Mātaiō 12
12
Ko Iētū te Atu o te Tāpati
(Māleko 2:23-28; Luka 6:1-5)
1I te vāia ia, wano loa ia Iētū lā loto o nā pā toki tītona i te Tāpati. Na wiakakaia oki ana pipi, eia, kāmata ai lātou e te kotokoto i nā toe kaulu tītona, kai ai i nā wua.#Teutelonomi 23:25 2I te kitenga a nā Pālitea i te mea ia, mea loa lātou kia ana, “Onoono ake! Ko wai au pipi nā i te yanga e yē tanga i te Tule kē waingia i te Tāpatí!”
3Talatala atu ai ia Iētū, “E kiai lā kōtou na kauwi i te yanga a Tāvita na wai i te vāia na wiakaia ai iāna ma ona tāngata?#1 Tāmuela 21:1-6 4Wano loa iāna ulu ki loto o te wale o te Atua ma ona tāngata, kai i nā walaoa tapu, nā walaoa e yē tanga i te Tule kē kai lātoú, ko nā tatakuvai wua lā ko wakatikaina kē kai i nā walaoa ia.#Levitiku 24:9 5Pēkole, e kiai mō kōtou na kauwi i loto o te Tule a Mōte e meá, ko yanga nā tatakuvai i loto o te Waleyā i te ayo Tāpati, ko yē wakayā oki lātou i te Tāpati, yaulā, ko yē takayala lātou i te mea ia?#Nūmelo 28:9-10 6Ko tala atu au, ko i kinei iāna e matamatua atu i te Waleyā́. 7Pī pē mō oki na taka lelei ia kōtou nā mō muna nei, ‘E manavaaloa taku mea ko winangalo ai, e kiai ko te ātinga,’ e yē wakakino pā kōtou i te kau kāyi yala nei.#Mātaiō 9:13; Ōtea 6:6 8Ko te Tama oki a te Tangata nei, ko ona te Atu o te Tāpati.”
Te tāne na pilikokia te lima
(Māleko 3:1-6; Luka 6:6-11)
9Maka ai ia Iētū i te konga ia, wano loa ki loto o tō lātou walepule, 10nā i kiai te tāne na wakamate te lima. Ko nā tāngata nā i kiaí, nā ulu kē yī mea tāyī ai lātou ia Iētū, eia, iliili loa lātou ki ai, “Ko tanga mō i te Tule kē wakaola i te tangata i te Tāpati?”
11Mea atu ai iāna kia lātou, “Pē e tayi o kōtou tangata na tō tana māmoe ki loto o te lua i te Tāpati, e yē liko lā iāna i te māmoe ia tāki mai ki vao?#Luka 14:5 12Ko kalunui atu oki te tangata i te māmoe! Nō kiai, ēeke, ko tanga i te Tule kē wai i nā yanga lelei i te Tāpati.”
13Eia, talatala ai iāna ki te tāne ia, “Wakayako mai lā tō lima.” Wakayako atu loa iāna, lelei wakawōu oki tona lima ia, niko ki tona tū mao loa, wekiki ma te toe lima. 14Ko nā Pālitea lā, wō loa lātou ki vao, wunawuna ai ka mea lātou pēwea kē patu ia Iētū kē mate.
Te tāvini na ikingia e te Atua
15Ko Iētū lā, na iloa wua ēna a lātou manatunga ia, eia, wano atu loa iāna mai te konga ia. Ko te wainga tāngata oki nā ālu i muli ōna ia, na pau tākatoa ia ana e te wakaola i te kau o lātou nā mamakí. 16Wakalapa oki iāna ia lātou, auyē loa lātou e wō tala ko ai iāna ki te toe kau. 17Na wakatupu oki te mea nei i te talatala a te peloveta ko Ītaia e mea pēneí:
18 #
Ītaia 42:1-4 (LXX) “Ēnei toku tāvini āku na iki,
te tangata e mina ai au, ko ona oki ko pūmanava ai au;
ka tuku oki au i toku Vaelua ki lunga ōna,
ko ona lāi ka wakamamataina te wakavānga tika ki te wī wenua.
