पेरेरित 27
27
पावलका रोम लगाइल
1जब हमर्सिका पानि जाहाजम चर्हिक इटालिया देस जाइ पर्लाहार पक्का भेलो त फेस्तसले पावल आ अरु जेलम पर्ल मानुकसिका रोमि माहारजा अगस्तसक सेनाक कप्तान युलियसक जिम्माम सुम्पि देल्को। 2ओहेस हमर्स्या एड्रामिटेनोस सहरस एसिया पर्देसक थुप्रे बन्दरगा हब्ति गेल्हार पानि जाहाजम चर्हिक जाइ लग्ल्यो। हमर्सिसङ माकेडोनिया पर्देसम पर्लाहार थेस्लोनिका सहरक अरिस्तार्खस पनि छलो। 3ओक्र दस्रो दिन् हमर्स्या सिदोन सहर पुग्ल्यो। ओइलग कप्तान युलियसले पावलका दया करिक आप्न सङ्सिका जाइक भेट-घाट कर्लाहार आ चाहिल समानसब लइक आइलाहार अनुमति देल्को। 4ओइलगस हमर्स्या फेरि पानि जाहाजम चर्हिक जाइ लग्ल्यो। तर हबा अगाभरस बहल कारनस हमर्स्या साइपरस टापुक काटे-काट हबास बच्ति गेल्यो। 5अनि हमर्स्या किलिकिया आ पाम्फिलिया पर्देसक काटम पर्लाहार समुन्द्रका कटिक लुकिया पर्देसक माइरा सहरम पुग्ल्यो। 6ओइलग कप्तान युलियसले अलेक्जेन्डरिया सहरस इटालिया देस गेल्हार एगो पानि जाहाज पाइक हमर्सिका ओहे पानि जाहाजम चर्हाइल्को।
7हमर्स्या थुप्रे दिन् तलिक रसे-रसे कर्ति एक्दम मस्किलस किनिडस सहर पुग्ल्यो। ओइलग पुग्ल्यो त झन आरो हबाले हमर्सिका अगाभर जाइ नाइ देल्को। ओहेस हमर्स्या केरेट टापुक काटे-काट हबास बच्ति साल्मोने कहलाहार ठाउँ हब्ति गेल्यो। 8हमर्स्या एक्दम मस्किलस उ टापुक काटे-काट लासिया सहरक लगम भेल छग्बर बन्दरगाहा कहलाहार ठावम पुग्ल्यो।
9ओइलग पुग लागि हमर्सिका थुप्रे दिन् लग्ल छलो। उजुमा समुन्द्रम हबा बिहार चल्ल कारनस पानि जाहाजम सफर कर लागि एक्दम डर लग्लाहार भेल छलो। अनि उपबासक समै पनि ओराइ सक्ल छलो। ओहेस पावलले ओकर्सिका एना कहिक सल्लाहा देल्के, 10“ए हम्र दाजुभाइसब, हम्रा एहेन लग्ति छो कि अखन आपन्स्या एहेन मौसमम अइलगस जेब त पानि जाहाज आ माल-समान मत्रे नास नाइ हेतो तर आपन्स्याहु मोर सक्ब।” 11तर कप्तानले पावलक बातस बेसि पानि जाहाज चलाइलाहार आ पानि जाहाजक मालिकक बात पत्याइल्के। 12ओइ बन्दरगाहाम जारक समै बिताब लागि सुबिधा नाइ छले। ओहेस थुप्रे मानुकस्या ओइलगस जेनामे हेतो तैयो फोनिक्स सहरम पुगिक ओति जारक समै बिताब लागि सल्लाहा देल्के। फोनिक्स सहर केरेट टापुक एगो बन्दरगाहा स्यो जुन दखिन-पछिम आ उत्तर-पछिमभर घुम्ल छो।
समुन्द्रम बर्कि हबा बिहार एल
