Ipilipin 1
1
1 #
Asw 16:12; 1 Kor 1:2; 1 Tim 3:1,8. Paul ka Timoteo, ibulesin luka Kristo Yesu, Mama ejaas lukalaunak kere lukotoma Kristo Yesu luejaas Pilipi, nepepe kikaanyanarak ka ikejaanakinak;
2 #
Rom 1:7. Asianut kojai mama ijaas ka ainapakin nuepote kama ejai Edeke Papawok ka Ejakait Yesu Kristo.
3 #
Rom 1:8; 1 Kor 1:4. Emalaenenei Ekadeke nakeitununoo yes, 4nakelipanakinia yes kere tir, eŋaiŋaenenei kaiyalama, 5kanuka eidicanekus aisilosikin Akiro Nukajokak ameun kapaaran nasodit kiton kwana. 6#Pil 2:13; 1 Kor 1:6-8. Eoŋ da etogogoŋit ebe ŋol loabu kogeu aswam naejok kotomakus, itodoli kiton apaaran naka Yesu Kristo, 7kwape eraar naedolit eoŋ aomit ŋin kanukus kere, naarai ijaas yesi otauka, naarai iraas yesi kere luidicakina keoŋ kotoma asianut, kotoma aenioka, ka aiyar kaitogogoŋ da Akiro Nukajokak. 8#Rom 1:9; 2 Kor 1:23; 1 Ses 2:5. Naarai erai Edeke ekajenanika, kwape kemuitor yes kere kotoma otau loka Kristo Yesu. 9Na da ŋes ailipasitika ebe, kiyatanakin akusimin ailapanar kotoma aijen ka amisiikin kere, 10#Rom 2:18; 12:2; 1 Ses 5:23; Bur 5:14. tetere icamunete nuejok, iraunos luliogot, komamei aitoronet kiton apaaran naka Kristo, 11#Pes 5:9; 1:6,12,14; Yok 15:8. kilelebi araito nuka adolit nuepote kama ejai Yesu Kristo kanuka aibuses ka aitopoloorio naka Edeke.
12 #
2 Tim 2:9. Konye iinacan, akoto yes ajenun ebe nukadoikinete apotu kisilosikis Akiro Nukaiokak, 13#Asw 28:30; Pil 4:22; Pes 3:1. kiton akaenio atakanun ebe ejai kotoma Kristo, kokidiŋ oserikalei kere, ka ice da kere; 14luipu da luka iinacan agogonoros kotoma Ejakait kanuka aenioka, etitiŋikinete aitelekarit einer akirot naka Edeke komam ekuriaka.
15Elimonokinete ice Kristo kanuka ekokote ka epeget, konye ice ketau kaloejok, 16Elimonokinete lu kanuka amin, kojenete kwape kebwaikinere ne kanuka aiyar naka Akiro Nukajokak, 17konye kwi elimonokinete Kristo kanuka aŋolopa, mere kotoma abeit, koomito aitican eoŋ kotoma aenioka. 18#Pil 2:17,18. Aso anyoika bo? Dimarai kotoma oponesio kere, arai kotoma ojose, arai kotoma abeit, elimonokinio Kristo; ido alelakinit ŋin.
19 #
Yob 13:16; 2 Kor 1:11. Eebo, alelakini do. Naarai ajeni ebe kainunete eoŋ ŋun aitaiario kanuka ainainakus ka ainakinio naka Emoyo loka Yesu Kristo, 20#1 Pet 4:16. kwape emielar noi kamuno da ebe mam kerumete ileic kakirot kere, dimarai katitiŋ kere, kwana, kwape kapaarasia kere, kitopolooroi Kristo kotoma akuanaka, arai kotoma aijar, arai bo kotoma atwanare. 21#Gal 2:20. Naarai kamakaŋ aijar ŋes Kristo, atwanare da erai ameda. 22#Rom 1:13. Konye arai aijar toma akuan ŋes araito naka aswam kamakaŋ, aso mam ajeni nuaseuni. 23#1 Ika 19:4; 2 Kor 5:8. Karidakinito akiro ŋun aarei, emiela alosit ajaut ka Kristo, naarai ŋes ejok aitelekarit. 24Konye asalit toma akuan ibusakinit aitelekarit kanukus, 25Ido naarai etogogoŋit kwaŋin, ajeni ebe asali, ido asalenenei nepepe kayes kere, tetere iyatanakinos yesi kaiyalama kotoma aiyuun, 26tetere ilapar akusiwolobobot kanukaŋ kotoma Kristo Yesu, kanuka ajaun kayes bobo.
27 #
Kol 1:10; Pil 4:3; 1 Ses 2:12. Konye ejautenekus korai loibusakinit Akiro Nukajokak nuka Kristo, tetere arai abuni aanyun yes, arai bo amamei, apupuni nukus ebe icasitos kotoma omoyo ediopet, iutas nepepe, ketau ediopet kanuka aiyuun naka Akiro Nukajokak, 28kwabo mam ikuriaka lukasurupokus kotoma akirot kere. Kowaikec ŋes aanyunet naka aolior, konye kowaikus ŋes aanyunet naka aitajario, naebuni kama ejai Edeke. 29Naarai kiinakinitai yes, kanuka Kristo, mere bon aiyuun ŋes, dimarai aisiriebio da kanukeŋ, 30#Asw 16:19-40. kojaas kauta kaŋin nakianyunete kotomakaŋ, ido naipupete kwana ejai tomakaŋ.
Currently Selected:
Ipilipin 1: AOV1961
Highlight
Share
Copy
Want to have your highlights saved across all your devices? Sign up or sign in
Ateso Old Version Bible © United Bible Societies, 1961.