मुध चेलर 1

1अना थियोफिलस, एन पहेला पुथी नू येसुस ओरे ती नन्‍जका नलख अउर सिखबाचका कत्‍था गुट्‍ठी लिखचका र'अदन।#लुकस १:१-४

2तान चज्‍जका मुध चेलारिन येसुस नेम्‍हा बोलतस ती पेसका ख़ोख़ा आस मेर्ख़ा नू होतारका उल्‍ला गुटी ता हुरमी कत्‍थन आ पुथी नू लिखचका र'अदन। 3येसुस दुक्‍खे भोगचका अउर केच्‍चका ख़ोख़ा आस आर गे कोहड़े मानी सबुत ती तान उज्‍जना र'अदन बाचस की एदस। चालिस उल्‍ला गुटी आस आर गुसन घड़ी-घड़ी एथरते रहचस अउर धर्मेस ही राजी ही पत्‍त नू आरिन तिंगियस। 4ओन्‍द समे येसुस आर गने मन्‍डी ओनो बिरी आस आरिन पेसस, “निम यरुसलेमन अम्‍बके की एसन हूँ मला कालके, लेकिन बबस नेम्‍हा बोलतसिन चि'ओन बाचका गच्‍छरकन आसे एःरा। एकदा ही पत्‍त नू निम एंग्‍हय ती मेन्‍जका र'अदर।#लुकस २४:४९ 5एन्‍देरगेका युहन्‍नस तो अम्‍म ती बप्‍तिस्‍मा चिच्‍चस, लेकिन अक्‍कू ती जोक्‍क उल्‍ला नू नेम्‍हा बोलतस नू निम्‍हय बप्‍तिस्‍मा मनो।”#मत्‍तिस ३:११; मरकुस १:८; लुकस ३:१६; युहन्‍नस १:३३

येसुस मेर्ख़ा नू होतारदस

6औंगे एकाबिरी मुध चेलर ख़ोड़रर ख़ने आर येसुसिन मेन्‍जर, “अना उर्बायो, एन्‍दरा निन ई बेड़ा नुम इस्रा'एलिर ही राजिन फेर पहिले ता लेखा कम'ओय चि'ओय?”

7येसुस आरिन बाचस, “इदिही बेड़ा तो धर्मे बबस तंग्‍हय अधिकार भितरी तोक्‍चका बेड़ा अउर मिती र'ई, अदिन अख़ना निम्‍हय नलख मल्‍ली। 8लेकिन नेम्‍हा बोलतस निम म'इयाँ बरचका ख़ोख़ा निम सवंग ख़क्‍खोर, अउर निम यरुसलेम नू, गोट्‍टे यहुदिया प्रदेस नू, सामरिया प्रदेस नू अउर ख़ेख़ेल ता फेच्‍चा गुटी एंग्‍हय गोवाह मनोर।”#मत्‍तिस २८:१९; मरकुस १६:१५; लुकस २४:४७, ४८ 9आस ई कत्‍थन बाचका ख़ोख़ा, आर इरनुम-इरनुम आस म'इयाँ होतारस अउर बदाली आसिन आर ही ख़न्‍न ती ओढ़ नन्‍जा चिच्‍चा।#मरकुस १६:१९; लुकस २४:५०, ५१

10एकाबिरी आर आस ही मेर्ख़ा तरा कानन मेन इरनुम रहचर, आबिरी अनचोख'एम पंडरु झुला अत्‍तका दु'ई गोड़े आलर आर हेद्‍दे इज्‍जर। 11आर बाचर, “अना गालिल ता आलरो, निम एन्‍दरगे इज्‍जकर की मेर्ख़ा तरा एःरा लगदर? ई येसुस ने निम्‍हय गुस्‍ते ती मेर्ख़ा नू होतारस, अक्‍कुन एकसे निम आसिन मेर्ख़ा नू कानन इरकर, अन्‍नेम आस फेर बर'ओस।”

मतियासस चाजरका

12अदिही ख़ोख़ा आर जैतुन परता ती यरुसलेम किर्रियर। यरुसलेम ती ई परता लगभग ओन्‍द किलोमिटर लेखा गेच्‍छा पड़ार'ई। 13सहर भितरी कोरचका ख़ोख़ा आर म'इताँ तल्‍ला ही ताम र'ऊ कोठली नू कोरचर। आर पतरुसस, युहन्‍नस, याकुबस, अन्‍द्रियासस, फिलिपस अउर थोमस, बारथोलोमा'इस अउर मत्‍तिस, अल्‍फयसस ही तंग्‍दस याकुबस अउर राजिन चोन्‍हा ननू सिमोनस अउर याकुबस ही तंग्‍दस यहुदस रहचस।#मत्‍तिस १०:२-४; मरकुस ३:१६-१९; लुकस ६:१४-१६ 14कय गोड़े मुक्‍कर अउर येसुस ही तंगियो मरियम अउर आस ही भ'इय्‍योर ही संगे इबड़ा होरमर ख़ोड़र'आ की गोहरार'आ लगियर।

15अबड़ा उल्‍ला नू असन लगभग १ सय २० गोड़े उर्बा येसुस नू पत्‍त'ऊ आलर ख़ोड़रका रहचर। पतरुसस आर ही मझी नू इज्‍जस की बाचस, 16“अना भ'इ-बहिनरो, धरमपुथी ता बचन पुरा मन्‍ना चाड़ रहचा, एका बचन येसुसिन धरत'उर ही अगुवा यहुदस ही पत्‍त नू दा'उदस ही ब'ई ती अगुतिम नेम्‍हा बोलतस कच्‍छनखरका रहचस। 17आस नम्‍हय गोहड़ा ता ओरोत आलस रहचस अउर आस हूँ नम्‍हय लेखा उर्बस ही नलख नना गे चाजरका रहचस।”

18[यहुदस मलदव नलख ती अर्जाचका ढिबा ती ओन्‍टा ख़ल्‍ल ख़िन्‍दियस। आ ख़ल्‍लनुम कुक्‍क भरसा खत्‍तरस अउर आस ही कुल बिदिगरा केरा। अउर पोट्‍टा बहरी उरख़िया की आस केच्‍चस।#मत्‍तिस २७:३-८ 19ई कत्‍थन यरुसलेम नू र'ऊ होरमा आलर अख़चर। औंगे आ ख़ल्‍ल ही नामे तम्‍हय भखा नू “आखेल्‍दामा” उइय्‍यर। इदिही मने ख़ेस ही ख़ल्‍ल हिके।]

20पतरुसस बाचस, “एन्‍देरगेका अस्‍सनापाड़ना पुथी नू एन्‍ने लिखिरकी र'ई,

‘आस ही एड़पा उजड़ार'आ नेक'आ,

अइया ने हूँ मला र'आ नेक'अन।’

इद हूँ लिखिरकी र'ई,

‘आस नन्‍ना नलख ही जिम्‍मा दोसरर नेक'उम हो'आ नेक'अन।’#अस्‍सनापाड़ना ६९:२५; १०९:८

21-22“औंगे येसुस फेर उज्‍जियस ब'अना कत्‍था ही गोवाह मना गे नम्‍हय गोड़हा ती ओन्‍टा आलसिन चाजा पड़ार'ओ। आस एन्‍ने आलस मना पड़ार'ओ, ने युहन्‍नस बप्‍तिस्‍मा चिच्‍चका बेड़ा ती उर्बा येसुस मेर्ख़ा नू होतारका उल्‍ला गुटी आस नम्‍हय गनेम रहचस।”#मत्‍तिस ३:१६; मरकुस १:९; लुकस ३:२१; मरकुस १६:१९; लुकस २४:५१

23इदिन मेन्‍जर की आर दोनो गोड़ेरिन अगू ओन्‍दरर। ओर्तोस योसेफस रहचस, नेकन बारसाबास ब'आ लगियर, आस ही दोसरा नामे युस्‍तस हूँ रहचा, अउर दोसरा मतियासस रहचस। 24आर एन्‍ने गोहरारर, “अना उर्बायो, निन होरमा आलर ही जिया ता कत्‍थन अख़दय, ई दु'ई गोड़े मधे निन नेकन चज्‍जका र'अदय अदिन एमन एद'आ चि'आ। 25अउर आस ई सुसर'अना नलखन अउर मुध चेलर नन्‍ना नलख ही जिम्‍मा हो'ओस नेक'आ एन्‍देरगेका यहुदस ई नलखन अम्‍बियस की आस केच्‍चस अउर तंगा गे सोहारना अड्‍डा नू केरस।” 26अउर आर अबड़ा दु'ई गोड़े ही मझी नू चिट्‍ठा ख़ट्‍टियर ख़ने मतियासस ही नामे नू पड़ारा अउर आसिन मुध चेला मना गे चज्जियर।

Currently Selected:

मुध चेलर 1: KRUX

Highlight

Copy

Compare