पेरेरित 28
28
पावल माल्टा टापुम
1एनामे हमर्स्या बचिक समुन्द्रक काटम एल्यो त उ टापुक ना माल्टा स्यो कहिक हमर्सिका थाहा भेलो। 2ओइलगक मानुकसब एक्दम दयालु छलो। ओहेस ओकर्स्या पानि परिक जार भेल कारनस आगि बारिक हमर्सिका ताप बलाइल्को आ स्वागत करल्को। 3अनि पावलले एक पँजा जर्ना धेर्याइक आनल्को आ ओइ धुनिम घालल्को त आगिक धिप्तस एगो बिख बला साँप निक्लिक ओक्र हाथम सेर्घोराइलो। 4पावलक हाथम साँप सेर्घोराइल देखिक ओइलगक मानुकस्या एना कहिक आपसम बज लग्लो, “यि मानुक पक्का खुनि रहतो। किरकि यि समुन्द्रस त बचिक एलो तर फैसला कर्लाहार देब्ताक सजाएस बच नाइ सक्लो।” 5तर पावलले आप्न हाथ झट्कारिक उ साँपका आगिम झारि देल्को अनि ओक्र कथ्यो हानि नाइ भेलो। 6ओइलगक मानुकस्या साँपक बिखस पावलक देह फुलिक अन्चकिएक ढलिक मोर्तो कहिक ताक्ति छलो। तर थुप्रे घरिया तलिक पावलका कथ्यो नाइ भेल देखिक ओकर्स्या आप्न सोच् बद्लिक एनामे कह लग्लो, “यि मानुक त देब्ता पो स्यो।”
7ओइ टापुम पब्लियस कहलाहार एक जना मुखिया छलो। ओक्र जग्गा-जमिन हमर्स्या रहल ठावस लगेम छलो। ओइले हमर्सिका आप्न घरम लगाइक स्वागत करल्को आ तिन दिन् तलिक हमर्सिक सेबा-सत्कार करल्को। 8उजुमा पब्लियसक बाप जर आ सुल्बाहि परिक बिरामि भेल छलो। ओहेस पावले ओक्र कोठाम जाइक पर्थना करल्को आ आप्न हाथ ओक्र उप्रिम राखल्को त उ चट्दबर अस्लि भेलो। 9यि घट्नाका देखिक ओइ टापुक अरु रोगि-बिरामिसब पनि पावललग एलो अनि सभे जना अस्लि भेलो। 10ओहेस ओइलगक मानुकस्या हमर्सिका थुप्रे सम्मान करल्को। ओइ टापुम हमर्स्या तिन महिना रहल्यो। अनि जब हमर्स्या ओइलगस पानि जाहाजम चर्हिक जाइ लग्ल्यो त ओकर्स्या हमर्सिका चाहिलाहार सभे चिजसब आनिक देल्को।
पावल माल्टा टापुस रोम गेल
11तब हमर्स्या अलेक्जेन्डिरिया सहरस आइल पानि जाहाजम चहर्ल्यो। उ जाहाज जारक समैभोरि ओहे टापुम रोकिक राख्ल छलो। ओइ जाहाजक अगाभर जोम्लिया देब्ताक मुर्ति बनाइ छलो। 12अनि हमर्स्या सुराकुसाइ सहर पुग्ल्यो त ओइलग तिन दिन् रहल्यो। 13ओइलगस हमर्स्या समुन्द्रक काटे-काट जाइक रेगियन सहर पुग्ल्यो। ओक्र दस्रो दिन् दखिनभरस हबा चल्लो। अनि तेस्रो दिन् चाहिं हमर्स्या पटिओलि सहर पुग्यो। 14ओइलग हमर्स्या बिस्वासि दाजुभाइसिका भेटाइल्यो। अनि ओकर्स्या एक हप्ता हमर्सिलग रह कहिक हमर्सिका बिन्ति करल्को। ओहेस हमर्स्या ओकर्सिसङ एक हप्ता रहिक रोम सहर गेल्यो। 15जब रोम सहरक बिस्वासिस्या हमर्स्या आब्ति स्यो कहिक सुनल्को त ओकर्स्या अप्पिया बजार आ तिनपाटि कहलाहार ठाउँ तलिक हमर्सिका भेट एलो। पावलले ओकर्सिका देख्ति बितिन खुसि भइक पर्मेसोरका धन्येबाद देल्को।
पावलले रोम सहरम पर्चार कर्ल
16जब हमर्स्या रोम सहर पुग्ल्यो त पावलका एक जना सिपाहिक देख्भालम अस्करे रह लागि अनुमति देल्को।
17ओक्र तिन दिन् पछा पावलले रोम सहरक यहुदि अगुवासिका बलाइल्को। अनि ओकर्स्या आइक धेर्याइलो त पावलले एनामे कहल्को, “ए हम्र दाजुभाइसब, हम आपन्सिक जात आ आपन्सिक पुर्खासिक जुमास चल्ति आइल कुन्हुँ रितिरिबाजक बिरोधम गलत काम कर्ल नाइ स्यो। तैयो हम्रा यहुदि दाजुभाइस्या यरुसलेमम पक्रिक रोमिसिक हाथम सुम्पि देल छो। 18रोमि सासकस्या पुछ-ताछ करिक हम्रा छोरि दिअ खोज्ल छलो किरकि ओकर्स्या हम्रा मारि पर्लाहार कथ्यो कारन नाइ भेटाइल्को। 19तर यहुदि दाजुभाइस्या झन आरो हम्र बिरोध करल्को। हम्रसङ यहुदि दाजुभाइसिक बिरोधम कथ्यो बात नाइ छलो। तैयो हम्रा रोमि माहारजालग आप्न फैसलाक बिन्ति कर लागि कर् लग्लो।#पेरेरित २५:११ 20एहे बात बुझाब आ तोर्सिसङ भेट-घाट कर लागि हम तोर्सिका बलाइल स्यो। किरकि इस्राएलिस्या एतो कहिक आस कर्ल मुक्ति देल्हार खिरिस्टका बिस्वास कर्ल कारनस हम यि जिजिरस बह्नाइल स्यो।”
21यि बात सुनिक ओकर्स्या पावलका एनामे कहल्के, “हमर्स्या त तोर बारेम यहुदिया पर्देसस कुन्हुँ चिठि पाइल नाइ स्यो, न त कुन्हुँ दाजुभाइसब ओतस आइक तोर बारेम कथ्यो खराब बातसब हमर्सिका सुनाइल छो। 22तर हमर्स्या यि बातक बारेम तोर बिचार कथि छो कहिक सुन चाहास्यो। किरकि तोर समुहक जति-तति बिरोध भेल बात चाहिं हमर्सिका थाहा छो।”
23ओहेस ओकर्स्या पावलक बात सुन लागि एक दिन् तोकल्के। अनि तोक्ल दिन् थुप्रे मानुकसब पावलक डेराम एले। उ दिन् पावलले बिहानस लइक साँझ् तलिक पर्मेसोरक राज्येक बारेम ओकर्सिका सिखाइल्के। ओइले मोसाले देल नियम आ अगमबक्तास्या निख्ल कितापस येसुक बारेम गबाहि देति ओकर्सिका बिस्वासम आन लागि कोसिस करल्के। 24ओक्र बात सुनिक कुन्हुँ-कुन्हुँले बिस्वास करल्के तर कुन्हुँ-कुन्हुँले चाहिं बिस्वास नाइ करल्के। 25जब ओकर्स्या आपसम सहमत हब नाइ सकिक ओइलगस जाइ लग्ले त पावलले एनामे कहल्के, “पबित्र आत्माले यसैया अगमबक्ताक मार्फत तोर्सिक पुर्खासिका कहल बात ठिके स्यो। 26किरकि ओइले एनामे कहल छो,
‘यि मानुकसिलग जाइक कह,
तोर्स्या सुनक त सुन्छ तर कह्याहु नाइ बुझ्छ,
ताकक त ताक्छ तर कह्याहु नाइ देख्छ।#यसैया ६:९-१०
27किरकि यि मानुकसिक मन कठोर भेल छो,
ओकर्स्या आप्न कान बन् कर्ल छो,
आ आप्न आँख मुन्ल छो,
नत्रे त ओकर्स्या आँखस देख्ते,
आ कानस सुन्ते,
अनि मनस बुझ्ते
आ हम्रभर घुमिक एते,
अनि हम ओकर्सिका अस्लि कर्ते।’
28“ओहेस तोर्सिका यि थाहा हउस कि पर्मेसोरक यि मुक्तिक खबर दस्रो जातक मानुकसिलग पठाइल छो। अनि ओकर्स्या सुन्तो।” 29[जब पावलले एतेक कहि सकल्के त यहुदिस्या आपसम बाद-बिबाद कर्ति ओइलगस गेले।]#28:29 यि पद पुर्ना गिरिक भसाक बाइबलम नाइ छो। ओहेस यि पदका एहेन कोठा भित्रि राख्ल छो।
30पावल दुइ बरिस तलिक आप्ने भराम लेल कोठाम रहले। ओइले आप्नलग आइलाहार सभेका स्वागत करेक। 31अनि ओइले बिना डेराइक पर्मेसोरक राज्येक बारेम पर्चार कर्ति प्रभु येसुक बारेम सिखाबेक आ ओक्रा कुन्हुँले नाइ रोकेक।
Currently Selected:
पेरेरित 28: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
