Yanga 4
4
Ko i mua ia Pētelo ma Ioane o te Kōnitala
1Ia Pētelo ma Ioane e talatala nei ki te kakai i loto o te Waleyā, lōmamai loa nā tatakuvai ma te wakayaele wolo o te Waleyā ma nā toe Tātukea. 2Kamuloa lātou līlili i lua āpōtetolo nei, nō tēlā ko akoako lāua ki te kakai ma te wakamamata ē, i loto o Iētū e maua ai te tūwakawōunga o te kau na mamaté. 3Nō kiai, liko loa lātou ia lāua kave ki te waleāuli, nō tēlā e awiawi, maka ai ia lāua i kiai ki te tāyao. 4Yaulā, e tokawolo te kau na langona te talatala ia na loloku ki ai, oko ai te tokawolo o te tālē tangata talivave ki te limanga mano.
5Kē oko ki te tāyao, wakalulu loa te kau wakayaele, te kau mātutua ma nā akoako tule i Iēlūtalema. 6Nā i kiai ia Ana, te takuvai wolo, peia ia Kaiāpa, ko Ioane ma Ālekānētelo, ma te toe kau mai nā tautangata o te takuvai wolo. 7Mea loa lātou kē aumaia lua āpōtetolo ia kē wetū lā mua o lātou, iliili loa kia lāua pēnei, “Nō ai te mana ma te ingoa na maua ai ia kōlua kē wai i nā mea nei?”
8Ko Pētelo lā, na kamuloa kakale i te Vaelua Yā, mea loa kia lātou pēnei, “E nā wakayaele ma te kau mātutua o te kakai ia ē: 9Na valoa mai mō māua i te ayo nei kē iliilingia nō tā māua yanga lelei na wai ki te tangata pilikoki nei? Ka tala atu māua na mea pēwea na wakaolangia ai iāna. 10Onoono mai, kē taka ngaleka te mea nei ia kōtou ma te kakai tākatoa o Ītalāela: Na yawea te maki o te tangata e tū i mua o kōtou nei i te ingoa o Iētū Metia o Nātalēta, te tangata a kōtou na wakatātauló, yaulā na wakatūngia ki lunga e te Atua mai te mate. 11Ko Iētū tēnei nā talā mai e te Puka Yā,
‘Ko te watu na makatia e kōtou te kau patu walé,
na lilo mai wai watu aukaleka!’#Talamo 118:22; Luka 20:17; 1 Pētelo 2:7
12Kāe loa ola e maua mai e toe tangata; kāe oki ingoa atu i lalolangi nei na aumaia e te Atua ki te tangata kē ōla ai tātou.”
13I te onoononga a te Kōnitala i te tū matakukole o Pētelo ma Ioane, kamuloa lātou wulungia nā tino, nō tēlā e tokalua lāua e kiai na āpīngia, ni tāngata wua pēlā. Eia, mailonga ai ia lātou ē, nā tataka lāua ma Iētū. 14Yaulā kāe a lātou muna loa e maua, nō tēlā, ko tū wua mai te tāne na wakaolangiá i tawa o Pētelo ma Ioane. 15Eia, wakauwe loa lātou ia lāua kē wō mai te puyo o te Kōnitala, wuliwuli talatala wua ai lātou. 16Wakatau iliili ai lātou pēnei, “Ka pēwea tātou i te tokalua nei? Na mailonga oki i te kakai tākatoa o Iēlūtalema nei tā lāua yanga wakawotu nei, e yē maua ia tātou e te nanā. 17Yaulā, kē maua ia tātou e te pupulu wua i te mea nei auyē loa kē mayoya atu ki te wenua tangata, kē wakalapa lā tātou ia lāua, auyē loa e langaki wakawōu ki e tangata i te ingoa o Iētū nei!”
18Eia, tauvalo atu ai lātou ia lāua kē nīniko mai ki loto, wakauwe ai kia lāua, auyē loa e talatala ma te akoako atu i te ingoa o Iētū. 19Kākole lā te mea atunga a Pētelo ma Ioane kia lātou, “Wakamanatu wakalelei ake kōtou, ko tautonu lā i mua o te Atua kē wakamāmalu māua kia kōtou, pēkole kē talingatai māua ki te Atua. 20Nō tēlā, e yē maua loa ia māua e te wakamutu i te talatala nō nā mea a mātou nā onoono ai, nā wakalongo ai oki.”