13जब दखिनभरस रसे-रसे हबा बह लग्लो त ओकर्स्या आब् आपन्स्या अइलगस जाइ सक्ब कहिक सोचल्को। ओहेस ओकर्स्या पानि जाहाजका अर्काइक राख्ल लङ्गरका#27:13 लङ्गर: लङ्गर कहल पानि जाहाजका अर्काइक राख्लाहार फलामक चिज स्यो। निकालिक जाहाजका केरेट टापुक काटे-काट लगाइल्को। 14ओइलगस गेल एके घरियाक पछा टापुभरस उत्तर-पुर्बैया कहलाहार बर्कि हबा बिहार बह लग्लो। 15जब पानि जाहाज हबा बिहारक चपेटम पर्लो त हमर्स्या पानि जाहाजका अगाभर लगाब नाइ सक्ल्यो। ओहेस हमर्स्या पानि जाहाज जैभर जेतो तैयो जाउस कहिक छोरि देल्यो। 16अनि हमर्स्या कलौडा कहलाहार एगो कन्कि टापुक काटम पुग्ल्यो त टापुले हबा बिहारका छेकल्को। ओहेस हमर्स्या पानि जाहाजक पछाभर बाह्न्ल कन्कि डुङ्ङासिका एक्दम मस्किलस जोगाइल्यो। 17तब ओकर्स्या डुङ्ङासिका तानिक जाहाजक भित्रि राखल्को आ जाहाजका चारोभरस मोट घुरिस बाह्नल्को। अनि पानि जाहाज सिरटिस कहलाहार बल्वाम धँस्लाहार डरस ओकर्स्या जाहाजक पालका झारिक जाहाजका हबाक भरम छोरि देल्को। 18उ हबा बिहार आरो कस्याइक आब्ति रहल कारनस ओकर्स्या दस्रो दिनस जाहाजक चिज-बिजसब समुन्द्रम फेक लग्लो। 19ओक्र दस्रो दिन् ओकर्स्या आप्नि पानि जाहाजका हल्क बनाब लागि जाहाज चलाब लागि चाहिलाहार समानसब पनि फेकि देल्को। 20थुप्रे दिन् तलिक हमर्स्या रउद आ तरासब देख नाइ पाइल्यो। हबा बिहार आरो कस्याइक आब्ति रहल कारनस हमर्सिक बँच्लाहार आस पनि ओराइ सक्ल छलो।
21जाहाजक मानुकस्या थुप्रे दिनस कथ्यो खाइल नाइ छलो। ओहेस पावलले ओकर्सिक बिचम ठेर्याइक एनामे कहल्के, “ए हम्र दाजुभाइसब, तोर्स्या हम्र बात मानिक केरेट टापुस नाइ एते त हेते। उजुमा हम्र कहल बात मान्ते त एहेन दुख नाइ पाइते। अनि कुन्हुँ चिज-बिजसब पनि नास नाइ हेते। 22तर आब् हम तोर्सिका हरेस नाइ खो कहिक बिन्ति कर्स्यो किरकि आपन्सिभोरि कक्रो परान नाइ जेतो तर जाहाज मत्रे नास हेतो। 23किरकि हम पर्मेसोरक मानुक स्यो आ ओक्रे सेबा कर्स्यो। ओक्रे सोर्गदुत आजु राति हम्रलग आइक एनामे कहल्को, 24‘ए पावल, तुइं नाइ डेरा किरकि तोरा रोमि माहारजाक अगाम ठेर्याबि पर्तो। ओहेस देख्, पर्मेसोरले आप्न किर्पास तोरसङ जाहाजम चहर्ल सभेका बचाइतो।’ 25ओहेस ए हम्र दाजुभाइसब, तोर्स्या निरास नाइ हो किरकि पर्मेसोरले कहल बात साँच्चेक पुरा हेतो कहिक हम बिस्वास कर्स्यो। 26तर आपन्स्या कुन्हुँ एगो टापुम जाइक ठोकाइब।”
27एनामे हमर्सिक पानि जाहाज हबा बिहारक चपेटम परिक एड्रियास समुन्द्रम अइभर-ओइभर धक्लाइल चौँद दिन् भेल छलो। चौँद दिनेक अधा रातभर जाहाज चलाइलाहार्सिका कुन्हुँ देसक काटम पुग्ल जक्या महसुस भेले। 28ओहेस ओकर्स्या कत्का गहिंर पानि छो कहिक नापल्के त अस्सि हाथ गहिंर पानि छले। अनि ओक्रस कनेक सना दुर जाइक फेरि नापल्के त साठि हाथ पानि छले। 29पानिक गहिंराइ घट्टि गेल कारनस जाहाज पेटारम ठोकाइतो कि कहिक ओकर्स्या डेराइले। ओहेस ओकर्स्या पानि जाहाजक पछाभरक चारगो लङ्गरका समुन्द्रम झारल्के आ झप्सिन बिहान हउस कहिक पर्थना कर लग्ले। 30तर जब पानि जाहाज चलाइलाहारसब अगाभरक लङ्गरका झार्लाहार बाहाना बनाइक कन्कि डुङ्ङाका जाहाजस उतारिक भाग खोज्ल छले त, 31पावलले कप्तान आ सिपाहिसिका कहल्के, “यि जाहाज चलाइलाहार मानुकसब भागिक जेतो त आपन्स्या कुन्हुँ नाइ बच्ब।” 32यि बात सुनिक सिपाहिस्या जाहाजम बाह्न्ल घुरिसब काटिक कन्कि डुङ्ङासिका पानिम भस्याइ देल्के।
33अनि बिहान हब लग्ले त पावलले ओकर्सिका खनाइ खाइ लागि बिन्ति कर्ति एनामे कहल्के, “तोर्स्या चिन्ता करिक भुख्ले रहल आजुस चौँद दिन् भइ सक्ल छो। 34ओहेस हम तोर्सिका खनाइ खाइ लागि बिन्ति कर्स्यो किरकि बच लागि त खनाइ खाइ पर्तो। तोर्स्या नाइ डेरा, तोर्सिभोरि कक्रो कपारक एगो केस पनि नास नाइ हेतो।” 35एतेक कहिक पावलले रोटि लेल्के आ सभेक अगाम पर्मेसोरका धन्येबाद दैक खाइ लग्ले। 36यि देखिक अरु मानुकस्या पनि हौसला पाइक खनाइ खाइ लग्ले। 37ओइ जाहाजम हमर्स्या जम्मा दुइ सइ छियत्तर जना छल्यो। 38जब ओकर्स्या सभेले पेट भोरिक खाइ सकल्के त जाहाजका हल्क बनाब लागि जाहाजम भेल सभे गोहोम समुन्द्रम फेकि देल्के।
पानि जाहाज टुक्रा भेल
39अनि बिहान भेले त ओकर्स्या समुन्द्रक काटम बल्वा भेल जमिन देखल्के तर ओकर्स्या उ ठाउँका चिन नाइ सकल्के। समुन्द्रक काटम बल्वा भेल जमिन देखिक ओकर्स्या जाहाजका ओहेलग लगाब लागि बिचार करल्के। 40ओहेस ओकर्स्या लङ्गरम बाह्न्ल घुरिसब काटिक लङ्गरका समुन्द्रेम छोरि देल्के आ जाहाजका चलाइलाहार पतबारक#27:40 पतबार: पतबार कहल पानि जाहाजका चलाइलाहार चिज स्यो। घुरिसब पनि खुजालि देल्के। अनि जाहाजक अगाभरक पालका उप्रि उठाइक हबाभर घुमाइ देल्के आ जाहाजका समुन्द्रक काटभर लगाइल्के। 41तर जाहाज पानि भित्रिक बल्वाम ठोकाइक धस्ले। जाहाज अगाभरस धस्ल कारनस एको रति टस-मस नाइ हबेक। अनि जाहाजक पछाभरक चाहिं पानिक हेल्फास टुक्रा-टुक्रा हब लग्ले।
42उजुमा जेलम पर्ल मानुकसब पौरि खेलिक भाग्तो कि कहिक सिपाहिस्या ओकर्सिका मार्लाहार बिचार करल्के। 43तर कप्तानले पावलका बचाइलाहार मन करिक सिपाहिसिका ओना कर नाइ देल्के। बरु पौरि खेल सक्लाहार्सिका पानि जाहाजस कुदिक जमिनम जाइ लागि आदेस देल्के। 44अनि पौरि खेल नाइ सक्लाहार्सिका चाहिं जाहाजक टुक्रा भेल काठ्सिका पक्रिक जमिनम जाइ लागि आदेस देल्के। एनामे सभे जना बचिक जमिनम पुग्ले।
Currently Selected:
पेरेरित 27: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
