Luka 18

Te palapole o te wawine takawua nanau

1Eia, tala loa ia Iētū e palapole kē akoako ai ana pipi kē nuti wua lātou e te tataku, auyē loa e wakangaengae. 2Mea loa iāna pēnei: “I te toe ōile, nā i kiai te akavā ko yē ete i te Atua, ko yē ana malaia oki te tangata. 3E tayi oki wawine takawua i te ōile ia, nā nuti wua mai nanau kia ana ma te mea ki ai, ‘Aumai ake koe i te tika lelei nō tō māua veka ma toku nawa.’

4Na loa lāi te vāia e kiai te akavā ia nā pā. Yaulā i muli mai, mea loa iāna i loto ōna, ‘Wua atu oki au ko yē ete i te Atua, pēkole ko yē aku malaia te tangata, 5nō tēlā loa te wawine takawua nei ko nuti wua mai wakayeuyeu ia aku, ko lelei atu au kē tuku atu i te tika mō ona, kē yē taunu wua mai iāna wakapau i oku vāvenga.’ ”

6Eia, mea oki te Atu, “Wakalongo ake ki nā muna a te akavā waiva kikino nei. 7E yē aumai lā te Atua i te tika lelei ki ona tāngata na iki, e valovalo atu kia ana i te pō ma te ao? Ka wakatalitali wua lā iāna peia i te paletuanga ia lātou? 8Ko tala atu au, ka wai iāna kē maua vave te tika nō lātou. Yaulā oki, kē niko mai te Tama a te Tangata, e tokawea tangata lotokono āna ka kite i te ao nei?”

Te palapole o te Pālitea ma te tāne taetae telo

9Tala oki ia Iētū i te palapole nei ki te kau e mea na pono o lātou tū tautonu, ko wakavāvā oki i te tākatoanga o te tangata: 10“E tokalua tāne na wakaake ki te Waleyā kē tataku, e Pālitea te toe, e taetae telo te toe. 11Nā tū wua tokotai te tāne Pālitea ia ki lunga, tataku loa i loto wua ōna, mea loa, ‘E te Atua ē, ko wakaatawai au ia koe, nō tēlā e kiai au i te tangata yala pe te toe kaú, te kau lima lavelave, waiva kikino, motutāunga, pēkole, pe te kovi taetae telo e lā kilā́. 12Ko wakawiakai au e lua ayo i te tāpati, ko avatu oki au e tuanga ngaulu mai aku wī moni e mauá.’

13Yaulā, tū loa te tāne taetae telo ia wakatōmamao. E kiai loa iāna na manatu kē kakalo ki te Langi, yaulā, patu loa te lima ki ona uma, mea loa, ‘E te Atua ē, wakaaloa mai ake koe ia aku, te tangata yala nei.’ ”

14Mea ai ia Iētū, “Ko tala atu au, ko te tāne taetae telo nei na wakatautonua mai iāna e te Atua i te nikonga ki wale, e kiai ko te Pālitea. Ko te tangata oki e wakatiketike ia aná ka wakayakayakangia, ko te tangata lā e wakayakayaka ia aná ka wakatiketikengia.”#Mātaiō 23:12; Luka 14:11

Te kauliki liliki ma Iētū

(Mātaiō 19:13-15; Māleko 10:13-16)

15I te vāia ia, nā aumai oki nā tāngata i a lātou tama liliki kia Iētū kē tuku i ona lima ki lunga o lātou. I te kitenga a nā pipi i te mea ia, kaemata loa lātou i te kau nā aumaingia nā tama ia. 16Yaulā, valovalo loa ia Iētū i te kauliki ia kē lōmamai kia ana, mea loa peia, “Tuku wua mai i te kauliki lilikí kē lōmamai kia aku nei, auyē loa e ālaia, ko te Pātileia oki o te Atua nō te kau pē lātou nei. 17Ko tala atu au i te tika, ko te tangata e yē āliki i te Pātileia o te Atua pe te tama lewú, e yē ō loa iāna ki loto ia.”

Te tāne penupenutini

(Mātaiō 19:16-30; Māleko 10:17-31)

18Uwi mai loa te toe wakayaele o te Ngāti Iūta kia Iētū, mea loa, “E te Pūāpī Lelei ia ē, ka mea pēwea e maua ai ia aku te ola kāe ngatanga?”

19Kākole lā te pau atunga a Iētū pēnei, “E wea koe na tauvalo ai ia aku e tangata lelei? Kāe loa tangata lelei, ko te Atua wua tokotai. 20Ko au iloa nā tule, ‘Auyē koe e motutāunga, auyē patu tangata, auyē kaiā, auyē talayayā i te tangata, māmalu atu koe ki tō matua tāne ma tō matua wawine.’ ”#Ēkoto 20:12-16; Teutelonomi 5:16-20

21“Na woke ia aku e te taute i nā mea ia mai oku lewunga,” tana mea atunga.