21Eia, wowo atu loa tā lātou wakalapa ia lāua, yaulā, tuku loa lātou ia lāua kē wō. E yē maua oki ia lātou e te wakautunga ia lāua, nō tēlā, na talayikayika te wī tāngata i te Atua nō te yanga wakawotu na tupu ia. 22Ko te tāne oki na wakaolangia ia, na yika atu tona matawiti i te lauwā.
Te tatakunga a te kau e nunumí
23I te tukuinanga o Pētelo ma Ioane kē wō, nīniko loa lāua ki o lātou tāngata, tala ai kia lātou i te wī muna a nā tatakuvai wowolo ma te kau mātutua nā mea mai kia lāua ia. 24Kē langona nā mea ia e te kau ia, tauvalo wakatayi loa lātou tākatoa ki te Atua, tataku loa peia, “E te Atu Tiketike ē, ko koe na wowoungia nā langi, te wenua ma te tai, ma te wī mea tākatoa i loto o lātou!#Ēkoto 20:11; Nēmia 9:6; Talamo 146:6 25Na talatala mai koe lā loto o te Vaelua Yā ki te ngutu o tō tāvini ia Tāvita, tō mātou tupuna, mea loa peia,#Talamo 2:1-2 (LXX)
‘E wea te wī wenua na ita ai i te lili?
E wea oki te wī tāngata e wunawuna ai nā ngākau i nā mea kāyi kalú?
26Ko wetū mai nā aliki o te wī wenua ki lunga,
ko opo wakatai oki nā wakayaele
kē wakatotoko atu ki te Atua,
ma tana Metia na wakatapú.’
27Ēeke, na wakalulu ngaleka ia Ēlota ma Ponotio Pilato ma nā Ētene i te ōile nei, peia te kakai o Ītalāela, kē wuna lātou ia Iētū tō valoyeunga tapu, a koe na wakayinungia wai Metia.#Mātaiō 27:1-2; Māleko 15:1; Luka 23:1, 7-11; Ioane 18:28-29 28Na wai oki lātou i te wī mea a koe na manatu lā loto o tō mana kē wai peia. 29Nō kiai, e te Atu, onoono mai koe i a lātou wakalapanga e wai mai i te vāia nei, wakamāloyi mai koe i ō valoyeunga nei kē yalu wua lāi i au muna ma te matakukole. 30Lalao wakaloa mai tō lima wakaola i nā maki, ma te wai i nā wakailo wotu ma nā yanga wakawotu lā loto o te ingoa o tō valoyeunga tapu ko Iētū.”
31Kē oti tā lātou tataku, ngāluelue loa te konga e kaputi ai lātou ia. Wakakīngia loa lātou kakale i te Vaelua Yā, wō ai lātou wakamamata i nā muna a te Atua ma te matakukole.
Na tanga wua nā penupenu a te kau e nunumí
32Wakatayi loa nā ngākau ma nā manako o te pupu e nunumi ia. Kāe tangata loa ko mea nō ona wua ona penupenu, yaulā, tau wakatayi loa i a lātou wī mea kia lātou tākatoa.#Yanga 2:44-45 33Wakamamata loa nā āpōtetolo lā loto o te mana wolo i te tūwakawōunga o te Atu ko Iētū, kamuloa ūtutua wua nā yauyau nunui o te Atua i lunga o lātou tākatoa. 34Kāe loa tangata na kayā i loto o lātou. I nā toe vāia, ko te kau e yī o lātou wale ma nā potonga wenuá, oko atu loa lātou i nā mea ia, aumai ai i nā moni, 35tuku ki nā vae o nā āpōtetolo, eia, tau ai lātou wakalelei i nā moni ia kē kaleka ki te kau e tōngeleá.
36Na peia oki ia Iōtēpa, e tangata nō te ulaula o Levi na wānau i te wenua ko Kūpelo, te kovi e tauvaloa e nā āpōtetolo ko Pānapa (ko te wakamaepanga, “te tama wakamāloyi”). 37Oko loa iāna i tona potonga wenua, aumai loa i nā moni na maua, kave atu ai ki nā āpōtetolo.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau