Yohanès 20
20
Yèsus nawòg nòm Kènbes Eh
(Mat 28:1-8; Mrk 16:1-8; Luk 24:1-12)
1Bil arik Ahad, èn tèk-tik rengah, Maria Magdaléna nawèk ma kubor Yèsus nak. Dak rik nak nanéh batuk cherèntekh èn sòy guwok kubor nak hòj nakèrléh ma chening. 2Jadik rik nak nadabal nakèk ma Simon Pètrus ròb néy hèhoh mòy, rik Yèsus nasayèkh nak. Dak Maria nachal ma wènar nak, “Umnak hòj umkod mayad Tuhan nòm kubor nak, dak kandék tok kilèng-lèkh èn lok umdol Eh!”
3Dak Pètrus ròb hèhoh rik mòy nak wèwèk ma kubor. 4Wènar nak wèdabal, tapik hèhoh rik mòy nak nadabal lebéh géj nòm Pètrus bok nabeleh nèng-nèng ma kubor nak. 5Dak rik nak najungẽk bok nanéh ma kelòj guwok kubor nak, dak nanéh had mok dèꞌrik abat hék èn anak, tapik rik nak tok namèj-mòj ma kelòj kubor. 6Pas nak Simon Pètrus nabeleh keꞌjèk, dak rik nak namòj ma kelòj guwok kubor nak. Rik nak nanéh mok abat rik umlat ma esik Yèsus hatòp, 7bok mok keꞌjèk abat rik umlat ma kuy Yèsus. Abat nòm kuy Eh nak hòj bebenalet dèꞌrik, èn tempad mòy nòm abat nòm esik Eh naꞌtèk. 8-9Pas nak hèhoh mòy rik hòj nabeleh nèng-nèng naꞌtèk namòj ma kubor nak keꞌjèk. (Sampéy mase nak, hèhoh Yèsus nak tèk-tik tok umlèng-lèkh ma maksod Kitab, rik hòj naramal Yèsus haros nawòg nòm kènbes). Dak hèhoh Yèsus nak nanéh bok napechaye. 10Kerek nak wèh hèhoh Yèsus nak wèmak.
Yèsus napèrnéh rik Eh ma Maria Magdaléna
(Mat 28:9-10; Mrk 16:9-11)
11Bil nak Maria tik natèd-ted èn béng guwok kubor nak dak nayèm-yam. Èn tik nayèm-yam, rik nak najungẽk bok nanéh ma kelòj kubor nak. 12Dak anak Maria nanéh nar melaykat rik benèglòg beyug, wègèl-gel èn tempad umsèrlòg mayad Yèsus nak hatòp: néy èn tempad kuy Eh nak, bok naꞌnéy wèl èn tempad jukh. 13Melaykat nak wètanyak ma Maria, “Aléh, nahey bok hayam?”
Maria nasaꞌod, “Umnak hòj umkod mayad Tuhan yék, dak yék tok ilèng-lèkh èn lok umnak umdol Eh!”
14Hòj sòj nachal gerèk nak, Maria nawãr bok nanéh Yèsus natèd-ted èn anak. Tapik Maria tèk-tik tok nalèng-lèkh Rik Nak Yèsus. 15Yèsus natanyak ma rik nak, “Aléh, nahey bok hayam? Ma chok hakèk?”
Maria nasabok Rik Nak sènꞌòy rik kerèꞌjak èn selay nak. Jadik Maria nachal, “Yãng, kalòw hãk hòj hatèrjog mayad Yèsus, oglèkh lah ma yék tempad hãk hadol mayad Eh, bok yék akal iwèk imkod mayad Eh nak.”
16Yèsus nachal ma rik nak, “Maria!”
Dak Maria nawãr wèl ma Yèsus dak naꞌèh-éh, “Raboni!” (èn kuy sènꞌòy Yahudi maksod eh nak “Guruk”).
