Mui Psalm 119
119
ALEPH.
1Ikire muini ni haa dianaanga ko saetaha isulie tala: ko laelae isulie haatolanga a Lord.
2Ikire kira ini ni haa dianaanga ko kinetainie wala ni unu haahoainge ingeie: na ko heitalea ana ahutana saena.
3Mwala otona kaa palopaloa orahaa: tae ko laelae ana tala ingeie.
4O haauresie haausulinge ioe: uri emi ke kinetai mwaemwae ana.
5Na uri e kaa aliu odoodo ana tala ingeie: ni kinetainie wala ni harainge ingeie.
6Mala sapeku e saa kalawa ike ana: ana noko mamakerehie mu haatolanga ioe.
7Nekei palaheo ani sae odoodo: ana nou manatainie haatolanga ni lei odotainge ioe.
8Na ni kinetainie wala ni harainge ioe: mwane o taitehi mwaanieu oto.
BETH.
9Itehulaana nga meita saanau ke dau rerea ana tala ingeie? huni liolio isulie walamu.
10Nou heiheitaleo ana ahutana saeku: suuri toliasieu neke takalo mwaanie mu haatolanga ioe.
11Nou onimei konie haalunge ioe ilaona saeku: mwane nou tateingeinie.
12Emi ko laheo, Lord: Oke haananaueu ana wala oko unuunui.
13Ana i ngiduku ni oto nou tarohainie: ahutana mu haatolanga ni leinge ure i ngidumu.
14Nou lai sao mango ana wala ni unu haaoainge ioe e oa: mala uri molani ola ani teriolanga ngaini e saa idu suheni.
15Neke neisae mwamwanoto isulie wala ni haausulinge ioe: na ni toomaie mu tala ioe.
16Nekei ileilenimwae tohuku aena walani harainge ioe: nou saa roroa pulongo tainie ike walamu.
GIMEL.
17Oke niie niinge hunie inoni ioe, neke maumeuri ana: nge kei urine nge sulu isulie walamu.
18Oke tahanie maaku: nesi toomaie walu ola ni pangatainge ana mu haatolanga ioe.
19Ineu oto nga awata ilaona walumalau: mwane o mumunie mu haatolanga ioe mwaanieu.
20Maurihaaku ko mariirii oto ani herihunie: tolahani leinge ioe suli heidinge.
21Oko ere ni haananaue muini ko neisae tohainire maraada: ikirena kira hoahoasi, kire takalo hainie haatolanga ioe.
22Oke taasie mwaanieu saeni maleledinge na neisaenga ni mwakatainge: aena noko kinetainie wala ni unu haaoainge ioe.
23Mui Alaha noone kire io iano kire ko talei sisiho aku: tae inoni ioe ko talei looloongainie mola wala ni harainge ioe.
24Wala ni unu haaoainge ioe lou e kohi nakue: ana ko peieu eni unu haaoai olanga.
DALETH.
25Maurihaaku ko rarao oto peie mwakano: Oke haamwaemwaeau alihoi isulie walamu.
26Nou unu tahangainie mu tala ineu, na o alamieu: Oke haausulieu ana wala ni heiusungeinge ioe.
27Oke da neke saenanau ana tala ni haatolanga ioe: hunie nesi lolodosae ana palonga ni pangatainileni ioe.
28Maurihaaku ko ano mai ani saehuunge: Oke haasusueu elihoi isulie haiholotainge ioe.
29Oke taasie tala ni eronga mwaanieu: Oke niie sae diananga nakue ana haatolanga ioe.
30Nou lio hilisie nakue tala ani taloahunge: nou neie haatolanga ni leinge ioe honotaku.
31Nou io mautaa ue isulie wala ni unu haaoainge ioe: Lord, mwane o haamasaau.
32Noko huru isulie tala ni haatolanga ioe: isulie o saeku ke taha.
HE.
33Lord oke haausulieu ana mu wala haatolanga ioe: hunie neke kinetainie taraasi.
34Oke niie saenanaunge nakue, nge nekei kinetainie mu haa tolanga ioe: na ni sulu isulileni ana ahutana saeku.
35Oke naoku isulie tala ni haatolanga ioe: ana saeku ko rikerike i nunuhaani.
36Oke da saeku ke norutoo ana mu wala ni laladonga ioe e malisi: na suuri ana tariolanga.
