Matayo 16

ꞌBa Farasayi nɨ vɨɨ ɨnɨ nɨ Sadukayo be Yesu bʉ talɨ àꞌíjʉ vɨɨ

(Mariko 8:11-13; Luka 12:54-56)

1ꞌBa Farasayi drʉ vɨɨ ɨnɨ ꞌba Sadukayo drʉ vɨɨ ɨbe mú Yesu bʉ díká òꞌbí ɨ̀rɨ kɨ́nɨ̀ ɨ̀rɨ ꞌo ànɨ yɨ́ talɨ ɨ̀cetaa drʉ nìjʉ Orɨ pè ɨ̀rɨ ti nɨ̀ ɨngajʉ ꞌbùa.

2Te Yesu òmvɨ kɨ́nɨ̀,#16:2 Eꞌyo sɨ̀zà drɨ̀ò vɨɨ alóo ɨnɨ alɨa “Te caa òndroti, ɨnɨ sawà ɨ̀sɨle co kʉ vɨɨ be yʉ.” “Tè caa òndròti, àmɨ́ ꞌyo, ‘Àngʉ̀mule nɨ ovʉʉ ònyɨ̀be àrɨ̀yɨ̀kʉ ꞌbù mule nɨ ovʉle ɨka drʉ vɨɨ yɨ̀.’ 3Tè caa òꞌbuti àmɨ́ ꞌyó, ‘Ozoo nɨ ko sʉ̀ʉ nɨ̀ àrɨ̀yɨ̀kʉ àngʉ̀mule nɨ ovʉle ini àloo ɨka drʉ vɨɨ yɨ̀.’ Àmɨ ɨco ꞌbù mule ɨkɨ́ ɨ̀ꞌdara te àmɨ ɨcoo ɨ̀cetaa eꞌyo ànɨ ꞌoꞌba vɨɨ ꞌyowa vɨɨ ɨnɨ sawà ɨ̀sɨle co kʉ. 4Àꞌbɨanzɨ ònzɨ díká àlɨ òbàꞌba vɨɨ lé talɨ ndre, te ꞌba ngáá ɨnɨ yɨ́ talɨ ꞌo kʉ ráaka àsì ɨ̀cetaa Yona bʉ vɨɨ yɨ̀.” Acete Yesu kʉ ɨnɨ ra díká mu ra.

Àkúfí Farasayi ꞌyowa Sadukayo be vɨɨ

(Mariko 8:14,21)

5ꞌBa ɨ̀rɨ nɨ ɨmbale vɨɨ ɨnɨ nɨ yí zojʉ ꞌba, ɨnɨ drì àvɨ̀ mʉ̀gatɨ̀ ꞌdujʉ ra. 6Yesu ꞌyo ɨnɨ yɨ́ kɨ́nɨ̀, “Àmɨ ovʉ́ mule ꞌbe àkúfí Farasayi ꞌyowa Sadukayo be vɨɨ yɨ̀.” 7ꞌBa ndee ɨꞌdó eꞌyo nzee ɨnɨ ɨ̀sɨlɨa kɨ́nɨ̀, “Ɨ̀rɨ ꞌyo vɨ́nɨ àrɨ̀yɨ̀kʉ àmanɨ mʉ̀gatɨ̀ jile kʉ vɨɨ yɨ̀.” 8Yesu nɨ nìle ɨnɨ eꞌyo ꞌdɨ̀vɨɨ nzee ɨnɨ ɨ̀sɨlɨa vɨɨ yɨ̀, zi ɨnɨ kɨ́nɨ̀, “Àmɨ ꞌba àꞌɨ̀taa be wereá vɨɨ ɨnɨ drʉ, àmɨ eꞌyo àmɨ nɨ mʉ̀gatɨ̀ jijʉ kʉ vɨɨ nzee àmɨ ɨ̀sɨlɨa àrɨ eꞌyo yɨ yà? 9Àmɨ vàa ngà kpere eꞌyo kʉ yà? Àmɨ ɨco eꞌyo ndráánɨ́ manɨ mʉ̀gatɨ̀ tòwí òŋòjʉ àgu alɨ̀fʉ̀ tòwí yɨ́ vɨɨ ɨga kʉ yà? Àmɨ tra ndráánɨ́ ɨnɨ ogéé sí yà? 10Nòsɨ̀kʉ àmɨ ɨco eꞌyo ndráánɨ́ mʉ̀gatɨ̀ aziìrì fèjʉ àgu alɨ̀fʉ̀ su yɨ́ vɨɨ ɨga ra yà? Àmɨ tra ɨnɨ ndráánɨ́ ogéé sí yà? 11Àmɨ vàa ndù lʉ́ ma nzee eꞌyo àmɨ́ yɨ́ mʉ̀gatɨ̀ drìa kʉ vɨɨ kʉ yà? Àmɨ ovʉ́ mule ꞌbe àkúfí Farasayi ꞌyowa Sadukayo be vɨɨ yɨ̀.” 12Acete vá ace ra kɨ́nɨ̀ ɨ̀rɨ eꞌyo nzee ɨmbataa ònzɨ Farasayi ꞌyowa Sadukayo be vɨɨ drìa ovʉ ꞌyowa àkúfí yìle mʉ̀gatɨ̀ alɨa vɨɨ drìa kʉ.

