Matayo 15

Aꞌbɨ àꞌbi Yahudi nɨ vɨɨ ꞌyowa vɨɨ

(Mariko 7:1-13)

1Acete ꞌba Farasayi drʉ vɨɨ alóo ɨnɨ ɨmbaꞌba àzítáá Orɨ awo vɨɨ nɨ vɨɨ ɨnɨ be mú Yesu bʉ ɨngajʉ Yerusalemua díká zí ɨ̀rɨ kɨ́nɨ̀, 2“ꞌBa mɨnɨ ɨmbale vɨɨ ɨ́ rɨ ɨmbataa aꞌbɨ àꞌbimà ꞌyowa vɨɨ ɨnɨ òŋo vɨ́nɨ àrɨ eꞌyo yɨ̀ yà? Káꞌdí tà nyarɨa òjɨ́ɨ́ ànɨ gí aꞌbɨ aꞌbíá vɨɨ nɨ lèle vɨ́nɨ kʉ.”

3Yesu òmvɨ kɨ́nɨ̀, “Àmɨ òbɨ̀ɨ àzítáá Orɨ awo vɨɨ ɨnɨ kʉ aꞌbɨ àmɨ ꞌyowa vɨɨ eꞌyoa yɨ̀ àrɨ yɨ̀ yà? 4Orɨ kɨ́nɨ̀, ‘Mɨ rʉ ateè ɨnɨ ayèè be’#Ipuza 20:12; Azita Amviza 5:16 díká ‘agú atapi ɨnɨ trɨle ayopi be vɨɨ lè ɨ̀rɨ jà drì ra.’#Ipuza 21:17; Levi 20:9 5Te àmɨ ꞌyo kɨ́nɨ̀ agú tè atapi ɨnɨ àzà ko ayopi be, ɨ̀rɨ ꞌyo kɨ́nɨ̀, ‘Àfa fèzà vɨɨ ɨnɨ Orɨ awo nɨ,’ 6lè ɨ̀rɨ rʉ atapi ɨ kʉ.#15:6 sitaa alóo kɨ́nɨ̀ Ata nòsìkʉ Ayo. Léti vɨɨ yɨ̀ àmɨ gà àzítáá Orɨ awo vɨɨ eꞌyo àmɨ ꞌyowa aꞌbí nɨ vɨɨ yɨ̀ ꞌba. 7Àmɨ ꞌba lókìrí be vɨɨ ɨnɨ drʉ, Isaya ondrí ndráánɨ́ eꞌyo ada àmɨ drìa vɨɨ ra kɨ́nɨ̀:

8‘ꞌBa ꞌdɨ̀vɨɨ ɨ́ ma rʉ lʉ́ tia,

te ɨnɨ así ma ꞌbʉ vɨɨ yɨ̀ vàlà.

9Òròdría yʉ ɨnɨ nɨ ma ìnzìjʉ

àrɨ̀yɨ̀kʉ ɨ́ àzítáá ꞌba ada nɨ òꞌbàle vɨɨ ɨnɨ ɨmba

kɨ̀le ɨnɨ àzítáá ma awo nɨ lé.’#Isaya 29:13”

Àfa ꞌba ada ꞌbàle òndi drʉ vɨɨ

(Mariko 7:4-23)

10Acete Yesu omve òꞌbɨ nɨ bʉ díká ꞌyo ɨnɨ yɨ́ kɨ́nɨ̀, “Àmɨ ɨrɨ́ díká àmɨ vá eꞌyo ndee ɨkɨ́a. 11Àfa fɨɨ ꞌba ada tile yɨ̀ vɨɨ ꞌbàa ɨ̀rɨ òndi drʉ nɨ̀ kʉ, te àfa pʉ̀le ɨrɨ tile yɨ̀ vɨɨ ɨ ɨ̀rɨ ꞌba ‘òndi’ drʉ nɨ̀.”

12Acete ꞌba ɨ̀rɨ nɨ ɨmbale vɨɨ mú ɨ̀rɨ bʉ díká zí ɨ̀rɨ kɨ́nɨ̀, “Mɨ nì eꞌyo mɨnɨ nzele vɨɨ fè así suzà ꞌba Farasayi drʉ vɨɨ ɨnɨ yɨ́ ònzɨ ɨnɨ nɨ eꞌyo vɨɨ ɨrɨjʉ ꞌba vɨɨ butia vɨɨ ra yà?”

13Yesu òmvɨ kɨ́nɨ̀, “Òrɨ drɨ́á Atamà ꞌBùa vɨɨ nɨ sale nɨ̀ kʉ vɨɨ ɨnɨ ngaa ovʉʉ òtùzà drʉ ola be drɨ́á. 14Mɨ kʉ ɨnɨ ovʉ́; ɨnɨ ꞌba muleko àrípí muleko drìceꞌba vɨɨ ɨnɨ ɨ.#15:14 Eꞌyo sɨ̀zà alóo kɨ́nɨ̀ drìceꞌba mule ko ꞌyowa vɨɨ. Muleko tè àrípi muleko vɨɨ drìa cee nɨ̀, ɨnɨ nga òzòo ꞌbúlíá ìrìtro.”

15Petero kɨ̀nɨ̀, “Mɨ ɨ̀ce àma yɨ́ eꞌyo oꞌbezà vɨɨ ɨkɨ́a.”

16Yesu zi ɨnɨ kɨ́nɨ̀, “Àmɨ vàa ngà asúú eꞌyo kʉ yà? 17Àmɨ nìi àfa fɨɨ tile yɨ̀ vɨɨ ɨ àli alɨa díká ɨ pʉ àja ra vɨɨ kʉ yà? 18Te eꞌyo pʉ̀le tilia vɨɨ ɨ ɨnga asíá, díká eꞌyo ꞌdɨ̀vɨɨ ɨ ꞌba ada ꞌba ‘òndi’ drʉ nɨ̀. 19Àrɨ̀yɨ̀kʉ eꞌyo ònzɨ ɨcole fèle mɨ́ yɨ́ ꞌba kile, àlɨ ꞌbàle, ògì ògìle, ɨ̀nzò ilílé díká àsʉ sʉle vɨɨ ɨ́ nga mɨ asíá. 20Àfa ꞌdɨ̀vɨɨ ɨ́ ꞌba ada ꞌba ‘òndi’ drʉ nɨ̀, te tà nyajʉ gí òjɨ̀ ko drʉ vɨɨ ꞌbàa ꞌba ada ‘òndi’ drʉ nɨ̀ kʉ.”

Àꞌɨ̀taa izí kanani drʉ vɨɨ awo vɨɨ

(Mariko 7:24-30)

21Yesu kʉ ace àngʉ̀ naa ra, mu àngʉ̀ àkú ìmgbélé Turo ɨnɨ ɨ̀sɨlɨa Sidoni be vɨɨ alɨa. 22Izí àloo Kanani drʉ ovʉle nàa vɨ́ɨvɨɨ ca ɨ̀rɨ bʉ rɨ ji wʉ pàyɨ̀ kɨ́nɨ̀, “Kɨ́rɨ́kɨ̀rɨ̀ Opɨ Daudi Mvápi, mɨ ovʉ ma bʉ yìkíì yɨ̀! Orɨndɨònzɨ nɨ zàmàa nɨ ɨ̀candɨ tʉ̀!”

23Te Yesu òmvɨɨ ɨ̀rɨ́ yɨ́ eꞌyo àloo kʉ. ꞌBa ɨ̀rɨ nɨ ɨmbale vɨɨ ꞌyó ɨ̀rɨ́ yɨ́ kɨ́nɨ̀, “Mɨ dro izí vɨɨ ra, ɨ̀rɨ ꞌba buti bɨ̀ɨ díká bílé ikúu.”

24Acete Yesu òmvɨ ɨnɨ yɨ́ kɨ́nɨ̀, “ꞌBà pé ma ti lʉ́ ꞌba Isirali drʉ kɨ̀le kàbèlè àvɨ̀zà lé vɨɨ ɨnɨ bʉ.”

25Izí vɨɨ mʉ òsì ùlùúti ɨ̀rɨ drìlia kɨ́nɨ̀, “Mi ko ma àzà, Opɨ.”

26Yesu òmvɨ kɨ́nɨ̀, “Ovʉʉ ꞌyée kʉ tà anzɨ ꞌyowa vɨɨ ꞌbejʉ òcé yɨ́.”

27Izí ndee òmvɨ kɨ́nɨ̀, “Èè, ɨ̀rɨ ada Opɨ lá, te káꞌdí òcé ɨ́ tà nyɨngɨ ayɨle nyáá ꞌba ìmgbélé awo mézà sotia vɨɨ nya ra.”

28Acete Yesu òmvɨ ɨ̀rɨ́ yɨ́ kɨ́nɨ̀, “Izí, mɨ àꞌɨ̀taa angɨrɨ! Eꞌyo mɨnɨ lèle vɨɨ ɨ̀rɨ ꞌo nɨ rá.” Cotícotí zàpia àtɨ̀ ra.

Yesu nɨ ꞌba òꞌbɨ́ àtɨ̀jʉ vɨɨ

29Yesu kʉ àngʉ̀ naa ꞌba dèè, mu mèrè Galili ti yɨ̀. Acete tu ꞌbee drìa díká rɨ nyáá. 30ꞌBa òꞌbɨ́ányá mú ɨ̀rɨ ꞌbʉ, jí ɨ̀rɨ bʉ ꞌba acozà ɨnɨ, ꞌba muleko vɨɨ ɨnɨ, ꞌba òpʉ nɨ nyale vɨɨ ɨnɨ, òdúrú drʉ vɨɨ ɨnɨ díká ꞌba àzo mgbimgbi be vɨɨ ɨnɨ be. Òꞌbá ɨnɨ ɨ̀rɨ kalɨa díká àtɨ̀ ɨnɨ ra. 31Òꞌbɨ ndee ovʉ́ òsùtaa yɨ̀ ɨnɨ nɨ nèjʉ òdúrú ɨnɨ eꞌyo nzerɨa, ꞌba òpʉ nɨ nyale vɨɨ àtɨ́rá, ꞌba acozà ɨnɨ acɨɨ díká muleko vɨɨ ɨnɨ àngʉ̀ nèe. Ace ꞌba ndee ìnzí Orɨ Isirali nɨ vɨɨ ra.

Yesu nɨ ꞌba alɨ̀fʉ̀ su yɨ́ tà fèjʉ vɨɨ

(Mariko 8:1-10)

32Yesu omve ꞌba ɨ̀rɨ nɨ ɨmbale vɨɨ ɨnɨ nɨ bʉ díká ꞌyo ɨnɨ yɨ́ kɨ́nɨ̀, “Ma ovʉ càndɨ yɨ̀ ꞌba ꞌdɨ̀vɨɨ ɨnɨ yɨ̀, ɨnɨ ɨbú ovʉʉ ma be oꞌdú pɨpɨ na te àfa àloo ɨnɨ nɨ nyalea yʉ. Ma lèe ɨnɨ ti pèe àkúá àfa àloo nyaa ko drʉ kʉ, àrɨ̀yɨ̀kʉ ìcìmàkòrò tè mu ɨnɨ ꞌbee létia kʉ.”

33ꞌBa ɨ̀rɨ nɨ ɨmbale vɨɨ zí ɨ̀rɨ kɨ́nɨ̀, “Àma ɨco àfa nyazà isú ìndí ꞌdɨ̀vɨɨ alɨa ngua mujʉ fèjʉ ꞌba òꞌbɨ́ányá ꞌdɨ̀vɨɨ ɨnɨ yɨ́?”

34Yesu zi ɨnɨ kɨ́nɨ̀, “Àmɨ bʉ mʉ̀gatɨ̀ sí?”

Òmvɨ́ ɨ̀rɨ́ yɨ́ kɨ́nɨ̀, “Ɨnɨ aziìrì díká ɨ̀ꞌbɨ were be.”

35Ànɨ Yesu ꞌyo ꞌba òꞌbɨ́ányá vɨɨ ɨnɨ rɨ́ nyáá. 36Acete ꞌdʉ mʉ̀gatɨ̀ aziìrì vɨɨ ɨnɨ ìꞌbi vɨɨ ɨnɨ be, fè àwàꞌdɨ̀fóò Orɨ yɨ́, òŋò ɨnɨ ale díká fè ɨnɨ ꞌba ɨ̀rɨ nɨ ɨmbale vɨɨ ɨnɨ yɨ́, ꞌba ndee fé ɨnɨ ꞌba òꞌbɨ́ányá vɨɨ ɨnɨ yɨ́ ra. 37ꞌBa drɨ́á nyá rá díká trá rá. ꞌDànaa butia ꞌba ɨ̀rɨ nɨ ɨmbale vɨɨ trá jólóa ɨ̀rɨ nɨ òŋòle nɨ kʉle vɨɨ ɨnɨ ogéé ale aziìrì. 38ꞌBa nyale vɨɨ ɨnɨ kàlàfe alɨ̀fʉ̀ su vɨɨ dèè isú ꞌba làa zi anzɨ be kʉ. 39Ace Yesu nɨ òꞌbɨ ti pèjʉ ꞌba, tʉ yee alɨa díká mu àngʉ̀ Magadani nɨ vɨɨ alɨa.

Currently Selected:

Matayo 15: MADI-URL

Highlight

Copy