पेरेरित 19
19
पावल एफिसस सहरम
1अपल्लोस कोरिन्थ सहरम रहल जुमा पावल एसिया पर्देसक भित्रिक पैरा हब्ति एफिसस सहर एले। ओइलग पावलले कुन्हुँ-कुन्हुँ बिस्वासिसिका भेटाइक, 2ओकर्सिका पुछल्के, “जब तोर्स्या प्रभुका बिस्वास कर्ल त पबित्र आत्मा पाइल?”
ओकर्स्या उत्तर देल्के, “पबित्र आत्मा छो कहिक हमर्स्या त सुन्लो नाइ स्यो।”
3पावलले फेरि पुछल्के, “ओना स्यो त तोर्स्या केहेन खालक बप्तिस्मा लेल?”
ओकर्स्या उत्तर देल्के, “बप्तिस्मा देल्हार युहन्नाले सिखाइल जक्या हमर्स्या बप्तिस्मा लेल्यो।”
4तब पावलले ओकर्सिका कहल्के, “युहन्नाले सिखाइल बप्तिस्मा त पस्चतापक बप्तिस्मा छलो। ओइले त ‘हम्रस पछा आइलाहारका बिस्वास कर्’ कहिक मानुकसिका कहल्को। ओक्रस पछा आइलाहार चाहिं येसु छलो।”#मत्ति ३:११; मर्कुस १:४,७,८; लुका ३:४-१६; युहन्ना १:२६-२७
5यि बात सुनिक ओकर्स्या प्रभु येसुक नामम बप्तिस्मा लेल्के। 6अनि पावलले ओकर्सिक उप्रिम आप्न हाथ राखल्के त पबित्र आत्मा ओकर्सिक उप्रिम एले। अनि ओकर्स्या दस्रो भसाम बज्ले आ अगमबानि कर लग्ले। 7ओइलग लग्भग बार जना मरदसब छले।
8पावल तिन महिना तलिक ओइलगक सभाघरम जाइति रहले आ बिना डेराइक पर्मेसोरक राज्येक बारेम मानुकसिसङ बहस करिक ओकर्सिका बुझाइलाहार कोसिस करेक। 9तर ओकर्सिभोरि कुन्हुँ-कुन्हुँ मानुकस्या आप्न मन कठोर करिक बिस्वास नाइ करल्के आ प्रभुले देखाइल पैराक बारेम सभे मानुकसिक अगाम खराब बातसब बज लग्ले। ओहेस पावल ओकर्सिक सभाघरम जाइ लागि छोरि देल्के आ प्रभु येसुका बिस्वास कर्लाहार चेलासिका लइक गेले। अनि टुरान्नसक इस्कुलम सब्दिन मानुकसिसङ येसुक बारेम बहस करेक। 10यि काम पावलले दुइ बरिस तलिक कर्ति रहले। ओहेस एसिया पर्देसम रहलाहार सभे यहुदि आ दस्रो जातक मानुकस्या प्रभुक बचन सुनल्के।
एफिसस सहरम अचम्मक काम
11पर्मेसोरले पावलक हाथस सोच नाइ सक्लाहार बर्कि-बर्कि अचम्मक कामसब करल्के। 12एहेन-एहेन अचम्मक कामसब करल्के कि पावलक देहम छुवाइल रुमाल आ गम्छा लगाबेक आ रोगिसिक उप्रिम राखेक त उ रोगि अस्लि हबेक। अनि भुत लग्ल मान्खस पनि भुतसब निक्लिक जाबेक। 13यि देखिक गाम-गामम जाइक झार-फुक कर्लाहार कुन्हुँ-कुन्हुँ यहुदिस्या पनि प्रभु येसुक ना लेति भुत लग्ल मान्खस भुतसिका भगाब लागि एनामे कहेक, “हम तोरा पावलले पर्चार कर्ल येसुक नामम निक्लिक गेल्हार आग्या देस्यो!” 14ओइलगक यहुदि मुल पुजारि इस्केवास कहलाहारक सात जना बेटासब छले। ओकर्स्याहु ओनाहिमे करेक।
15तर एक दिन् ओकर्स्या भुत लग्ल मान्खस भुत भगाइत खुमा उ भुतले ओकर्सिका एनामे कहल्के, “हम येसुका चिन्स्यो, पावलका पनि चिन्स्यो तर तोर्स्या चाहिं कोन स्या?”
