मुध चेलर 28
28
पावलस माल्टा टापू नू
1एन्नेकी बच्छरकम की गन्डा नू बरचकम की आ टापू ही नामे माल्टा हिके ब'अना कत्थन एम अख़चकम। 2असन र'ऊ आलर एमन कोहड़े दया नन्जर। चेँप पु'इयाँ की प'इयाँ लक्का करने आर चिच्च दगचर चिच्चर, अउर एमन होरमारिन स्वागत नन्जर। 3पावलस ओन्द बोजहा कंकन ख़ोड़चका रहचस अदिन ओन्दरस की चिच्च नू सज्जस। चिच्च सेकचा ख़ने ओन्टा नेर्र उरख़िया अउर आस ही ख़ेक्खा नू पोज्जरा। 4अस्ता आलर आस ही ख़ेक्खा नू नेर्र पोजरकन इरियर की ताम-ताम नू बाच नक्खरर, “मानिम ई आलस आल पिटू हिकदस। समुन्दर ती बच्छरस की तो उरख़स लेकिन न्याय ननू देवतद इसिन बच्छर'आ मला चिच्चा।” 5लेकिन पावलस आ नेर्रन चिच्च नू झड़चस चिच्चस अउर आस गे एन्दरा हूँ मला मन्जा। 6लेकिन आस ही देह फुल्लर'ओ की अनचोख'एम खत्तर'ओस की खे'ओस ब'आ की आर असरा एःरा लगियर। आर बग्गे बेड़ा गुटी असरा नन्जर लेकिन आस गे एन्दरा हूँ मला मन्जकन इरियर की आर तम्हय विचारन बदलाचर की ब'आ हेल्लरर, “इस तो मानिम देवता हिकदस।”
7आ टापू ता पब्लियस नामे मन्जका मुधस ही ख़ल्ल-उखड़ी आ अड्डा ही हेद्देम रहचा। आस एमन स्वागत नन्जस अउर एम तिन उल्ला गुटी आस ही एड़पा नू पाही मन्जकम की रहचकम। 8पब्लियसस ही तम्बस नड़ी अउर सुलवा'ई रोगे ती बेमार रहचस। पावलस आसिन एःरा केरस अउर आस ही खतरी गोहरारस। तंग्हय ख़ेक्खन आस म'इयाँ उइय्यस ख़ने आस कोड़े मन्जस। 9एन्ने मन्जा ख़ने आ टापू ता और बेमार आलर हूँ बरचर अउर आर हूँ कोड़े मन्जर। 10आर एमरिन बग्गे आदर नन्जर की उपहार गुट्ठी चिच्चर अउर काना बेड़ा नू डहरे नू चाड़ पड़ारना हुरमी चिज गुट्ठिन हूँ कोहाँ डोँगा नू सज्जर चिच्चर।
पावलस माल्टा ती रोम नू
11तिन महिना ख़ोख़ा एम जौवा देवता बाचका की लिखिरका कोहाँ डोँगा नू अरगकम की माल्टा ती केरकम। आ कोहाँ डोँगा अलेक्जेन्ड्रिया सहर ती बरचा की भैर प'इयाँ माल्टा टापू नुम रहचा। 12एम सुराकुसा'ई नगरे नू अड़सकम की असन तिन उल्ला रहचकम। 13अस्ते ती एम इटाली राजी ही रेगियन ब'अना सहर नू अड़सकम, अउर दोसरा उल्ला दखिन तरती के ताका तागरा, ख़ने एम तिसरा उल्ला पटि'ओली ब'अना सहर नू अड़सकम। 14असन एम पत्त'ऊ भ'इय्योरिन ख़क्खकम अउर आर एमन सात उल्ला गुटी तम्हय गने र'आ गे बिन्ती नन्जर। एन्नेकी एम रोम नू अड़सकम। 15एकाबिरी रोम सहर ता पत्त'उर एम्हय पत्त नू मेन्जर, ख़ने आर अप्पियस बजार अउर तिन-पाटी ब'अना अड्डा गुटी एमन ख़क्खा गे बरचर। आरिन इरियस की पावलस डिढ़ ख़क्खियस अउर धर्मेसिन धन्नेबाद चिच्चस।
पावलस रोम सहर नू
16एकाबिरी एम रोम नू अड़सकम, ख़ने पावलस ओरोत सिपाहिस ही एरनाख़ोजना नू ओत्ख़ेम र'आ गे अनुमती ख़क्खियस।
