पेरेरित 22
22
1“ए हम्र दाजुभाइ आ बापसब, हम तोर्सिक अगाम जुन बात आप्न पछम कह लग्ल स्यो उ बात सुन्।” 2पावलका हिब्रु भसाम बज्ल सुनिक सभे मानुकसब सान्त भेले।
3तब पावलले आप्न बारेम कह लग्ले, “हम किलिकिया पर्देसक टार्सस सहरम जनम भेल एगो यहुदि स्यो। तर हम एहे यरुसलेम सहरम हुर्कल्यो आ गम्लिएल कहलाहार गुरुक मार्फत आपन्सि पुर्खासिक जुमास चल्ति आइल बिधि आ पर्मेसोरक नियमका एक्दम अस्लिमे सिख्ल स्यो। आजु तोर्स्या पर्मेसोरक भक्ति कर लागि जतेक जोसिलो स्या, हमु ओत्के जोसिलो छल्यो।#पेरेरित ५:३४-३९ 4हम त झन प्रभुक पैराम हिंठ्लाहार मानुकसिका मोर्लाहार जोगत सताइल्यो। अनि मरद आ जनिसिका पनि जेलम घालि देल्यो।#पेरेरित ८:३; २६:९-११ 5यि बात सभेस बर्कि पुजारि आ बर्कि पन्चायतक सदस्यसिका पनि थाहा छो। किरकि ओकर्स्याहि हम्रा दमस्कस सहरम भेल यहुदि दाजुभाइसिक लागि चिठि निखिक देल छलो। ओइ चिठिम प्रभु येसुका बिस्वास कर्लाहार्सिका पकर्लाहार अधिकार देल छलो। ओहेस हम ओकर्सिका पक्रिक यरुसलेमम आनिक सजाए दिअ लागि दमस्कस जाइति छल्यो।
पावलले आप्न जिबन बदल्लक बारेम कहल
(पेरेरित ९:१-१९; २६:१२-१८)
6“जाइत-जाइत जब हम दिनक बार बजेभर दमस्कस सहरक लगम पुग्ल्यो त ओहे जुमा अन्चकिएम सोर्गस एक्दम चहकिलो इजोत हम्र चारोभर चम्कलो। 7ओहेस हम धर्तिम खस्ल्यो आ एना कहिक कहल एगो अबाज सुन्ल्यो, ‘साउल, ए साउल, तुइं किर हम्रा सताइ छ?’ 8तब हम पुछ्ल्यो, ‘प्रभु, तुइं कोन स्या?’ अनि प्रभुले हम्रा कहल्को, ‘हम नासरतक येसु स्यो, जक्रा तुइं सताइ छ।’ 9ओइलग हम्रसङ जतेक जना छलो, ओकर्स्या इजोत त देखल्को तर हम्रसङ बज्लाहारक बात चाहिं नाइ बुझल्को। 10तब हम पुछ्ल्यो, ‘हे प्रभु, आब् हम कथि करुँ?’ अनि प्रभुले हम्रा कहल्को, ‘तुइं उठिक दमस्कस सहरम जो। ओहेलग तोरा कर पर्लाहार कामक बारेम कहल जेतो।’ 11उ इजोतक कारनस हम कथ्यो देख नाइ सक्ल्यो। ओहेस हम्र सङ्स्या हम्र हाथका पक्रिक दमस्कस सहर लगाइल्को।
12“ओइ सहरम हननिया कहलाहार एक जना पर्मेसोरक नियमका पालन कर्लाहार धर्मि मानुक छलो। ओक्रा ओइ सहरक सभे यहुदिस्या एक्दम इज्जत करोक। 13उ हम्रलग आइक ठेर्याइलो आ हम्रा कहल्को, ‘ए भाइ साउल, तुइं फेरि देख सक्लाहार हो।’ ओइले कहति बितिन हम फेरि देख सक्लाहार भेल्यो अनि ओक्रा देख्ल्यो। 14तब हननियाले हम्रा एनामे कहल्को, ‘तोरा आपन्सि पुर्खासिक पर्मेसोरक इच्छा जान लागि आ धर्मि सेबकका देख लागि अनि ओक्र मुहस बज्ल बातका सुन लागि चुन्ल छो। 15किरकि तुइं जे देख्ल आ सुन्ल स्या उ सभे बातक बारेम मानुकसिक अगाम पर्मेसोरक गबाह बन्ब। 16ओहेस आब् तुइं किर अबेर कर्छ? उठ् आ बप्तिस्मा ले अनि येसुक ना पुकारिक आप्न पापस सुद्द हो।’
पावलका दस्रो जातक मानुकसिक बिचम पर्चार कर लागि चुन्ल
17“जब हम दमस्कस सहरस यरुसलेम घुमिक एल्यो आ मन्दिरम जाइक पर्थना कर्ति छल्यो त हम एगो दर्सन देख्ल्यो। 18ओइ दर्सनम प्रभुले हम्रा एनामे कहल्को, ‘तुइं झप्सिन यरुसलेमस निक्लिक जो किरकि हम्र बारेम तोर देल गबाहि अइलगक मानुकस्या सुइकार नाइ कर्तो।’ 19तर हम एनामे कहल्यो, ‘हे प्रभु, हम हरेक सभाघरम जाइक तोरा बिस्वास कर्लाहार्सिका पक्रिक जेलम बन् कर्ल आ पिट्ल बात ओकर्सिका थाहा छो। 20तोर गबाहि देल्हार इस्तिफनका मार्त खुमा पनि हम ओकर्सिसङ सहमत भइक ओक्र हत्या कर्लाहार्सिक कप्राका ओग्रिक ठेर्याइल छल्यो।’#पेरेरित ७:५८ 21तर प्रभुले हम्रा एनामे कहल्को, ‘तुइं जो किरकि हम तोरा बर्कि-बर्कि दुरिक दस्रो जातक मानुकसिलग पठाइबो।’”
22एत्के तलिक मत्रे मानुकस्या पावलक बात सुनल्के आ एना कहति कस्याइक चिच्याब लग्ले, “एहेन मानुकका पिर्थिबिस हटाबि पर्तो। किरकि यि जिउँत रहलाहार लायकक नाइ छो।” 23जब ओकर्स्या आप्न होर्ल कप्रासब फटाइक धुरा उराइति चिच्याब लग्ले त, 24सेनापतिले पावलका ब्यारेक भित्रि लगाब लागि आदेस देल्के। अनि किर एक्र बिरोधम यहुदिसब चिच्याइति छो कहिक पत्ता लगाब लागि पावलका कोर्रास पिट कहल्के। 25जब सिपाहिस्या कोर्रास पिट लागि पावलका बाह्न लग्ले त पावलले आप्नलग ठेर्याइल कप्तानका एनामे पुछल्के, “कथि रोमि कानुन अन्सार एगो रोमि मानुकका कथ्यो दोस साबित नाइ भइक कोर्रास पिट ठिक स्यो?”
26यि बात सुन्ति बितिन कप्तानले सेनापतिका जाइक कहल्के, “तुइं यि कथि कर खोज्ल स्या? यि त रोमक मानुक पो स्यो।”
27कप्तानक बात सुनिक सेनापति भित्रि गेले आ पावलका पुछल्के, “तुइं हम्रा कह, कथि तुइं साँच्चेक रोमक मानुक स्या?”
पावलले उत्तर देल्के, “हँ, हम साँच्चेक रोमक मानुक स्यो।”
28यि बात सुनिक सेनापतिले कहल्के, “हम त थुप्रे ढेवा तिरिक रोमक नागरिता किन्ल स्यो।”
तर पावलले कहल्के, “हम त जनमेस रोमक मानुक स्यो।”
29तब पावलका पुछ-ताछ कर्लाहार सभे मानुकसब चत्दबर पछा सर्ले। अनि पावल रोमक मानुक स्यो कहिक थाहा पाइक सेनापति पनि डेराइले किरकि सेनापतिले पावलका बाह्न लगाइल छले।
पावल बर्कि पन्चायतम
30तर दस्रो दिन् सेनापतिले मुल पुजारि आ बर्कि पन्चायतक सभे सदस्यसिका बलाइक कथि कारनस पावलका दोस लगाइल छो कहिक पत्ता लगाब लागि पन्चायत राख्लाहार आदेस देल्के। अनि पावलका खुजालिक बर्कि पन्चायतक अगाम लगाइल्के।
Currently Selected:
पेरेरित 22: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
