मुध चेलर 8
8
सा'उलस पत्त'उरिन साधदस
1स्तिफनससिन पिटना बिरी सा'उलस हूँ संगे चिच्चका रहचस। अउला तिम यरुसलेम ता कलिसिया गुट्ठी नू कोहड़े साधरना ओरे मना हेल्लरा। ख़ने दोसरा होरमा पत्त'उर यहुदिया अउर सामरिया प्रदेस तरा छिरियारर, लेकिन मुध चेलर यरुसलेम नुम रहचर। 2धर्मेस ही जोक्क भक्तर स्तिफनससिन होच्चर की माडियर अउर आस ही खतरी कोहड़े दुक्खे मन्नुम चिख़ियर।
3लेकिन सा'उलस कलिसियन नास नना गे कोसिस नना लगियस। आस एड़पा-एड़पा नू कोर'आ की उर्बस नू पत्त'ऊ मेतर अउर मुक्करिन नतख़नुम हो'आ की जेहेल नू सज'आ चि'आ लगियस।#मुध चेलर २२:४-५; २६:९-११
फिलिपस सामरिया प्रदेस नू दवसमाचार तेंगदस
4अबड़ा छिरियारका पत्त'उर एसन-एसन केरर असन दवसमाचारन तिंगियर। 5फिलिपस सामरिया ता ओन्टा सहर नू केरस की अस्ता आलरिन येसू ख्रिस्तस ही पत्त नू तिंगियस। 6फिलिपस बाचका कत्थन मेन्जर। ख़ने आस नन्जका चिन्हा गुट्ठिन इरियर की गोहड़ा आस ही कत्थन ध्यान चिच्चा की मेन्जा। 7नेका-नेका गे मलदव बोलता गुट्ठी लक्की रहचा, अबड़ा आर ती जोरसे चिचयार नुम उरख़ा अउर कय बग्गे लकवा बेमरहर अउर लेंगड़ा आलर हूँ कोड़े मन्जर। 8एन्नेकी आ सहर नू कोहड़े रिझ मन्जा।
9सिमोन नामे मन्जका ओरोत आलस असन रहचस। आस आ सहर नू जादुटोना नना की सामरिया ता आलरिन हयकट नन्जका रहचस अउर तंगन एनिम हिकदन ब'आ लगियस। 10आ आलसिन सन्नी ती कोहाँ गुटी होरमर एन्ने ब'आ की मन'आ लगियर, “ई आलस धर्मेस ही आ सवंग हिकदस, एकदन कोहाँ सवंग बातार'ई।” 11आर आसिन मन'आ लगियर एन्देरगेका ढेर उल्ला ती आस तंग्हय जादुटोना ती आलरिन हयकट नना लगियस। 12लेकिन एकाबिरी आर धर्मेस ही राजी अउर येसू ख्रिस्तस ही नामे ही दवसमाचार मेन्त'ऊ फिलिपस ही कत्थन पत्ताचर। ताब मेतर अउर मुक्कर बप्तिस्मा होच्चर। 13सिमोनस हूँ पत्ताचस अउर बप्तिस्मा होच्चस। अदिही ख़ोख़ा आस फिलिपस गनेम एका हेल्लरस अउर चिन्हा गुट्ठिन अउर कोहाँ-कोहाँ हयकट नलखन इरियस की आस छक्केम पड़ार'आ लगियस।
14सामरिया ता आलर धर्मेस ही कत्थन इन्जरर ब'अनन मेन्जर की यरुसलेम नू र'ऊ मुध चेलर पतरुसस अउर युहन्नसिन आर गुसन त'इय्यर। 15आर सामरिया नू अड़सियर की पत्त'उर नेम्हा बोलतस ख़क्खोर नेक'आ ब'आ की आर ही खतरी गोहरारर। 16एन्देरगेका आ बेड़ा गुटी नेख़ाय म'इयाँ हूँ नेम्हा बोलतस मला इत्तका रहचस। आर ही बप्तिस्मा उर्बा येसुस ही नामे नू लेका मन्जकी रहचा। 17ख़ने पतरुसस अउर युहन्नस आर म'इयाँ तम्हय ख़ेक्खन उइयर अउर आर नेम्हा बोलतसिन ख़क्खियर।
18सिमोनस मुध चेलर आर ही म'इयाँ ख़ेक्खन उइनर होले आलर नेम्हा बोलतसिन ख़क्खनर ब'अनन इरियस की आर गे ढिबा चि'आ गे ओन्दरस 19अउर बाचस, “एंगा गे हूँ ई सवंग चि'आ अउर एन नेख़'अम म'इयाँ ख़ेक्खन उइय्योन चि'ओन होले आर नेम्हा बोलतसिन ख़क्खा नेक'आ।”
20लेकिन पतरुसस बाचस, “निंग्हय ढिबा निंग्हय गनेम नास मना नेक'आ एन्देरगेका धर्मेस ही बरदान ढिबा ती ख़ेंदा ओंगोन ब'आ की निन सोच्चकय। 21ई पत्त नू ना निंग्हय बखरा र'ई ना हिस्सा दुम र'ई एन्देरगेका धर्मेस ही अगू नू निंग्हय जिया बेस्स मल्ला। 22औंगे निंग्हय ई मलदव ही खतरी पाप ती जियन किर्रत'आ अउर उर्बसिन गोहरार'आ होले आस निंग्हय अन्ने विचारन छेमा ननोस होत्'एन। 23एन्देरगेका एन एरदन का निन हिस्गाँहा ती निन्दरका र'अदय अउर पाप ही हेर्रना नू र'अदय।”
