Yohanès 21

Yèsus napèrnéh rik Eh ma tujoh sènꞌòy hèhoh Eh

1Hòj nòm kerek nak, Yèsus napèrnéh rik Eh wèl ma hèhoh Eh èn Òng Pang Galiliya.#21:1 Òng Pang Galiliya. Tèks asli: “Òng Pang Tibèriyas.” Unak kenëh mòy sènꞌòy Roma umkòw òng pang nak. Gerèk doh lah nabelakuk: 2Rik umbekumpol èn pantay nak Simon Pètrus, Tòmas (rik umkòw Kamar), Natanaꞌèl nòm kampong Kana èn Galiliya, wèh kuwòt Sèbedius (Yakobus ròb Yohanès), bok mok keꞌjèk nar hèhoh Yèsus rik mòy. 3Simon Pètrus nachal ma umnak, “Yék imwèk imjalok kak.”

Dak rik gèhnih nak umchal, “Nak, kandék kimhoh.” Jadik umnak kenèmbek umꞌòj ma perahuk dak umwèk. Tapik layèg nak umnak tok umterègseg néy ikor kak pon.#Luk 5:5. 4Yèhyah jakal nak, bil mad is najuray, Yèsus natèd-ted èn béng, tapik hèhoh Eh nak tok umlèng-lèkh Rik Nak Yèsus. 5Dak Yèsus nakòw ma umnak, “Kéy-kéy, mok ke kak nyob nak?”

Umnak umsaꞌod, “Hõy.”

6Yèsus nachal, “Suwar lah jalok nyob nak èn chening tep perahuk nyob nak, bok akal nyob dapad kak.” Umnak pon umhoh umsuwar. Dak umtèrseg kak ibuk geb, sampéy tok boléh mujéng wèl jalok umnak ma kelòj perahuk! #Luk 5:6.

7Dak anak hèhoh rik Yèsus nasayèkh nak nachal ma Pètrus, “Unak Tuhan!” Bil Simon Pètrus nakeyòkh unak Tuhan, rik nak sejèkh nalòg wèl bajuk eh (rik hòj nateg bil nakerèꞌjak atèk), dak napelaw ma kelòj òng dak nakayoh ma béng. 8Hèhoh Yèsus rik gèhnih umhoh èn perahuk umnak, bok umja-jéng jalok rik tebikh kak nak. Umnak tok jèꞌrok nòm béng, kirak-kirak seratos miter hék. 9Bil umnak umtaw ma béng, umnak umnéh kak nèꞌjek èn balikh os, bok ruti pon mok èn anak. 10Dak Yèsus nachal ma umnak, “Èn lah maròp-maròp ikor kak rik pay nyob tèrseg nak.”

11Jadik Simon Pètrus naꞌòj ma perahuk dak najéng jalok nak ma béng. Jalok nak tebikh kak rèꞌyak, lènbéh um 153 ikor. Dak yab kak umseg ibuk geb, jalok nak tok nabecha-chèg. 12Yèsus nachal ma umnak, “Jok lah géy.” Tok mok néy sènꞌòy pon nòm umnak rik belamid namtanyak ma Yèsus, “Chok Hãk nak?” Umnak hòj umlèkh Rik Nak Tuhan. 13Yèsus nakod ruti dak naꞌog ma umnak, dak naꞌog keꞌjèk kak ma umnak. 14Unak lah kalik tenigak eh Yèsus napèrnéh rik Eh ma mèn hèhoh Eh, nòm kerek Allah natèrwòg ma Rik Nak nòm kènbes.

Yèsus naꞌor ma Simon Pètrus namjagak ma kewarge Tuhan

15Hòj sòj umgéy, Yèsus nachal ma Simon Pètrus, “Simon kuwòt Yohanès, mok ke hãk lebéh hasayèkh ma Yék nòm rik umgèhnih doh?”

Pètrus nasaꞌod, “Hek, Tuhan. Hãk halèkh yék isayèkh ma Hãk!”

Dak Yèsus nachal ma rik nak, “Tènglèkh lah ma kewarge Yék, gerèk kël nak natèrgéy ma mèn kuwòt kambikh biri eh nak.”

16Dak Yèsus natanyak wèl ma rik nak, “Simon kuwòt Yohanès, mok ke hãk hasayèkh ma Yék?”

Pètrus nasaꞌod, “Hek, Tuhan! Hãk halèkh yék isayèkh ma Hãk.”

Yèsus nachal, “Jagak lah ma mèn kambikh biri Yék!”

17Dak kalik tenigak wèl Yèsus natanyak, “Simon kuwòt Yohanès, mok ke hãk hasayèkh ma Yék?”

Pètrus nagahmak nangòm hup eh, sebab Yèsus hòj natanyak tigak kalik, “Mok ke hãk hasayèkh ma Yék?” Dak rik nak nasaꞌod, “Tuhan, Hãk halèkh kenèmbek. Hãk halèkh yék isayèkh ma Hãk!”

Yèsus nachal ma rik nak, “Tèrgéy lah ma kambikh biri Yék!

18Kemën lah Yék ichal ma hãk: mase tik lenitòw hãh tòp, habeg talik wakh rik hãh bok hawèk hék ma lok-lok hachèn. Tapik bil hãk hòj tatak jakal, hãk akal hatadok tikh hãh, dak sènꞌòy mòy akal umbeg ma hãk bok umꞌèn hãk ma tempad rik hajèk hamwèk.”#21:18 hãk akal hatadok tikh hãh Jajéh guruk Kitab umbèdlod maksod Yèsus èn anuh nachal sènꞌòy akal umkèrbes ma Pètrus èn palok salib. 19(Yèsus nachal gerèk doh untok namꞌoglèkh gerèk lok Pètrus akal nakebes, bok nòm kènbes eh akal napèrnéh kuwase ròb renayak Tuhan.)

Nòm kerek nak Yèsus nachal ma Pètrus, “Hoh lah ma Yék!”

Yohanès, hèhoh rik Yèsus nasayèkh

20Pètrus nawãr dak nanéh ma kéy eh naꞌtèk, hèhoh mòy rik Yèsus nasayèkh nak; rik nak nahèh-hoh ma Pètrus ròb Yèsus. (Nanak irik sèn-set tilok ma Yèsus bil umnak umga-géy layèg hatòp bok natanyak chok sènꞌòy rik akal namtulong ma mèsmus muròt ma Tuhan Yèsus.) #Yoh 13:25. 21Bil Pètrus nanéh ma rik nak, Pètrus natanyak ma Yèsus, “Tuhan, ilok akal nambelakuk ma rik nak?”

22Tapik Yèsus nasaꞌod, “Hãk tok perlu hamlèkh tentang rik nak. Kalòw Yék ichèn rik nak tetab namgos sampéy Yék ilãj wèl pon, unak kedak hal hãk. Hãk hahoh lah ma Yék!”

23Sebab nèlchal Yèsus nak, èn kewarge Tuhan mok sènꞌòy rik umterèngjekh gah nak bok umchal sènꞌòy nak akal tok nakèsbes. Tapik Yèsus tok nachèl-chal rèk nak pon. Yèsus had nachal, “Kalòw Yék ichèn rik nak tetab namgos sampéy Yék ilãj wèl, unak kedak hal hãk.”

24Yék lah hèhoh nak. Yék lah irik nèh-néh bok iꞌèg-oglèkh kenèmbek hal doh, dak itulis kenèmbek eh èn anuh. Dak èk èlèkh ilok rik iꞌoglèkh doh kemën.

25Tik ibuk hal mòy rik Yèsus nateꞌèl keꞌjèk. Tapik yék ibèdlod, kalòw lah èmtulis kenèmbek eh nak, kenèmbek bumi pon tok tèdhad untok èmdol mèn bukuk rik ètulis nak!

Currently Selected:

Yohanès 21: KKT

Highlight

Copy