लुका 8
8
प्रभु येसुका सघाइलाहार जनिसब
1ओक्र कनेके दिनक पछा येसुले गाँ-गाँ आ सहर-सहरम जाइक पर्मेसोरक राज्येक बारेम खुसिक खबर सुनाब लग्ले। उजुमा बार्हो जना चेलासब येसुसङ छले। 2अनि भुत आ रोगसिस अस्लि भेल अरु जनिसब पनि येसुसङ गेल छले। ओकर्सिभोरिम सातगो भुत लगिक अस्लि भेल मरियम मग्दलिनि पनि छले।#मत्ति २७:५५-५६; मर्कुस १५:४०-४१; लुका २३:४९ 3एनाहिमे रजा हेरोदक घरक बेबस्तापक#8:3 बेबस्तापक कहल सभे चिजक् बन्दोबस् कर्लाहार् मानुक् स्यो। खुजासक बहु योअन्ना पनि छले। अनि सुसन्ना आ आरो थुप्रे जनिसब पनि छले। ओकर्स्या चाहिं आप्न धनस येसु आ येसुक चेलासिक सेबा करेक।
बिचन छिर्याइलाहार किसानक उखान
(मत्ति १३:१-९; मर्कुस ४:१९)
4जब गाँ आ सहरस थुप्रे मानुकसब आइक येसुलग धेर्याइले त येसुले ओकर्सिका यि उखान कहल्के,
5“एक जना किसान बिचन छिर्याब लागि खेत गेले। बिचन छिर्याइत खुमा कुन्हुँ बिचन पैराम पर्ले। अनि मानुकस्या टाङस जाँटल्के आ फुदिस्या पनि खेल्के। 6अनि कुन्हुँ बिचन चाहिं पाख्नेगो भेल जमिनम पर्ले आ जर्मति बितिन सुखाइले किरकि जमिनम हाल नाइ छले। 7अनि कुन्हुँ बिचन चाहिं काँटेगो जर्मल जमिनम पर्ले। ओहेस सङि बह्र्ति गेल काँटले झाँपिक बिचनका बह्र नाइ देल्के। 8तर कुन्हुँ बिचन चाहिं मल्गर जमिनम पर्ले आ जर्मिक सइ दोब्बर फर फर्ले।”
एतेक कहिक येसुले बर्कि घार कहल्के, “जक्र सुन्लाहार कान छो, ओइले सुनुस।”
चेलास्या उखानक अर्थ पुछ्ल
(मत्ति १३:१०-१७; मर्कुस ४:१०-१२)
9पछास चेलास्या यि उखानक अर्थ कथि स्यो कहिक येसुका पुछल्के। 10ओहेस येसुले चेलासिका कहल्के, “तोर्सिका त पर्मेसोरक राज्येक रहस्ये बुझ्लाहार ग्यान देल छो। तर अरुका चाहिं हम उखानम मत्रे कह स्यो किरकि ओकर्स्या ताकिक पनि नाइ देखुस् आ सुनिक पनि नाइ बुझुस।#यसैया ६:९
उखानक अर्थ
(मत्ति १३:१८-२३; मर्कुस ४:१३-२०)
11“उखानक अर्थ यि स्यो, बिचन चाहिं पर्मेसोरक बचन स्यो। 12पैराम पर्ल बिचन चाहिं ओकर्स्या स्यो, जकर्स्या बचन सुनक त सुन्छो तर बिस्वास करिक नाइ बचुस कहिक सैतान आइक ओकर्सिक मनस बचनका लगाइ हाल्छो। 13अनि पाख्नेगो भेल जमिनम पर्ल बिचन चाहिं ओकर्स्या स्यो, जकर्स्या पर्मेसोरक बचन सुन्ति बितिन खुसिस सुइकार त कर्छो। तर ओकर्सिक बिस्वासक जर कम्जोर भेल कारनस कम समैक लागि मत्रे बिस्वास कर्छो। अनि जिबनम समस्या आ दुख पर्ल जुमा ओकर्स्या बिस्वास कर पनि छोर्छो। 14अनि काँटक बिचम पर्ल बिचन चाहिं ओकर्स्या स्यो, जकर्स्या बचन त सुन्छो तर आप्न जिबनक चिन्ता धन-सम्पति आ मौज मज्जाले कर्त खुमा ओकर्स्या बह्र नाइ पाइक फरे नाइ फर्छो। 15तर मल्गर जमिनम पर्ल बिचन चाहिं ओकर्स्या स्यो, जकर्स्या बचन सुनिक आग्याकारि भइक बचनका अस्लिमे आप्न मनम राख्छो आ थुप्रे फर फराइछो।
दिब्याक उखान
(मर्कुस ४:२१-२५)
16“कुन्हुँ मानुकले दिब्याका बारिक ढक्यास नाइ झाँप्छे न त चौकिक तरम राख्छे। तर घरम ढुक्लाहार मानुकसिका इजोत हउस कहिक बरु चेकाम राख्छे।#मत्ति ५:१५; लुका ११:३३
17“एनाहिमे घुसारिक राख्ल सभे चिज देखाइतो आ जुन बात गोप्ये छो उ सभे थाहा हेतो।#मत्ति १०:२६; लुका १२:२
18“ओहेस तोर्स्या सुन्ल बातम अस्लिमे ध्यान दैक होसियार रह किरकि जक्रसङ छो ओक्रा आरो देतो आ जक्रसङ नाइ छो ओक्रसङ भेलो चिज छिनाइल जेतो।”#मत्ति २५:२९; लुका १९:२६
प्रभु येसुक मतार आ भाइसब
(मत्ति १२:४६-५०; मर्कुस ३:३१-३५)
19पछास येसुका भेट लागि मतार आ भाइसब एले तर मानुकसिक थुप्रे भिर भेल कारनस ओकर्स्या येसुका भेट नाइ सकल्के। 20ओहेस एक जना मानुकले आइक येसुका कहल्के, “तोर मतार आ भाइसब तोरा भेट लागि बाहारम अस्याइल छो।”
21तर येसुले ओकर्सिका कहल्के, “पर्मेसोरक बचन सुन्लाहार आ पालन कर्लाहार ओकर्स्याहि हम्र मतार आ भाइसब स्यो।”
येसुले हबा बिहारका सान्त कर्ल
(मत्ति ८:२३-२७; मर्कुस ४:३५-४१)
22एक दिन् येसुले आप्न चेलासिका कहल्के, “ले आब् आपन्स्या यि तालक ओइपार च।” ओहेस ओकर्स्या सभे जना डुङ्ङाम बेठिक जाइ लग्ले। 23तर जाइति-जाइति येसु सुत्ले। ओहे जुमा तालम बर्कि हबा बिहार चल लग्ले आ पानिक हेल्फास डुङ्ङा भोर लगिक चेलासब बर्कि समस्याम पर्ले। 24ओहेस चेलास्या येसुका जगाइति कहल्के, “प्रभु! प्रभु! हमर्स्या डुब लग्ल्यो!” चेलासिक पुकार सुनिक येसु उठ्ले आ हबा बिहारका हप्काइल्के त ओहे जुमा हबा बिहार बन् भइक सान्त भेले।
25तब येसुले चेलासिका कहल्के, “तोर्सिक बिस्वास खोइ?” यि घट्ना देखिक चेलासब डेराइले आ अचम्म लगिक आपसम एना कह लग्ले,
“यि कोन स्यो? एक्र कहल बात त हबा बिहार आ हेल्फाले पनि मान्छो त!”