24ताबसिले सिमोनस बाचस, “निनुम एंग्हय खतरी उर्बस नू गोहरार'आ चि'आ का निम बाचका एन्दर'उम कत्था हूँ एंग्हय म'इयाँ मला बर'आ नेक'आ।”
25ख़ने पतरुसस अउर युहन्नस गोवाह चिच्चका ख़ोख़ा अउर उर्बस ही बचन तिंगका ख़ोख़ा सामरिर ही बग्गे पद्दा नू दवसमाचार तेंगतेम आर यरुसलेम किर्रियर।
फिलिपस अउर इथियोपिया ता आलस
26अदिही ख़ोख़ा धर्मेस ही ओन्टा मेर्ख़ादुतस फिलिपसिन बाचस, “चो'आ की दखिन तरा काला की यरुसलेम ती गाजा तरा काना डहरे नू कला। असन फिटकी अड्डा ही डहरे र'ई।” 27-28ताब फिलिपस सपड़ारस की केरस। असन ओरोत आलसिन ख़क्खियस, ने नपुंसक रहचस। आस इथियोपिया ता रानी कन्दाकी ही कोहाँ मन्तरी अउर खजान्ची रहचस। आस यरुसलेम नू धर्मेस ही ओहमा नन्जस की तंग्हय घोड़ो गडी नू किर्ररा लगियस ख़ने यसायाह अगमजानिस ही पुथिन पढ़'आ लगियस। 29ताबसिले नेम्हा बोलतस फिलिपसिन बाचस, “कला अउर आ घोड़ो गडी ही ख़ोख़ा लग्गा।” 30फिलिपस आस गुसन बुंगनुम केरस अउर आसिन यसायाह अगमजानिस ही पुथिन पढ़'आ लक्कन मेन्जस। फिलिपस आसिन मेन्जस, “निन अक्कुन एन्दरा पढ़'आ लगदय, अदिन बुझरदय?”
31ताबसिले आस बाचस, “नेक'उम मला तेंगना गुटी एन एकसे बुझर'आ ओंगोन?” ख़ने आस फिलिपसिन घोड़ो गड़ी नू अरगा की तंग्हय संगे नू ओक्का गे बिन्ती नन्जस। 32आस पढ़'आ लक्का धरमपुथी ही कड़ी इद रहचा,
“एकसे आस ख़ोतर'आ गे होतारका मेढ़हो लेखा रहचस,
उन खन्डुर ही अगू नू छछेम र'ऊ मेढ़हो ख़द्द लेखा,
आस तंग्हय ब'ई ती ओन्टा कत्था हूँ मला ओत्थरस।
33आस ही हिड़रका परिया नू आस गे न्याय मला ख़क्खरा।
आस ही बनस गुट्ठी ही पत्त नू ने तेंगा ओंगनर?
एन्देरगेका आस ही जिन्गी ख़ेख़ेल ती होतारा।”#यसायाहस ५३:७-८
34ख़ने आ नपुंसकस फिलिपसिन बाचस, “सोग्गे नना की एंगन तेंगा, अगमजानिस ई कत्थन नेख़य पत्त नू बाचका र'अदस आस ही तंग्हय पत्त नू का दोसरा नेख़'अम पत्त नू?” 35ताबसिले फिलिपस धरमपुथी ता आ कड़ी तिम आसिन येसुस ही पत्त नू दवसमाचार तिंगियस। 36ख़ने आर डहरे नू काते-कातेम थोरे अम्म मन्जका ओन्टा अड्डा गुसन अड़सियर। आ नपुंसकस बाचस, “एःरा, इसन अम्म र'ई, एंगन बप्तिस्मा हो'अना ती ने छेक'आ ओंगो?” 37[फिलिपस बाचस, “निन सौंसे जिया ती पत्त'अदय होले निन बप्तिस्मा हो'आ ओंगदय।” नपुंसकस बाचस, “एन पत्त'अदन का येसू ख्रिस्तस धर्मेस ही तंग्दस हिकदस।”]#८:३७ एक'अम-एक'अम लिखरका पच्चा बा'इबल गुट्ठी नू ई पद मल्ला।
38आस घोड़ो गड़िन इज्त'आ गे पेसस। अदिही ख़ोख़ा फिलिपस अउर आ नपुंसकस दोनो गोड़ेर अम्म नू कोरचर अउर फिलिपस आस गे बप्तिस्मा चिच्चस। 39आर अम्म ती बाहरी उरख़र, ख़ने उर्बस ही बोलतस फिलिपसिन धरचस की होच्चस अउर आ नपुंसकस आसिन फेर इकला हूँ मला इरियस। लेकिन आस रिझिरनुम तंग्हय डहरे लग्गियस। 40ख़ोख़ा नू फिलिपस अस्दोद नू एथरस अउर कैसरिया मला अड़सना गुटी हुरमी सहर गुट्ठी नू दवसमाचार मेन्त'आनुम केरस।
Currently Selected:
मुध चेलर 8: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
