Luŋ 15

Kə́ chí mbi ndə məchìi tʉʉ bəbɛʼbʉə bʉ̀ʉ, kaa ya-yə fɛ

1Bʉʼʉ ndə bʉʼʉ tə́nə shʉ́əshʉ́ə ndəŋ fia-Nyii, nɔ kie ndə məkwáa bʉə ndə bɔ̂ŋ gòʼ təmə tə́nə shʉ́əshʉ́ə fɛ, nə bɛʼkə-ʉə, kaa bə mbɔ wo kə́ kɔ́ tʉʉjyu bə haʼ tʉ ŋwɔŋ-ɛŋ fɛ. 2B̈ʉʼʉ kɔ́ tʉʉjyu tʉ bʉə-kətoʼ-bʉʼʉ ndə bʉʉ-yʉə ndə məbɔ́ bɔŋ. 3Bʉʼka buŋ Klai nə kə́ fɔ̀ʼ ndə məkɔ́ tʉʉjyu tʉ ŋwɔŋ-ɛŋ fɛ, bɔŋ ndə bə nyɔ̀ʼ mu ŋwɔʼnə-Nyii mbɔ, “Nchɛŋhə ndə bʉə kə́ véʼ kətʉ-bii, nɔ kə gwù ndə mɔ.” 4Nubə nchəŋnchəŋ ndə bə kə nyɔ̀ʼ mu ŋwɔʼnə-Nyii hə bəshʉbəshʉ, nɔ kə bɛ ndə mədàhə bʉʼʉ mbɔ tíŋ hə ndəŋ məlyʉ̀ʉtə́nə ghɔŋbə məkwèʼhə ndə ŋgieNyiikə tʉʼ kwèʼhə bʉʼʉ, bəkɔ bʉʼʉ yʉ́əʼnə ndəŋ Nyii.

5Tə Nyii, ndə ɔ̃ kɔ́ fyii ndə məlyʉ̀ʉtə́nə bɔŋleʼ kwèʼhə bʉʼʉ, kɔ́ bii nə ghʉəʼkə ndə mədùʼ nə ntɛ gyʉʉ imɔʼ mu bii, ndə i lʉ̀ hə kəwu-Klai Jiso, 6mbɔ bəkɔ bii bənchəŋ chə̀ŋtə nə fyii imɔʼ ndə mə-kə́-kɔ́ məgʉ́ə tʉ Nyii, mbʉ Tie-Tiekətʉ-yʉʼʉ Jiso Klai nə gyʉʉ imɔʼ.

7B̈ii lʉ̀ bəbɛʼbʉə kɔ́ mbʉə-bii, haʼ ndə Klai kə lʉ̀ bii kɔ́ mbʉə-ɔ, ndə məkɔ́ məgʉ́ə tʉ Nyii. 8M̈ɔ shyíi bii mbɔ Klai nɔ kə bɛ vaafɔ̀ʼ bʉə-Juu ndə mədʉ̀ʼ mbɔ Nyii nɔ bɛ wo-shʉəŋ, ndə məchìi mbɔ ŋkɔʼnə-i ndə ɔ kə kɔ̀ʼnə bətietie-bʉə nə yɔŋ fyú shʉəŋ 9mbɔ bəkɔ bʉə ndə bɔ̂ŋ gòʼ təmə bɛ bʉə-Juu fɛ kə́ lə̀ʼtə Nyii mu tʉvyiikə-i. Haʼ ndə bə nyɔ̀ʼ mu ŋwɔʼnə-Nyii mbɔ,

“Nɔ, mɔ bu lə̀ʼtə a mu bʉə ndə bɔ̂ŋ gòʼ təmə bɛ bʉə-Juu fɛ,

mɔ bu yùɔ lyuutə ndə mələ̀ʼtə yie-a.”#15:9 Ŋwɔʼnə təLyuu 18:49.

10I nɔ bìʼ ghɔ̀ŋ mbɔ,

“T̈ʉʉtə-ii bʉ̀ʉ, bʉə ndə bii gòʼ təmə bɛ bʉə-Juu fɛ,

bii bəbʉə-bi mɔʼɔ.”#15:10 Məbìʼ Kɔ́ Nuʼ 32:43.

11Bìʼ ghɔ̀ŋ mbɔ,

“Tə bii bənchəŋ ndə bii gòʼ təmə bɛ bʉə-Juu fɛ, lə̀ʼtə Tiekətʉ,

tə bʉə-kəchisê bənchəŋ lə̀ʼtə ɔŋ.”#15:11 Ŋwɔʼnə təLyuu 117:1.

12Adaya bìʼ nyɔ̀ʼ mbɔ,

“Wo bu fyú hə ndə lyʉʼʉ-ŋgwie-Jesi,

kóʼ gwè ndə məsɔ́ʼ bʉə ndə bɔ̂ŋ gòʼ təmə bɛ bʉə-Juu fɛ.

Bʉə ndə bɔ̂ŋ gòʼ təmə bɛ bʉə-Juu fɛ bu yʉ́əʼnə ndəŋ ɔŋ.”#15:12 Adaya 11:10.

13Tə Nyii ndə bʉʼʉ yʉ́əʼnə ndəŋ ɔŋ, kɔ́ tʉʉjyu tʉ bii ghɔŋbə fyiighʉ́ənə ilə́ŋnə tíŋ hə bɔ̌ŋ məmɔʼfyiihə-ii ndəŋ ɔŋ mbɔ bəkɔ məyʉ́əʼnə-yii ndəŋ ɔŋ kə́ gɛ̀ nə shʉbə nə ghʉəʼ-kəLyʉʉhəNyii-kə.

Luu ndə i chìi Bɔɔ nyɔ̀ʼ nə fyii tə̀ŋnə

14Fyii-ɔ nɔ bɛ itə́nə te bii, bəliŋ-bɔŋ, mbɔ bii nɔ tʉʼ fɔ̀ʼ bʉʉ yɔ́ŋyɔ́ŋ, mbɔ bii nɔ kínə nubə inchəŋ ndə bəkɔ bii dàhə ŋwɔŋtə-ii nə yɔŋ. 15Bɔŋ mu ŋwɔʼnə-fɛ̄ŋ, mɔ nɔʼ nyɔ̀ʼ tʉ bii te bəbɛʼbə nubə nə fyii tə̀ŋnə ndə məkwɛ́nə tʉ bii, bʉʼka buuŋjyu-Nyii ndə ɔ dʉ̀ʼ tʉ mɔ 16ndə məbɛ wofɔ̀ʼ-Klai Jiso tʉ bʉə ndə bɔ̂ŋ gòʼ təmə bɛ bʉə-Juu fɛ. Mɔ nɔ tʉʼ fɔ̀ʼ nə wofɛ̀ʼndɛŋNyii ndə məlɔ̀ʼ ntəŋjyujyu ndə i gwè hə kəghɔ-Nyii, mbɔ bʉə ndə bɔ̂ŋ gòʼ təmə bɛ bʉə-Juu fɛ bəkɔ bɔ̂ŋ bɛ fɔ-fɛ̀ʼndɛŋ-bə ndə i kʉ̀ʼnə tʉ Nyii ndə LyʉʉhəNyiikə nɔʼ chìi bɔŋ bɛ tʉ́ʉnə. 17Nɔ, bʉʼka baʼa Klai Jiso bɛ mɔʼɔ, mɔ nɔ kie luu ndə mə-kə́-ŋàʼtə ndə fɔʼɔ-ɔ ndə mɔ nɔʼ fɔ̀ʼ tʉ Nyii.

18Mɔ mə ŋɔ́ʼhə chu-ɔ ndə məgìe nukə fɛ, yaʼkɛŋ nukə ndə Klai nɔʼ kwáa mɔ ndə məfɔ̀ʼ tíŋ hə bɔ̌ŋ ŋgiebə-ɔŋ ghɔŋ fɔʼtə-ɔŋ, kə́ bɛ ndə məchìi bʉə ndə bɔ̂ŋ gòʼ təmə bɛ bʉə-Juu fɛ bɔ̂ŋ kə́ yʉ́ chu-Nyii, tíŋ hə ndəŋ ŋgie-chu-kə-ɔŋ ghɔŋbə fɔʼtə-ɔŋ, 19nə ghʉəʼ-bəcheʼ-kə ghɔŋbə nuchíechubə nə ghʉəʼ-kəLyʉʉhəNyii-kə. Nɔ bɛ nɔ mbɔ mɔ nɔʼ lɔ̀ʼ ntəŋjyujyu te Klai lʉ̀ hə Jɛlosalɛŋ tə gɛ̀ dàa Ilolikum gɛ̀ kùu.

20Mu fyii-ɔ, nɔ tʉʼ kwònə mbɔ m̈ɔ kə́ lɔ̀ʼ ntəŋjyujyu ndə yəŋbə təmə bə nɔʼ nə kwə́ʼ chɔ te Klai fɛ byuunɔ, təmə mɔ bu kə́ bɔ́ŋ njaa ndəŋ yiesê-wo-kədɔŋ. 21Ndə ŋwɔʼnə-Nyii ghɔ̀ŋ mbɔ,

“Bʉə ndə bə kə gòʼ təmə nɔʼ kə shyíi bɔŋ te nə nɔŋ fɛ bu nyíɛ shʉəŋ-ɛŋ,

bʉə ndə bɔ̂ŋ gòʼ təmə nɔʼ nə yʉ́ nukə te ɔ fɛ tʉkə-ʉə bu súunə ndəŋ ŋgiekə-i.”#15:21 Adaya 52:15.

22Nɔ bɛ luu nɔ, ndə i tʉʼ chíe mɔ ndə məgwè mətòʼ tʉ bii, bʉʼka mɔ nɔ kə kə́ lɔ̀ʼ ŋgieNyiikə ndə bəbɛʼyəŋbə.

Ntɛ ndə Bɔɔ tʉʼ kwɔ̀ʼtə ndə mətòʼ ndə yəŋbə

23Bɔŋ nduɔ ndə mɔ nɔʼ lìʼ fɔʼɔ-ɔ mu biehə-ɔ̄ŋ nɔ bɔŋleʼ bʉʼka mbɔ mɔ nɔʼ kə́ kʉ́ʉ ndə ŋgʉʼhə buŋmbi ndə məgwè tʉ bii nɔ, 24mɔ nɔ tʉʼ kwɔ̀ʼtə ndə məgwè nyíɛ bii, ndə mɔ bu kə́ tíŋ ndə məgɛ̀ Səbɛŋ, bəkɔ bii bɔŋleʼ kwáa mɔ ndə məgɛ̀ chɔ, ndʉʉ ndə mɔ nɔʼ sàtə ŋwɔŋ-ɔŋ ndə məbɛ bʉʼʉ ndə kʉʉkə məniʼ.

25Bɔŋ nduɔ, mɔ nɔ tʉʼ gɛ̀ Jɛlosalɛŋ ndə məgɛ̀ kɔ́ ŋkwaa tʉ bʉə-Nyii chɔ. 26Bʉʼka tʉʉ bʉə-chɔshi ndə bɔ̂ŋ bɛ mu Masɛdonia ghɔŋbə Akia nɔʼ bʉ̀ʉ ndə məmɔ̀ʼ fɔbə tə́ŋ kɔ́ tʉ bʉə-mbʉʼ ndə bɔ̂ŋ bɛ mu bʉə-Nyii mu Jɛlosalɛŋ. 27Nɔ kə kʉ̀ʉ bɔŋ ndə məfɔ̀ʼ nɔ, bɔŋ ndə ŋgie-shʉəŋ-kə, bɔ̂ŋ nɔ kə kie ndə məkwáa bɔŋ. Bʉʼka bʉə-Juu kə gwè nə biʼkə ndə i gwè hə kəghɔ-LyʉʉhəNyiikə tʉ bʉə-Nyii ndə bɔ̂ŋ gòʼ təmə bɛ bʉə-Juu fɛ, mbəŋ-yʉə ghɔ nɔ kie ndə məbìʼ bʉə-Juu nə fɔbə ndə Nyii tʉʼ kɔ́ tʉ bɔŋ. 28Ndʉʉghɔfii, ndʉʉ ndə mɔ bu mìʼtə fɔʼɔ-ɔ chɔ, kɔ́ fɔkə tʉ bɔŋ ndə bə kə mɔ̀ʼ, mɔ bu lɔ̀ tíŋ hə kəyəŋ-bii buŋ gɛ̀ Səbɛŋ. 29Mɔ nɔ kínə mbɔ ndʉʉ ndə mɔ tʉʼ gwè tʉ bii, mɔ bu gwè nə biʼkə ndə i gwè hə kəghɔ-Klai ilə́ŋnə.

30Mɔ nɔ tʉʼ fʉ̀ʉtə bii, bəliŋ-bɔŋ, mbɔ bʉʼka məmɔʼfyiihə-ʉʼʉ ndəŋ Jiso Klai Tiekətʉ-yʉʼʉ leʼnə ŋkʉ̂ʉ ndə LyʉʉhəNyiikə tʉʼ kɔ́ tʉ bʉʼʉ, b̈ii bìa mɔ bʉʼʉ kɔ̀ɔtə ndə məgháaNyii tʉ mɔ, 31mbɔ Nyii chʉʼ chʉ̀ʼ tʉkə-ɔŋ hə kəghɔ-bʉə mu Judia ndə bɔ̂ŋ gòʼ təmə bɛ́ŋ Nyii fɛ, bɔŋleʼ gháaNyii mbɔ ẗʉʉ bʉə-Nyii mu Jɛlosalɛŋ bʉ̀ʉ ndə məbɛ́ŋ fɔʼɔ-ɔ tʉ bɔŋ, 32kə mbɔ kaʼ bɛ ŋkʉʉnə-tʉʉ-Nyii, mɔ chʉʼ gwè tʉ bii nə tʉʉjyu, bʉʼʉ bɔŋleʼ kwèʼhə ŋwɔŋtə-ʉʼʉ.

33Tə Nyii ndə ɔ kɔ́ fyiighʉ́ənə, bɛ bii bɔŋ bənchəŋ. Ï bɛ haʼ nɔ.

Currently Selected:

Luŋ 15: bvm

Highlight

Copy