पेरेरित 18
18
पावल कोरिन्थ सहर गेल
1ओक्र पछास पावल एथेन्स सहरका छोरिक कोरिन्थ सहर गेले। 2ओइलग ओक्र भेट् अकिलास कहलाहार एक जना यहुदिसङ भेले। अकिलासक जनम पोन्टस पर्देसम भेल छले। रोमि माहारजा कलौडियसले सभे यहुदिसिका रोम सहरस निक्लिक जाइ लागि हुकुम देल कारनस उ आप्न बहु पिरिस्किलासङ हाल-साले इटालिया देसस कोरिन्थ सहर आइल छले। अनि पावल ओकर्सिका भेट गेले। 3ओकर्स्या पाल बनाइलाहार काम करेक। पावलले पनि ओकर्सिएक जक्या पाल बनाइलाहार काम कर्लाहार भेल कारनस ओकर्सिएसङ रहिक काम कर लग्ले। 4पावल हरेक जिराइलाहार दिन् सभाघरम जाइक यहुदि आ गिरिकसिसङ बहस करेक आ ओकर्सिका बुझाबक कोसिस करेक।
5जब सिलास आ तिमोथि माकेडोनिया पर्देसस कोरिन्थ सहर एले त पावलले आप्न पुरा समै खुसिक खबर सुनाइलाहार काम मत्रे कर लग्ले। अनि यहुदिसिका येसुवे खिरिस्ट स्यो कहिक गबाहि दिएक। 6तर यहुदिस्या पावलक बिरोध कर्ति बिजेत करल्के त पावलले आप्न कप्राक धुरा झार्ति चेताबनि दैक ओकर्सिका कहल्के, “तोर्स्या नास हेब त आप्ने दोसक कारनस नास हेब। हम निर्दोस स्यो। आब् हम दस्रो जातक मानुकसिका खुसिक खबर सुनाब जाइ स्यो।” 7ओहेस पावल ओइलगस निकल्ले आ पर्मेसोरक भक्ति कर्लाहार तितस युस्तसक घर गेले। ओक्र घर सभाघरक काटेम छले। 8पछास सभाघरक हाकिम किरिस्पस आ ओक्र पुरा परिबारले प्रभुका बिस्वास करल्के। कोरिन्थ सहरक अरु थुप्रे मानुकस्या पनि पावलक बात सुनिक बिस्वास करल्के आ बप्तिस्मा लेल्के।
9एक रात प्रभुले पावलका दर्सन दैक एनामे कहल्के, “तुइं कक्रोसङ नाइ डेराइक पर्चार कर् आ चुप नाइ रह। 10किरकि हम तोरसङ स्यो, कुन्हुँले तोर कथ्यो हानि कर नाइ सक्तो किरकि अइ सहरम हम्र थुप्रे मानुकसब छो।” 11ओहेस पावल एक बरिस छ महिना तलिक पर्मेसोरक बचन सिखाइति कोरिन्थ सहरम रहले।
12जब गलियोन कहलाहार मानुक अखैया पर्देसक सासक भेले त यहुदिसब एक्जुत भइक पावलका पक्रल्के आ अदालतम लगाइल्के। 13अनि ओकर्स्या एनामे दोस लगाइल्के, “यि मानुकले हमर्सिक नियमम जे निख्ल छो, ओइस उन्टा तरिकास पर्मेसोरका पुज लागि मानुकसिका सिखाइ छो।”
14जब पावल बज लग्ल छले त गलियोनले यहुदिसिका एनामे कहल्के, “ए यहुदिसब, यि मानुकले कर्ल काम साँच्चेक नाइ अस्लि आ कुन्हुँ बर्कि पाप रहते त हम तोर्सिक बात सुनिक फैसला कर ठिक हेते। 15तर यि त तोर्सिक आप्ने धर्मसास्तरक नियम, ना आ सब्दक बारेम स्यो। ओहेस तोर्स्या आप्नि एक्र फैसला कर्। हम यि बातक बारेम फैसला नाइ कर्बो।” 16एतेक कहिक गलियोनले ओकर्सिका अदालतस बाहार निकालि देल्के। 17तब ओकर्स्या सभे जनाले सभाघरक हाकिम सोस्थेनेसका पक्रल्के आ अदालतेक अगाम पिटल्के। तर गलियोनले यि बातक कथ्यो वास्ता नाइ करल्के।
