Yanga 6
6
Te tokawitu tiākono na ikingia
1I nā ayo ia lāi ko wano atu nei te nūmelo o nā pipi ki te tokawolo, wakaamu loa nā Ngāti Iūta e ngangana i te leo Ēleni i nā Ngāti Iūta Ēpelá, nō tēlā ko kano kāyayā wua o lātou wāwine takawua i nā tuanga o nā popoa i te wī ayo. 2Eia, opo wakatai mai loa te tino angaulu mā lua āpōtetolo i te wī pipi, mea loa peia kia lātou, “Ko yē tautonu oki kē maka mātou i te yanga akoako i nā talatala a te Atua nō te manatunga kē wakayaele wua i te tuanga o nā popoa. 3Teia wua, e nā tāīna, iki mai kōtou mai loto o kōtou nā e tokawitu tāne longo lelei, ko kī i te Vaelua ma te tūwuwunga. Ka tuku mātou ia lātou kē wakayaelea te yanga nei. 4Yaulā mātou, ka tūwuli o mātou vāvenga ki te tataku ma te yanga vānangananga i nā talatala a te Atua.”
5Kamuloa te patanga tangata ia popole i te manatunga ia. Nō kiai, iki loa lātou ia Tetepano, e tangata māngoto Atua, ko kī oki i te Vaelua Yā; ko lātou oki ma Pilipa, ko Polokolo, ko Nikanola, ko Timona, ko Palemena ma Nikola, e tangata nō Ānētiōka na wakaōina i mua atu ki te ākonoanga Ngāti Iūta. 6Ko lātou te kau na tukuna mai ki mua o nā āpōtetolo kē tatakungia ma te tuku i o lātou lima ki lunga o lātou.
7Eia, mayoya ai te talatala a te Atua mai kiai. Matolu atu ai ma te pipi i Iēlūtalema, na tokawolo oki te kau tatakuvai na lotokono ki te Atu.
Na likongia ia Tetepano
8Ko Tetepano oki, e tangata na yulā wua i te yauyau nunui o te Atua ma tona mana, e wolo tana yanga wakawotu ma ana wakailo nā wai i te puyo o te kakai. 9Yaulā, tupu loa te ālainga mai nā toe tāngata o te walepule e meangia “nō te kau na wakatangangia”, ni Ngāti Iūta lātou nō Kūlene ma Ālekānētelea, mai nā wuti wenua oki o Kilikia ma Ātia. Wakatautotoko loa lātou ma Tetepano, 10yaulā e yē taupilitia e lātou te wōwonu o tona māwutu ma te Vaelua e talatala mai ai iāna ia.
11Eia, wakauyuuyu nanā loa lātou ni tāngata kē talayeke wua lātou pēnei, “Na langona e mātou iāna ko wakakino ia Mōte ma te Atua.”
12Na kamuloa te kakai ma te kau mātutua yōyātia, peia nā akoako tulé. Eia, liko loa lātou ia Tetepano, totoi mai ki mua o te Kōnitala. 13Aumai oki lātou ni tāngata kē talayayā wua ia ana, i nā meanga pēnei: “Ko te kovi nei, ko yē mutu tana wakakino i tō tātou yionga yā nei ma te Tule a Mōte. 14Na a mātou langona oki iāna nā mea pēnei, ko Iētū o Nātalēta, ko ona ka lepetia te Waleyā nei ki lalo, ka yua oki ēna nā tāpingā-wenua a Mōte na tuku mai kia tātou.”
15Eia, pupula wakanoi loa nā mata o te Kōnitala tākatoa kia Tetepano, kakalo atu lā ki tona tupu, kaina loa te tupu o te āngela.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau