मुध चेलर 2
2
नेम्हा बोलतस ही एत्तना
1पेन्तिकोस पबनी#२:१ पेन्तिकोस पबनी: इद यहुदिर ही ख़ोयना परब हिके। इद कट्टना परब ही पचास पुरना उल्ला नू मना लगिया। ही उल्ला नू उर्बा येसुस नू पत्त'ऊ होरमर ओन्द अड्डा नू ख़ोड़रका रहचर।#लेविर २३:१५-२१; व्यवस्था १६:९-११ 2आ बेड़ा मेर्ख़ा ती अन्चोख'एम कोहाँ ताका तागरना लेखा ख़रख़ना मेन्दरा अउर आर रहचका गोट्टे एड़पा नू आ ख़रख़ना ती निन्दिया। 3चिच्च ही ततख़ा गुट्ठी लेखा आर हेद्दे एथरा, अउर अबड़ा ओर्त-ओर्त म'इयाँ उक्किया। 4अउर आर होरमर नेम्हा बोलतस ती निन्दरर की आर नेम्हा बोलतस तिम कच्छनखरना सवंग ख़क्खियर की नन्ना भखा गुट्ठी नू कच्छनखर'आ हेल्लरर।
5आ बेड़ा नू ख़ेख़ेल ता बग्गे राजी ती यहुदी धरम मन'ऊ आलर यरुसलेम नू बरचका रहचर। 6ताब ई ख़रख़नन मेन्जर की आलर ही कोहाँ गोहड़ा ख़ोड़रा। आर अकबकरर एन्देरगेका आर होरमर तम्हय-तम्हय भखा गुट्ठी नू कच्छनखरनन मेन्जर। 7आर कोहड़े अकबकरर केरर अउर ब'आ हेल्लरर, “एन्दरा ई कच्छनखर'ऊ आलर होरमर गालिलिर मलनर दरा? 8होले एकसे नाम होरमत नम्हय-नम्हय अयंग भखा नू कच्छनखरनन मेना लगदत? 9नाम तो इसन पार्थी गुट्ठी, मादी गुट्ठी, एलामी गुट्ठी, मेसोपोटामिया, यहुदिया प्रदेस, कापाडोकिया, पोन्टस, एसिया, 10फ्रिगिया, पामफिलिया, मिसर राजी, कुरेनी हेद्दे-हेद्दे नू पड़ारना लिबिया राजी ता प्रदेस गुट्ठी, रोम ती बरचका यहुदी अउर यहुदी धरम होच्चका दोसरा जात ता आलत, 11क्रेट टापू अउर अरब राजी ती बरचका आलत हिकदत। लेकिन इर धर्मेस नन्जका कोहाँ नलख गुट्ठी ही पत्त नू कच्छनखरकन नम्हय-नम्हय भखा नू मेना लगदत।” 12एन्नेकी आर अकबकरर अउर हयकट मन्जर की ताम-ताम नू एन्ने ब'आ हेल्लरर, “इदिही मने एन्दरा हिके?”