पावल एन्टिओखिया सहर घुमिक एल
18ओक्र पछास पनि पावल थुप्रे दिन् तलिक कोरिन्थ सहरक बिस्वासिसिसङ रहले। पछास ओकर्सिसङ छुटिक पिरिस्किला आ अकिलाससङ पानि जाहाजम चर्हिक सिरिया देसभर जाइ लग्ले। तर पावलले अगाहि कब्ला कर्ल कारनस किंकिरिया सहरम आप्न केस कमाइल्के।#गन्ति ६:१८ 19जब ओकर्स्या एफिसस सहर पुग्ले त पावलले पिरिस्किला आ अकिलासका ओहेलग छोरि देल्के। अनि आप्न चाहिं एगो सभाघरम जाइक यहुदिसिसङ बहस कर लग्ले। 20ओइलगक यहुदिस्या कन्हेक दिन् हमर्सिएसङ रह कहिक पावलका बिन्ति करल्के तर पावल नाइ मान्ले। 21अनि एना कहिक ओकर्सिलगस गेले, “पर्मेसोरक इच्छा हेतो त हम फेरि तोर्सिलग घुमिक एबो।” तब उ पानि जाहाज चर्हिक एफिसस सहरस गेले।
22जब पावल कैसरिया सहर पुग्ले त उ उतर्ले आ यरुसलेम गेले। अनि मन्डलिक बिस्वासिसिसङ भेट-घाट करिक एन्टिओखिया सहर गेले। 23अनि उ कन्हेक दिन् ओहेलग रहिक गलतिया आ फिरिगिया पर्देसक थुप्रे ठावम जाइक प्रभुक सभे चेलासिका बिस्वासम जोर्गर बनाइल्के।
अपल्लोसले एफिसस सहरम पर्चार कर्ल
24ओहे समैम अलेक्जेन्डिरिया सहरम जनम भेल अपल्लोस कहलाहार एक जना यहुदि एफिसस सहरम एले। उ एक्दम अस्लिमे बज जान्लाहार मानुक छले। ओक्रा धर्मसास्तरक बारेम पनि थुप्रे ग्यान छले। 25ओइले प्रभु येसुले देखाइल जिबनक पैराक बारेम सिछ्या पाइल छले। उ आत्माम जोसिलो भइक येसुक बारेम मानुकसिका एक्दम अस्लिमे सिखाबेक तर ओक्रा युहन्नाक बप्तिस्माक बारेम मत्रे थाहा छले। 26ओइले सभाघरम जाइक बिना डेराक पर्चार कर लग्ले। ओक्र पर्चार कर्ल सुनिक पिरिस्किला आ अकिलासले ओक्रा आप्न घरम लगाइल्के आ पर्मेसोरक पैराक बारेम आरो अस्लिमे बुझाइ देल्के। 27पछास अपल्लोसले अखैया पर्देस जाइ लागि मन करल्के त ओइलगक बिस्वासिस्या ओक्रा जाइ लागि हौसला देल्के आ अपल्लोसका स्वागत करुस कहिक अखैयाक चेलासिक लागि चिठि पनि निखि देल्के। अनि अपल्लोस ओत पुग्ले त पर्मेसोरक किर्पास बिस्वास कर्लाहार दाजुभाइसिका थुप्रे सहयोग करल्के। 28किरकि ओइले यहुदिसिसङ बहस कर्त खुमा धर्मसास्तरक बचन देखाइति येसुवे खिरिस्ट स्यो कहिक पर्मान दैक ओकर्सिक मुह् बन् करि दिल्के।
Currently Selected:
पेरेरित 18: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