भुत लग्ल मानुकका अस्लि कर्ल
(मत्ति ८:२८-३४; मर्कुस ५:१-२०)
26पछास येसु आ येसुक चेलासब गालिल तालक ओइपार गेरासा पर्देसम पुग्ले। 27अनि येसु डुङ्ङास उतर्ले त ओइ सहरक एक जना भुत लग्ल मानुक एले। उ मानुकले थुप्रे दिनस कप्रासब नाइ पिन्हेक आ घर पनि नाइ जाबेक तर चिर्यारिएगो भेल ठावम रहत छले। 28ओइले येसुका देखिक कस्याइक चिच्च्याइले आ येसुक अगाम ठेउन्या मारिक बर्कि घार एनामे कहल्के, “हे येसु, महान पर्मेसोरक बेटा, तोरा हम्रसङ कथि काम छो? तोरा हम बिन्ति कर्स्यो, हम्रा दुख नाइ दे।” 29किरकि येसुले भुतका उ मान्खस निक्लिक जो कहिक अगाहि आग्या देल छले। उ मानुकका भुतले घरि-घरि आप्न अधिनम करिक थुप्रे दुख दिएक। ओहेस ओक्रा जिजिरस बाह्निक राखेक तैयो ओइले भुतक सक्तिस जिजिरका टुटाइक उजाड ठाउँभर भागिक जाबेक।
30तब येसुले ओक्रा पुछल्के, “तोर ना कथि स्यो?” ओइले कहल्के, “हम्र ना फौज स्यो!” किरकि ओक्रा थुप्रे भुतसब लग्ल छले।
31पछास उ भुतस्या येसुका बिन्ति करिक एनामे कहल्के, “हमर्सिका सभेस तर् पतालम नाइ पठा।”
32उजुमा ओहेलगक डँराम एक जेर सुगुरसब चर्ति छले। ओहेस भुतस्या येसुका बिन्ति करिक सुगुरक भित्रिम ढुक्लाहार अनुमति माङल्के। अनि येसुले ओकर्सिका अनुमति देल्के त, 33भुतसब उ मान्खस निक्लिक सुगुरक भित्रिम ढुक्ति बितिन सुगुरसब डँराक तरभर हुर्मुराइक दोगिक तालम खस्ले आ डुबिक मोर्ले।
34यि घट्ना देखिक सुगुर चर्भासब भाग्ले आ गाँ आ सहरम जाइक मानुकसिका सुनाइल्के। 35ओहेस थुप्रे मानुकसब घट्ल घट्नाका देख लागि येसुलग एले। अनि भुत लग्ल मानुकका अस्लि भइक कप्रा पिन्हिंक येसुक टाङलग बेठ्ल देखिक सभे जना डेराइले। 36जकर्स्या यि घट्नाका देख्ल छले ओकर्स्या भुत लग्ल मानुक केनामे अस्लि भेल छले उ सभे बात अरुका पनि सुनाइल्के। 37यि घट्नाका देखिक गेरासा पर्देसक आस्पासक सभे मानुकस्या येसुका बिन्ति करिक “तुइं यि ठाउँका छोरिक् जो” कहिक कहल्के किरकि ओकर्स्या एक्दम डेराइल छले। ओहेस येसु ओइलगस जाइ लागि डुङ्ङाम चहर्ले। 38ओहे जुमा भुत लगिक अस्लि भेल मानुकले येसुका बिन्ति करिक कहल्के, “हे प्रभु, हमु तोरसङ जेबो।” तर येसुले ओक्रा कहल्के,
39“तुइं आप्ने घर जो आ पर्मेसोरले तोर लागि कथि काम करि देल छो, जाइक अरुका पनि सुना।”
तब उ गेले आ येसुले ओक्र लागि कर्ल कामक बारेम सहरेभोरि सुनाब लग्ले।
याइरसक मोर्ल बेटि आ रकत बहलाहार जनि
(मत्ति ९:१८-२६; मर्कुस ५:२१-४३)