22I te longonga a Iētū i te mea ia, mea oki iāna ki ai, “E tayi wua mea na pangā ai koe. Oko koe i au wī penupenu pau, tau atu ai i nā moni ki te kau vevé, eia lā koa maua ai oki ma au penupenu i te Langi. Eia, yau ai loa koe ālu mai ia aku.”

23I te wakalongonga a te tāne ia i nā talatala ia, wuwuli loa ona pale ki lalo, na kamuloa yōyātia, nō tēlā e tangata penupenutini iāna. 24Kakalo ai ia Iētū ki ai, mea loa pēnei: “Ko te konga tēnei ko wakaō ngatā ai te kau penupenutiní ki te Pātileia o te Atua! 25E waingāwie ake i te kāmela kē ulu lā loto o te pū o te nila i te tangata penupenutini kē wakaō atu ki te Pātileia o te Atua.”

26Uwi mai loa te kau na a lātou langoná kia ana, “Ko ai wua ai ka maua tona ola?”

27Pau atu loa pēnei ia Iētū, “Ko nā mea e yē maua i te tangata e te waí, ko waingāwie wua i te Atua.”

28Eia, mea mai loa ia Pētelo kia ana, “Ia mātou na maka pūpū loa i te wī mea pau i te ālunga ia koe!”

29Mea oki ia Iētū kia lātou, “Ko tala atu au i te tika, ko te tangata na maka i tona wale, tana wawine, pēkole, ona tāīna, ona tuaine ma ona mātutua, peia tana wuānga tama nō te Pātileia o te Atua, 30ka lā lunga atu te wolo o ana mea ka maua mai i te vāia nei, peia oki i te vāia ka yaú, ka maua ia ana te ola kāe ngatanga.”

Na yivayiva wakawōu ia Iētū i tona matenga

(Mātaiō 20:17-19; Māleko 10:32-34)

31Taki mai loa ia Iētū i te tino angaulu mā lua pipi ki te kaokao, mea loa peia kia lātou, “Onoono ake, ka wakaake tātou ki Iēlūtalema, kē tautonu lāi ki te wī mea pau nā tutingia mai e nā peloveta nō lunga o te Tama a te Tangata nei. 32Ka tukua iāna ki te kau Ētené, ko lātou ka wai akanaua, ka wakakinongia ma te yūvalevale atu ia ana. 33Ka vayi oki lātou ia ana, patu atu ai kē mate. Yaulā, e tolu ayo i muli mai, ka tū wakawōu iāna ki lunga.”

34Yaulā, e kiai na taka lelei i nā pipi nā mea ia. Na nanāngia te wakamaepanga o nā muna ia maia lātou, ko yē a lātou īloloa oki ni wea nā talatala a Iētū e yalu ia.

Na kakalo nā mata o te matapō talikai

(Mātaiō 20:29-34; Māleko 10:46-52)

35Koa tō pili ia Iētū ki Iēliko, nā nō te tangata matapō ia i tawa o te ngutuala, talikai wua ai. 36I tana longonga i te yolonga tangata ia koa pange ake ki mua, uwi loa iāna, “E wea te mea e tupu nei?” 37Tala loa te kau nei ki ai, “Ko Iētū o Nātalēta tēnei e wano atu nei.”

38Kakā oki iāna pēnei ki lunga, “E Iētū, te tama a Tāvita ia ē, wakaaloa mai ake au!”

39Ko te kau lā e yāele lā muá, wakalapa mai loa ia ana, mea loa ki ai, auyē iāna e vāvā; yaulā, wowo ongo ai loa tana kakā, “E te tama a Tāvita ia ē, wakaaloa mai ake au!”

40Eia, tū loa ia Iētū, wakaunga ai kē aumaia te matapō ia kia ana. Kē oko mai te matapō ia ki ona tawa, uwi loa ia Iētū kia ana, 41“Ka wea au ia koe?”

“E te Atu ē, ko winangalo au kē kakalo oku mata!” tana mea atunga.

42Talatala ai ia Iētū ki ai, “Eia lā, kē kakalo ō mata! Na yawea koe i tō lotokono.” 43Na peia ngatai, kakalo oki ona mata, ālu ai iāna i muli o Iētū, ko wai ma te talapaya i te Atua. I te kitenga a te wī tāngata i te mea ia, wakateniteni loa lātou i te Atua.

Currently Selected:

Luka 18: PKP

Highlight

Copy