Luŋ 16

Bɔɔ chàʼtə bətieŋkɔŋ-bi

1Mɔ nɔ tʉʼ kʉ́ʉ shyíi bii mbɔ liŋ-yʉʼʉ Fobe ndə ɔ bɛ ŋgyʉə mu chɔshi Sɛŋkala, nɔ bɛ yʉʼ woke. 2B̈ii lʉ̀ ɔ kɔ́ mbʉə bii yie-Tiekətʉ nə ntɛ ndə bʉə-Nyii kie ndə məfɔ̀ʼ. B̈ii kwáa ɔ nə fɔkə təmiyɔŋ ndə ɔ byúu, bʉʼka ɔ nɔʼ kwáa bʉə buŋmbi, tə buŋ kɔmə mbəŋ-ɔŋ ghɔ.

3B̈ii gìe tʉ Bilisika ghɔŋ Akwela, bʉə ndə baʼa bɔŋ nɔʼ fɔ̀ʼ mɔʼɔ ndə fɔʼɔ-Klai Jiso, 4ndə bɔ̂ŋ kə kɔ́ tʉkə-ʉə tʉ kwú bʉʼka mɔ. Kaa bə haʼ mbəŋ-ɔŋ ndə mɔ tʉʼ kɔ́ ndɔ yʉə fɛ, bɔŋ bəchɔshi inchəŋ ndə i bɛ mu lɔʼɔbə-ʉə ndə bɔ̂ŋ gòʼ təmə bɛ bʉə-Juu fɛ, nɔ kɔ́ ndɔ yʉə ghɔ. 5B̈ii gìe tʉ bʉə-chɔshi ndə bɔ̂ŋ tʉʼ fə́nə mu njaa-bɔŋ ghɔ.

B̈ii gìe tʉ mbʉətə tieŋkɔŋ-ɔŋ Ɛbanɛto ndə ɔ kə bɛ fəŋ wo ndə ɔ kə bɛ́ŋ Klai mu Esia. 6B̈ii gìe tʉ Mɛli ndə ɔ nɔʼ fɔ̀ʼ tʉ bii shʉ́əshʉ́ə. 7B̈ii gìe tʉ Andoloniku ghɔŋ Junia bʉə-lɔʼɔ-bɔŋ ghɔŋ bʉə ndə baʼa bɔŋ nɔʼ bɛ mɔʼɔ mu njaa-chaŋ. Ndə bəlɔntəŋNyii bə nɔ kínə bɔŋ jyujyu, bɔ̂ŋ nɔ kə fəŋ mɔ̀ʼfyiihə-ʉə ndəŋ Klai hə bəshʉ mɔ. 8B̈ii gìe tʉ Ambilitu, ndə ɔ bɛ mbʉətə tieŋkɔŋ-ɔŋ ndə mɔ kʉ̀ʉ ndəŋ fia-Tiekətʉ. 9B̈ii gìe tʉ Obanu, wo ndə baʼa bɔŋ tʉʼ fɔ̀ʼ fɔʼɔ Klai mɔʼɔ, leʼnə Staku, ndə ɔ bɛ mbʉətə tieŋkɔŋ-ɔŋ ndə mɔ kʉ̀ʉ. 10B̈ii gìe tʉ Abele, wo ndə ɔ tə́nə ndəŋ fia-Klai, bə bɛ́ŋ ɔŋ. B̈ii gìe tʉ nchinjaa-Alistobulu. 11B̈ii gìe tʉ Hɛlodiɔŋ, wo-lɔʼɔ-ɔ, bɔŋleʼ gìe tʉ bʉə-Tiekətʉ ndə bɔ̂ŋ bɛ nchinjaa-Nakisu. 12B̈ii gìe tʉ Tilifina ghɔŋ Tilifosa, bəke ndə bɔ̂ŋ nɔʼ fɔ̀ʼ tʉ Tiekətʉ, leʼnə Bɛsi mbʉətə tieŋkɔŋ-ɔŋ ndə ɔ nɔʼ kə fɔ̀ʼ fɔʼɔ-Tiekətʉ shʉ́əshʉ́ə. 13B̈ii gìe tʉ Lufɔ ndə Tiekətʉ nɔʼ séʼ ɔ bɔŋleʼ gìe tʉ ŋkwê-i, ndə ɔ nɔʼ kə bɛ naa-ɔŋ ghɔ.

14B̈ii gìe tʉ Asiŋkilitu, Filigɔŋ, Hɛmɛ, Batoloba, Hɛma leʼnə bəbɛʼbʉə-Nyii ndə ghɔŋ bɔŋ bɛ mɔʼɔ. 15B̈ii gìe tʉ Filologu, Julia, Nɛlu leʼnə liŋ-iŋ woke, leʼnə Oliŋmba, leʼnə bʉə-Nyii bənchəŋ ndə ghɔŋ bɔŋ bɛ mɔʼɔ. 16B̈ii gìetə tʉ ŋwɔŋtə-ii nə nchaʼtə ndə i bɛ ŋkʉʉ. Bəchɔshi-Klai bənchəŋ nɔ tə́ŋ nchaʼtə-yʉə tʉ bii.

Ndyiʼtə-tʉ̂ʼ-Bɔɔ-kə

17Mɔ nɔ tʉʼ fʉ̀ʉtə bii bəliŋ-bɔŋ, mbɔ b̈ii láa bʉə ndə bɔ̂ŋ tʉʼ gwè nə ŋkʉʉŋkʉʉ bɔŋleʼ mɔ̀ʼ ŋkyʉhəbə tʉ bii ndə mədàhə nubə ndə i bɛ ŋkʉ̂ʉ ndə yi ndə bii kə yétə. B̈ii nyʉ́ʉ bɔŋ. 18Bʉʼka ntɛ bʉə-maa-bɔ̄ŋ tʉʼ fɔ̀ʼ tʉ Klai Tiekətʉ-yʉʼʉ fɛ, bɔ̂ŋ bɔŋ kə́ kʉ́ʉ bə yʉə-yə tɔbə, kə́ lʉ̀ ŋgie-lʉ̀ʉhə-bə ghɔŋbə ŋgie-ndoʼtə-bə kə́ fə́ʼhə bʉə nə ndaahə-ʉə túŋhə nə yɔŋ. 19Bəsɔʼka-yii ndə bii tʉʼ yʉ́ hə chu-Nyii nɔʼ wɔ̀ʼnə ndə yəŋbə inchəŋ, i chìi tʉʉ-ɔ kə́ bʉ̀ʉ te bii. Mɔ bɔŋ kə́ kʉ́ʉ mbɔ ẗʉkə-ii súunə ndə nu-jyujyu-bə, ghɔkə-ii bɛ ighʉ́ʉnə ndə nu-bʉəbʉə-bə. 20Ñyii ndə ɔ kɔ́ fyiighʉ́ənə, nɔ tʉʼ gwè jìehə tʉ-Sata-kə, bii tʉ́ʼ wukə-i ndəŋ ɔŋ. Tə Jiso Klai Tiekətʉ-yʉʼʉ dʉ̀ʼ buuŋjyu-i tʉ bii.

21Timɔti, wo ndə baʼa ɔ tʉʼ fɔ̀ʼ mɔʼɔ, nɔ tə́ŋ nchaʼtə-i tʉ bii. Lusio, Jasɛŋ leʼnə Sosibata, ndə bɔ̂ŋ bɛ bʉə-lɔʼɔ-bɔŋ, nɔ tə́ŋ nchaʼtə ghɔ.

22Mbəŋ-ɔŋ Tɛtu, ndə mɔ tʉʼ nyɔ̀ʼ ŋwɔʼnə-ɔ̄ŋ nə ghɔkə-ɔŋ, nɔ tə́ŋ nchaʼtə-ɔŋ tʉ bii yie-Tiekətʉ.

23Gayo ndə ɔ bɛ tie-njaa-ɔ bɔŋleʼ kə́ bɛ tie-njaa-chɔshi bənchəŋ, nɔ tə́ŋ nchaʼtə-i tʉ bii. Ɛlastu ndə ɔ tʉʼ lə̀ŋ kyʉə mu kəyəŋkwɛʼtəŋ ghɔŋ Kweto liŋ-yʉʼʉ nɔ tə́ŋ nchaʼtə-yʉə tʉ bii. 24[Tə Jiso Klai Tiekətʉ-yʉʼʉ dʉ̀ʼ buuŋjyu-i tʉ bii bənchəŋ. Ï bɛ haʼ nɔ.]

25B̈ʉʼʉ kɔ́ kuŋhə tʉ Nyii! Ɔ nɔ kie ghʉəʼkə ndə məchìi bii, bii tə́nə shʉ́əshʉ́ə ndə məmɔʼfyiihə-ii ndəŋ ɔŋ haʼ ndə ntəŋjyujyu ndə mɔ tʉʼ lɔ̀ʼ te Jiso Klai ghɔŋbə ŋguu ndə i kə bɛ te shʉəŋ, ndə bə nɔʼ kə lə̀ŋ lʉ̀ hə ndəŋ ŋgwunə-mbi, bɔŋ-nɔʼ-leʼ kɛ̀ʼnə nduɔ. 26Bɔŋ nduɔ, mbʉ shʉəŋ nɔ kə gwè ŋgwʉʉnə ndə i tíŋ hə bɔ̌ŋ nubə ndə bʉəyʉkəŋgieNyii nə nyɔ̀ʼ. Nyii, ndə ɔ gòʼ təmə kie nchʉʉhə fɛ təmə kie liʼ fɛ, kàhə mbɔ b̈ə chìi lɔʼ-bətə̂ŋ-tə inchəŋ bəyəŋbəyəŋ kínə, mbɔ bɔ̂ŋ chʉʼ bɛ́ŋ bɔŋleʼ kə́ fɔ̀ʼ.

27M̈əgʉ́ə təmə liʼ-i ghɔ fɛ, ndə i gwè tíŋ hə bɔ̌ŋ Jiso Klai, bɛ tʉ mbyu Nyii imɔʼ ndə ɔ kie mukətʉ-súunə tətɛʼ ɔ inchəŋ. Ï bɛ haʼ nɔ.

Currently Selected:

Luŋ 16: bvm

Highlight

Copy