37Oke da neke lio aopa mwaanie mwane nou toomaie walu ola tauteu: Oke haaurieu isulie tala ioe.
38Oke haasusue inoni ioe ana haiholotainge ngeena: ke adona haamaunge amu.
39Oke haaliue mwaanieu moola ni heileledinge noko meumeu teinii: ana wala hi leinge ioe e diana.
40Lio kau, saeku ko hanalie wala ni haausulinge ioe: Oke haaurieu ana tolahamu e odotai.
VAU.
41Amasinge ioe, Lord, ke hule mai eku: maurihaamu ena, isulie haalunge ioe.
42Alitana ena nekesi ere ni alamilana ini ko ere leledieu: ana nou norutoo ana walamu.
43Suuri taasie mu wala toohu haataulie ngiduku: ana noko mamaohie mu wala ni leinge ioe.
44Alitana ena nekei tarau ana haatolanga ioe: oto di oto di.
45Na nekesi lae mamauware: isulie urinena ana nou heiheitalea mu wala ni haausulinge ioe.
46Na nekei ereere ana mu wala ni laladonga ioe e malisi inaoda mu inemauri: nge nou saa masa i nunuhaani.
47Na neke si rikerike i nunuhaana mu haatolanga ioe: lehu ngeena nou heri hunie.
48Nge nekei susueinie nimeku takoie mui haatolanga ioe nou sae paine ani: nekei looloongai isulie mu wala haatolanga ioe.
ZAIN.
49Oke amasitoo alihoi ana mu wala ngeena hunie inoni ioe: Oke da hunie neke maohi susutoo ana.
50Ienini saedodonga na siohaanga ineu: ana haalunge ioe e haa mwaemwaeau.
51Mwala ko haatohainire maraada na kire ko lae otoi mweimwesi mwaanieu: tae nou kaa due alihoi mwaanie haatolanga ioe.
52Nou amasitoo ana tolahai leinge inao, Lord: nge saeku esi dodo alihoi.
53Aririne e toleau aena kira orahaa: mwalana ena kire toli puri ana haatolanga ioe.
54Kana ineu ena ana mei wala haharai ioe: ilaona nume nou ioni deunge mola ilaona.
55Nou amasitoo ana satamu, Lord, irodo: na nou kinetainie haatolanga ioe.
56Mu inine oto aku: ana nou hele oto ana mu wala haausulinge ioe.
CHETH.
57A Lord e rarau eku: nou unue oto nekei rongo hunie walamu.
58Noko eieitanai uri oke saediana hunieu ana ahutana saeku: Oke lio ni amasinge isulie haalunge ioe.
59Nou lolodo sae ana mu tala ineu: na nou haaaliue aeaeku isulie mu wala ni unu haaoainge ioe.
60Na lauleu, na nou kaa haahiru ike: huni kinetainie mu tolahai haatolanga ioe.
61Qanu kira orahaa e hiriieu: tae nou kaa pulongo tainie haatolanga ioe.
62I upui rodo nekei taelai ni palaheo: aena ana haatolanga ni leinge ioe e odotai.
63Ineu ena mwala hunge ahutana mwala ko haahaamau emu: peie muini ko kinetainie mu wala ni haausulinge ioe.
64Walumalau, Lord, e honu ana amasinge ioe: Oke haausulieu ana mu wala ni haatolanga ioe.
TETH.
65O asu ni sae diananga peie inoni ioe: Lord isulie walamu.
66Oke haausulieu ani lei odotai na ani sae nanaunge: ana nou norutoo oto ana haatolanga ioe.
67Maholo nou kaa siohaa ineu oto nou tatakalo: tae maholo ie noko kinetainie walamu.
68Ioe o diana, na helelamu e diana: Oke haausulieu ana wala ni hei usungeinge ioe.
69Muini ko tohainire maraada e qelu wala eroero honosieu: na nekei kinetainie mu wala ni haausulinge ioe.
70Oqada e susu oto ana rakuhe: tae ineu noko rikerike ana mu haatolanga ioe.
71E diana hunie ana e haasiohaau: uri neke saenanau ana wala ni harainge ioe.
72Haatolanga urei ngidumu e diana hunieu: mwaanie mu gold na mui mola ni mola ani Silver.
JOD.
73Nimemu e haaholau na e sooisulie sapeku: Oke niie mai sae nanaunge hunieu: uri hunie neke saenanau ana tolahai haatolanga ioe.
