पेरेरित 23
23
1तब पावलले पन्चायतभर ध्यानस ताक्ति एनामे कहल्के, “ए हम्र दाजुभाइसब, हम आजु तलिक पर्मेसोरक नजरम आप्न मनका सुद्द राखिक जिबन बिताइल स्यो।” 2यि बात सुनिक सभेस बर्कि पुजारि हननियाले पावलक काटम ठेर्याइल मानुकसिका पावलक मुहम पिट् कहिक आग्या देल्के। 3तर पावलले हननियाका कहल्के, “ए कारिय मन भेल कप्टि मानुक!#23:3 ए कारिय मन भेल कप्टि मानुक: गिरिक भसाम चुनास निप्ल टाटि कहिक निख्ल छो। पर्मेसोरले तोराहु सजाए देतो। किरकि तुइं धार्मिक नियम अन्सार हम्र फैसला कर लागि बेठिक पनि धार्मिक नियम अन्सार फैसला नाइ कर्छ, उन्टा हम्रा पिट लागि आग्या धि छ?”#मत्ति २३:२७-२८
4यि बात सुनिक पावलक काटम ठेर्याइलाहार मानुकस्या कहल्के, “तुइं पर्मेसोरक सभेस बर्कि पुजारिक अप्मान कर्छ।”
5तब पावलले जबाफ देल्के, “ए हम्र दाजुभाइसब, उ सभेस बर्कि पुजारि स्यो कहिक हम्रा थाहा नाइ छलो। किरकि धर्मसास्तरम एनामे निख्ल छो, ‘तुइं आप्न सासकक बिरोधम खराब बात नाइ बज्ह्य।’”#प्रस्थान २२:२८
6तर जब पावलले ओइ पन्चायतम एक दल सदुकि आ दस्रो दल फरिसिसब छो कहिक थाहा पाइल्के त ओइले बर्कि घार एनामे कहल्के, “ए हम्र दाजुभाइसब, हम त फरिसि कुलम जनम भेल एगो फरिसि स्यो। हम मोर्ल मानुकसब एक दिन् फेरि जिउँत भइक उठ्तो कहिक बिस्वास कर्ल कारनस हम्र मुद्दा चल्ति छो।”#पेरेरित २६:५; फिलिप्पि ३:५
7पावलले कहल बात सुनिक फरिसि आ सदुकि दलक बिचम बर्कि बाद-बिबाद भेले। ओहेस पन्चायतम आइल मानुकसिक बिचम फुट भेले। 8किरकि सदुकिस्या मोर्ल मानुक फेरि जिउँत भइक उठ्लाहार बातम बिस्वास नाइ करेक अनि सोर्गदुत आ आत्मा पनि नाइ छो कहिक कहेक। तर फरिसिस्या चाहिं उ सभे बातम बिस्वास करेक।#मत्ति २२:२३; मर्कुस १२:१८; लुका २०:२७ 9ओहेस ओइलग बर्कि होहल्ला भेले। अनि फरिसि दलक कुन्हुँ-कुन्हुँ धर्मगुरुस्या एना कहिक सदुकिसिक बिरोध कर लग्ले, “हमर्स्या त यि मान्खक कथ्यो दोस नाइ देख्स्यो। हब सक्तो कुन्हुँ आत्मा आ सोर्गदुत एक्रसङ बज्ल रहतो।”
10जब ओइलग झन-झन बाद-बिबाद बह्र्ति गेले त पावलका चिथ्रिएक मानुकस्या मार्तो कि कहिक सेनापति डेराइले। ओहेस सेनापतिले सिपाहिसिका तर् जाइक पावलका ओकर्सिक बिचस बलिस्के ब्यारेकम आन लागि हुकुम देल्के।
11ओहे रात प्रभु पावलक लगम आइक एनामे कहल्के, “ए पावल, तुइं हिम्मत नाइ हार् किरकि जेनामे तुइं हम्र बारेम यरुसलेमम गबाहि धिल स्या ओनाहिमे रोमम पनि गबाहि दिअ पर्तो।”
पावलका मार लागि योजना बनाइल
12जब बिहान भेले त यहुदिस्या धेर्याइक पावलका मार लागि सल्लाहा करल्के। अनि पावलका नाइ मार्ल तलिक कथ्यो नाइ खेल्हार-पिल्हार किर्या खेल्के। 13पावलका मारि पर्तो कहिक किर्या खेल्हार मानुकसब चालिस जनास बेसि छले। 14जब ओकर्स्या सल्लाहा करि सकल्के त मुल पुजारि आ धर्मगुरुसिलग जाइक एनामे कहल्के, “हमर्स्या जखन तलिक पावलका नाइ मार्बो तखन तलिक कथ्यो नाइ खेल्हार किर्या खाइल स्यो। 15ओहेस तोर्स्या आ पन्चायतक सभे सदस्यसब मिलिक ‘हमर्स्या पावलका आरो अस्लिमे पुछ-ताछ कर चाहास्यो’ कहिक सेनापतिका बिन्ति करिक पावलका ब्यारेकस झिका। अनि ओक्रा एत आन्त खुमा पैराइम हमर्स्या ओक्रा मार्बो।”
16तर पावलक भगिनाले यि योजनाक बारेम थाहा पाइक ब्यारेक भित्रि गेले आ पावलका सुनाइल्के। 17तब पावलले एक जना कप्तानका बलाइक एनामे कहल्के, “यि छउँराका सेनापतिलग पुगाइ धि किरकि अइले ओक्रा कथ्यो कह पर्लाहार छो।” 18ओहेस कप्तानले पावलक भगिनाका सेनापतिलग पुगाइक कहल्के, “हाकिम साहाप, जेलम पर्ल पावलले हम्रा बलाइक यि छउँराका तोरलग आन लागि कहल्को किरकि अइले तोरा कथ्यो कह पर्लाहार छो अरे।”
19तब सेनापतिले पावलक भगिनाका हाथ पक्रिक एक्भर लगाइल्के आ पुछल्के, “तुइं हम्रा कथि कह चाहाछ ले कह?”
20तब ओइले कहल्के, “यहुदिस्या पावलक बारेम आरो अस्लिमे पुछ-ताछ कर पर्लाहार बाहाना बनाइक कालु बर्कि पन्चायतम पावलका आनि दे कहिक तोरा बिन्ति कर्लाहार सल्लाहा कर्ल छो। 21तर तुइं ओकर्सिक बात नाइ मान्ह्य किरकि चालिस जनास बेसि मानुकस्या जखन तलिक पावलका नाइ मार्बो तखन तलिक कथ्यो नाइ खेबो-पिबो कहिक किर्या खाइल छो। ओकर्स्या अखन तयार भइक ओक्रा मार लागि घुस्रिक रहल छो आ तोर आग्याक आसम अस्याइल छो।”
22यि बात सुनिक सेनापतिले पावलक भगिनाका एना कहिक पठाइ देल्के, “तुइं यि खबर हम्रा सुनाइल स्या कहिक कक्राहु नाइ कह्य।”
पावलका कैसरिया सहर पठाइल
23तब सेनापतिले दुइ जना कप्तानसिका बलाइक एनामे कहल्के, “आजु राति नौ बजे दुइ सइ सिपाहि, सत्तरि जना घोराम चहर्लाहार सिपाहि आ दुइ सइ भोक्ला बोक्लाहार सिपाहिसिका कैसरिया जाइ लागि तयार कर्। 24अनि पावलक लागि पनि घोरा तयार कर् आ ओक्र अस्लिमे देख्भाल करिक बर्कि हाकिम फेलिक्सलग पुगा।” 25जब सेनापतिले एतेक कहि सकल्के त ओइले बर्कि हाकिम फेलिक्सका एना कहिक चिठि पनि निखल्के, 26“आदरनिय बर्कि हाकिम फेलिक्स, हम कलोडियस लुसियसले तोरा गोरलाग स्यो। 27पावल कहलाहार यि मानुकका यहुदिस्या पक्रिक मार खोज्ल छलो तर हम आप्न सिपाहिसिका लइक ओइलग गेल्यो आ ओक्रा छुटाइक आन्ल्यो। अनि हम्रा थाहा भेलो कि यि त रोमक मानुक स्यो कहिक। 28जब हम यहुदिस्या कथि कारनस एक्रा दोस लगाइल छो कहिक बुझ लागि बर्कि पन्चायतम लगाइल्यो त, 29हम्रा यि थाहा भेलो कि ओकर्स्या त आप्ने धार्मिक नियमक बारेम एक्रा दोस लगाइल स्यो कहिक। तर मार पर्लाहार आ जेलम बन् कर पर्लाहार खालक कुन्हुँ दोस हम नाइ भेटाइल्यो। 30तर जब हम यहुदिस्या एक्रा मार लागि योजना बनाइल छो कहिक थाहा पाइल्यो त चट्दबर ओक्रा तोरलग पठाइल्यो। अनि ओक्रा दोस लगाइलाहार मानुकसिका पनि तोरलग जाइक आप्न बातसब राख् कहिक आदेस देल स्यो।”
31ओहेस सिपाहिस्या सेनापतिले आग्या देल अन्सार रातिए पावलका एन्टिपाट्रिस सहर पुगाइल्के। 32अनि दस्रो दिन् पैदल गेल्हार सिपाहिसब चाहिं पावलका घोराम चर्हिक गेल्हार सिपाहिसिक जिम्माम दैक ब्यारेक घुमिक एले। 33जब घोराम चर्हिक गेल्हार सिपाहिसब कैसरिया सहर पुग्ले त ओकर्स्या बर्कि हाकिम फेलिक्सका सेनापतिले पठाइल चिठि सहित पावलका पनि सुम्पि देल्के। 34अनि हाकिमले चिठि पह्रि सकल्के त पावलका पुछल्के, “तोर घर कुन पर्देसम पर्छो?” पावलले उत्तर देल्के, “हम्र घर त किलिकिया पर्देसम पर्छो।” 35तब उ हाकिमले कहल्के, “तोरा दोस लगाइलाहार मानुकसब एतो त हम तोर बारेम छल-फल कर्बो।” एतेक कहिक हाकिमले पावलका सिपाहिसिक देख्भलम रजा हेरोदले बनाइल दर्बारम राख्लाहार आग्या देल्के।
Currently Selected:
पेरेरित 23: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
