2 Samuel 18

1Kimar Daudi ituŋa lukejaas kaŋes, kodakanak ijaka luka ilukumin ka ijaka luka akwat. 2#2 Sam 15:19. Kijuka Daudi ituŋa korioŋeta iuni, ediopet akan naka Yoab, ediopet akan naka Abisai okoku loka Seruia, onace loka Yoab, ka ediopet da akan naka Itai Egitit. Kobala ekabaka ituŋa ebe, “Eoŋ da elopet kiupar kayes ojie.” 3#2 Sam 21:17. Konye kobalas ituŋa ebe, “Mam jo ilosi: naarai kiiker isio mam kipodoi: karaida ketwana atutubetekosi, mam kipodoi: konye jo iriakas kasio ilukumin itomon: aso tiejok jo asalakin ore ikapakina ayuun sio.” 4Kotema ekabaka kes atiar, “Nuitojokata yesi, kes eswamai eoŋ da.” Kobwo ekabaka kawai kerute, kolomete ituŋa kere kakwat ka ilukumin. 5Kicorak ekabaka Yoab ka Abisai ka Itai kinera atiar, “Kiyamuyamut etelepat kanukaŋ, ŋes Abisalom.” Kiirasi ituŋa kere naeeorakinia ekabaka ijaka kere akiro nuka Abisalom.

6 # Yos 17:15,18. Kosodete kolomasi ituŋa ais ejie ka Isirael; kojau ejie amagoro naka Epuraim. 7#Awa 11:21. Kipikoroi kaŋina ituŋa luka Isirael kakonyen nuka ikejaanakinak luka Daudi, kojau aario naepol kapaaran kaŋin naka ituŋa ilukumin akwat aarei. 8Naarai kaŋina abu ejie kisiarakin akwap kere: koar amagoro ituŋa luipu kapaaran kaŋin aitelekarit lukeari ekileŋ.

9 # 2 Sam 14:26; 17:23; Yob 18:5-14; Mat 27:5; 1 Kor 11:14. Koturiaikin Abisalom ikejaanakinak luka Daudi. Kibwanenite Abisalom ekenyubu, kitor enyubu kwap katenun nuetumito nuka ekum loepol, kikamakin akou okum, kijeko kokidiŋ akuj ka akwap: korasite enyubu lokibwanenit kinareŋ, 10Kojai etuŋanan lokeanyuni, kolimok Yoab kinera atiar, “Koany, abu kaany Abisalom ijekokino okum.” 11Kotema Yoab etuŋanan lokelimokini atiar, “Koany, ibu ijo koany, kanukinyo kigirio aibirun ŋes kwap? Eoŋ da tikainak jo atutubeta atomon nuka epuesa ka arukan.” 12Kobala etuŋanan Yoab ebe, “Karaida kaainakin atutubeta alukumit nuka epuesa akanika, timam karioo akakan mama ejai okoku loka ekabaka: naarai kipou keirasi kicorakini ekabaka jo ka Abisai ka ltai ebe, ‘Kocoito kereka kinye etuŋanan atiror etelepat Abisalom.’ 13Konye tikeswama nakaiŋal aiar akeijar (kwabo emamei akirot naibwaio kama ejai ekabaka), asa tikiŋadaar ijo da olopet.” 14Kosodi kotema Yoab atiar,” Mam apedori aitumor kajo kwaŋin.” Kitiŋ ikojoi iuni kakekan, koremio Abisalom otau, eroko ejari kokidiŋ okum. 15Itelepai da itomon lukitiŋenenete lujiis luka Yoab kirigaut kicumucumata Abisalom, koara.

16Kokut Yoab arupepe, koboŋut ituŋa kama kerukitotor Isirael naarai kitikok Yoab ituŋa, 17#Yos 7:26; 8:29; Yer 22:18,19; Aku 3:53. Koyaŋaasi Abisalom, kocakakis aipany nakepol kamagoro, kotukokis kujuke atukot naepol noi naka amor: kosodete kokera luka Isirael kere, ŋinituŋanan owemake. 18#Age 14:17; 2 Sam 14:27; Yob 13:12; 18:17,19; Sab 34:16; 109:13; Awa 2:22; Sab 49:11. Ido eroko Abisalom ejari abu kolem epir lokejai aditot naka ekabaka kosipok: naarai enera atiar, “Emamei eoŋ ikoku yeniitununere ekakiror.” Komaik epir ekekiror: ido enyaritai aiitunet naka Abisalom kiton lolo.

19 # 2 Sam 15:36; 17:17. Kosodi Akimaas okoku loka Sadok, kobala ebe, “Mere kaker kwape kwana, kaina ekabaka akiro, kwape abu EJAKAIT kitokokolikinio ŋes lukasurupoke.” 20Kobala Yoab ebe, “Mam iyaŋaari akiro lolo, konye iyaŋaari acepaaran; konye lolo mam iyaŋaari akiro, naarai atwana okoku loka ekabaka,” 21Kosodi kobala Yoab Ekusit ebe, “Kolot kolimok ekabaka akiro nuiany ijo.” Kokukokin Ekusit Yoab, kopaari akerit. 22Kosodi Akimaas, okoku loka Sadok, kobala bobo Yoab ebe, “Mam akiro, kisiikinai kaker eoŋ da katupa Ekusit.” Kobala Yoab ebe, “Ikakoku, kanukinyo ikotor ijo akerit, naarai mam ibore yenidumuni kaŋina?” 23Kotema ŋes atiar, “Mam akiro, akeri eoŋ.” Kobala ŋes ebe, “Koker bo.” Kosodi koker Akimaas, kitor Apuuton, kilany Ekusit.

24 # 1 Sam 1:9; 4:13; 2 Sam 13:34; 2 Ika 9:17; Isa 31:6-9. Kiboie Daudi kokidiŋ orutei iarei; kodoka eketeon kuju orute loka abwas, kiteluo koŋoleŋol, ido koany, ekeruni etuŋanan bon. 25Kiworok eketeon kolimok ekabaka. Kobala ekabaka ebe, “Arai erai ediopet, eyaunit akiro.” Kodiŋirir akerun; koeku die. 26Kosodi koany eketeon ecetuŋanan loekeruni: konyarau eketeon ekedaran erute, kobala ebe, “Koany, ecetuŋanan loekeruni bon.” Kobala ekabaka ebe, “Eyaunit ŋesi da akiro.” 27#1 Ika 1:42. Kotema eketeon atiar, “Aomit eoŋ akerit naka ŋol kaloiŋarenit esubit bala akerit naka Akimaas, okoku loka Sadok.” Kobala ekabaka ebe, “Erai etuŋanan lokajokan, eyaunit akiro nukajokak.”

28Kiworok Akimaas ekabaka, kotema ŋes atiar, “Yoga.” Kisuded kakonyen nuka ekabaka, kinera atiar, “Kituritete EJAKAIT Ekonideke, loepiko ituŋa lukedakakinete akecekanin ekajakait ekabaka.” 29Kobala ekabaka ebe, “Ejai etelepat Abisalom ejok?” Koboŋok Akimaas ebe, “Nakejukunia Yoab ekejaanakinan loka ekabaka, ŋes eoŋ ekonikejaanakinan, abu kaany autaar naepol konye mam abu kajen akiro.” 30Kobala ekabaka ebe, “Komanu, kobwo kane.” Komanu, kobwo. 31#Sab 27:2; 55:18. Ido koany, kobu Ekusit; kobala Ekusit ebe, “Ainunit ekajakait ekabaka akiro: naarai kitokokolik lolo EJAKAIT ediŋet loka ŋul kere lukinyoikinete jo.” 32Kobala ekabaka Ekusit ebe, “Ejai etelepat Abisalom ejok?” Koboŋok Ekusit ebe, “Lukasurup luka ekaiakait ekabaka ka ŋul kere lukinyoikinete jo aikonakin aronis, ekonakis kwape ejaar etelepat ŋol.” 33#2 Sam 19:4; Awa 10:1; 19:13. Kosodi kiturur noi ekabaka, kodoka togo loejai orute, komony akiyo: napelosi kinera kwanata, ebe, “Wu ikakoku Abisalom, ikakoku, ikakoku Abisalom! Karai gwai eoŋ atwanit kojari ijo, wu Abisalom, ikakoku, ikakoku!”

Currently Selected:

2 Samuel 18: AOV1961

Highlight

Copy

Compare