13लेकिन नन्नर हंसी-ठट्ठा नन्जर की बाचर, “आर तो पुना अंगुर मध ओन्डर की उंखका र'अनर।”
पतरुसस ही उपदेस
14ताबसिले पतरुसस अउर एगार गोड़े मुध चेलर गने इज्जस की जोरसे आरिन ब'आ हेल्लरस, “यहुदिया प्रदेस ता आलरो अउर यरुसलेम नू र'ऊ आलरो, निमा गे ई कत्थन अख़'आ हो'आ अउर एंग्हय कत्थन मेना। 15एकसे निम सोचकादर, अन्ने इर मा उंखका र'अनर एन्देरगेका अक्कुन तो पैरी ता नौ लेका ख़रख़की र'ई। 16लेकिन यो'एल अगमजानिस ती बाचका कत्था इदिम हिके,
17धर्मेस ब'अदस,
‘फेच्चा उल्ला गुट्ठी नू एन होरमा आलर म'इयाँ एंग्हय बोलतन तुन्दोन,
अउर निम्हय ख़द्दख़र्रार मुन्द तेंगोर,
जोख़र देखार गुट्ठी एरोर,
अउर पचगिर सपना एरोर।
18ह'ए, एन अबड़ा उल्ला नू एंग्हय सेवा ननुर आलस अउर आली म'इयाँ,
एंग्हय बोलतन तुन्दोन चि'ओन,
अउर आर मुन्द तेंगोर।
19म'इयाँ मेर्ख़ा नू एन हयकट नलख
अउर कि'इयाँ ख़ेख़ेल नू चिन्हा गुट्ठी एद'ओन,
असन ख़ेस, चिच्च अउर धुवाँ ही बदाली एथर'ओ।
20उर्बस ही कोहाँ अउर महबा ही उल्ला बरना ती अगू,
बिड़ी उख़ा मनो कालो अउर चन्दो ख़ेस लेखा लाल मनो कालो।
21अउर उर्बस ही नामेन हु'ऊ होरमर बछरनन ख़क्खोर।’#यो'एलस २:२८-३२
22“इस्रा'एल ता आलरो, ई कत्थन मेना, नासरत ता येसुस एन्ने आलस रहचस नेकन धर्मेस सवंगिय नलख गुट्ठी, हयकट नलख गुट्ठी अउर चिन्हा गुट्ठी ती निम्हय मझी नू साबित नन्जस। निमा गे अख़चका र'अदर का धर्मेस निम्हय मझी नू इबड़ा नलख गुट्ठी आस ती नन्जका रहचस। 23येसुसिन निम्हय ख़ेक्खा नुम सोप'आ च'आ पड़ार'ओ बाचस की धर्मेस ढेर पहले अगुतिम योजना अउर निरनय नन्जका रहचस। औंगे येसुसिन क्रुस नू टंग'आ की पिटत'आ गे निम येसुसिन मलदव आलर ही ख़ेक्खा नू सोपचकर।#मत्तिस २७:३५; मरकुस १५:२४; लुकस २३:३३; युहन्नस १९:१८ 24लेकिन धर्मेस आसिन केच्चका ती उज्जताचका र'अदस। धर्मेस आसिन खे'अना ही सवंग ती अम्बताचका र'अदस एन्देरगेका खे'अना आसिन तंग्हय तबे नू उइय्या पोल्ला।#मत्तिस २८:५-६; मरकुस १६:६; लुकस २४:५ 25एन्देरगेका दा'उद बेलस हूँ आस ही पत्त नू एन्नेम बाचका रहचस,
एन उर्बसिन सगरो उल्ला एंग्हय अगू इरकन,
एन्देरगेका एन मा एल्चा नेक'आ ब'आ की आस एंग्हय तिना ख़ेक्खा तरा र'अदस।#अस्सनापाड़ना १६:८-११
26औंगे एन जिया तिम रिझरका र'अदन
अउर एंग्हय ततख़ा रिझ ती निन्दरकी र'ई।
अउर एंग्हय देह खे'ओ कालो अन्नू हूँ
एन फेर बच्छर'ओन ब'अना असरा नू उज्जोन,
27एन्देरगेका निन एंग्हय बोलतन केच्चकर ही अड्डा नू मला अम्बोय,
न तो निन अपना नेम्हा आलस ही देहन मसड़ा नू कित्ता चि'ओय।
28निन एंगन जिन्गी ही डहरेन एदका र'अदय,
निंग्हय गने मन्दन होले एन रिझ ती रिझिरदन।
29“अना भ'इ-बहिनरो, नम्हय पुरखा दा'उद बेलस ही पत्त नू एन सफा ती ब'आ ओंगोन। आस केच्चस अउर माड़रस, अउर आ मसड़ा इन्ना गुटी हूँ नम्हय गनेम र'ई। 30लेकिन आस अगमजानी रहचस अउर आस ही तंग्हय बनस तिम आस लेखम बेल कम'ओन बाचस की धर्मेस ही गछरकन आस अख़'आ लगियस।#अस्सनापाड़ना १३२:११; २ सामु'एलस ७:१२-१३ 31ख़ोख़ा नू मन्ना कत्था गुट्ठी अगुतिम दा'उदस अख़चका करने आस ख्रिस्तस ही उज्जा चो'अना ही पत्त नू एन्ने बाचस,