40अनि जब येसु तालक ओइपार पुग्ले त थुप्रे मानुकस्या येसुका स्वागत करल्के। किरकि ओकर्स्या सभेले येसुका अस्याइल छले। 41एक घरिया पछा याइरस कहलाहार सभाघरक हाकिम एले आ येसुक अगाम ठेउन्या मारिक “हम्र घरम आइ दे” कहिक बिन्ति करल्के। 42किरकि ओक्र एकेगो बार बरिसक बेटि छले। ओहो बिरामि भइक मोरि लग्ल छले। ओहेस येसु ओक्रसङ जाइ लग्ले। जाइत खुमा पैराम मान्खक थुप्रे भिर लगिक ठेलम-ठेला हब लग्ले।
43ओइ भिरम एक जना बार बरिसस रकत बहलाहार रोग लग्ल जनि छले। उ जनिले आप्न भेल जति सभे सम्पति दबाइम खर्चा करिक पनि ओक्रा कुन्हुँ अस्लि कर नाइ सक्ल छले। 44ओहेस उ जनिले पछाभरस आइक येसुक कप्राक कोनम छुइल्के। छुइति बितिन ओक्र रकत बहलाहार रोग अस्लि भेले। 45ओहेस येसुले पुछल्के, “हम्रा कोन छुइल्को?”
जब सभेले हम त नाइ स्यो छुइल कहिक कहल्के त पत्रुसले एनामे कहल्के, “हे प्रभु, तोरा मान्खक भिरले चारोभरस घेरिक ठेल्ति छो।”
46तर येसुले कहल्के, “हम्रा कुन्हुँले छुइले स्यो किरकि हम्रस सक्ति निक्लिक गेल हम थाहा पाइल्यो।” 47जब उ जनिले हम घुस्रिक रह नाइ सक्बो कहिक थाहा पाइल्के त डरस लद-लद काँप्ति एले आ येसुक अगाम ठेउन्या मारिक गोरलागल्के। अनि किर येसुका छुइल्के आ छुइति बितिन केनामे अस्लि भेले उ बात सभेका सुनाइल्के। 48तब येसुले ओक्रा कहल्के, “बेटि, तोर बिस्वासले तोरा अस्लि कर्ल छो, आब् तुइं अस्लिमे जो।”
49येसु बज्ति छले। ओहे जुमा याइरसक घरस एक जना आइक याइरसका कहल्के, “तोर बेटि त मोरि सक्लो। आब् गुरुका दुख नाइ धि।”
50यि बात सुनिक येसुले याइरसका कहल्के, “तुइं नाइ डेरा, तर बिस्वास कर् अनि तोर बेटि जितो।”
51जब याइरसक घर पुग्ले त येसुले पत्रुस, याकुब, युहन्ना आ छउँरिक बाप-मतार बाहेक आरो कक्राहु न भित्रिम ढुक नाइ देल्के। 52ओइलग आइल सभे जना मोर्ल छउँरिक लागि दुखि भइक कान्ति छले। तर येसुले ओकर्सिका कहल्के, “तोर्स्या नाइ कान्! किरकि उ मोर्ल नाइ छो तर सुत्ल छो।”
53यि बात सुनिक ओकर्स्या येसुक खिसि करिक हाँस लग्ले किरकि उ छउँरि मोर्ले छो कहिक ओकर्सिका थाहा छले। 54तर येसुले मोर्ल छउँरिक हाथ पक्रिक कहल्के, “गे बेटि उठ्!” 55येसुले कहति बितिन उ छउँरिक परान एले अनि उ उठिक बेठ्ले। तब येसुले ओकर्सिका कहल्के, “एक्रा कथ्यो खाइलाहार चिज धि।” 56बेटिका जिउँत भेल देखिक बाप मतारका अचम्म लग्ले। तर येसुले ओकर्सिका यि बात कक्राहु नाइ सुनाह्य कहिक आग्या देल्के।
Currently Selected:
लुका 8: DANU
Highlight
Share
Compare
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
