i lunga o nā yua
(Māleko 6:45-52; Ioane 6:16-21)
22I te vāia ia lāi, unga loa ia Iētū i ana pipi kē wīwiti ki loto o te poti, kē wō lātou taumua ki te toe kaokao o te loto, ko tuku oki iāna i te wī tāngata kē wō ki wale. 23Kē oti iāna e te tuku atu i te kaputinga tangata ia, wakaake loa iāna tokotai wua ki lunga o te maunga kē tataku. Kē pō te pō, ko ona wua tokotayi nā i kiai. 24Ko te poti o te kau ia na maotai ongo mai te wenua, ko kopikopia mai e te ngalu, nō tēlā, ko yau te matangi mai mua o lātou.
25I mua ake ka oko mai ai te ata o te mālama, angatu loa ia Iētū kia lātou i tai ia, nā yaele wua iāna i lunga o nā yua o te loto. 26I te kakalo atunga a nā pipi ko yaele iāna i lunga o nā yua, kamuloa lātou wulutia i te mātataku. “Te yītolo ē!” tā lātou meanga, kakā ai lātou ki lunga i te mataku.
27E kiai oki ia Iētū na tukumuli, mea loa peia kia lātou, “Wakamāloyi! Ko oku tēnei. Auyē mātataku!”
28Pau atu loa ia Pētelo, “E te Atu, pē ko koe lāi tēnā, tauvalo atu ake au kē angatu kia koe i lunga o nā yua.”
29Mea atu oki ia Iētū, “Yau.”
Eia, leilo loa ia Pētelo ki lalo, maka i te poti, yaele loa i lunga o te yuatai kia Iētū. 30Yaulā, ke ana kitea te ongo o te matangi, mataku loa, kāmata oki iāna e te ngoto. Kā ai tana kakānga peia, “E te Atu ē, wakaola mai ake au!”
31Peia ngatai oki ia Iētū wakatatae loa i tona lima, liko mai ia ana, mea loa peia ki ai, “Ia koe pē e tangata lotokono māyangiyangi! E wea na mangalua ai tō manako?”
32Eia, kē wīwiti atu lāua ki loto o te poti, mamaya oki te matangi. 33Ko te kau nā i loto o te poti ia, tautapa loa lātou ia ana, wai ma te talatala peia, “Ko tautonu lāi pē, ko koe te Tama a te Atua!”
Na yawea te kau mamaki i Kēnetāleta
(Māleko 6:53-56)
34Kē tīkoti atu lātou ki te toe kaokao o te loto ia, tau atu loa lātou ki Kēnetāleta. 35I te iloanga e nā tāngata i kiai ko Iētū teia, kave loa lātou i te talatala ki te wī yionga o te wenua ia. Eia, tali mai loa te wī tāngata i te kau mamaki o lātoú kia ana. 36Talikai māmate loa lātou kia ana kē wakapaki wua ake nā maki ia i te tipi o tona kākawu. Ko te kau oki na wakapaki atu kia ana ia, na yawea loa tākatoa.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau