Lukas 4

Iblis natarèk ma Yèsus

(Mat 4:1-11; Mrk 1:12-13)

1Nòm kerek Yohanès nabaptis ma Yèsus, Ruway Kudus nakuwase ma Yèsus. Dak Yèsus nalos nòm Òng Tibok Yordan, dak Ruway Allah naꞌéd Eh ma pantil gurun. 2Dak Iblis natarèk ma Yèsus anak selamak empad puloh arik nak, dak Yèsus tok nagèy-géy ilok-ilok, sampéy nacherok.

3Dak Iblis nachal ma Yèsus, “Kalòw Hãk Kuwòt Allah, or lah mèn batuk doh mujadik ruti.”

4Yèsus nasaꞌod, “Èn kelòj Kitab mok natulis: ‘Sènꞌòy tok dapad mugos nòm nèygéy hék.’” #Ter 8:3.

5Dak Iblis naꞌéd Yèsus ma tempad rik balikh, dak sekelip mad Iblis napèrnéh kenèmbek kerajaꞌan èn duniak doh ma Rik Nak. 6Iblis nachal wèl ma Yèsus, “Kenèmbek kuwase ròb kenaye doh yék imꞌog ma Hãk. Sebab kenèmbek nak hòj mok èn yék, dak yék iꞌog ma chok-chok rik yék ichèn. 7Jadik kalòw Hãk hatud hasindol ma yék, kenèmbek doh akal najadik milik Hãk.”

8Yèsus nasaꞌod, “Èn kelòj Kitab hòj natulis: ‘Sindol lah ma Tuhan, Allah nyob, bok og lah rik nyob ma Rik Nak hék!’” #Ter 6:13.

9Kerek nak, Iblis naꞌéd Yèsus ma Yèrusalèm, ma juhngõd Dékh Tuhan, dak nachal ma Rik Nak, “Kalòw Hãk Kuwòt Allah, lompad lah nòm balikh doh ma tèk rèh! 10Sebab èn kelòj Kitab hòj mok natulis, ‘Allah akal naꞌor mèn melaykat Eh untok mujagak ma Hãk méj-méj.’ #En 91:11,12. 11Dak mok natulis keꞌjèk, ‘Melaykat akal umtayod ma Hãk nòm tikh um, supaye jukh Hãh tok namchòng ma batuk.’”

12Yèsus nasaꞌod, “Èn kelòj Kitab mok natulis, ‘Agok tarèk ma Tuhan, Allah nyob.’” #Ter 6:16.

13Bil Iblis hòj sòj nachubak jajéh tenarèk ma Yèsus, dak Iblis naperak ma Rik Nak dak napòj tèk-tik mòy is wèl.

Yèsus natekèd kèrjak Eh èn Galiliya

(Mat 4:12-17; Mrk 1:14-15)

14Yèsus nalos wèl ma Galiliya, dak Ruway Allah nakuwase ma Rik Nak. Dak najekh lah gah Yèsus ma kenèmbek belah nak. 15Yèsus natekèd nabetènglèkh èn dékh senindol ma lok-lok tèk, dak kenèmbek sènꞌòy umꞌèhmah ma Rik Nak.

Sènꞌòy umjèk ma Yèsus èn kampong rik Eh

(Mat 13:53-58; Mrk 6:1-6)

16Kerek nak Yèsus namak ma Nasarèt, ma tempad rik umtèrhin Eh. Bil Is Tenarak, gerèk biyase Yèsus nawèk ma dékh senindol. Dak Rik Nak nated untok nambache Kitab. 17Sènꞌòy rik betugas èn dékh senindol naꞌog ma Yèsus kitab nabi Yèsaya rik umteꞌèl èn kertas benalet. Dak Rik Nak napog kitab nak dak nabache ayad-ayad doh:

18“Ruway Tuhan mok èn Yék. #Yès 61:1,2.

Rik Nak hòj napili ma Yék supaye imtèrlòy

Gah Méj ma sènꞌòy hèl-hal.

Rik Nak hòj natèrꞌèn ma Yék untok imꞌèg-oglèkh

ma sènꞌòy rik umròt akal umbébas,

ma sènꞌòy bebèybëy akal umhakh bok umnéh wèl,

dak ma sènꞌòy rik umderite akal umbébas.

19Dak imꞌoglèkh hòj nalòy mase eh

Tuhan namteꞌèl méj ma sènꞌòy.”

20Yèsus nabalet wèl kitab nak, natèrlos ma sènꞌòy rik betugas naꞌtèk, dak nagel. Mad kenèmbek sènꞌòy èn kelòj dékh senindol nak umtemèl umtelen ma Rik Nak. 21Dak Yèsus namulak nabetènglèkh ma umnak, “Is doh ayad-ayad Kitab rik hòj nyob keyòkh nak hòj nabelakuk.”

22Nèlchal Yèsus rik natèrwòl nak méj geb, sampéy umnak kenèmbek umbèlꞌih dak umꞌèhmah ma Rik Nak. Umnak umchal, “Bok rik doh nak kuwòt Yusop hék! Rèk lok Nanak boléh nabetènglèkh gerèk doh?”

23Yèsus nachal, “Pastik nyob akal nyob chal ma Yék gerèk biyase èdéh nak: ‘Dukteh, tèrhakh lah rik ma rik hãh’ — maksod eh, akal nyob chal, ‘Kandék kikeyòkh tentang tènꞌèl kuwase rik Hãk hateꞌèl èn Kapernaum. Teꞌèl lah gerèk nak èn kampong rik Hãh doh keꞌjèk!’” 24Yèsus nachal wèl, “Kemën ichal ma nyob, tok mèk-mok nabi rik umhormad èn kampong rik eh. #Yoh 4:44. 25Keyòkh lah nèlchal Yék doh: bil jènman Nabi Èliya manah tòp, mok musim tinag rik dèngwòng geb, tok natèh-teh untok tigak tawon setengah. Dak èn kenèmbek negerik nak mok chènrok rik terok, tok mèk-mok mènhik sènꞌòy mugéy. Bil nak mémang mok ibuk balakh èn Israꞌèl. #1 Raj 17:1. 26Yab rèk nak, Allah tok èr-or Èliya namwèk ma balakh-balakh èn Israꞌèl nak, tapik ma néy balakh kedak Yahudi rik nagel èn Sarapat, èn belah Sidon. #1 Raj 17:8-16. 27Gerèk nak keꞌjèk, èn jènman Nabi Elisa manah tòp mok jajéh sènꞌòy èn Israꞌèl rik bechenèk sèmpok. Tapik èn sènꞌòy Israꞌèl nak tok mèk-mok néy sènꞌòy pon namtèrhakh — had Naman, sènꞌòy kedak Yahudi nòm Siriya nak.” #2 Raj 5:1-14.

28Dak bil umkeyòkh ma nèlchal Yèsus nak, kenèmbek sènꞌòy Yahudi èn kelòj dékh senindol nak umꞌõl geb. 29Umnak umted dak umjéng Yèsus nahuwòl nòm kampong. Kampong Nasarèt nak umteꞌèl èn balikh pok. Jadik umꞌéd Yèsus ma juhngõd pok untok mutulag Eh ma terab. 30Tapik Yèsus sejèkh nachib èn gagid umnak dak nawèk nòm nak.

Yèsus natèrhakh ma sènꞌòy rik sèd-sid yel jèdhad

(Mrk 1:21-28)

31Dak kerek nak Yèsus nawèk ma kote Kapernaum èn tèk Galiliya. Èn anak Nanak nabetènglèkh ma sènꞌòy èn Is Tenarak. 32Dak sènꞌòy umbèlꞌih umkeyòkh ma chare tenènglèkh Eh, sebab Yèsus nabecharak gerèk sènꞌòy rik behak bok bekuwase. #Mat 7:28,29. 33Èn dékh senindol nak mok sènꞌòy rik sèd-sid yel jèdhad. Sènꞌòy nak naꞌèh-éh nòm kuy kèdwad eh, 34“Yèsus sènꞌòy Nasarèt, ilok Hãk hamhey ma kandék? Ke halãj hamterèyhõy ma kandék? Yék ilèkh Hãk nak chok: Hãk Rik Suchi nòm Allah!”

35Yèsus natèdchod ma yel nak, “Sengẽk! Huwòl lah nòm sènꞌòy doh!” Dak yel jèdhad nak nasuwèd sènꞌòy nak ma gagid sènꞌòy jajéh nak, dak nahuwòl nòm sènꞌòy nak, dak tok naperèdjèd wèl.

36Kenèmbek sènꞌòy umbèlꞌih geb dak umcha-chal kaban rik um, “Ayah! Ilok che naꞌdoh? Nèlchal sènꞌòy doh bekuwase geb! Nanak naꞌor ma yel jèdhad, dak yel-yel pon umhuwòl!” 37Dak umtèrjekh gah tentang Yèsus nak ma kenèmbek kawasan.

Yèsus natèrhakh jajéh sènꞌòy

(Mat 8:14-17; Mrk 1:29-34)

38Yèsus naperak dékh senindol, dak nawèk ma dékh Simon. Belok babok Simon najèk-jik, nabèd-bëd esik eh, jadik umsemany ma Yèsus namtèrhakh. 39Yèsus nated èn chening eh, dak natèdchod ma bèd-bëd eh nak. Dak bèd-bëd eh nak nahakh, dak sejèkh nawòg nabejamuk ma umnak.

40Bil mad is hòj namjèdlũd, sènꞌòy anak umꞌéd jajéh sènꞌòy rik umberagik-ragik chenèk ma Yèsus. Dak Yèsus nadol tikh Eh èn tiyab-tiyab sènꞌòy dak natèrhakh ma umnak. 41Yel-yel jèdhad umhuwòl nòm jajéh sènꞌòy keꞌjèk, dak umꞌèh-éh, “Hãk Kuwòt Allah!” Tapik Yèsus nahuwok ma yel-yel nak, tok naꞌèg-og muchèl-chal ilok-ilok, sebab yel-yel jèdhad umlèkh Rik Nak Mèsias.

Yèsus naꞌèg-oglèkh Gah Allah èn dékh senindol èn kenèmbek negerik Yudéya

(Mrk 1:35-39)

42Bil yèhyah is jakal nak, Yèsus naperak kote nak dak nawèk ma néy tempad sèꞌngẽk sèngyõng. Tapik jajéh sènꞌòy umkèk ma Rik Nak, dak kerek umtèrbuk Eh dak umkèrdakh mutèrhan ma Rik Nak supaye agok namperak ma umnak. 43Tapik Yèsus nachal ma umnak, “Yék haros imtèrlòy Gah Méj tentang Kerajaꞌan Allah ma kote-kote mòy keꞌjèk, sebab nak lah tujuwan Allah natèrꞌèn Yék ma duniak.”

44Jadik Yèsus nachèb-chib ma lok-lok tèk èn kenèmbek negerik Yudéya, dak naꞌèg-oglèkh Gah Méj èn dékh senindol umnak.

Currently Selected:

Lukas 4: KKT

Highlight

Copy

Compare