74Mwala ko palopaloo kire kei leesieu kire kosi ileilenimwae hahie: aena nou maohi susutoo ana walamu.
75Nou manatainie, Lord, uri leinge ioe e odotai: na uri o haasiohaau hatanga diana.
76Nou haatohu emu, uri manata diananga ioe ke haadodoa saeku: isulie walamu hunie hairaretai ioe.
77Amasinge ioe ke siho hahieu, hunie neke mauri: ana noko ilenimwae hahie tolahai haausulinge ioe.
78Mui ko tohainire maraada kei masa; ana kire ase eronga ilengiku: tae neke lolodosae mwamwanoto isulie mu wala ni haausulinge ioe.
79Mwala ko haahaamau emu kire ko loko mai sulieu: kire kesi saie mu wala ni ladadonga e toohu.
80Saeku ke wala mango isulie mu wala ni hei usungeinge: uri hunie neke suuri io ni masanga.
CAPH.
81Maurihaaku ko heri hunie mauringe ioe: nge noko mamaohie susutoo ana walamu.
82Maaku e mumuni ue ana walamu: oto nou ere urini okei haadodoa saeku ingenite?
83Ana nou urihana oto hoi atea teeteeipo ilaona qaulei dunge: tae nou saa pulongose mu haatolanga ioe.
84Qongine hai raretai ioe e nite oto ana: ingenite oke si lei tooana mwala ko teuteungeinieu?
85Kire neisae tohainire kire elie mui kelinge lou loosieu: tae kire kaa sulu isulie mu wala ni haausulinge ioe
86Mui haatolanga ioe e huleitana: kire ko teungeinieu ani eronga; Oke lauhieu.
87Tatahana oto kire ke taasieu mwaanie walumalau: tae nou kaa tolipuri ana mu wala ni haausulinge ioe.
88Oke haa rangasieu alihoi isulie manata diana ioe: kei urine nekei kinetainie mu wala ni laladonga ure ana nidumu.
LAMED.
89E saa mola oto hu, Lord: kire haamautaa walamu tai lengi.
90Tolahamu e huleitana taenanga qaunge: O haaurese walumalau nge e io ue.
91Hule mai ana mu dinge ie kire ure isuli wala ni hei usungeinge ioe: aena ahutana waluola ko meni nei hairaretai namue.
92Nge uri tolahai haausulinge ioe kaa ola ike uri neke ilenimwae ana: nou eia oto ana ionga ineu.
93Nou saa roroa pulongese wala ni haausulinge ioe: ana o soi hadai eku alihoi.
94Ineu, ini ioe, Oke haaurieu: ana nou heiheitalea wala ni haausulinge ioe.
95Kira orahaa ko maohieu huni taasieu: tae nou neisae moutei ana mei wala ni laladonga ioe e toohu.
96Nou leese ngengedena ahutana moola e wala mango: na tolahai usungeinge ioe e paine na e ahureha.
MEM.
97Nou manata diana hunie mui haatolanga ioe uri taa kau: na nou heitale onimei suli heidinge.
98Mui haatolanga ioe ko haasaieu mwaanie mui maeloonga ineu: ana leune e io oto hu oto aku.
99Na nou lai saenanau liutana mwala ko haahaausulieu: ana mui wala ioe e malisine oto moola noko looloongai mwamwanoto ani.
100Na nou saiola liutana mui ratonimwane: ana nou kinetainie wala ni haausulinge ioe.
101Nou haaapue aeaeku mwaanie taenanga tala e aela: hunie neke kinetainie walamu.
102Nou haa opa mwaanie tolahai leinge ioe: ana o haausulieu.
103Walamu e lai melimeli i ngiduku: liuta ana sului ngingidue.
104Nou saiola isulie mui wala ni haausulinge ioe: aena ana nou ngiduupu hunie ahutana mui tala ni eronga.
NUN.
105Mei wala ure amu e nei sine talana aeaeku: raraa hunie tala ineu.
106Nou ere ni haapunge na ni ere haasusu: na ni kinetainie wala ni leinge ioe e odotai.
107Haa motahileku e liuta: Oke haalalainieu alihoi isulie walamu.
108Lord noko haatohu emu, oke hele ana mui ununge ni mwaemwaenga ure ana ngiduku namue: na oke haausulieu ana tolahai leinge ioe.
