Yanga 3
3
Na yawea te pilikoki
1I te toe ayo, wō loa ia Pētelo ma Ioane ki te Waleyā i te ola tolu i te awiawi, i te okonga ki te vāia tataku. 2Eia, e tayi tāne na pilikokia mai tona wānaunga, amongia mai loa iāna ki te pū o te Waleyā e lapaina ko Te Pū Popoti. Ko aumaia wakakeingia iāna i te wī ayo ki te pū ia kē talikai moni ai ki nā tāngata e wō ki loto o te Waleyā́. 3I tana onoono atunga ia Pētelo ma Ioane koa ūlu mai ki loto, talikai loa iāna kia lāua kē aumai ni moni mā ana. 4Kakalo yako mai loa lāua kia ana, mea atu ai ia Pētelo ki ai, “Onoono mai koe kia māua!” 5Eia, kakalo mai ai iāna kia lāua i te manatunga, ka maua ana mō mea maia lāua.
6Kākole lā te meanga a Pētelo kia ana, “Kulakulanga kole aku tiliva ma te kōlo, ko taku mea wua e takoto nei, teia lāi te mea āku ka avatu kia koe. I te mana o te ingoa o Iētū Metia o Nātalēta, tū koe ki lunga, yaele!” 7Eia, liko loa ia Pētelo i tona lima mātau, wakatū ki lunga, na peia wua ake, keketu oki ona vae ma ona watingā-vae. 8Wao loa te tāne ia ki lunga, kāmata ai e te yaele. Eia, ālu ai iāna lā muli o lāua ki loto o te kolo o te Waleyā, yāeleele ai ma te waowao ki lunga i te talapayanga i te Atua. 9I te kitenga a te kau nā i kiaí ko yāeleele iāna ma te talapaya i te Atua, 10iloa ai e lātou ko te tāne teia nā nō i te pū o te Waleyā e lapaina kia Popotí, na kamuloa lātou vili nā ate ma te mīmīngutu wua i te mea na waingia kia ana ia.
Te akonga a Pētelo i loto o te Waleyā
11Ia ana e liko ki lunga o Pētelo ma Ioane ia, na kamuloa te wī tāngata mīmīngutu wua, mangungu mai loa kia lātou e i te pōlōtiko e meaina nō Tōlomoná. 12I te onoononga a Pētelo ki te wainga tangata ia, mea loa kia lātou, “E oku tautangata Ītalāela ia ē, e wea o kōtou ate na vili ai i te mea nei? E wea oki kōtou e pupula mai ai kia māua pe te mea nō māua te mana, pēkole te tū tau Atua na maua ai te tangata nei e te yaele? 13Ko te Atua o Āpelaama, o Ītaaka ma Iākōpa, ko te Atua o o tātou tūpuna, na wakatiketikengia tona valoyeunga ko Iētū. Yaulā kōtou na kave ia ana kē patua, tuku yakayaka oki e kōtou iāna ki mua o Pilato, tēnei ia Pilato e tonoi nei kē tuku ia ana kē wano.#Ēkoto 3:15 14Na maka pūpū oki kōtou i te Mea Yā Tū Tautonu ia, naumate lā kōtou kia Pilato kē tuku ki vao i te tangata patu tangatá.#Mātaiō 27:15-23; Māleko 15:6-14; Luka 23:13-23; Ioane 19:12-15 15Na patu kōtou i te Puyo o te Ola, yaulā, na wakatū mai te Atua ia ana mai te mate, ko mātou oki nā kite o te mea ia. 16Nō te lotokono ki te ingoa o Iētū na aumaia te māloyi ki te pilikoki a kōtou e kakalo ai nei, nā mātau ai oki kōtou kia ana. Nō te ingoa o Iētū ma te lotokono kia ana, na yawea ngaleka ai te tangata nei, pē a kōtou onoono mainga nā.
17Nō kiai, e oku tāīna, na aku iloa oki nō te tū valetiko na peia ai kōtou ma nā wakayaele. 18Yaulā, ko te manatunga lāi tēnei a te Atua kē wakatupu i nā talatala āna nā yivayiva mai e te wī pelovetá, na mea mai oki ka takikinongia tana Metia. 19Nō kiai, yalayala kōtou ma te wulitonu ki te Atua, kē yuaina a kōtou yala, kē wakawōungia kōtou e te Atu, 20kē unga mai oki iāna i te Metia, ia Iētū na iki takelengia mō kōtou. 21Ka nō wua iāna i te Langi, oko wua atu ki te vāia ka wakawōu ai te Atua i te wī mea, na wakaponoa takele mai ēna lā loto o nā peloveta tatapú. 22Na mea oki ia Mōte, ‘Ka wakatū mai te Atu tō kōtou Atua e peloveta mō kōtou pē eku nei, mai loto lāi o ō tāngata nā. Kē talingatai kōtou i te wī mea tākatoa āna ka tala atu kia kōtou.#Teutelonomi 18:15, 18 (LXX) 23Ko te tangata e yē wakalongo i te peloveta ia, ka makatia iāna ki tātea mai nā tautangata o te Atua.’#Teutelonomi 18:19
24Ko tonu ngaleka, ko te wī peloveta nā talatala mai, maia Tāmuela oko wua mai ki te kau mumulí, nā yivayiva mai lāi i nā yanga e waingia i nā ayo nei. 25Ni ulaula oki kōtou nō te wī peloveta, ko i loto kōtou o te wakapononga a te Atua na mea ki o kōtou tūpuna. Na talatala oki iāna kia Āpelaama, ‘Lā loto o tō ulaula ka wakalelei ai au i te wī tāngata o te ao nei.’#Kēnete 22:18; 26:4 26Nō kiai, iki loa te Atua i tona valoyeunga ia, unga mai loa taumua kia kōtou, kē wakaleleingia kōtou i te meanga kē wuwulingia kōtou takitai mai a kōtou yanga kikino.”
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau