लुका 9
9
येसुले बार जना चेलाका पर्चार कर पठाइल
(मत्ति १०:५-१५; मर्कुस ६:७-१३)
1एक दिन् येसुले आप्न बार्हो जना चेलासिका बलाइक ओकर्सिका भुत लग्ल मान्खसिस भुत भगाइलाहार आ रोगिसिका अस्लि कर्लाहार सक्ति आ अधिकार देल्के। 2अनि पर्मेसोरक राज्येक बारेम पर्चार कर आ रोगिसिका अस्लि कर पठाबस अगा, 3येसुले ओकर्सिका कहल्के, “तोर्स्या आप्न लागि कथ्यो नाइ लगाह्य। न लाठि, न झोला, न फेर्लाहार नुङा, न ढेवा, न खाइलाहार चिज।#लुका १०:४-११; पेरेरित १३:५१ 4तोर्सिका जुन घरक मानुकस्या स्वागत कर्तो, उ गाँमम रहल तलिक ओहे घरम रह्य। 5तर जुन गाँमक मानुकस्या तोर्सिका स्वागत नाइ कर्तो, ओइ गाँमस निक्लिक जाइत खुमा आप्न टाङक धुरा ओकर्सिक बिरोधम गबाहिक लागि झार्ह्य।”
6तब चेलासब ओइलगस गेले आ गाँम-गाँमम जाइक सभेका खुसिक खबर सुनाइति रोगि मानुकसिका अस्लि कर लग्ले।
रजा हेरोद अल्मलम पर्ल
(मत्ति १४:१-१२; मर्कुस ६:१४-२९)
7तर जब यि सभे कामक बारेम गालिल पर्देसम सासन कर्लाहार रजा हेरोद एन्टिपासले सुनल्के त उ अल्मलम पर्ले। किरकि कुन्हुँले कहेक बप्तिस्मा देल्हार युहन्ना मोरिक फेरि जिउँत भेल छो।#मत्ति १६:१४; मर्कुस ८:२८; लुका ९:१९ 8कुन्हुँले कहेक एलिया देखा पर्ल छो आ कुन्हुँले कहेक पेहेन्कक एक जना मोर्ल अगमबक्ता फेरि जिउँत भेल छो। 9तर हेरोदले कहल्के, “युहन्नाक कपार त हम आप्नि काट लगाइल स्यो। तर यि कोन स्यो जक्र बारेम हम एहेन अचम्मक बात सुन्ति स्यो?” ओहेस हेरोदले येसुका भेट लागि इच्छा करल्के।
येसुले पाँच हजार मानुकका खुवाइल
(मत्ति १४:१३-२१; मर्कुस ६:३०-४४; युहन्ना ६:१-१४)
10पछास येसुले पठाइल बार्हो जना चेलासब घुमिक एले आ ओकर्स्या कर्ल कामक बारेम सभे बात येसुका सुनाइल्के। जब सभेले सुनाइ सकल्के त येसुले चेलासिका आप्नसङ लइक चुप-चाप बेथसेदा सहर गेले। 11तर थुप्रे मानुकस्या यि बात थाहा पाइक येसुक पछा लगिक गेले। अनि येसुले ओकर्सिका स्वागत करल्के आ पर्मेसोरक राज्येक बारेम सुनाइक रोगि-बिरामिसिका पनि अस्लि करल्के।
12अनि जब सुरुज दुब लग्ले त बार्हो जना चेलासब आइक येसुका कहल्के, “प्रभु, यि मानुकसिका पठाइ धि किरकि यि ठाउँ सुन्सान छो। एकर्स्या आस्पासक गाँमम जाइक आप्न रह लागि आ खनाइक बेबस्ता करुस।”
13तर येसुले चेलासिका कहल्के, “तोर्स्याहि एकर्सिका कथ्यो खाइ लागि धि।”
तर चेलास्या कहल्के, “हमर्सिसङ त पाँचगो रोटि आ दुइगो माछ मत्रे छो। कि हमर्स्या यि सभे जनाक लागि खाइलाहार चिज किनिक आनुम?”
14किरकि ओइलग मरदसब मत्रे लग्भग पाँच हजार छले।
तब येसुले चेलासिका कहल्के, “ओकर्सिका पचास-पचासक समुह बनाइक बेठा।”
15अनि चेलास्या सभे मानुकसिका येसुले कहले जक्या बेठाइल्के। 16तब येसुले पाँचगो रोटि आ दुइगो माछ लइक सोर्गभर ताकिक पर्मेसोरका धन्येबाद देल्के आ रोटि आ माछका टुक्रा-टुक्रा करिक चेलासिका बाँट लागि देल्के। 17पछास सभेले अघाइक खाइक पनि उभर्ल रोटि आ माछक टुक्रासब धेर्याइल्के त बार डला भेले।
पत्रुसले येसुका खिरिस्ट कहिक सुइकार कर्ल
(मत्ति १६:१३-२३; मर्कुस ८:२७-३३)
18एक दिन् येसुले अस्करे पर्थना कर्त जुमा चेलासब पनि येसुक काटेम छले। अनि पर्थना करि सकल्के त येसुले चेलासिका पुछल्के, “मानुकस्या हम्रा कोन स्यो कहिक कहछो?”
19चेलास्या उत्तर देल्के, “कुन्हुँले बप्तिस्मा देल्हार युहन्ना कहछो, कुन्हुँले एलिया, कुन्हुँले चाहिं पेहेनिक एक जना अगमबक्ता फेरि जिउँत भेल छो कहिक कहछो।”#मत्ति १४:१-२; मर्कुस ६:१४-१५; लुका ९:७-८
20तब येसुले चेलासिका पुछल्के, “तोर्स्या चाहिं हम कोन स्यो कहिक कहछ?”
पत्रुसले उत्तर देति कहल्के, “तुइं पर्मेसोरले पठाइल खिरिस्ट स्या!”#युहन्ना ६:६८-६९ 21तर येसुले यि बात कक्राहु नाइ कह्य कहिक चेलासिका करा आग्या देल्के।
येसुले आप्न मोर्लाहारक बारेम अगमबानि कर्ल
(मत्ति १६:२०-२८; मर्कुस ८:३०—९:१)
22अनि येसुले ओकर्सिका कहल्के, “मानुकक बेटाका थुप्रे दुख भोग पर्तो। ओक्रा यहुदिसिक अगुवा, मुल पुजारि आ धर्मगुरुस्या इन्कार कर्तो आ मारि देतो। तर तेस्रो दिनम उ फेरि जिउँत हेतो।”
23तब येसुले सभेका कहल्के, “जुन मानुक हम्र चेला बनिक हम्रा पछ्याब चाहाछो ओइले आप्न सभे इच्छाका मारुस आ सब्दिन हम्र लागि दुख भोग तयार रहुस।#मत्ति १०:३८; लुका १४:२७ 24किरकि जुन मानुकले आप्न जिबनका बचाब चाहातो ओइले सब्दिन रहलाहार जिबन गुमाइतो। तर हम्र लागि जिबन गुमाइलाहार्ले चाहिं सब्दिन रहलाहार जिबन पाइतो।#मत्ति १०:३९; लुका १७:३३; युहन्ना १२:२५ 25किरकि कुन्हुँ मानुकले सन्सारक सभे चिज पाइक आप्न परान चाहिं गुमाइतो त ओक्रा कथि फैदा? 26जुन मानुकले हम्रा आ हम्र बचनका सुइकार कर लजाइतो, ओक्रा मानुकक बेटाले पनि आप्न महिमाम आ सोर्गक बापक आ पबित्र सोर्गदुतसिक महिमाम आब्त खुमा सुइकार कर लजाइतो। 27हम तोर्सिका साँच्चेक कह स्यो, अइलग ठेर्याइल मानुकभोरि कुन्हुँ-कुन्हुँले पर्मेसोरक राज्ये बिना देखिक नाइ मोर्तो।”
येसुक रुप बदल्ल
(मत्ति १७:१-८; मर्कुस ९:२-८)