‘आस केच्चकर ही अड्डा नू मला अम्बरका रहचस,
अउर आस ही देह मसड़ा नू हूँ मला कित्तिया।’
32ई येसुस दुम हिकदस नेकन धर्मेस केच्चका ती उज्जताचस अउर इबड़ा कत्था ही एम होरमम गोवाह र'अदम। 33धर्मे बबस येसुसिन तंग्हय तिना ख़ेक्खा पक्खे ओक्ताचस अउर बबस ती नेम्हा बोलतस ही गच्छरकन ख़क्खियस अउर आ नेम्हा बोलतसिन नमा गे चिच्चका र'अदस, एकदन निमा एरदर अउर मेन्दर। 34मेर्ख़ा नू केरस की दा'उदस तानुम तो धर्मेस ही तिना ख़ेक्खा पक्खे मला उक्कियस, अन्नू हूँ आस एन्ने बाचस,
‘धर्मेउर्बस एंग्हय उर्बसिन बाचस,
निन एंग्हय तिना ख़ेक्खा पक्खे ओक्का
35एका गुटी एन निंग्हय बैरिरिन निंग्हय ख़ेड्ड कि'इयाँ मला ओन्दर'ओन।’#अस्सनापाड़ना ११०:१
36“औंगे अक्कू इस्रा'एल ता होरमा आलर ई कत्थन अख़'आ पड़ार'ओ का धर्मेस निम क्रुस नू पिटका येसुसिनुम उर्बा अउर ख्रिस्त दोनो कमचका र'अदस।”
37ई कत्थन मेन्जर की आर ही जिया बेधरा केरा। अउर आर पतरुस अउर मुध चेलारिन मेन्जर, “अना भ'इरो, होले अक्कू एम एन्दरा ननोम?”
38पतरुसस आरिन बाचस, “पाप ती जियन किर्रत'आ, अउर निम्हय पाप छेमा ही खतरी येसू ख्रिस्तस ही नामे नू निम होरमर बप्तिस्मा हो'आ, अउर निम धर्मेस ही बरदान नेम्हा बोलतसिन ख़क्खोर। 39एन्देरगेका ई गच्छरकन निमा गे अउर निम्हय ख़द्दर गे अउर गेच्छा-गेच्छा राजी गुट्ठी नू र'उर गे हिके। नेका-नेकन उर्बस नम्हय धर्मेस मेख़दस।”
40पतरुसस आरिन बग्गे कत्था गुट्ठी बाचस की गोवाह चिच्चस अउर आरिन एन्ने ब'अनुम चेताब चिच्चस, “ई मलदव पिढ़ी म'इयाँ बरना दन्डे ती निम निमरिनुम बछाब'आ।” 41ताबसिले ने-ने आस ही कत्थन पत्ताचर आर बप्तिस्मा होच्चर अउर अउलम लगभग तिन हजार आलर आर गने मेस्सरर। 42आर मुध चेलर ही सिखाब'अनन मेना गे, संगती नू, उर्बस ही भोजे ओना-मोख़ा गे अउर गोहरारना नू लक्का र'आ लगियर।
पत्त'उर ही संगती
43मुध चेलर ती कोहड़े हयकट नलख अउर चिन्हा गुट्ठी मन्जकन इरियर की होरमा आलर एल्चा हेल्लरर। 44होरमा पत्त'उर संगेम र'आ लगियर अउर आर ही एन्दरा रहचा अबड़ा होरमर ही सजहा रहचा।#मुध चेलर ४:३२-३५ 45आर तम्हय ख़ल्ल-उखड़िन अउर ज्या बग्गे चिजबिज गुट्ठी रहचा अबड़न बिसियर की ख़क्खका ढिबन होरमर तम्हय-तम्हय मझी नू चाड़ लेखा ख़टर-नखर'आ लगियर। 46सगरो आर ओन्टेम जिया मना की धर्मेस ही मन्दिर नू ख़ोड़र'आ लगियर, अउर एड़पा-एड़पा नू उर्बस ही भोजे नना लगियर, अउर आर रिझ अउर सुध जिया ती ओना-मोख़ा लगियर, 47अउर धर्मेस ही ओहमा नन्तेम। अउर नन्ना आलर आरिन पसिंग नना लगियर। अउर उर्बस सगरो बछरनन ख़क्खुरिन आर गने मेस'आ लगियस।
Currently Selected:
मुध चेलर 2: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