19E yē wakatautotoko iāna, e yē kakā oki ki lunga;
e yē langona tona leo i nā ngutuala.
20E yē wawati iāna i nā vayavaya laumatematé,
e yē tāmate oki i te mōlī yila matemate,#12:20 Ko te wakamaepanga: Ko yaumālū iāna ki te kau ngawingawí, ko waiwai wakalelei oki ki te kau vevé.
ka peia wua iāna oko wua atu ki te vāia
e lē ai te tū tautonu iāna.
21Ko i tona ingoa oki ka tuku te wī wenua i a lātou mānakinakinga.”
Ko Iētū ma Peletepupa, te yula o nā tēmoni
(Māleko 3:20-30; Luka 11:14-23)
22Eia, aumai loa lātou kia ana i te tāne na ulungia e te tēmoni ia, ko pōuli oki ona mata, ko yē maua e te talatala. Eia, wakaola loa e Iētū te tāne ia kē maua e te talatala, kē kakalo oki ma ona mata. 23Mīmīngutu wua ai te lulunga tangata i kiai ia, mea loa peia, “Ēnei mō te Tama a Tāvita?”
24Yaulā, i te longonga a te kau Pāliteá i te mea ia, kā ai te meanga pēnei, “Ko maua wua oki i te tangata nei e te tutuli i nā tēmoni ki vao lā loto o te mana o Peletepupa, te yula o te wī tēmoní.”#Mātaiō 9:34; 10:25
25Na iloa wua e Iētū a lātou manatunga ia, eia, mea atu ai iāna kia lātou, “Ko te pātileia e tuavaevae ia ana lāi, ka pānakia iāna, peia oki te ōile, pēkole te wale tangata e tuavaevae iāna lāi, ka puewu. 26Pē oki ia Tātani ko tutuli lāi ia Tātani ki vao, ko tuavaevae iāna ia ana lāi. Ka takoto ai pēwea tona pātileia? 27Pē oki au ko tutuli ki vao i nā tēmoní i te mana o Peletepupa, nō ai oki te mana e tutuli ai o kōtou tāngata i nā tēmoní ki vao? Nō kiai, ko nā yanga lāi a o kōtou tāngata ia ko talā mai, ko takayala kōtou! 28Yaulā, pē au ko tutuli ki vao i nā tēmoní i te mana o te Vaelua o te Atua, ko wakapono mai te mea ia, na oko mai te Pātileia o te Atua ki te puyo o kōtou.
29Pēkole, kāe tangata oki e maua e te ulu pōuli wua ki loto o te wale o te tāne vave, kave wua i ana penupenu, kē yele loa iāna taumua i te tangata vave ia; eia lā, koa maua ai ia ana e te kaiā i tona wale.
30Ko te tangata e ngalo i oku tawa, ko wakatotoko mai iāna kia aku; ko te tangata oki e yē wakatai mai kia aku nei, ko tuatele iāna i te tangata ki tātea maia aku nei.#Māleko 9:40 31Nō kiai ko tala atu au, ka yuangia te wī yala ma te wī muna wakakino a te tangata nei; ko te wakakino lā i te Vaelua Yā, e yē yuangia loa tana yala ia. 32Ko te tangata ka wakakino i te Tama a te Tangata nei, ka yuangia tana yala ia; ko te tangata lā ka wakakino i te Vaelua Yā, e yē yuangia loa tana yala ia i te ao nei, ma te ao ka yaú.#Luka 12:10
Ko te lākau ma ona wua
(Luka 6:43-45)
33“Ko peia oki te onoononga i te lākau lelei, ka wua mai lāi iāna ni wua lelei; ko te lākau kino, ka wua mai lāi ni wua kikino. Ko mailonga wua oki te tū o te lākau mai nā wua ōna.#Mātaiō 7:20; Luka 6:44 34Tiāi kōtou ka peia ai, e te wuānga ōvī ia, ka maua pēwea ia kōtou nā tāngata kikino nā, e te talatala mai i nā mea lelei? Ko talatala wua oki te ngutu i nā mea e yulā wua i loto o te ngākaú.#Mātaiō 3:7; 23:33; 15:18; Luka 3:7; 6:45 35Ko aumai te tangata lelei i nā mea lelei ki vao, mai te pukenga lelei i loto ōna; ko peia lāi te tangata kino, ko aumai i nā mea kikino ki vao mai te pukenga kino i loto ōna.