16एतेक कहिक भुत लग्ल मानुकले ओकर्सिका झप्टिक पट्कल्के आ ओकर्सिक एहेन हालत बनाइ देल्के कि ओकर्स्या घाइते भइक नाङ्टे ओइ घरस भाग्ले। 17जब यि बात एफिसस सहरम रहलाहार यहुदि आ दस्रो जातक मानुकस्या सुनल्के त ओकर्स्या एक्दम डेराइले। अनि ओकर्स्या प्रभु येसुक नामक पर्संसा करल्के। 18तब प्रभुका बिस्वास कर्लाहार थुप्रे मानुकसब एले आ आप्न खराब कामका सभे मानुकसिक अगाम सुइकार करल्के। 19ओकर्सिभोरि थुप्रे मानुकस्या जादो-तोना आ झार-फुक करेक। ओकर्स्या आप्न-आप्न जादो-तोनाक कितापसब आनिक धेर्याइल्के आ सभेक अगाम डर्हाइ देल्के। जब ओकर्स्या डर्हाइल कितापक मोल जोरल्के त पचास हजार चाँनिक डलर भेले। 20एनामे पर्मेसोरक बचन झन-झन सक्तिसालि रुपम फैलति गेले।
एफिसस सहरम हुल-दङ्ङा भेल
21उ घट्नाक पछा पावलले माकेडोनिया आ अखैया पर्देसक पैरा हब्ति यरुसलेम जाइ लागि इच्छा करल्के। अनि ओइले कहल्के, “हम यरुसलेम पुगि सक्बो त हम्रा रोम सहर पनि जाइ पर्तो।” 22ओहेस पावलले आप्न सहयोग कर्लाहार तिमोथि आ इरास्तसका माकेडोनिया पठाइल्के तर आप्न चाहिं कन्हेक दिन् एसिया पर्देसेम रहले।
23ओहे समैम प्रभुले देखाइल पैराक बिरोधम एफिसस सहरम बर्कि हुल-दङ्ङा भेले। 24किरकि डेमेतिरियस कहलाहार एक जना सुनारले आर्तेमिस देबिक चाँनिक कन्कि-कन्कि मन्दिरसब बनाबेक। यि कामस ओइले आ ओक्रसङ काम कर्लाहार्स्या थुप्रे ढेवा कमाबेक। 25ओहेस डेमेतिरियसले आप्नसङ काम कर्लाहार आ अरु ओक्रे जक्या काम कर्लाहार्सिका बलाइक एनामे कहल्के, “ए भाइसब, तोर्सिका थाहे छो आपन्स्या एहे कामस ढेवा कमाइ छ। 26तर तोर्स्या आप्नि पावलले पर्चार कर्ल बात देख्ल आ सुन्ल स्या। ओइले एफिसस सहरम मत्रे नाइ तर पुरा एसिया पर्देसभोरि यि कहिक मानुकसिका फुस्लाइक बहकाइछो कि मान्खक हाथस बनाइल देब्ता त देब्ताइ नाइ स्यो। 27यि बातस आपन्सिक कामक मत्रे बद्नाम नाइ हेतो तर माहान देबि आर्तेमिसक मन्दिरक पनि हेला हेतो। अनि एसिया आ सन्सारभोरिक मानुकस्या पुज्ति आइल माहान देबि आर्तेमिसक इज्जत पनि ओराइतो।”
28यि बात सुनिक ओइलग धेर्याइल सभे मानुकसब पिटस खम-खम भइक कस्याइक एनामे कह लग्ले, “एफिसस सहरक आर्तेमिस देबि माहान स्यो।” 29ओकर्सिक हल्लास पुरा सहरभोरि हुल-दङ्ङा भेले। अनि मानुकसब एक्जुट भइक माकेडोनियास आइल पावलक सङ् गायस आ अरिस्तार्खसका पक्रिक घिस्याइति रङ्गसालाम लगाइल्के। 30पावल मानुकसिक भिरम जाइ खोज्ले तर प्रभुका बिस्वास कर्लाहार दाजुभाइस्या ओक्रा जाइ नाइ देल्के। 31एसिया पर्देसक कुन्हुँ-कुन्हुँ हाकिमसब पावलक सङ् छले। ओकर्स्याहु पावलका रङ्गसाला भित्रि नाइ जो कहिक सल्लाहा देल्के। 32उजुमा रङ्गसालाम एतेक होहल्ला भेल छले कि कुन्हुँले एगो बात कहेक त कुन्हुँले दस्रो बात कहेक। तर थुप्रे मानुकसिका त ओइलग किर मानुकसब धेर्याइल छो कहिक पनि थाहा नाइ छले। 33ओहे जुमा यहुदिस्या ओइलग भेल घट्नाक बारेम बज लागि अलेक्जेन्डर कहलाहार मानुकका अगा सारल्के। ओहेस अलेक्जेन्डरले मानुकसिका सान्त हो कहिक हाथस इसारा करल्के आ यहुदिसिका बचाब लागि कथ्यो बज खोज्ले। 34तर जब ओइ भिरम भेल मानुकस्या उ त यहुदि स्यो कहिक थाहा पाइल्के त ओकर्स्या झन आरो कस्याइक “एफिसस सहरक आर्तेमिस देबि माहान स्यो” कहिक दुइ घन्टा तलिक चिच्याइले।
35पछास सहरक हाकिमले मानुकसिका सान्त करिक एनामे कहल्के, “ए एफिसस सहरक मानुकसब, कक्रा यि बात थाहा नाइ छो कि एफिसस सहर माहान देबि आर्तेमिसक मन्दिर आ अकासस झर्ल ओक्र मुर्तिक देख्भाल कर्लाहार स्यो कहिक? 36यि बातका कुन्हुँ इन्कार कर नाइ सक्तो। ओहेस तोर्स्या सान्त हो आ जोसम आइक कुन्हुँ गलत काम नाइ कर्। 37किरकि तोर्स्या पक्रिक आन्ल यि मानुकस्या न त मन्दिर लुट्ल छो, न त आपन्सिक देबिक अप्मान कर्ल छो। 38तर डेमेतिरियस आ ओक्र सुनार सङ्सिसङ यि मानुकसिक बिरोधम कथ्यो बात रहतो त अदालत आ न्यायधिससब छिति छो। ओकर्स्या ओति ओकर्सिक बिरोधम मुद्दा दिउस। 39तर यि बाहेक तोर्सिक दस्रो आरोप रहतो त सहरक मानुकसब बलाइक नियम अन्सार बैठक करिक छलफल हेतो। 40किरकि आजु भेल यि हुल-दङ्ङाक दोस आपन्सिक उप्रिम लग्लाहार डर छो। अनि बिना कारनेस भेल यि हुल-दङ्ङाक बारेम आपन्स्या कथ्यो जबाफ दिअ पनि नाइ सक्ब।” 41एतेक कहिक सहरक हाकिमले सभे मानुकसिका पठाइ देल्के।
Currently Selected:
पेरेरित 19: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
