Luŋ 14

Kə bii məchʉ̀ə ŋkwɛ bʉə fɛ

1B̈ii lʉ̀ bʉə ndə bɔ̂ŋ mɔ̀ʼfyiihə-ʉə ndəŋ Nyii təmə bɔŋleʼ shʉ̀tə shʉ́ə jyujyu fɛ, kɔ́ mbʉə bii, kə bii mə kə́ túŋ bəŋʉʉ bii bɔŋ te nubə ndə bɔ̂ŋ yá mu kətʉ-bɔŋ fɛ. 2Bəbɛʼbʉə ndə bɔ̂ŋ mɔ̀ʼfyiihə-ʉə ndəŋ Nyii nɔ kwɔ̀ʼtə mbɔ bəkɔ b̈ɔ̂ŋ yú fɔbə inchəŋ, bɔŋ wo ndə ɔ məmɔʼfyii-i lʉ́ʉtə, kwɔ̀ʼtə mbɔ bəkɔ ɔ kwó bə haʼ mbɔʼ-ŋkɔ. 3Kə wo ndə ɔ tʉʼ yú fɔbə inchəŋ mə dʉ̀ʉhə wo ndə ɔ gòʼ təmə kə́ yú fɛ, bɔŋ kə wo ndə ɔ gòʼ təmə kə́ yú fɛ mə chʉ̀ə ŋkwɛ te wo ndə ɔ tʉʼ yú inchəŋ bʉəbʉə fɛ, bʉʼka Nyii nɔʼ lʉ̀ ɔ kɔ́ mbʉə ɔ. 4A bɛ nda ndə məchʉ̀ə ŋkwɛ vaafɔ̀ʼ-wo-kədɔŋ bʉəbʉə? Mətə́nə-i ghɔŋ məgwu-i nɔ bɛ kəghɔ-tiefɔ̀ʼ-ɛ. Ɔ bɔŋ bu tə́nə bʉʼka Tiekətʉ nɔ kie ghʉəʼkə ndə məchìi ɔ tə́nə.

5M̃byu womɔʼ nɔ lʉ̀ mbyu kəchîmbi imɔʼ i gʉ́ə shʉ-ɔ chàa bəbɛʼchîbə, ibɛʼ-yə wo lʉ̀ chîmbibə inchəŋ i bɛ ndyʉndyʉ tʉ ɔŋ. Wo nɔ kie ndə məyá yi-yə ndə i súunə mukətʉ-ɔ tə́nə chɔ jyujyu. 6Wo ndə ɔ tʉ́ʼ mbʉ kəchîmbi, nɔ tʉʼ tʉ́ʼ ndə məkɔ́ məgʉ́ə tʉ Tiekətʉ. Wo ndə ɔ tʉʼ yú fɔkə təmiyɔŋ, nɔ tʉʼ yú ndə məkɔ́ məgʉ́ə tʉ Tiekətʉ bʉʼka mbɔ ɔ tʉʼ kɔ́ ndɔ tʉ Tiekətʉ haʼ ndə wo ndə ɔ tɛ́ŋ məyú fɔbɛʼbə nɔ tɛ́ŋ ndə məkɔ́ məgʉ́ə tʉ Tiekətʉ bɔŋleʼ kɔ́ ndɔ tʉ Nyii. 7Bʉʼka mbyu wo mu bʉʼʉ tʉʼ chí mbi tʉ ŋwɔŋ-ɛŋ fɛ, təmə wo bɔŋ-kə́-leʼ kwú tʉ ŋwɔŋ-ɛŋ fɛ. 8Kaʼ bʉʼʉ kə́ chí mbi, təmə bʉʼʉ nɔ tʉʼ chí yie-Tiekətʉ, bʉʼʉ kwú təmə bʉʼʉ nɔ kwú yie-Tiekətʉ. Nɔ, kaʼ bʉʼʉ kə́ chí mbi byuunɔ kwú, nɔ bɛ tʉ Tiekətʉ. 9Bʉʼka Klai nɔ kə kwú bʉ̀nə kóʼ mbɔ ɔ chʉʼ bɛ Tiekətʉ bʉə ndə bɔ̂ŋ nɔʼ kwútə leʼnə bʉə ndə bɔ̂ŋ bíe mbi. 10Chìi ka a kə́ chʉ̀ə ŋkwɛ yie liŋ-aŋ bʉəbʉə? Byuunɔ, chìi ka a kə́ dʉ̀ʉhə liŋ-aŋ? Bʉʼka bʉʼʉ bənchəŋ nɔ bu tə́nə bəshʉ-Nyii ndə məkwɛ̀ sɔ́ʼ-yʉʼʉ. 11Bʉʼka bə nɔ nyɔ̀ʼ mu ŋwɔʼnə-Nyii mbɔ,

“Tiekətʉ nɔ ghɔ̀ŋ mbɔ, ‘Ndə mɔ bɛ Nyii, kə́ bɛ ŋɛnə, b̈ii kínə shʉəŋ mbɔ bʉə bənchəŋ bu kwíʼtə bəshʉ mɔ,

bɔŋleʼ gìe hə chu-bɔŋ ŋgwʉʉnə mbɔ mɔ nɔ bɛ Nyii.’ ”#14:11 Adaya 45:23.

12Nɔ, wotəmiyɔŋ mu bʉʼʉ bu túu chu-i te ŋwɔŋ-ɛŋ tʉ Nyii. 13Nɔ ndʉʉmɛ, bʉʼʉ káa məchʉ̀ə ŋkwɛ yie bəliŋ-bʉʼʉ bʉəbʉə, bɔŋ kɔ́tuu bə hə mu fyiihə-ʉʼʉ mbɔ bʉʼʉ kʉʉnə fʉ̀ə ŋkʉʼ tʉ bəliŋ-bʉʼʉ byuunɔ chìi b̈ɔ̂ŋ gwù mu bʉ̂ʼʉ fɛ.

14Mɔ nɔ kwɔ̀ʼtə shʉəŋ bʉʼka njunə-ɔŋ baʼa Jiso Tiekətʉ mbɔ fɔyubə inchəŋ nɔ bɛ jyujyu ndə məyú, bɔŋ kaʼ a kwɔ̀ʼtə mbɔ bəbɛʼbə fɔyubə kʉ̀ʼnə ndə məyú fɛ, ndʉʉmɛ təmə i kʉ̀ʼnə tʉ a fɛ. 15Bʉʼka mbɔ kaʼ liŋ-aŋ kə́ vínə bʉʼka fɔkə ndə a tʉʼ yú, i nɔ dʉ̀ʼ mbɔ a leʼ kie ŋkʉ̂ʉ fɛ. Kə a mə bʉ́əhə wo ndə Klai kwú yie-ɔ fɛ. 16Nɔ, kə bii mə mɛ̀ʼtə mbɔ fɔbə ndə b̈ii nyíɛ ndə məbɛ fɔ-jyujyu-bə, b̈ə kwə́ʼ bʉəbʉə te yɔŋ fɛ. 17Bʉʼka Sɔ́ʼ-Nyii kaa bə nu-bəfɔyu-kə ghɔŋbə fɔ-nu-kə fɛ, bɔŋ i nɔ bɛ mətə́nə ndyʉndyʉ, məkie fyiighʉ́ənə leʼnə tʉʉjyu ndə LyʉʉhəNyiikə kɔ́. 18Ndʉʉ ndə a fɔ̀ʼ tʉ Klai ndə ntɛ mənɔ, tʉʉ-Nyii bʉ̀ʉ, bəbɛʼbʉə bɔŋ bɛ́ŋ aŋ. 19Nɔ, bʉʼʉ nɔ kie ndə mə-kə́-nyʉ́ʉ gɛ̀ bɔ̌ŋ bənu ndə ĩ gwè nə fyiighʉ́ənə bɔŋleʼ kwáa ndə məbɔ́ ŋwɔŋtə-ʉʼʉ.

20Kə a mə bʉ́əhə fɔʼɔ-Nyii bʉʼka fɔyubə fɛ. Fɔyubə nchəŋnchəŋ nɔ bɛ tʉ́ʉnə ndə məyú, i bɔŋ byʉ́ʼ ndə məyú fɔkə ndə i bu bɛ ŋkʉʼ tʉ liŋ-aŋ ndə məgwù. 21I nɔ bʉ̀ʉ daa mbɔ kə a məkwó mbɔʼ byuunɔ nú ndʉʼmə byuunɔ chìi nukə təmiyɔŋ ndə i bu chìi liŋ-aŋ gwù fɛ. 22Nukə ndə a bɛ́ŋ hə mu fyii-a te nubə-ɔ̄ŋ, ï káa haʼ bətɔ-a bii Nyii. Tʉʉjyu nɔ bɛ yi-wo-yə ndə ɔ gòʼ təmə mɛ̀ʼtə fyii-i kə́ chɔ́ŋhə ɔŋ fɛ ndʉʉ ndə ɔ chìi nukə ndə ɔ kínə mbɔ i bɛ kʉ̀ʼnə bʉ̀nə kə́ kwɔ̀ʼtə bə mbɔ i bɛ bʉəbʉə fɛ. 23Bɔŋ wo ndə ɔ tʉʼ kwɔ̀ʼtə tʉkə-i kwɔ̀ʼtə ndə fɔkə ndə ɔ tʉʼ yú, nɔʼ chʉ̀ə ŋkwɛ-ɛ bʉəbʉə, bʉʼka mbɔ ɔ mɔ̀ʼfyii-i ndəŋ Nyii ndʉʉ ndə ɔ tʉʼ yú mbʉ bəfɔ fɛ. Bʉʼka nukə təmiyɔŋ ndə a chìi təmə mɔ̀ʼfyii-a ndəŋ Nyii fɛ, nɔ bɛ bʉ̂ʼʉ.

Currently Selected:

Luŋ 14: bvm

Highlight

Copy