17तिन उल्ला ख़ोख़ा पावलस रोम नू र'ऊ यहुदी अगुवरिन मिख़ियस। आर ख़ोड़रर ख़ने पावलस बाचस, “अना भ'इरो, एन एंग्हय जतियर अउर एम्हय पुरखर ती चलरनुम बरचका चाल-चलन ही बिड़दो नू एन्दरा हूँ मला नन्जकन अन्नू हूँ यहुदी भ'इय्योर एंगन यरुसलेम नू धरचर की कैदी ही रुप नू रोमिर गे सोपचर चिच्चर। 18रोमी आलर एंगन जाँच नन्जर ख़ने एंग्हय नू पिटरना दन्डे ख़क्खना लेखा एन्दरा हूँ मला ख़क्खियर ख़ने एंगन अम्बना चि'अना विचार नन्जका रहचर। 19लेकिन यहुदिर बिड़दो नन्जका करने रोमी बेलस गुसन एंगा गे बिन्ती ननम पड़ारा। लेकिन एंग्हय जतियर ही बिड़दो नू एंग्हय गने एन्दर'उम दोस लगब'अना कत्था मला रहचा।#मुध चेलर २५:११ 20औंगे एन निम्हय गने ख़क्खा की कच्छनखर'आ गे निमरिन मिख़का र'अदन। एन्देरगेका इस्रा'एलिर असरा नन्जका ने हिके आस ही खतरिम एन ई सिकड़ी नू हेर्रका र'अदन।”
21आर आसिन बाचर, “एम तो निंग्हय पत्त नू यहुदिया प्रदेस ती एन्देर चिट्ठी हूँ मला ख़क्खकम। एक'अम भ'इय्योर बरचर की निंग्हय बिड़दो नू एन्दर'उम मलदव कत्था हूँ मेन्ताचका या कच्छनखरकम मल्लर। 22लेकिन निंग्हय विचार एन्दरा हिके, अदिन निंग्हय ती मेना बेद्दम। एन्देरगेका एम ई बग्गे लेका अख़दम का आलर गोट्टे तरा निंग्हय गोहड़ा ही बिड़दो नू लेका कच्छनखरनर।”
23अदिही ख़ोख़ा आर पावलस ही कत्था मेना गे उल्ला चज्जियर। आ उल्ला नू बग्गे यहुदिर ख़ोड़रर की पावलस ही डेरा नू बरचर। आ उल्ला पावलस पैरी ती लेके बिड़ी पुत्तना गुटी धर्मेस ही राजी ही पत्त नू गोवाह चिच्चस। येसुसिन पत्त'आ नेक'आ ब'आ की आस मोसस अउर अगमजानिर ही पुथी नू लिखरका कत्था ती आस येसुस ही पत्त नू बुझाब'अनुम बग्गे कत्था गुट्ठी तिंगियस। 24आस बाचका कत्थन कय गोड़ेर पत्ताचर अउर कय गोड़ेर मला पत्ताचर। 25ताम-ताम नू कत्था मला मिल्रा ख़ने आर काना ती अगू पावलस एन्ने बाचस, “नेम्हा बोलतस यसायाह अगमजानिस ही ब'ई ती निम्हय पुरखरिन एन्ने बाचका रहचस, 26इबड़ा आलर गुसन कला की ब'आ,
‘मेना गे तो निम मेन्दर,
लेकिन इकला हूँ मला बुझरदर,
एःरा गे तो ओंगदर, लेकिन इकला हूँ एःरा पोल्दर,
27एन्देरगेका ई आलर ही जिया कठोर मन्जकी र'ई,
अउर आर ही ख़ेबदन उट्टका र'अनर,
अउर आर तम्हय ख़न्नन मिंक्खका र'अनर,
महलेता आर ख़न्न ती एःरा ओंग्गोर पहेंस,
ख़ेब्दा ती मेना ओंगोर पहेंस,
जिया ती बुझर'आ ओंगोर पहेंस,
अउर किर्रोर की बर'ओर पहेंस,
अउर एन आरिन कोड़े ननोन पहेंस।’”#यसायाहस ६:९-१०
28अउर पावलस बाचस, “औंगे निम अख़'आ नेक'आ का धर्मेस चि'ऊ बछरना ही खबर नन-यहुदिर ही खतरी त'इका र'ई अउर आर मेनोर।” 29[आस ई कत्था बाचका ख़ोख़ा, यहुदिर तम्हय-तम्हय नुम बग्गे आना-नखरनुम असले ती चले केरर।]
30पावलस पुरा दु'ई बछर गुटी डेरा होच्चस की तंग्हय खरचा नुम रहचस। अउर आस गुसन बर'उर होरमारिन आस स्वागत नन्जस। 31आस डिढ़ मना की धर्मेस ही राजी ही पत्त नू तिंगनुम उर्बा येसू ख्रिस्तस ही पत्त नू सिखाब'आ लगियस अउर ने हूँ आसिन मला छेक्'आ लगियर।
Currently Selected:
मुध चेलर 28: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
