लुका 23
23
पिलातसक अगाम येसु
(मत्ति २७:१-२,११-२४; मर्कुस १५:१-५; युहन्ना १८:२८-३८)
1तब पन्चायतम आइल सभे मानुकसब उठ्ले आ येसुका रोमि सासक पिलातसलग लगाइल्के। 2अनि येसुक उप्रिम एना कहति दोस लगाब लग्ले, “हमर्स्या एक्रा हमर्सिक देसक मानुकसिका उक्साइत भेटाइल्यो। अनि अइले रोमि सरकारका पनि कर् तिर नाइ पर्तो कहिक मानुकसिका कहछो आ आप्न चाहिं ‘हम खिरिस्ट आ रजा स्यो’ कहिक कहछो।”
3ओकर्सिक बात सुनिक पिलातसले येसुका पुछल्के, “तुइं साँच्चेक यहुदिसिक रजा स्या?”
येसुले जबाफ देल्के, “उ त तुइं आप्नि कहति स्या।”
4तब पिलातसले मुल पुजारि आ ओइलग धेर्याइल मानुकसिका कहल्के, “हम यि मान्खम कुन्हुँ दोस नाइ पाइल्यो।”
5तर ओकर्स्या झन आरो कस्याइक कह लग्ले, “यि मानुकले गालिलस लइक पुरा यहुदिया पर्देस आ अइलग पनि आप्न सिछ्यास मानुकसिका उक्साइति छो।”
येसु हेरोदक अगाम
6ओकर्सिक बात सुनिक पिलातसले पुछल्के, “कथि यि मानुक गालिल पर्देसक स्यो?” 7जब पिलातसका येसु रजा हेरोदले सासन कर्लाहार पर्देसक स्यो कहिक थाहा भेले त ओइले येसुका हेरोदलग पठाइ देल्के। उजुमा हेरोद यरुसलेमेम छले। 8येसुका देख पाइक हेरोद एक्दम खुसि भेले किरकि ओइले येसुक बारेम सुन्ल छले। ओक्रा थुप्रे दिनस येसुका देख लागि मन छले। अनि येसुले कर्ल अचम्मक काम आप्ने आँखिस देख लागि आस कर्ल छले। 9ओहेस हेरोदले येसुका थुप्रे बातसब पुछल्के तर येसुले कथ्यो जबाफ नाइ देल्के। 10तब मुल पुजारि आ धर्मगुरुसब ठेर्याइले आ येसुक बिरोध करिक अनेक दोस लगाब लग्ले। 11पछास हेरोदले पनि आप्न सिपाहिसिसङ मिलिक येसुक खिसि कर्ति बिजेत कर लग्ले। अनि येसुका रजाले पिन्लाहार जक्या कप्रा पिन्हाँइक फेरि पिलातसलग पठाइ देल्के। 12ओहे दिन् हेरोद आ पिलातसक बिचम मेलमिलाप भेले किरकि ओइस अगा ओकर्सिक बिचम दुस्मनि छले।
येसुका कुरुसम लट्काइक मार्लाहार आदेस देल
(मत्ति २७:१५-२६; मर्कुस १५:६-१५; युहन्ना १८:३९—१९:१६)
13तब पिलातसले मुल पुजारि, यहुदिसिक अगुवा आ अरु मानुकसिका बलाइक कहल्के, 14“तोर्स्या यि मानुकले आप्न सिछ्यास मानुकसिका उक्साइ छो कहिक हम्रलग आन्ल छल। ओहेस हम तोर्सिएक अगाम एक्रा पुछ-ताछ कर्ल्यो तर तोर्स्या लगाइल कुन्हुँ दोस हम यि मान्खम नाइ पाइल्यो। 15हेरोदले पनि कथ्यो दोस नाइ पाइक एक्रा फेरि हम्रेलग पठाइ देल्को। देख्, यि मानुकका मार पर्लाहार कथ्यो कारन नाइ छो किरकि अइले कथ्यो गलत काम कर्ल नाइ छो। 16ओहेस हम एक्रा साफिस पिट लगाइक छोरि देबो।” 17[पब्निक उपलछेम एक जना कैदिका छोरि देल्हार चलन छले।]
18तर ओइलग भेल सभे मानुकस्या चिच्याइक एनामे कहल्के, “एक्रा मारि पर्तो। बरु हमर्सिक लागि बरब्बाका छोरि धि।” 19बरब्बा सहरम हुल-दङ्ङा कर्ल आ मानुकका मार्ल कारनस जेलम पर्ल छले।
20पिलातसले येसुका छोरि देल्हार बिचार करिक ओकर्सिका फेरि सम्झाइल्के। 21तर ओकर्स्या झन आरो चिच्याइति कह लग्ले, “एक्रा कुरुसम लट्का, एक्रा कुरुसम लट्का!”
22पिलातसले फेरि ओकर्सिका पुछल्के, “किर? अइले कथि गलत काम कर्ल छो झन? हम त एक्रा मार पर्लाहार कथ्यो कारन नाइ देख्स्यो। ओहेस हम एक्रा कोर्रास पिट लगाइक छोरि देबो।”
23तर ओकर्स्या झन आरो कस्याइक चिच्याइति कह लग्ले, “एक्रा कुरुसम लट्काबि पर्तो।” एनामे ओकर्स्या चिच्याइक जितल्के। 24ओहेस पिलातसले ओकर्सिएक माङ् कर्ल बमोजिम फैसला सुनाइल्के। 25ओइले उ मानुकका छोरि देल्के, जुन मानुकले हुल-दङ्गा करिक आ मानुकका मारिक जेलम पर्ल छले। तर येसुका चाहिं मानुकसिक इच्छा बमोजिम ओकर्सिक जिम्माम सुम्पि देल्के किरकि ओकर्सिक एहे माङ् छले।
येसुका कुरुसम लट्काइल
(मत्ति २७:३२-४४; मर्कुस १५:२१-३२; युहन्ना १९:१७-२७)
26जब सिपाहिस्या येसुका कुरुसम लट्काब लगाइति छले त कुरेनि सहरक सिमोन कहलाहार एक जना मानुकका भेटाइल्के। उ आप्न देसस यरुसलेम सहरभर आब्ति छले। आब्त खुमा पैराइम सिपाहिस्या ओक्रा पक्रल्के आ येसुक कुरुस बोकाइक येसुक पछा-पछा लगाइल्के।
27सिपाहिस्या येसुका लगाइत खुमा थुप्रे मान्खक भिर पछा लगिक गेले। ओइ भिरम जनिसब पनि छले। उ जनिस्या येसुक लागि बिलाप करिक कान्ति छले। 28ओहेस येसुले ओकर्सिभर घुमिक कहल्के, “गे यरुसलेमक बेटिसब, तोर्स्या हम्र लागि नाइ कान्, बरु आप्ने लागि आ आप्न बेटा-बेटिसिक लागि कान्। 29किरकि एहेन दिन् आब्ति छो, जब मानुकस्या कहतो, ‘धन्ये बाँझिसब, देह्भारि नाइ भेल्हार कोखसब आ दुध नाइ पियाइलाहार जनिसब।’ 30उजुमा मानुकस्या पाहारका कहतो, ‘हमर्सिक उप्रिम खस्’ आ डँराका कहतो, ‘हमर्सिका पुर्।’#होसे १०:८; प्रकास ६:१६ 31किरकि एकर्स्या हरियर गाछ्का त एनामे कर्छो त झन सुखाइल गाछ्का कथि नाइ कर्तो?”
32उ सिपाहिस्या दुइ जना पापिसिका पनि येसुसङ मार लगाइति छले। 33जब ओकर्स्या खप्परे कहलाहार ठावम पुग्ले त ओहेलग सिपाहिस्या येसु आ उ दुनुगो पापिका कुरुसम लट्काइल्के। एक जनाका येसुक दहिना काटम आ दस्रोका बमा काटम। 34[तब येसुले कहल्के, “गे बाप, एकर्सिका छेमा करि धि किरकि एकर्सिका थाहा नाइ छो, कथि कर्ति स्यो कहिक।”] अनि सिपाहिस्या येसुक कप्राका चिट्ठा घालिक बाँटल्के।#भजन २२:१८
35यि घट्नाका मानुकस्या ठेर्याइक ताक्ति छले तर यहुदिसिक अगुवास्या चाहिं येसुक खिसि कर्ति कहल्के, “अइले अरुका त बचाइल्को, यि साँच्चेक पर्मेसोरले चुन्ल खिरिस्ट स्यो त आप्नि आप्नका बचाउस।”#भजन २२:७
36तब सिपाहिस्या पनि येसुका अङ्गुरक आम्त रस पिअ लागि देल्के आ खिसि कर्ति एनामे कहल्के,#भजन ६९:२१ 37“तुइं साँच्चेक यहुदिसिक रजा स्या त बचिक देखा।”
38येसुका लट्काइल कुरुसक उप्रिम “यि यहुदिसिक रजा स्यो।” कहिक निख्ल पाटि लट्काइल छले।
