Luka 19

Ko Tākaiō te taetae telo

1Kē oko atu ia Iētū ki Iēliko, nā wano iāna lā loto o te ōile ia. 2E tayi tāne nā i kiai, ko Tākaiō tona ingoa; e wakayaele wolo iāna nō te yanga taetae telo, lilo mai loa iāna wai tangata monia. 3Nā winangalo iāna ke ana kitea ko ai ia Iētū, yaulā nō tona pūpoto na yē ana maua ai, nō te tokawolo oki o te patanga tangata ia. 4Nō kiai, lele loa iāna lā mua o te yolonga tangata ia, kake ai ki lunga o te lākau tūkāmino ke ana kitea ia Iētū e yaele mai nei lā te konga ia.

5Kē oko mai ia Iētū ki te konga ia ana ia, kakalo loa iāna ki lunga, mea loa ki ai, “Tākaiō ē, leilo mai ki lalo i te eva, ka angatu au nō i tō walé i te ayo nei.” 6Na peia ngatai, leilo mai oki ia Tākaiō ki lalo, welāvei ia Iētū ma te vēvēia.

7I te kitenga a te wī tāngata i te mea ia, kāmata loa lātou e te wakaamu, “Wō, na wano iāna wai manuyili mā te tangata yalá!”

8Yaulā, tū ai ia Tākaiō ki lunga, mea loa ki te Atu, “Ke au iloa, e te Atu, i te vāia nei ka kave loa au i te toe āpa o oku penupenu mā te kau vevé. Pē nā lima lavelave au ki e tangata, ka tāwaki wā au e te tali wakawōu atu ia ana.”

9Eia, talatala atu ai ia Iētū kia ana, “Na oko mai te ola ki te wale nei i te ayo nei, ko te tangata nei oki e tama iāna nā Āpelaama. 10Nō kiai te Tama a te Tangata na yau ai, kē ulu iāna ma te wakaola atu i te kau na ngangaló.”#Mātaiō 18:11

Te palapole o te paunu

(Mātaiō 25:14-30)

11I te wī tāngata e wakalongolongo mai ki ana muna ia, tala mai oki ia Iētū i te palapole nei kia lātou, nō tēlā, koa pili wua iāna ki Iēlūtalema, na manatu oki te kakai koa talivave wua mai te vāia e wakaālia mai ai te Pātileia o te Atua. 12Eia, mea loa iāna pēnei: “E tayi tangata wolo na valongia kē wano atu ki te wenua mamao kē ikingia iāna wai aliki, niko mai ai wakawōu. 13Valo mai loa iāna taumua i te toe tino angaulu tāvini, tuku atu ai e takitayi paunu#19:13 paunu: e moni kōlo (mēkole, tiliva), pe te tūtaki o te tolu malama yanga. kia lātou, mea oki iāna pēnei, ‘Wō kōtou wakananea i nā moni nā, oko wua atu ki te vāia e niko mai ai au.’

14Yaulā, kamuloa nā tāngata o tona wenua ia te veliveli ia ana, unga loa lātou e pupu tangata kē ālu i muli ōna ma te talatala nei, ‘Ko yē winangalo mātou i te kovi nei kē lilo wai aliki mō mātou.’

15Yaulā, na lilo mai lāi te tangata ia wai aliki, eia, niko mai ai iāna ki wale. Valo mai loa iāna i nā tāvini na tuku ai iāna i nā moní kē lōmamai, ke ana iloa e wea te wolo o tā lātou moni na maua mai.

16Yau loa te tāvini mua, mea loa peia, ‘E toku Pū, na maua wakawōu ia aku e laungaulu paunu mai tau moni na tuku maí.’

17Pau atu oki te aliki, ‘Na wotu koe, e toku tāvini manakia ia! Na taute wakalelei koe i nā mō mea lewu ia, ka tuku atu au ia koe e laungaulu tau ōile ka wakayaele.’

18Yau loa te lua o te tāvini, mea loa peia, ‘E toku Pū, na maua wakawōu ia aku e lima paunu mai tau moni na tuku maí.’

19Pau atu oki te aliki, ‘Ka wakayaele koe e lima au ōile.’

20Eia, yau ai te toe tāvini, mea loa peia, ‘E toku Pū, ēnei tau paunu, nā nanā wua ēku ki loto o te oloi. 21Ko mataku oki au ia koe, nō tēlā, e kovi loa koe ko lili wua. Ko au maua wua e te kave i nā mea kāle ai nā koe, ma te tope i nā mea e kiai koe na tokí.’

22Talatala mai ai tona Pū ki ai, ‘E te tāvini waiva kikino ia ē! Ka wakavā au ia koe kē kaleka ki au muna nā yalu mai nā. Na taka ia koe e tangata au ko lili wua; ko kave au i nā mea kāle ai nā aku, ko tope oki au i nā mea e kiai na tokia ēkú. 23E wea ai koe na yē tuku ai i aku moni ia ki loto o te pāngika, kē nanea mai ni moni tele kē koi ai au i taku niko mainga?’

24Eia, talatala ai iāna ki te kau e wetū mai lā tawá, ‘Waokia mai te paunu maia ana, tukungia atu ki te tāvini e laungaulu ana moni na mauá.’