28उ बातक लग्भग आठ दिनक पछा येसुले पत्रुस, युहन्ना आ याकुबका आप्नसङ लइक पर्थना कर पाहारम गेले।#२ पत्रुस १:१७-१८ 29ओत पुगिक येसुले पर्थना करिरहल जुमा येसुक अनुहार बदल्ले आ कप्रासब पनि उज्रसेत्ते चहकिलो भेले। 30ओहे जुमा अन्चक्एम दुइ जना मानुक येसुसङ बात कर्त देखा पर्ले। ओकर्स्या मोसा आ एलिया छले। 31ओकर्स्याहु उज्रसेत्ते चहकिलो भेल छले आ येसु केनामे पर्मेसोरक इच्छा पुरा कर लागि येरुसलेमम मोर पर्तो कहिक येसुसङ बात कर्ति छले। 32उजुमा पत्रुस आ ओक्र सङ्सब बर्कि निनम पर्ल छले। पछास ओकर्स्या निनस जग्ले त येसुका उज्रसेत्ते चहकिलो भेल देखल्के। ओइलग मोसा आ एलिया पनि येसुसङ ठेर्याइल छले। 33जब ओकर्स्या येसुसङ बात करि सकिक जाइ लग्ले त पत्रुसले कहल्के, “हे गुरु, आपन्सिका अइलग रह कत्का अस्लि छो। हमर्स्या अइलग तिनगो छप्रा बनाउँ, एगो तोर लागि, एगो मोसाक लागि आ एगो एलियाक लागि!” तर पत्रुसका कथि कहति स्यो कहिक ओक्रा थाहे नाइ भेले।
34पत्रुस बज्ति-बज्ति एगो मेघ आइक ओकर्सिका झाँपल्के त चेलासब एक्दम डेराइले। 35ओहे जुमा मेघस एना कहिक एगो अबाज एले, “यि हम्र चुन्ल बेटा स्यो, एक्र कहल बात मान्।”#यसैया ४२:१; मत्ति ३:१७; १२:१८; मर्कुस १:११; लुका ३:२२
36पछास उ अबाज ओराइले त चेलास्या येसुका मत्रे देखल्के। उजुमा चेलास्या यि बात कक्राहु नाइ सुनाइक आप्ने मनम राखल्के।
भुत लग्ल छउँराका येसुले अस्लि कर्ल
(मत्ति १७:१४-१८; मर्कुस ९:१४-१७)
37अनि दस्रो दिन् येसु चेलासिसङ पाहारस तर् एले त थुप्रे मानुकस्या येसुका भेट एले। 38ओइ मान्खक भिरस एक जनाले बर्कि घार येसुका एनामे कहल्के, “हे गुरु, हम तोरा बिन्ति कर्स्यो, दया करिक हम्र बेटाका अस्लि करि दे किरकि यि हम्र एगो मत्रे बेटा स्यो। 39एक्रा घरि-घरि भुत लग्छो जक्र कारनस यि अन्चक्एम कस्याइक चिच्याइ छो। उ भुतले एक्र देहका एनामे अइंठ छो कि मुहस गाउँजेगो निकाल्छो। अनि एक्रा चोत-पटक दैक मत्रे छोर्छो। 40हम तोर चेलासिका यि भुतका निकालि दे कहिक कहल्यो तर ओकर्स्या नाइ सकल्को।”
41तब येसुले कहल्के, “ए बिस्वास नाइ कर्लाहार आ अटेरि मानुकसब, हम तोर्सिसङ कतेक दिन् रहबो आ कतेक दिन् तोर्सिक अबिस्वासका सहबो? उ छउँराका हम्रलग आन्।”
42बापले बेटाका आन्ति-आन्ति भुतले ओक्रा धर्तिम पट्किक ओक्र देहका अइंठ लग्ले। तर येसुले भुतका हप्काइल्के आ उ छउँराका अस्लि करिक बापक जिम्मा लगाइ देल्के। 43पर्मेसोरक बर्कि सक्ति देखिक सभे मानुकसब छक पर्ले।
येसुले आप्न मोरपर्लाहार बारेम फेरि कहल
(मत्ति १७:२२-२३; मर्कुस ९:३०-३२)
येसुले कर्ल कामका देखिक सभे मानुकसब छक पर्ल जुमा येसुले आप्न चेलासिका कहल्के,
44“आब् हम्र बात ध्यान दैक सुन् आ नाइ बिस्रा किरकि मानुकक बेटा मान्खसिक हाथम पक्राउ पर लग्ल छो।” 45तर यि बात चेलास्या बुझ नाइ सकल्के। किरकि यि बातक अर्थ चेलास्या नाइ बुझुस कहिक घुसारिक राख्ल छले। अनि चेलास्या पनि यि बातक बारेम येसुका पुछ डेराइले।
सभेस बर्कि कोन
(मत्ति १८:१-५; मर्कुस ९:३३-४०)
46उजुमा चेलासिक बिचम सभेस बर्कि कोन स्यो कहिक बाद-बिबाद हब लग्ले।#लुका २२:२४ 47तर येसुले ओकर्सिक बात थाहा पाइक एगो बच्चाका आनिक आप्नलग ठेर्याइल्के, 48आ चेलासिका कहल्के, “जुन मानुकले हम्र नामम एहेने बच्चाका स्वागत कर्तो, ओइले हम्रा स्वागत कर्तो अनि हम्रा स्वागत कर्लाहारले हम्रा पठाइलाहारका स्वागत कर्तो। किरकि तोर्सिभोरिम जे सभेस कन्कि बन्ब ओक्राहि पर्मेसोरले सभेस बर्कि ठहराइतो।”#मत्ति १०:४०; लुका १०:१६; युहन्ना १३:२०
तोर्सिक बिरोध नाइ कर्लाहार तोर्सिक पछक स्यो
(मर्कुस ९:३८-४०)
49तब युहन्नाले येसुका कहल्के, “हे प्रभु, हमर्स्या एक जनाका तोर नामम भुतसब भगाइत देख्ल्यो। हमर्स्या ओक्रा एना नाइ कर् कहिक रोक्बो कर्ल्यो किरकि ओइले हमर्सिक जक्या तोरा नाइ पछ्याइ छो।”
50तर येसुले चेलासिका कहल्के, “ओक्रा नाइ रोक्, किरकि तोर्सिक बिरोध नाइ कर्लाहार तोर्सिक पछक स्यो।”
सामरियाक मानुकस्या येसुका इन्कार कर्ल
51जब येसुक सोर्ग गेल्हार दिन् लगम आब लग्ले त येसुले यरुसलेम जाइ लागि पक्का करल्के। 52ओहेस येसुले आप्नस अगा खबर लगाइलाहार मानुकसिका सभे कथ्यो तयार कर लागि सामरिया पर्देसक एगो गाँमम पठाइल्के। 53तर सामरियाक मानुकस्या येसु यरुसलेम गेल्हार बात थाहा पाइक येसुका स्वागत नाइ करल्के। 54यि देखिक याकुब आ युहन्नाले येसुका एनामे पुछल्के, “हे प्रभु, कथि तुइं यि चाहाछ कि हमर्स्या पर्मेसोरका सोर्गस आगि झारिक एकर्सिका भस्म करुस कहिक बिन्ति करुम?”#२ रजा १:९-१६
55तर येसुले घुमिक ओकर्सिका हप्काइल्के। [आ एनामे कहल्के, “तोर्सिक केहेन खालक मन हब पर्तो कहिक त तोर्सिका थाहे नाइ छो। किरकि मानुकक बेटा कक्राहु नास कर नाइ तर मानुकसिका बचाब आइल स्यो।”] 56तब येसुले आप्न चेलासिका लइक दस्रो गाँ गेले।
येसुका पछ्याइत खुमा तिर पर्लाहार मोल
(मत्ति ८:१९-२२)
57येसु चेलासिसङ पैराम जाइत खुमा एक जना मानुक आइक येसुका कहल्के, “हे गुरु, तुइं जत-जत जेब, हमु तोर पछा-पछा जेबो।”
58तर येसुले ओक्रा कहल्के, “देख्, नर्ह्यासिक रहलाहार बिल्लि छो, फुदिसिक खोँट्रा छो तर मानुकक बेटाका त आप्न कपार राख्लाहार पनि ठाउँ नाइ छो।”
59तब येसुले दस्रो मानुकका कहल्के, “तुइं हम्रा पछ्या।”
तर ओइले उत्तर देल्के, “हे गुरु, अगा हम्रा जाइक हम्र बापका गार दे।”
60येसुले ओक्रा कहल्के, “मोर्ल मानुकसिका मोर्ले मानुकस्या गारुस। तर तुइं जाइक पर्मेसोरक राज्येक पर्चार कर्।”
61पछास दस्रो मानुकले येसुका कहल्के, “हे प्रभु, हम तोरा पछ्याइबो तर अगा हम्रा घरम जाइक सभेका भेटिक आब दे।”#१ रजा १९:२०
62तर येसुले ओक्रा कहल्के, “आप्न हाथ हरम राखिक पछाभर घुमिक ताक्लाहार कुन्हुँ पर्मेसोरक राज्येक लायकक नाइ हेतो।”
Currently Selected:
लुका 9: DANU
Highlight
Share
Compare
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