Petero nɨ eꞌyo ɨ̀cejʉ Yesu drìa vɨɨ

(Mariko 8:27,30; Luka 9:18-21)

13Yesu mu àngʉ̀ Kasaria Filipi nɨ vɨɨ alɨa ꞌba, zi ꞌba ɨ̀rɨ nɨ ɨmbale vɨɨ ɨnɨ kɨ́nɨ̀, “òꞌbɨ ɨ́ ꞌBa Mvápi nɨ omve àrɨ ɨ yà?”

14Òmvɨ́ ɨ̀rɨ yɨ́, “ꞌBa alóo ɨ́ ꞌyo Yohana Bàbùtízìmù fèle vɨɨ ɨ, alóo ɨ́ ꞌyo Elia ɨ, àsúú ꞌba alóo ɨ́ ꞌyo Yeremia ɨ nòsɨ̀kʉ Nàbíà vɨɨ àlowa ɨ.”

15Zi ɨnɨ kɨ́nɨ̀, Àmɨ́ te nɨnɨa ꞌyo ma àrɨ ɨ yà?

16Simoni Petero òmvɨ ɨ̀rɨ́ yɨ́, “Mɨ Kristo,#16:16 Nòsìkʉ Mesia; pàbaa vásì kàlíìrì. Orɨ ɨdrɨ be vɨɨ mvápi ɨ.”

17Yesu òmvɨ ɨ̀rɨ́ yɨ́ kɨ́nɨ̀, “Mɨ ovʉ drìleba be Simoni Yona mvápi lá. Àrɨ̀yɨ̀kʉ eꞌyo ada ꞌdɨ̀vɨɨ ɨnga ꞌba ada bʉ kʉ te Ata ꞌbù nɨ vɨɨ bʉ. 18Ma lè ꞌyo mɨ́ yɨ́ mɨ Petero ɨ,#16:18 Petero ɨkɨ́ òjí. díká òjí ꞌdɨ̀vɨɨ drìa, ma ngaa ma awo ꞌba ma àꞌɨ̀le vɨɨ ɨnɨ sii díká jó tilia drà#16:18 nòsìkʉ drà nánináni. ngaa àŋo kʉ.#16:18 nòsìkʉ ꞌdèle òkpo yɨ̀a yʉ. 19Ma ngaa mɨ́ yɨ́ fùngʉ́à Kárí ꞌBùnɨ vɨɨ fèe. Eꞌyo mɨnɨ gàle nyawúa sɨ̀ vɨɨ ꞌba nga#16:19 nòsìkʉ ngàle ꞌba. gàa sɨ̀ ꞌbùa díká eꞌyo mɨnɨ àtìle nyawúa ra vɨɨ ɨnɨ ꞌba ngaa #16:19 nòsìkʉ ngàle.àtìi ꞌbùa ra.” 20Acete Yesu lɨ ꞌba ɨ̀rɨ nɨ ɨmbale vɨɨ ɨnɨ bílé ꞌyojʉ nɨ kristo ɨ kʉ.

Yesu nɨ dràtaa nɨ awo vɨɨ eꞌyoa ɨ̀cejʉ vɨɨ

(Mariko 8:31; 9:1; Luka 9:22-27)

21Ɨꞌdojʉ oꞌdú ꞌdànaa yɨ̀, Yesu rɨ eꞌyo ɨ̀ce ꞌba ɨ̀rɨ nɨ ɨmbale vɨɨ ɨnɨ yɨ́ nɨ awo dràtaa drìa kɨ́nɨ̀, “Lè màá mu ace Yerusalemua càndɨ isú oroo gíá, ꞌba ꞌwàrà orɨ ɨteꞌba vɨɨ ɨnɨ gíá díká ꞌba àzítáá ɨmbaꞌba vɨɨ ɨnɨ gíá. Ma ngaa dràa ra, te oꞌdú na butia ma mu ɨ̀gàa ra.”

22Petero ꞌdu ɨ̀rɨ ji kala ɨꞌdo eꞌyo ɨ̀rɨ nɨ nzele vɨɨ trɨ kɨ́nɨ̀, “Opɨ lá ꞌonɨ kʉ! ꞌDɨ̀vɨɨ ngaa nɨ o mɨ be tʉ́á kʉ!”

23Yesu òjati ꞌyo Petero yɨ́ kɨ́nɨ̀, “Mɨ dà mɨ ra Sitani! Mɨ kumù nɨ ma drìlia, àrɨ̀yɨ̀kʉ ɨgataa mɨ awo vɨɨ ngáá Orɨ bʉ kʉ te ɨnɨ eꞌyo ɨngale ꞌba ada bʉ nɨ.”

24Acete Yesu ꞌyo ꞌba ɨ̀rɨ nɨ ɨmbale vɨɨ ɨnɨ yɨ́ kɨ́nɨ̀, “ꞌBa àloo tè lèe ma buti bɨ̀ɨ ra, ɨ̀rɨ àvɨ̀ eꞌyo nɨ ngʉlʉpɨ drìa ra, ɨ̀rɨ ꞌdu nɨ awo mʉ̀sàlaꞌbà vɨɨ díká ɨ̀rɨ bɨ̀ ma buti. 25Ànɨyɨ̀ ꞌbarʉʉ lèe nɨ ɨdrɨ#16:25 Gìríkì yɨ̀ ɨkɨ́a ɨdrɨ nòsɨ̀kʉ orɨndɨ pàbaa vásì 26. pa ra vɨɨ nɨ ngaa nɨ ɨdrɨ àvɨ̀ɨ ra, te ꞌbarʉʉ nɨ ɨdrɨ àvɨ̀ɨ ma eꞌyo yɨ̀ vɨɨ nɨ nga ɨdrɨ isúu ra. 26Òròdría nɨ nga ovʉʉ ngóni agú nɨ àngʉ̀ nyajʉ nyawú drìa, te ɨ̀rɨ nɨ nɨ ɨdrɨ àvɨ̀jʉ ra yà? Nòsɨ̀kʉ àfa agú nɨ ɨcojʉ nɨ orɨndɨ àlèjʉ vɨɨ ɨ̀rɨ àrɨ nɨ yà? 27Ànɨyɨ̀ ꞌBa Mvápi nɨ nga ca dìzà atapi awo vɨɨ yɨ̀ malaika ɨ̀rɨ awo vɨɨ ɨbe, díká ɨ̀rɨ ngaa òròdrí ꞌba àlʉàlʉ awo vɨɨ fèe eꞌyo ɨ̀rɨ nɨ ꞌole vɨɨ butia yɨ̀. 28Ma ꞌyo àmɨ́ yɨ́ tàándí, ꞌba alóo ɨnɨ vɨ̀a ngáá dra kʉ dèèngà ndréé ꞌba Mvápi nɨ kárí nɨ awo vɨɨ ꞌdurɨa kʉ.”

Currently Selected:

Matayo 16: MADI-URL

Highlight

Copy