39येसुसङ कुरुसम लट्काइल एगो पापिले पनि येसुक खिसि कर्ति एनामे कहल्के, “तुइं खिरिस्ट नाइ स्या झन? तुइं खिरिस्ट स्या त आप्न आ हमर्सिका पनि बचा।”
40तर दस्रो पापिले ओक्रा हप्काइति कहल्के, “तोरा पर्मेसोरक कनेक सना पनि डर नाइ लग्छो? तुहुँ त ओहे सजाए भोग्ति स्या। 41आपन्स्या त आपन्सिक नाइ अस्लि कामक ठिक सजाए पाइल स्या तर अइले त कथ्यो नाइ अस्लि काम कर्ल नाइ छो।” 42तब ओइले येसुका कहल्के, “हे येसु, तुइं आप्न राज्येम आब्त खुमा हम्राहु सम्झह्य।”
43ओहे जुमा येसुले ओक्रा कहल्के, “साँच्चेक हम तोरा कह स्यो, आजुवै तुइं हम्रसङ सोर्गलोकम रहब।”
येसु मोर्ल
(मत्ति २७:४५-५६; मर्कुस १५:३३-४१; युहन्ना १९:२८-३०)
44-45उजुमा लग्भग दिनक बार बज्ल छले। उ समैस लइक तिन बजे तलिक पुरा देस अँन्हार भेले किरकि सुरुजस रउद निक्ल बन् भेले आ मन्दिरक पर्दा पनि बिचम फटिक दुइ टुक्रा भेले।#प्रस्थान २६:३१-३३ 46अनि येसुले बर्कि घार चिच्याइक एनामे कहल्के, “गे बाप, हम आप्न आत्मा तोर हाथम सुम्प स्यो।” एतेक कहिक येसुले आप्न परान छोरि देल्के।#भजन ३१:५
47यि घट्नाका देखिक सिपाहिसिक कप्तानले एना कहति पर्मेसोरक पर्संसा करल्के, “साँच्चेक यि मानुक त धर्मि छलो।”
48यि घट्नाका देख आइलाहार सभे मानुकस्या आप्न छाति पिट्ति आ कान्ति घर घुमिक गेले। 49तर येसुका चिन्लाहार मानुकस्या आ गालिल पर्देसस येसुका पछ्याइति आइल जनिस्या चाहिं भले दुरि ठेर्याइक यि सभे घट्नाका ताक्ति छले।#लुका ८:२,३
येसुका चिर्यारिम राख्ल
(मत्ति २७:५७-६१; मर्कुस १५:४२-४७; युहन्ना १९:३८-४२)
50-51ओइलग यहुदिया पर्देसक अरिमाथिया सहरस आइल एक जना योसेफ कहलाहार मानुक छले। उ धर्मि आ मन सफा भेल मानुक छले। ओइले पर्मेसोरक राज्येक पैरा ताक्ति छले। उ यहुदिसिक बर्कि पन्चायतक सदस्य पनि छले तर ओइले बर्कि पन्चायतक अरु सदस्यसिसङ येसुका मार्लाहार योजनाम सहमति नाइ देल छले। 52जब येसु मोरि सक्ले त योसेफ पिलातसलग गेले आ येसुक लास माङल्के। 53अनि पिलातसले अनुमति देल्के त उ घुमिक एले आ येसुक लासका कुरुसस तर् उतारिक सुतिक कप्राम सेंरिक पेतारका खोँपिक बनाइल चिर्यारिम राखल्के। ओइ चिर्यारिम अगा कक्रो लास नाइ राख्ल छले। 54उ दिन् जिराइलाहार दिनक लागि तयारि कर्लाहार दिन् छले। अनि जिराइलाहार दिन् सुरु हबि लग्ल छले।
55गालिल पर्देसस येसुका पछ्याइति आइल जनिसब पनि योसेफक पछा-पछा गेले आ चिर्यारिम केनामे येसुक लासका राखल्के उ सभे ताकल्के। 56तब ओकर्स्या घुमिक घर एले आ येसुक लासम लगाब लागि गम-गम गम्कलाहार मसलासब आ अत्तरक तेल तयार करल्के।
अनि धार्मिक नियम अन्सार जिराइलाहार दिनम ओकर्स्या जिराइले।#प्रस्थान २०:१०; ब्यबस्था ५:१४
Currently Selected:
लुका 23: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
