मुध चेलर 9
9
सा'उलस ही जिन्गी बादलारना
(मुध चेलर २२:६-१६; २६:१२-१८)
1सा'उलस आ बेड़ा गुटी हूँ पत्त'उरिन पिटना धम्की चि'अनुम कुद्दा लगियस। आस हुरमी ती कोहाँ यहुदी नैगस गुसन केरस 2अउर उर्बस ही डहरेन ख़ोख़ाब'ऊ होरमा मुक्कर अउर मेतरिन धर'आ की यरुसलेम नू ओन्दर'आ ओंगोन नेक'आ ब'आ की दमस्कस ता यहुदी सभा'एड़पा गुट्ठी ता सासकरिन चिट्ठी लिख'आ चि'आ ब'आ की आसिन बाचस।
3एकाबिरी सा'उलस डहरे एकते दमस्कस हेद्दे अड़सियस। ख़ने आबिरी अनचोख्एम मेर्ख़ा ती ओन्टा बिल्ली आस ही चारो तरा बिल्चिया। 4ख़ने आस ख़ेख़ेल नू खत्तरस अउर एन्ने ब'अनन मेन्जस, “सा'उल, सा'उल, निन एन्देरगे एंगन साधदय?”
5आस बाचस, “उर्बायो, निन ने हिकदय?” ख़ने आस बाचस, “एन येसू हिकदन नेकन निन साधदय।”
6“लेकिन अक्कू चो'आ की सहर नू कला अउर निंगा एन्दरा नना पड़ार'ओ, अदिन निंगा गे तेंगतार'ओ।”
7आस गने कालू आलर अकबकरर की इज्जका रहचर। एन्देरगेका आर आ अवाजन मेन्जर लेकिन नेकन हूँ मला इरियर। 8ताबसिले सा'उलस ख़ेख़ेल ती चोचस की ख़न्नन खुल्लियस ख़ने आस एन्दरन हूँ मला इरियस औंगे आर आस ही ख़ेक्खन धरचर की आसिन एकता'अनुम दमस्कस नू ओन्दरर। 9ख़ने आस तिन उल्ला गुटी एःरा पोल्लस अउर न तो मन्डी ओन्डस न अम्म ओन्डस।
10दमस्कस नू हननिया नामे मन्जका ओरोत पत्त'उस रहचस। आसिन उर्बस देखार नू बाचस, “ए हननिया।”
आस बाचस, “उर्बायो, एन इसानुम र'अदन।”
11उर्बस आसिन बाचस, “चो'आ अउर सोझ ब'अना गली नू कला अउर असन यहुदस ही एड़पा नू टार्सस सहर ती बरचका सा'उल ब'अना आलसिन बेद्दा। असन आस अक्कुन गोहरार'आ लगदस। 12आस देखार नू हननिया नामे मन्जका ओरोत आलस भितरी बरचस की आस एःरा ओंगा नेक'आ ब'आ की तंग्हय म'इयाँ आस ही ख़ेक्खन उइका इरका र'अदस।”
13लेकिन हननियस बाचस, “उर्बायो, ई आलस यरुसलेम नू निंग्हय ख़द्दख़र्ररिन कय बग्गे साधचका र'अदस। अदिन एन बग्गे आलर ती मेन्जका र'अदन। 14इसन हूँ निंग्हय नामे हु'ऊ होरमारिन हे'आ की हो'आ गे यहुदी मुध नैगर ती आस अधिकार ख़क्खका र'अदस।”
15लेकिन उर्बस हननियसिन बाचस, “कला, एन्देरगेका नन-यहुदिर, बेलर अउर इस्रा'एल ता आलर ही अगू नू एंग्हय नामेन प्रचार नना गे आस चाजरका आलस हिकदस। 16एन्देरगेका एंग्हय नामे चड्डे आस कय बग्गे दुक्खे खेप'आ पड़ार'ओ, अदिन एन आसिन एद'ओन।”
17ताबसिले हननियस केरस की आ एड़पा भितरी कोरचस अउर आस म'इयाँ तंग्हय ख़ेक्खन उइय्यस की बाचस, “अना भ'ई सा'उल, एका उर्बा येसुस निन बरना डहरे नू निंग्हय गुसन एथरका रहचस, आसुम निन एःरा ओंगा नेक'आ अउर निन नेम्हा बोलतस ती निन्दर'आ नेक'आ ब'आ की एंगन त'इका र'अदस।” 18तुरतेम आस ही ख़न्न ती चोपला लेखा खत्तरा अउर आस फेर एःरा उंगियस। ताबसिले आस चोचस अउर बप्तिस्मा होच्चस। 19ताब आस मन्डी ओन्डस की पया ख़क्खियस।
सा'उलस दमस्कस नू प्रचार नन्जका
सा'उलस जोक्क उल्ला गुटी दमस्कस नू मन्जका पत्त'उर गने रहचस।
20ख़ने चाँड़ेम आस यहुदिर ही सभा'एड़पा नू येसुस ही पत्त नू एन्ने की तेंगा हेल्लरस, “उर्बा येसुस दुम धर्मेस ही तंग्दस हिकदस।”
21ताबसिले मिनुर होरमर छक्केम मन्जर की बाचर, “एन्दरा यरुसलेम नू येसुस ही नामे हु'ऊ होरमारिन मुन्जा बिद्दू आलस इसुम मलदस दरा? इसन हूँ येसुस ही चेलारिन हे'आ की यहुदी मुध नैगर गुसन हो'आ कला गे मला बरचका र'अदस दरा?”
22लेकिन सा'उलस और बग्गे सवंगिया मन्नुम केरस अउर येसुस दुम ख्रिस्त हिकदस ब'अना सबुत चिच्चका करने दमस्कस ता यहुदिर एन्देर हूँ जवाब चि'आ पोल्लर।
23ढेर उल्ला ख़ोख़ा यहुदिर सा'उलसिन पिटा गे योजना कमचर। 24लेकिन तंगन पिटा बिद्दका कत्थन सा'उलस अख़चस। यहुदिर आसिन पिटा गे उल्ला-माख़ा दमस्कस ता बली गुट्ठी नू जोहचका र'आ लगियर। 25लेकिन आस ही चेलर आसिन माख़ाम डौड़ा नू सज्जर की देबाल ती एत्ताचर चिच्चर।#२ कोरिन्थिर ११:३२-३३
सा'उलस यरुसलेम सहर नू
26आस यरुसलेम नू बरचका ख़ोख़ा आस चेलर गने ख़क्खा बिद्दियस। लेकिन आर होरमर आस गने इल्चियर एन्देरगेका आस पत्त'ऊ मन्जका र'अदस ब'अना कत्थन मल पत्ताचर। 27लेकिन बरनाबासस आसिन संगे नू होच्चस की मुध चेलर गुसन केरस। ख़ने सा'उलस उर्बसिन डहरे नू इरका अउर उर्बस आस गने कच्छनखरका अउर आस दमस्कस नू डिढ़ ती येसुस ही नामे नू प्रचार नन्जका कत्थन आरिन तिंगियस। 28सा'उलस यरुसलेम नू आर संगे-संगेम काला-बर'आ हेल्लरस अउर डिढ़ ती उर्बस ही नामे नू प्रचार नना हेल्लरस। 29ख़ने आस ग्रिक-यहुदिर गने आना-नखर'आ लगियस, लेकिन आर आसिन पिटा बेद्दा लगियर। 30इदिन अख़चर की पत्त'उर आसिन कैसरिया नू ओन्दरर अउर अस्ते ती आसिन टार्सस नू त'इय्यर चिच्चर।
31अदिही ख़ोख़ा सौंसे यहुदिया प्रदेस, गालिल प्रदेस अउर सामरिया प्रदेस ता कलिसिया गुट्ठी नू सान्ती मन्जा अउर कलिसिया बड़ियर मन्नुम केरा। अउर पत्त'उर उर्बस ही एल्चना नू उज्जा लगियर। अउर आर नेम्हा बोलतस ही डिढ़ ख़क्खियर की गिन्ती नू परदनुम केरर।
पतरुसस लुड्डा अउर योप्पा सहर नू
32पतरुसस इज्गु-अज्गु हुरमी अड्डा नू डहरे इकनुम लुड्डा नू मन्जका पत्त'उर गुसन हूँ केरस। 33आस असन एनियास नामे मन्जका ओरोत आलसिन ख़क्खियस, ने आठ बछर ती लकवा रोगे ती बिछना नू पड़ारका रहचस। 34पतरुसस आसिन बाचस, “अना एनियास, येसू ख्रिस्तस निंगन कोड़े ननोस। चो'आ अउर निंग्हय पिटरिन तेरमा।” ख़ने आस तुरतेम चोचस। 35लुड्डा अउर सारोन नू र'ऊ एक्का बग्गेर आसिन इरियर की उर्बसिन पत्ताचर।
36योप्पा सहर नू तबिता नामे मन्जका ओरोत पत्त'ऊ आली रहचा। ग्रिक भखा नू आद डोरकास बातार'आ लगिया। अदिही मने हरिन हिके। आद सगरो दव नलख नना लगिया अउर गरिबरिन संगरा नना लगिया। 37पतरुसस लुड्डा सहर नू रहचका बेड़ा आद बेमार मन्जा अउर आद केच्चा। आलर अदिन एमताचर की म'इताँ तल्ला ही ओन्टा कोठली नू उइय्यर। 38लुड्डा सहर योप्पा सहर हेद्दे मन्जका करने, चेलर पतरुसस असन र'अदस ब'अनन मेन्जर की आस गुसन दु'ई गोड़े आलरिन एन्ने बिन्ती नना गे त'इय्यर, “दया नना की एम्हय गुसन चाँडे़म बरा।” 39ताबसिले पतरुसस चोचस की आर गने केरस। असन अड़सका ख़ोख़ा आर आसिन म'इताँ कोठली नू होच्चर। बेवार होरमर आस गुसन चिख़ा हेल्लरर अउर डोरकास उज्जना रहचा ख़ने आद कमचका झुलन अउर दोसरा झुला गुट्ठिन एदाचर। 40लेकिन पतरुसस अबड़ा होरमारिन बाहरी त'इय्यस की मुक लिद्दरस की गोहरारस अउर आ मुरदा तरा किर्रियस की बाचस, “तबिता, चो'अय!” ख़ने आद ख़न्नन खुल्लिया अउर पतरुससिन इरिया की चोचा की उक्किया। 41आस अदिन तंग्हय ख़ेक्खा ती धरचस की उठाचस, ख़ने पत्त'उर अउर बेवारिन मिख़ियस की तबिता उज्ज की र'ई बाचस की एदस। 42अक्कू ई कत्था गोट्टा योप्पा नू बिड़रा अउर ढेर बग्गेर उर्बस नू पत्ताचर। 43ख़ने आस जोक्क उल्ला ओरोत सिमोन ब'अना चपटा ही नलख ननू आलस गने योप्पा नू रहचस।
Currently Selected:
मुध चेलर 9: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