36Yaulā ko tala atu au, ka wakalau oki te wī tāngata i te wī muna loa taukole a lātou nā yalú i te Ayo o te Wakavānga. 37Ko i au talatala oki ka tūāngia ai koe, ko i au talatala lāi oki ka meaina ai koe e tangata yakolele.”
Te umatinga kē tai wakailo
(Māleko 8:11-12; Luka 11:29-32)
38Eia, talatala mai loa nā toe Pālitea ma nā akoako tule kia ana, mea loa, “E te Pūāpī ē, ko winangalo mātou ke a mātou kitea e wakailo mana maia koe nā.”#Mātaiō 16:1; Māleko 8:11; Luka 11:16
39Kākole lā te mea atunga a Iētū, “Ko wakavale mai te taitangata kikino ma te atuakole nei e wakailo mana! Eia wua, kākole wakailo e avatua kia kōtou, ko te wakailo wua lā o te peloveta ko Iōná.#Mātaiō 16:4; Māleko 8:12 40Pē Iōna oki na pau e tolu pō e tolu ao i loto o te manava o te tawitonga iká, ka peia lāi oki te Tama a te Tangata nei, e tolu ona pō e tolu oki ao, i loto o te puyo o te wenua.#Iōna 1:17 41Ka wetū mai oki te kakai o Nīneve wakatakayala i te taitangata nei i te Ayo o te Wakavānga ma te tūā ia lātou, nō tēlā, na wuwuli ia Nīneve mai a lātou yala i te ako atunga a Iōna ia lātou. I te vāia nei lā, ko i kinei te tangata ko matamatua atu iāna ia Iōna.#Iōna 3:5 42Ka tū mai oki te aliki wawine o te Pae Tonga ki lunga i te Ayo o te Wakavānga, wakatakayala i te taitangata nei, nō tēlā, na yau iāna mai tona wenua mamao kē wakalongo i te māwutu o Tōlomona. I te vāia nei lā, ko i kinei iāna e matamatua atu ia Tōlomoná.#1 Aliki 10:1-10; 2 Wakapapanga 9:1-12
Te niko mainga o te vaelua kino
(Luka 11:24-26)
43“Kē wano atu te vaelua kino ki vao mai loto o te tangata, ko wano iāna lā nā konga pakapaka o te wenua ulu e konga kē wakaea ai iāna, yaulā, kāe ona konga loa na maua. 44Eia, mea ai loa kia ana wua, ‘Ka niko au ki te wale nā i kiai aú.’ Kē oko mai lā iāna ki te wale ia, onoono atu na yē nōtia e te tangata, na velevelea mākitakita, na penapenangia oki wakalelei. 45Eia, wano loa iāna aumai e toe tokawitu vaelua ko ongo atu te kikino, lōmamai ai lātou ki loto ia, nōnō ai i kiai. Wotu atu loa te kino o te tāne ia i te vāia muá. Ko te mea lāi tēnei ka tupu kia kōtou, e te taitangata kikino nei.”
Te matua wawine ma nā tāīna o Iētū
(Māleko 3:31-35; Luka 8:19-21)
46Ia Iētū e talatala nei ki te lulunga tangata ia, lōmamai loa tona matua wawine ma ona tāīna wetū mai lā vao, ko manatu lātou kē talatala kia ana. 47Eia, mea mai loa te tangata ia kia ana, “Ko wetū mai tō matua wawine ma ō tāīna i te tulanga, ko winangalo kē talatala kia koe.”#12:47 Na ngalo te yīlava nei i nā toe pōkai talatala.
48Pau atu loa ia Iētū kia ana, “Ko ai toku matua wawine ia, ko ai oki oku tāīna ia?” 49Tou ai tona lima ki ana pipi, mea loa peia, “Ko te kau nei toku matua wawine ma oku tāīna. 50Ko te tangata oki ka wai i te winangalo o toku Matua i te Langí, ko ona lāi toku taina, toku tuaine ma toku matua wawine.”
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau