2 Samuel 13

1 # 2 Sam 3:2,3; 1 Siit 3:2,9. Kosodi kanen, kokau kaŋun, ajai Abisalom okoku loka Daudi inaeike naetemelel, ekekiror Tamar; komina Aminon okoku loka Daudi ŋes.

2Kokadak Aminon kwaŋin abu kodekakin kanuka inacike Tamar; naarai arai ŋesi abekot; kotionik Aminon aiswamakin ŋes akirot. 3#1 Sam 16:9; 1 Siit 2:13. Konye ajai Aminon epaperoke, ekekiror Yonadab, okoku loka Simea onaee loka Daudi: kopiriana Yonadab noi. 4#Isa 3:9; Esk 23:16. Kotema ŋes atiar, “Wu okoku loka ekabaka, kanukinyo isenyitor ijo ŋinipaaran? Mam jo ilimokini eoŋ?” Kotema Aminon ŋes atiar, “Amina eoŋ Tamar, inaci naka onaceka Abisalom.” 5Kotema Yonadab ŋes atiar,” Koper kaperitikon, kijoseik bala ideka: kebu papakon aanyun jo kotema ŋes atiar, “Keŋaiŋait, kisiik inacika Tamar abunore, kainak eoŋ atap kanyam, kitemok inyamat kakonyeneka, tetere aanyuni, kanyam kakanike.’’’ 6#Age 18:6. Koper do Aminon kijoseik bala edek: kebu ekabaka aanyun ŋes, kotema Aminon ekabaka atiar, “Keŋaiŋait, kisiik Tamar inacika abunore, aipoikin eoŋ imugatin iarei kakonyeneka, tetere anyami kakanike.”

7Kosodi Daudi aijukar ore neejai Tamar ebe, “Kolot togo loka onacekon Aminon, kipoik ŋes inyamat.” 8Kwaŋin kolot Tamar togo loka onaceke Aminon; koper ŋesi, Kotem aluŋuren kinyoŋ, kiswama imugatin kakonyeneke, kope imugatin. 9#Age 45:1; Tub 3:19; Yok 3:20. Kolem aiwowas kobukok kes akonyeneke; konye koŋer ŋesi ainyam. Kotema Aminon atiar, “Kolomasi ituŋa kere kiŋa.” Koloma ŋiniluŋanan kaneejai. 10Kotema Aminon Tamar atiar, “Koyau inyamat agola, tetere anyami kakanikon.” Koyaŋa Tamar imugatin luabu ŋesi kopeite, koyau kes agola neajai Aminon onaeeke. 11#Age 39:12; Awa 7:13; Lim 7:26. Naesukunyunia kes mama ejai ainyam, kikam ŋes, kotema atiar, “Bia kaperoto keoŋ, inacika.” 12#Leb 18:9,11; 20:17; Age 34:7; Tub 19:23; 20:6; Awa 7:7-23. Koboŋok ŋesi ebe, “Mam, onaceka, sirikiitiŋaik eoŋ; naarai mam akirot ŋin ibus aswam koIsirael: sirikiswama nuka abaŋaanut ŋun. 13#Age 19:8; Leb 18:9,11; Tub 19:24. Eoŋ da, aibo ayaŋaari ileicika? Ijo da, iraun kwape ediopet kalubaŋiok koIsirael. Aso, keŋaiŋait, kilip ekabaka; naarai mam ŋes eŋeri aikor eoŋ mamakon.” 14#Leb 18:9; 20:17; Ikis 22:25; 27:22; Tub 20:5; 2 Sam 12:11. Konye koŋer ŋesi apupun ekeporoto: konye kanuagogoŋor, kitiŋaik ŋes, kiteper ŋes.

15Kosodi Aminon aila ŋes kaila kanaepol noi; naarai aila naalait ŋesi kodeparite amin naabu komina ŋes, Kotema Aminon ŋes atiar, “Konyou, kolot.” 16Kotema nin ŋes ebe, “Mere kwaŋin, naarai aronis na naepol aireŋear eoŋ erono noi adeparit ŋin naibu kiswamak eoŋ.” Konye koner apupun ŋes. 17Kosodi aiworoun ekekejaanakinan loejaanakini ŋes, kotema atiar, “Kitoloma aberu na kaneaiai, koenik ekek kokauke.” 18#Age 37:3; Tub 5:30; Sab 45:14. Anapit nin anapito naka ejese loegelegela: naarai atapitos adwe nuka ekabaka nuaraas abekon anapit inapen luka epone kaŋol. Kosodi ekekejaanakinan aitolomun ŋes kiŋa, koenik ekek kokauke. 19#Yos 7:6; 2 Sam 1:2; Yob 2:12; 42:6; Yer 2:37. Kipurak Tamar ekurwon akouke, kocilieil akenapito naka ejese kaloegelegela naanapit ŋesi: kibwok akanike, kolot, kiluluei elosi.

20Kobala Abisalom onaeeke ŋes atiar, “Ajai Aminon onaeekon kajo? Konye do kililin inacika: ŋes onacekon; sirikibwaik akirot na otau.” Kosalak Tamar esilikinit kotogo loka onaceke Abisalom. 21Konye nakepupu ekabaka Daudi akiro ŋun kere, konyunyurikin noi. 22#Leb 19:17; Awa 10:18; 1 Yok 2:9,11; Pes 4:26,31. Mam Abisalom abu kiner nuejok karaida nueroko mama ejai Aminon: naarai alait Abisalom Aminon, naarai abu kitiŋaik inacike Tamar.

23 # Age 38:12; 1 Sam 25:4; 2 Ika 3:4; Yos 17:18; Tub 7:24. Kosodi kanen ketuboros ikar iarei, ajaas Abisalom ikatubok ajul nuka amerekekin koBaal-kasor, loedunyas ka Epuraim: konyarau Abisalom odwe kere luka ekabaka. 24Kobu Abisalom mama ejai ekabaka, kotema atiar, “Koany, ejaas ekejaanakinanikon ikatubok ajul nuka amerekekin; keŋaiŋait, kouparos ekabaka kikejaanakinakake ka ekejaanakinanikon.” 25Kotema ekabaka Abisalom atiar, “Mam, okokuka, mam kilosi kere, kenyeis alaŋirikin jo.” Kimaima noi: konye koŋer alosit, konye kilipak ŋes arereŋ. 26Kosodi Abisalom atemar atiar, “Keŋaiŋait, arai mam, kisiik onaceka Aminon alosit kasio.” Kotema ekabaka ŋes atiar, “Kanukinyo elosio ŋesi kajo?” 27Konye kimaima Abisalom noi, kisiik Aminon ka odwe kere luka ekabaka alosit kaŋes. 28#Age 9:21; 19:32-35; Tub 19:6; Rus 3:7; 1 Sam 25:36; Est 1:10; Sab 104:15. Kicorak Abisalom ikekejaanakinak ebe, “Aso kocoito naelakaror etau loka Aminon kanuka ebino; ido nakalimokinia yes ebe,, Kinomata Aminon,’ koara ŋes, sirikikuriakaros.” 29Kiswamakis ikejaanakinak luka Abisalom Aminon kwape kicorakinia Abisalom. Kosodete odwe kere luka ekabaka anyoun, kibwanen ŋolituŋanan enyubuke, kokerata.

30Kosodi kanen, napelosete, kobu eemut mama ejai Daudi ebe, “Aar Abisalom odwe kere luka ekabaka, mam ediopet kakesi ideuna.” 31#Age 37:29,34; 2 Sam 1:11; 12:16. Kosodi ekabaka anyoun, kocilicil akenapito koper kokwap; kobwaata ikekejaanakinak kere kocilieilito inapenekee. 32Koboŋok Yonadab, okoku loka Simea onace loka Daudi ebe, “Kinyek ejakaitika aomit ebe aarata ikatumunak kere odwe luka ekabaka; naarai Aminon bon etwanit; naarai apeleikinit Abisalom ŋin ameun kapaaran kaya naetiŋaikinia ŋesi inacike Tamar. 33#2 Sam 19:19. Aso do kinyek ejakaitika ekabaka aibwaikin akirot ŋin otauke, aomit ebe atwakata odwe kere luka ekabaka: naarai Aminon bon etwanit.”

34Konye koker Abisalom. Abu ekatumunan loabeit aidar kiteluo akekonyen kosesen, ido koany, eponito ituŋa luipu korot lokosiep loka eukot kokauke. 35Kotema Yonadab ekabaka atiar, “Koany, eponito odwe luka ekabaka: kwape abalar ekejaanakinanikon, ikote nepenen.” 36Kosodi kanen, kedau ŋesi einer, koany, eponito odwe luka ekabaka, kodelosi, komonyata: komony ekabaka da noi ka ikekejaanakinak kere.

37 # 2 Sam 3:3; 1 Siit 3:2. Konye koker Abisalom, kolot mama ejai Talumai okoku loka Amikur, ekabaka loka Gesur, Kitururwenenei Daudi kanuka okokuke ŋinipaaran. 38#2 Sam 14:23; 15:8. Koker Abisalom, kolot Gesur, kiboi kanen ikar iuni. 39#Age 38:12. Kimuite etau loka ekabaka Daudi alosit mama ejai Abisalom: naarai epudunio kanuka Aminon, naarai atwana.

Currently Selected:

2 Samuel 13: AOV1961

Highlight

Copy

Compare