25Mea mai loa lātou kia ana, ‘E te Pū ē, na lava wua iāna i tana laungaulu paunu ia!’

26Pau atu oki te Pū, ‘Ko tala atu au, ko te kau ko yī a lātou meá, ka tukua atu lāi ki ai ni toe kē wolo atu; yaulā te kovi kāni ana meá, ko ana mō mea lewu oki na maua maí, ka waokia lāi maia ana.#Mātaiō 13:12; Māleko 4:25; Luka 8:18 27Ka peiangia lāi ki te kau e veia ia aku nei, lātou e yē winangalo ia aku wai aliki mō lātou, talia mai lātou ki kinei, patu ai kē mamate lā mua o oku mata.’ ”

Te lāvakinga vēvēia ki Iēlūtalema

(Mātaiō 21:1-11; Māleko 11:1-11; Ioane 12:12-19)

28Oti loa ia Iētū e te talatala i nā mea ia, wano loa iāna lā mua o lātou kia Iēlūtalema. 29Koa tō pili atu iāna ki Petepange ma Pētānia i te maunga e meaina ko Olivetá, unga atu loa iāna i lua ana toe pipi kē wō lā mua ōna, mea loa peia kia lāua, 30“Wō ki te yikuanga e i mua o kōlua nā; kē ōko kōlua ki ai, ka a kōlua kitea te punua ātini toa ko yele i ai, e kiai ake na wakaoloina. Yala mai kōlua, aumai ki kinei. 31Kē uwi mai e tangata kia kōlua, ‘E wea kōlua e yala ai ia ana?’, mea atu kōlua ki ai, ‘Ko winangalo te Atu i te ātini nei.’ ”

32Wō atu loa lāua ki te yikuanga lā mua ia, kitea loa e lāua na tautonu ngaleka te wī mea ki te tala mainga a Iētū́. 33Ko yala lāua i te punua ātini toa ia, mea loa te kau nā lātou te ātini ia, “E wea kōlua e tatala ai ia ana?”

34Pau atu loa lāua, “Ko winangalo te Atu ia ana.”

35Aumai loa lāua i te punua ātini ia kia Iētū, wowola ake i o lāua peleue ki lunga o te tua, eia, wakawiti ai lāua ia Iētū ki lunga. 36Koa wakaolo atu iāna ki mua, ko wolawola mai te wī tāngata i o lātou peleue ki lunga o te ngutuala.

37Kē tō pili mai iāna ki Iēlūtalema, ki te konga e yopu te ngutuala ki lalo o te Maunga i Olivetá, koa wakaatawai te lulunga tākatoa o ana pipi e te talapaya ki te Atua i te kakānga ki lunga o lātou leo nō te wī yanga wakawotu na a lātou kitea:

38“Kē talapayangia te Aliki e yau ma te ingoa o te Atú!#Talamo 118:26

Kē yauleka te ao i te Langí, kē tiketike wua tona yilatū!”

39Yaulā, mea atu loa nā toe Pālitea i loto o te yōlonga ia kia Iētū, “E te Pūāpī, kae atu ki au pipi nā kē mutu i kinā!”

40Kākole lā iāna kia lātou, “Ko tala atu au, kē wakamutu lātou, ka kakā mai lāi te wī watu!”

Na tangi ia Iētū nō Iēlūtalema

41Koa talivave atu lātou ki Iēlūtalema, i te kakalonga a Iētū ki te ōile ia, tangi loa iāna, 42mea loa pēnei, “Pī pē mō na au iloa i te ayo nei nā mea ka maua ai te yauleka! Yaulā, na nanāina mai ō mata i te vāia nei. 43Ka yau te vāia mala e oko mai ai ō enemi takapini ia koe, ka wowou i a lātou kolo ālai i ō patu ma te pupuni ia koe i te wī kaokao. 44Ka wakawoke lātou ia koe ma ō tāngata i loto o ō patu. Kāe watu loa a koe e takoto i lunga o te toe, nō tēlā, e kiai na au malaia te vāia na yau ai te Atua kē wakaola ia koe.”

Te vevelenga a Iētū i te Waleyā

(Mātaiō 21:12-17; Māleko 11:15-19; Ioane 2:13-22)

45Eia, ulu loa ia Iētū ki loto o te kolo o te Waleyā, wakatūpoupou loa ēna ki vao te kau nā okooko i kiaí. 46Mea atu loa iāna kia lātou, “Na tutingia i te Puka Yā, ‘Ko toku wale ka lapangia e wale tataku,’ yaulā na wakalilongia e kōtou wai ‘pūnanga nō te kau tōpakavá.’#Ītaia 56:7; Ielemia 7:11”

47I te wī ayo nā akoako wua ia Iētū i loto o te Waleyā. Ko nā tatakuvai wowolo lā, nā akoako tule ma nā wakayaele o te kakai, na yanga ē lātou e te ulu e lāvenga kē patu ia ana.#Luka 21:37 48Yaulā, kāe konga loa e maua ai ia lātou kē mea peia, nō tēlā, na kamuloa te kakai pale nā kauvae ki ana wī muna tākatoa.

Currently Selected:

Luka 19: PKP

Highlight

Copy