Lukas 6

Is Tenarak Yèsus bekuwase keꞌjèk

(Mat 12:1-8; Mrk 2:23-28)

1Bil èn Is Tenarak, Yèsus ròb hèhoh-hèhoh Eh umcha-chib èn selay gandum, dak mèn hèhoh Eh umtelèh mad gandum. Dak umgèrsëj nòm tikh dak umgéy. #Ter 23:25. 2Maròp-maròp guruk agama nòm pitak Parisi umchal, “Nahey inyob kèrjak bok nyob telèh gandum èn Is Tenarak? Tok nyob hoh ma hukom agama èk!”

3Yèsus nasaꞌod, “Pastik nyob hòj nyob bache èn kelòj Kitab ilok rik Rajak Daud nateꞌèl, mase nanak ròb hèhoh eh umcherok tok benèygéy? 4Nanak namòj ma Dékh Allah dak imam naꞌog ma rik nak ruti rik hòj umjamuk ma Allah. Dak Daud nagéy ruti nak, dak naꞌog ruti nak ma mèn hèhoh eh keꞌjèk. Tapik èn hukom agama èk, had mèn imam hék boléh géy ruti nak.” #Im 24:9.#1 Sam 21:1-6.

5Dak Yèsus nachal ma umnak, “Jadik Yék, Sènꞌòy Nòm Sorga, ibekuwase bok mok hak Yéh imchal ilok rik boléh èmteꞌèl èn Is Tenarak.”

Yèsus natèrhakh sènꞌòy rik bekantem èn Is Tenarak

(Mat 12:9-14; Mrk 3:1-6)

6Bil èn Is Tenarak mòy, Yèsus nawèk ma dékh senindol dak nabetènglèkh. Èn anak mok néy sènꞌòy rik ènlẽng tikh tep eh nabekantem. 7Maròp-maròp guruk agama ròb sènꞌòy Parisi umkèk nòng untok mutanas ma Yèsus. Sebab nak umnak umtemèl jèngling ma Yèsus mok ke namtèrhakh sènꞌòy nak èn Is Tenarak. 8Tapik Yèsus nalèkh ilok rik umbèdlod. Dak nachal ma sènꞌòy rik ènlẽng tikh eh bekantem nak, “Jok lah, ted èn gagid doh.” Sènꞌòy nak pon nawòg dak nated èn anak. 9Dak Yèsus nachal ma umnak, “Yék imtanyak ma nyob: kalòw èhoh ma Hukom Tuhan, ilok rik boléh èmteꞌèl èn Is Tenarak? Èmteꞌèl méj atòw èmteꞌèl jèdhad? Èmtèrgos sènꞌòy atòw èmkèrbes?” 10Yèsus nawãr nanéh ma umnak kenèmbek, dak nachal ma sènꞌòy bekantem nak, “Tadok tikh hãh nak.” Sènꞌòy nak pon naꞌuy gerèk nak, dak tikh eh pon hòj nahakh.

11Tapik mèn guruk agama ròb sènꞌòy Parisi umꞌõl geb, dak umbepakad ilok rik muteꞌèl ma Yèsus.

Yèsus napili nar belas rasul

(Mat 10:1-4; Mrk 3:13-19)

12Nòm kerek nak Yèsus nawèk naꞌòj ma pok untok nampèꞌtak. Nanak napèꞌtak ma Allah sepanjang layèg nak. 13Bil hòj is jakal Nanak nakòw ma mèn hèhoh Eh, dak napili nar belas sènꞌòy nòm umnak. Yèsus natèrjal kenëh um rasul: 14Simon (rik Yèsus natèrjal kenëh pay eh Pètrus) ròb pek eh Andréas, Yakobus, Yohanès, Pilipus ròb Bartoloméus, 15Matius ròb Tòmas, Yakobus kuwòt Alpius ròb Simon (rik umdéh sènꞌòy Zèlot#6:15 Zèlot Sènꞌòy Zèlot rik bekerèngdakh supaye sènꞌòy Israꞌèl bébas nòm kerajaꞌan Roma.), 16Yudas kuwòt Yakobus,#6:16 Yudas kuwòt Yakobus Èn bukuk mòy, hèhoh Yèsus doh umkòw Tadius. ròb Yudas Iskariot rik akal natulong mèsmus muròt ma Yèsus.

Yèsus nabetènglèkh dak natèrhakh ma jajéh sènꞌòy

(Mat 4:23-25)

17Kerek nak Yèsus nataw nòm pok samak nar belas hèhoh Eh nak, dak umted èn tèk hèldey samak jajéh sènꞌòy mòy rik umhèh-hoh ma Yèsus. Dak èn anak mok keꞌjèk sènꞌòy jajéh rik umlãj nòm kenèmbek negerik Yudéya, nòm Yèrusalèm, ròb nòm kote Tirus ròb Sidon èn béng laud. 18Umnak umlãj untok mukeyòkh tenènglèkh Yèsus bok untok namtèrhakh nòm chenèk umnak. Sènꞌòy rik sèd-sid yel jèdhad umlãj keꞌjèk, dak Yèsus natèrhakh ma umnak. 19Kenèmbek sènꞌòy ibuk nak umteréy mupèk-pek ma Yèsus, sebab mok kuwase nahuwòl nòm Rik Nak dak natèrhakh ma umnak kenèmbek.

Enadés ròb derite

(Mat 5:1-12)

20Yèsus nayad ma mèn hèhoh Eh dak nachal:

“Beꞌadés lah, nyob rik hèl-hal,

sebab nyob lah rik Allah naterime ma kelòj Kerajaꞌan Eh.

21Beꞌadés lah, nyob rik chèꞌrok puꞌdoh,

sebab nyob akal nyob behik!

Beꞌadés lah, nyob rik puꞌdoh nyob yam,

sebab jakal nyob lèg-lug!

22Beꞌadés lah nyob kalòw umcheꞌẽs nyob, bok umjèk, umpègyog nyob, bok umlèrꞌes ma kenëh nyob #1 Ptr 4:14.

sebab nyob hoh ma Yék, Sènꞌòy Nòm Sorga!

23Bil sènꞌòy umteꞌèl jehad gerèk nak ma nyob, umnak gerèk yak dòt bej rik umteꞌèl jehad ma nabi-nabi Tuhan manah tòp. Jadik, nyob puꞌdoh pon gerèk nabi-nabi Tuhan nak. Sebab nak, beꞌadés lah — bok behunjol nòm enadés! Akal mok upah rik rayak untok nyob èn sorga! #2 Sej 36:16; Tèn 7:52.

24Tapik terok geb lah akal ma nyob rik bekaye puꞌdoh,

sebab nyob hòj terime nèsgos rik senang èn duniak doh.

25Terok geb lah akal ma nyob rik bèꞌhik puꞌdoh,

sebab nyob akal nyob cherok.

Terok geb lah akal ma nyob rik belèg-lug puꞌdoh,

sebab nyob akal nyob hõg dak nyob yam.

26Terok geb lah ma nyob bil kenèmbek sènꞌòy umꞌèhmah ma nyob,

sebab rèk nak keꞌjèk mèn yak dòt bej umꞌèhmah ma nabi-nabi bèj-bòj.”

Sayèkh lah ma sènꞌòy rik bemès-mus ma nyob

(Mat 5:38-48; 7:12a)

27Yèsus nachal wèl, “Tapik Yék imchal ma nyob rik kèngyòkh ma Yék: sayèkh lah ma mèsmus nyob! Dak teꞌèl méj ma sènꞌòy rik chèsꞌẽs ma nyob. 28Semany lah ma Tuhan namteꞌèl méj ma sènꞌòy rik umpantakh ma nyob, dak bepèꞌtak lah untok sènꞌòy rik tèlꞌèl jèdhad ma nyob. 29Kalòw mok sènꞌòy nalepag ma kapõk hãk, perak lah namlepag kapõk hãk rik ènlẽng wèl. Kalòw mok sènꞌòy namrus bajuk kèbꞌub hãk, og lah bajuk hãk keꞌjèk ma rik nak. 30Kalòw mok sènꞌòy nasemany ilok-ilok nòm hãk, og lah ilok rik nasemany nak. Dak kalòw mok sènꞌòy naseyèj milik hãk, agok lah semany wèl barang nak. 31Ilok rik nyob chèn sènꞌòy mòy muteꞌèl ma nyob, teꞌèl lah gah nak untok umnak. #Mat 7:12.

32Kalòw nyob had nyob sayèkh ma sènꞌòy rik besayèkh ma nyob, agok lah ès-as Allah namteꞌèl méj ma nyob sebab nyob teꞌèl gerèk nak! Sebab sènꞌòy bedose pon umsayèkh ma sènꞌòy rik besayèkh ma umnak keꞌjèk. 33Kalòw nyob had nyob teꞌèl méj ma sènꞌòy rik tèlꞌèl méj ma nyob, agok lah ès-as Allah namteꞌèl méj ma nyob sebab nyob teꞌèl gerèk nak! Sebab sènꞌòy bedose pon umteꞌèl gerèk nak keꞌjèk. 34Kalòw had nyob og peninjam ma sènꞌòy rik boléh namtèrlos, agok lah ès-as Allah namteꞌèl méj ma nyob sebab nyob teꞌèl gerèk nak! Sebab sènꞌòy bedose pon umꞌog peninjam ma sènꞌòy bedose, dak umlos umꞌoj wèl. 35Tapik sayèkh lah ma mèsmus nyob dak teꞌèl lah méj ma umnak. Og lah peninjam nak, dak agok as peninjam nak mutèrlos. Dak akal nyob dapad upah rik rayak, dak nyob pèrnéh hòj nyob jadik kuwòt Allah Rik Paléng Balikh, sebab Rik Nak keꞌjèk méj ma sènꞌòy rik tok lèng-lèkh beterime kaséh ròb sènꞌòy jèdhad. 36Haros lah nyob bekalõn, gerèk Apak nyob nabekalõn ma sènꞌòy keꞌjèk!”

Agok betanas ma sènꞌòy bok ampon lah

(Mat 7:1-5)

37Yèsus nachal wèl, “Agok tanas salah ma sènꞌòy, supaye Allah tok nabetanas salah ma nyob. Agok hukom ma sènꞌòy, supaye Allah tok nahukom ma nyob. Bok ampon lah ma sènꞌòy mòy, supaye Allah naꞌampon ma nyob keꞌjèk. 38Og lah ma sènꞌòy mòy, dak Tuhan keꞌjèk akal naꞌog ma nyob. Dak naꞌog ibuk, gerèk sènꞌòy rik chèhwoh menéh nachor, nadelũk, dak nayèh-yoh — dak tabeh nachuwoh wèl tebikh sampéy naka-koh. Sebab chènwoh rik nyob gunak untok sènꞌòy mòy, gerèk nak keꞌjèk Allah nachuwoh ma nyob.”

39Kerek nak Yèsus naꞌèg-oglèkh chòntoh wèl ma umnak, “Boléh ke sènꞌòy bebèybëy nampeyéng ma sènꞌòy bebèybëy rik mèy-mòy? Pastik akal nar-nar wèkelek ma kelòj jehòl! #Mat 15:14. 40Tok mèk-mok hèhoh rik namlèkh lebéh nòm guruk eh, tapik bil hèhoh nak sòj belajar, nanak najadik samak gerèk guruk eh. #Mat 10:24,25; Yoh 13:16; 15:20.

41Nahey ihãk hayad ma chèmrèm palok èn mad kéy hãh, bok tok hayèd-yad lah ma palok èn mad rik hãh? 42Gerèk lok lah hãk hamchal ma kéy hãh, ‘Perak lah yék imtèrwòl chèmrèm nak nòm mad hãk,’ yab tèk-tik mok palok èn mad rik hãh tok hanèh-néh lah? Nyob sènꞌòy rik bemèrhĩr! Tèrwòl lah nèng-nèng palok èn mad rik hãh, bok boléh lah hanéh tèꞌlalah untok hamtèrwòl chèmrèm naꞌtèk nòm mad kéy hãh.”

Chòntoh jehuk ròb kebek

(Mat 7:16-20; 12:33-35)

43Yèsus naꞌog chòntoh mòy, nachal, “Jehuk rik méj tok mèk-mok kebek eh nak laꞌes, dak jehuk rik laꞌes tok mèk-mok kebek eh nak méj. 44Tiyab-tiyab jehuk nak umkenal nòm kebek eh. Sènꞌòy tok boléh telèh kebek#6:44 kebek Tèks asli Kitab: “kebek ara.” Kebek ara nak gerèk kebek kèlpong. Kebek nak penting geb èn tèk Israꞌèl, dak sènꞌòy Yahudi ibuk umgéy kebek nak. nòm jehuk bejalak rik tok bekèꞌbek. Bok tok boléh telèh kebek anggor nak nòm bèrher bejalak. #Mat 12:33. 45#Mat 12:34.Sènꞌòy rik méj-méj mestik umteꞌèl rik méj, sebab hòj umdol ibuk hal méj èn kelòj hup um. Tapik sènꞌòy jèdhad umteꞌèl rik jèdhad, sebab èn kelòj hup umdol ibuk jènhad. Sebab ilok sènꞌòy umchal nòm nyag umnak, unak lah nahuwòl nòm kelòj hup um.”

Chòntoh nar sènꞌòy rik teꞌèl dékh

(Mat 7:24-27)

46Yèsus nachal, “Nahey nyob kòw ma Yék, ‘Yãng, Yãng,’ tapik nyob tok hèh-hoh ma nèlchal Yék? 47Yék imchal ma nyob gerèk lok sènꞌòy rik nalãj ma Yék, nakeyòkh dak nahoh ma tenènglèkh Yék: 48Rik nak gerèk sènꞌòy rik tèlꞌèl dékh dak nabay jehòl ma kelòj tèk sampéy ma batuk, dak nachep tunggol dékh. Bil nabeꞌag, òng tibok nak nawid kuwad geb ma dékh nak. Tapik dékh nak tok nayèh-yoh, sebab sènꞌòy nak nateꞌèl dékh nak méj bok chegod. 49Tapik sènꞌòy rik nakeyòkh dak tok nahèh-hoh ma tenènglèkh Yék, gerèk sènꞌòy rik tèlꞌèl dékh rik tok betunggol èn tèk biyase hék. Dak bil nabeꞌag, òng tibok nak nawid kuwad geb ma dékh nak, dak dékh nak sejèkh nakel narònggẽk!”

Currently Selected:

Lukas 6: KKT

Highlight

Copy

Compare