Mui Psalm 109
109
1Oke suuri rohuteinieu God: aena ana palahenga ineu.
2Ana wawana a orahaa, na mu wala ni eronga, kire angawawa honosieu eni: laladonga eroero ikire ana meada.
3Kire ala pupu lou kalieu ana mu wala ni ketaau: kire oho honosieu na e kaa too aena.
4Ana manata diananga ineu tae kire ko apa ni mae ue hunieu: tae ineu taane ani palonga.
5Na kire neie mui qeai ola ilengiku olise mui tohungei ola: na sae unuhinge ikire olise saediananga ineu.
6Tae oke neie leune ilengine inoni ni orahaa: na a maeloonga kei ure i qaloqalona.
7Ana leilana a orahaa na maholo kei isita mai kei lei tooana: na palonga ingeie kei nei orahaa.
8E saa too qongine: ngaini aopa kesi hele olisie ana iohana.
9Maeni kalena ke raiinge: hue ingeie ke nao.
10Maeni kalena kei talei meimeileinire mola kire kei susuke ngau: iohada kei naonga.
11Ini tataala e hele laue tootoolana: mu mehuara kei tekelainie talahuliana nimada.
12Ngaini ke suuri nei hairaretai hunie: na ngaini ke suuri amase maeni kalena e raiinge.
13Na ikire mui weuwada na kire kei moutoli oto: na kire kei taase satada ana mu qeune ikire i puri.
14Na kei neineisae ana tolahana amana e takalo hainia Lord: na suuri taasie roroanga a nikana.
15Na kire kei io hu inaona Lord: na kesi tapa mousire mwaanie neisaenga lou ada i welumalau.
16Ana ingeie ngeena e kaa amasitoo ana amasinge: tae ko teungeinie inoni e maitale na ini saena e maoioi ni horo maeana.
17Siue e saetoona wala ni hei uesinge, hunie ke rarao oto ana: e haataulie wala ni haa dianaanga.
18E uloa ana wala ni hoasinge mala tooni ingeie: hule i saena mala wai, mui suisuli mala rumu.
19Tooni oto ingeie huni tooni ana: na roro tooni ko hoose suli heidinge.
20Nge otona suu olanga hunie mu maeloonga ineu ure mai ana Lord: na hunie muini ko ere tataala hunie maurihaaku.
21Tae oke apa ni mae peieu, God Lord ana Satamu: ana amasinge ioe e paine oke haaurieu.
22Ana ineu ie nou meitale noko siohaa: saeku na maurihaaku e liliepule.
23Nou eia lauae mala nunuiola ko ehutata: noko tooai heiliu mala uri oru.
24Uruuruku ko asoso aena hiolanga: na hasioku ko tola tale oto kaa qieqiala oto lou.
25Nou aehota neie leu ni hei leledinge hunie mui inoni: kire ko leesieu ani teinilana qaude.
26Oke peieu mei Lord God ineu: Oke haaurieu mei isulie amasinge ioe.
27Hunie kire kesi manatainie oto ninimemu: namue otona, palolana a Lord otona.
28Ikire mwala ni hei uesinge haliite, tae ioe ani palahenga: kire kei taelai pei masanga, tae mwala ioe ani ilenimwaenga.
29Kei tooni hahira maeloonga ani neisaenga haamwamwatealada: kire kei eluhi hahire ani maeleledinge mala haau.
30Nekei totolongainia Lord ana walaku: na palahenga ineu i matolana taenanga inoni.
31Na kesi ureure i qaloqalona maitale: nge kesi haaurie mwaanie muini e lei tooana maurihaana.
Currently Selected:
Mui Psalm 109: apbPSA
Highlight
Copy
Compare
Share
Want to have your highlights saved across all your devices? Sign up or sign in
First published as part of the Anglican Prayer Book by the Melanesian Press, 1946.