17Tapik Yèsus nachal ma rik nak, “Agok lah kuwòp ma Yék, sebab Yék tèk-tik tok imèk-mak ma Apak. Jadik wèk lah puꞌdoh ma kéy-kéy Yék#20:17 kéy-kéy Yék Tèks asli Kitab: “mèrpek Yék.” Yèsus naꞌanggap ma mèn hèhoh Eh hòj umjadik mèrpek rik Eh. dak oglèkh ma umnak, tok lamad akal Yék imak ma Apak Yék bok Apak nyob, ma Allah Yék bok ma Allah nyob.” 18Maria Magdaléna pon nawèk natèrbuk ma mèn hèhoh Eh dak nachal ma umnak, “Yék hòj inéh Tuhan!” Dak rik nak keꞌjèk naꞌoglèkh ma umnak ilok rik Yèsus hòj nachal ma rik nak naꞌtèk.
Yèsus napèrnéh rik Eh ma hèhoh-hèhoh Eh
(Mat 28:16-20; Mrk 16:14-18; Luk 24:36-49)
19Tik arik Ahad, bil hòj layèg, mèn hèhoh Yèsus umbeterabuk èn néy dékh. Umnak hòj umkaldèb kenèmbek rèngkak, sebab umtukh ma mèn pemimpin Yahudi. Tok-tok et Yèsus, nated èn gagid umnak dak nachal, “Selamad, bema-méj lah nyob!” 20Hòj sòj nachal gerèk nak, Rik Nak napèrnéh tikh ròb cheres Eh ma umnak. Bil umnak umnéh Tuhan, mèn hèhoh Eh nak umꞌadés geb. 21Dak Yèsus nachal wèl, “Selamad, bema-méj lah nyob! Samak gerèk Apak hòj natèrꞌèn ma Yék, puꞌdoh Yék keꞌjèk itèrꞌèn ma nyob.” 22Dak hòj nachal gerèk nak, Yèsus nahũb henèmhum Eh ma umnak dak nachal, “Terime lah Ruway Kudus! 23#Mat 16:19; 18:18. Kalòw nyob ampon dose sènꞌòy, Allah keꞌjèk naꞌampon ma sènꞌòy nak. Tapik kalòw mok sènꞌòy rik nyob tok beꞌampon, Allah pon tok nabeꞌampon sènꞌòy nak.”
Yèsus napèrnéh rik Eh ma Tòmas
24Tapik Tòmas (rik umkòw Kamar), néy sènꞌòy nòm nar belas hèhoh Yèsus nak, tok mèk-mok samak umnak bil Yèsus nalãj atèk. 25Jadik hèhoh rik gèhnih umꞌoglèkh ma Tòmas, “Kandék hòj kinéh Tuhan!”
Tapik Tòmas nasaꞌod, “Had kalòw inéh nòm mad rik yéh bok ipechaye. Yék ichèn imnéh ma tepëh pakuk èn tikh Eh, bok impèk-pek tikh tènyog yéh ma tepëh Eh nak. Bok ichèn impèk-pek tikh yéh ma kelòj tepëh bulus èn cheres Eh nak. Kalòw hõy, yék tok ipechaye.”
26Hòj néy minggu nòm kerek nak, hèhoh-hèhoh Yèsus umbekumpol wèl èn dékh nak, dak Tòmas keꞌjèk mok samak umnak. Yab kenèmbek rèngkak nak hòj umkaldèb, tapik tok-tok et Yèsus, nated èn gagid umnak dak nachal, “Selamad, bema-méj lah nyob!” 27Nòm kerek nak Yèsus nachal ma Tòmas, “Nak, pek lah tikh hãh nak èn anuh, bok néh lah ma tikh Yéh doh. Tadok lah tikh hãh nak bok pek ma kelòj cheres Yék. Agok lah èd-id wèl, tapik pechaye lah!”
28Tòmas nachal ma Yèsus, “Hek, Hãk Tuhan yék bok Allah yék!”
29Yèsus nachal ma rik nak, “Hãk hanéh ma Yék bok hapechaye. Beꞌadés lah sènꞌòy rik tok umnèh-néh ma Yék, tapik tik umpechaye!”
Tujuwan Yohanès nateꞌèl bukuk Kitab doh
30Mèn hèhoh Eh umnéh Yèsus nateꞌèl ibuk tande kuwase mòy wèl, rik tok betenulis èn kelòj bukuk doh. 31Tapik kenèmbek doh yék itulis supaye nyompechaye Yèsus lah Kristus, Kuwòt Allah. Dak sebab nyob pechaye ma Rik Nak, nyob dapad nèsgos rik kènmën.
Currently Selected:
Yohanès 20: KKT
Highlight
Share
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