109Maurihaaku ilaona nimeku tarau: na nou saa tohungei pulongo tainie haausulinge ioe.
110Kira orahaa e lolo hune loosieu: tae nou kaa takalo hainie mu wala ni haausulinge ioe.
111Nou hele ana mu wala ni laladonga e malisine moola kei io hu: ana leu saeku ko ileilenimwae i nunuhaana.
112Nou ahea manataku isulie mu wala ni heiusungeinge ioe: e saa mola oto di, hule i ngengedena.
SAMECH.
113Nou sae unuhie mwala manatada e rueruaa: tae nou heri hunie oto tolahai haausulinge ioe.
114Ioe lehu ni mumuninge ineu: na mei talo honotaku: nou maohi susutoo ana tolaha ioe.
115Omu ke hoalai mwaanieu, iomu mwala palonga iomu e aela: hunie neke kinetainie tolahai haatolanga a God ineu.
116Oke suluieu isulie walamu, hunie neke mauri: tai neu neke suuri masa hahie maohinge susutoo.
117Oke sulu alaa aku hunie neke io mamauware: na neke neisae hahie mu wala ni haausulinge ioe.
118O haa mwaimweia muini ko lai tatakalo mwaanie mu wala ni heiusungeinge ioe: ana mu palonga kokoro ni eronga ikire.
119O neiasie ahutana kira orahaa ana walumalau mala mu hero mahuro: isulie urinena nou heri hunie mu wala ni unu haaoainge ioe.
120Hasioku ko asoso ana mauteinilemu: na ana mauteinilana tolahai leinge ioe.
AIN.
121Nou palopalo isulie tolahai leinge na leinge odotai: mwane tolipuri eku hunie mwala ko pili teteau hou.
122Oke tari honose hairaretai ioe ana e diana: mwaanie kira neisae tohainire maraada e aailaa honosieu.
123Maaku kei tala oto ana haauringe ioe: na ana walamu e odotai.
124Oke asu meiola hunie hairaretai isulie amasinge ioe: na oke haausulieu ana mu wala ni heiusungeinge ioe.
125Ineu hairaretai ioe, oke niie mai hunieu saiolanga: uri neke manatainie mu wala ni unu haaoainge ioe.
126Qongine a Lord e siho oto huni palopalo: ana kire mwakaterehainie tolahai haausulinge ingeie.
127Isulie urine nou saetooana tolahai haatolanga: e liuta ana mwaanie mu Gold, toohu e liuta mwaanie mu gold.
128Isulie urine nou neisae hiehie ana mu wala ni haausulinge ioe na ana ahutana waluola e diana: tae nou sae asie walu tala ni eronga.
PE.
129Mu wala ni unu haaoainge ana muola ni pangatainileni: isulie urinena maurihaaku ko kinetai.
130Na ni unu tahangainie walamu ko haamataqa: ko niie saiolanga hunie kira puo.
131Nou totolongai peine, ani awanganga: ana nou sae hanalie mu haatolanga ioe.
132Oke lio alieli mei takoie, na oke amasieu: mala o qaoqaoi keu hunie mwala e sae paine ana satamu.
133Oke ahe diana ana saeku isulie walamu: na mwaanie orahaa e sakaahieu.
134Oke hanuieu mwaanie haa ni pili mu inoni: kei urine nekei kinetainie mu wala ni haausulinge ioe.
135Oke rangie konikonihe ioe ana maamu: na oke haausulieu ana mu wala ni haatola ioe.
136Mei wei ni akalo ko ahe hou mwaanie maaku mala mu wei peine: ana kire kaa kinetainie haatolanga ioe.
TZADE.
137Manatamu e odotai, Lord, na tolahai leinge odotai ioe.
138O haiusungei tohumu ana mu wala ni unu haaoainge ioe ana manatanga e odotai: na ana manatai raroninge e liuta.
139Na tolahai nisulinge ineu, ko welehieu: isulie mu maeloonga ineu e puotainie walamu.
140Walamu e manomanolaa: isulie urine hairaretai ioe e saetoo ana.
141Ineu ini mweimwei na ni maleledinge: tae nou saa pulongose wala ni haausulinge ioe.
142Odotainge ioe e odotai oto hu: tolahai haausulinge e toohu.
143Utolinge na haani pili e hite aku: tae mu haatolanga ioe e mataqa liuta.
144Mu wala ni unu haaoainge ioe e odotai oto hu: Oke niie mai hunieu saiolanga hunie neke mauri.
KOPH.
145Nou soisoi ana ahutana saeku: Oke alamieu Lord: neke kinetainie wala ni harainge ioe.
146Nou soisoi oke haaurieu: na neke kakalie mu wala ni unu haaoainge ioe.
147Nou haahuo i mahuohuo nou soisoi: na nou maohi susutoo ana walamu.
148Maaku e lio lauleu i rodo ana mu maholo ni lionga i rodo: ni neineisae isulie mu wala ioe.
149Oke qarongo isulie walaku isulie tolahani sae diananga: Oke haamwaemwaeau alihoi isulie tolahamu oto.
150Mala ko luluisulie tolahani orahaa ko karaini oto mai: kire io ahoa oto haatau mwaanie haausulinge ioe.
151Ioe o karaini oto mai, Lord: na tolahani haatolanga ioe e toohu.
152Oto ure oto wau waite saeku e tahanie mu wala ni unu haaoainge ioe toohu: uri o haaure ngaingedi oto hu.
RESH.
153Oke neineisae ana ionga ni siohaanga ineu na oke haaurieu: ana nou saa pulongose mu haatolanga ioe.
154Oke rarahahieu ana mei neisaenga ineu, na oke tapaolisieu: Oke haamwaemwaeau isulie walamu.
155Haauringe e haataulie kira orahaa: ana kira kaa haiheitalea mu wala ni heiusungeinge ioe.
156Saeni amasinge ioe e paine, Lord: Oke haamwaemwaeau isulie mu wala ni leinge ioe.
157Mwala ko ketaketaau na kire ko heukama honoieu kire lai hunge: na nou kaa opa mwaanie unu haaoainge ioe.
158Nou leese mwala ko palopalo eroero, saeku ko lai hu hahie isulie kire kaa kinetainie mu wala ni haausulinge ioe.
159Oke neineisae uri noko manata diana urita hunie mu wala ni haausulinge: Oke haahalaau elihoi eku Lord, isulie sae ni manatanga.
160Naohai ola ana walamu e walaimoli: na mei wala ni leinge ioe kei io hu.
SHIN.
161Mu naohai mwane ko teuteungeinieu na kaa too aena: tae saeku e io mautaa ani haamaunge ana walamu.
162Noko saesae mango hahie walamu: mala nga ini e lio odoie muola hunge nana.
163Noko mamakolase na noko sereinie eronga: tae nou saetooana wala ni haausulinge ioe.
164Noko palaheo haahiu ani heidinge: leinge ioe e odotai.
165Sae mangonga liuta ada muini ko heri hunie oto haatolanga ni haausulinge ioe: nga meola ni haa mauora haike ada.
166Noko maaohi susutoo ana haauringe ioe, Lord: na nou esu isulie mu haatolanga ioe.
167Maurihaaku e kinetainie mu wala ni unu haaoainge ioe: na nou lai sae tooani liuta.
168Nou kinetainie wala ni haausulinge na wala ni unu haaoainge ioe: na mu tala ineu oto amu.
TAU.
169Awaranga ineu ke hule taau emu, Lord: Oke niie mai hunieu saenanaunge isulie walamu.
170Wala ni eitanainge ineu ke hule taau emu: Oke haaurieu isulie walamu.
171Ngiduku ke unu tahangainie wala ni palahenga: ana o haananaueu ana wala ni haananaunge ioe.
172Wawaku ke totolongainie walamu ani kananga: ana mu wala ni haatolanga ioe e odotai.
173Maamu hahieu huni peileku: ana nou lio hilisie wala ni haausulinge ioe.
174Noko maaohi ani sae madoro ana haauringe ioe, Lord: na tolahai haausulinge ioe meola oto noko lai saesae mango hahie.
175Maurihaaku ke mauri, na kesi palaheo: na tolahana leinge ioe kesi peieu.
176Na nou tatakalo mala sheep e takalo; Oke haitalea hairaretai ioe: ana nou saa pulongotainie mu haatolanga ioe.
Currently Selected:
Mui Psalm 119: apbPSA
Highlight
Copy
Compare
Share
Want to have your highlights saved across all your devices? Sign up or sign in
First published as part of the Anglican Prayer Book by the Melanesian Press, 1946.
