2 Timeteo 4
4
1Ma fè mɨ yɨ́ òkpo azítáá ꞌdɨ̀vɨɨ ɨnɨ buti òbɨ̀jʉ, Orɨ ɨnɨ drìlia Kristo Yesu ngale ꞌba ɨdrɨ drʉ vɨɨ ɨnɨ eꞌyo lile ꞌba dràzà be, àloo ɨ̀rɨ nɨ ngale cale òpɨ̀ nyale nɨ̀ vɨɨ eꞌyoa yɨ̀. 2Mɨ òlʉ̀ eꞌyo ꞌdɨ̀vɨɨ, mɨ sòka kirikiri eꞌyo ndee òlʉ̀jʉ sawà drɨ́á yɨ̀ káꞌdí ꞌbà té eꞌyo ndee àꞌɨ̀ɨ ra nòsɨ̀kʉ àꞌɨ̀ɨ kʉ ra kpé. Mɨ otʉ ɨnɨ, mɨ aꞌda eꞌyoònzɨ ꞌozà ꞌyowa vɨɨ ɨnɨ, díká mɨ ɨ̀ka ɨnɨ así ɨ̀ꞌyere yɨ̀ díká mɨ fè ɨnɨ yɨ́ ɨmbataa kílílí vɨɨ ɨnɨ ɨ. 3Àrɨ̀yɨ̀kʉ sawà àloo nɨ muu caa ꞌba ndépi nɨ ngajʉ dínì piri vɨɨ gàjʉ sɨ̀. Ɨ̀ndɨ̀a ráaka, ɨnɨ eꞌyo ɨnɨ así nɨ́ lèle vɨɨ butia òbɨ̀ɨ ɨ, díká ɨnɨ ngaa ànɨ àgaa ɨ̀mbaꞌba traa tree ànɨ ɨ̀mbaꞌba ndee ɨnɨ ngajʉ eꞌyo ꞌba ndee ɨnɨ bílé nɨ lèle ɨrɨle vɨɨ ɨnɨ òlʉ̀jʉ ɨnɨ yɨ́ benì. 4Ɨnɨ ngaa ànɨ bílé ojaa eꞌyo ada bʉ vɨɨ yɨ̀ kalaa díká así ꞌbàa eꞌyo aꞌbɨ nɨ vɨɨ ɨnɨ ɨrɨjʉ ɨ. 5Te lè mɨ mbá mɨ tà eꞌyo drɨ́á alɨa, mɨ taa eꞌyo ɨ̀wa ti, mɨ nga àzí eꞌyo Orɨ awo àlá vɨɨ òlʉ̀jʉ vɨɨ, mɨ nga àzí mɨ awo ovʉjʉ àtɨꞌboo Orɨ awo drʉ vɨɨ ɨnɨ drɨ́á.
6Àrɨ̀yɨ̀kʉ tè ovʉʉ ma ɨ, Ma awo sawà ca ace ꞌbanɨ kojʉ ma fèjʉ ɨtetaa drʉ Orɨ yɨ́ ꞌba, díká sawà ma awo dràjʉ vɨɨ ca ace ꞌba. 7Ma ꞌdi àꞌdí ònyɨ̀be, ma de àzí ma awo vɨɨ ꞌba, àloo ma mba àꞌɨ̀taa ma awo vɨɨ tàa ra. 8Díká sawà vɨɨ yɨ̀ okú eꞌyo ada nɨ manɨ ovʉjʉ ꞌba àlá drʉ Orɨ be vɨɨ ꞌba mba tàa ngónde ꞌba ma yɨ́, Opɨ nɨ ꞌbarʉʉ eꞌyo ada lii vɨɨ ɨ, ɨ̀rɨ ngaa okú ndee fèe ma yɨ́ oꞌdú ꞌdànaa yɨ̀ nɨ̀, te ovʉʉ kírí má yɨ́ kʉ pàbaa ꞌba drɨ́á ɨbúlé rɨle drìkàtaa ɨ̀rɨ awo vɨɨ tèle alè yɨ̀ vɨɨ ɨbe.
Eꞌyo ɨ̀cezà ꞌba àlʉàlʉ yɨ́ vɨɨ
9Mɨ ꞌo mbèlè mbele cajʉ ma bʉ, 10Àrɨ̀yɨ̀kʉ Demasi nɨ eꞌyo nyawú nɨ vɨɨ lèle tʉ̀ vɨɨ yɨ̀ adɨ ma ra díká mu ace Tesalonikaa ꞌba. Kereseke mu Galatia nɨ vɨɨ alɨa, Tito mu Dalamatia. 11Kiria Luka àsì ma be nɨ̀. Mɨ isú má yɨ́ Mariko nɨ díká mɨ ji ɨ̀rɨ ɨ̀ndɨ̀, àrɨ̀yɨ̀kʉ ɨ̀rɨ òròdrí drʉ má yɨ́ àzí ma awo vɨɨ alɨa. 12Ma pè Tucikoni ti Efesoa ꞌba. 13Mɨnɨ carɨa, mɨ ca bòngo ꞌbezà manɨ ndráánɨ́ kʉle Karipo bʉ àkú ìmgbélé Troasi vɨɨ be, díká búkù ma awo vɨɨ ɨbe te tʉ̀ vɨɨ ɨꞌdɨ ɨdele àfa sɨ̀jʉ drìa vɨɨ ɨ.
14Alikizenda oka dile vɨɨ ꞌo ma bʉ eꞌyo ònzɨ vɨ́ɨvɨɨ ɨ. Opɨ nɨ ngaa ɨ̀rɨ yɨ́ drìrima fèe eꞌyo ɨ̀rɨ nɨ́ ꞌole vɨɨ ɨnɨ yɨ̀ nɨ̀. 15Mɨ ovʉ pàbaa ɨ̀rɨ yɨ̀ mule be, àrɨ̀yɨ̀kʉ ɨ̀de eꞌyo àma nɨ òlʉ̀le vɨɨ ɨ̀de.
16Sawà òkò manɨ kasòjʉ eꞌyo lizà drìlia eꞌyo ɨ̀cejʉ ma drìa vɨɨ yɨ̀, ꞌbarʉʉ àloo ma àtìle raa yʉ, te ꞌba drɨ́á ga ma sɨ̀. Ma Orɨ nɨ zii kɨ̀nɨ̀ lè ɨ̀rɨ ꞌo ɨnɨ be eꞌyoònzɨ kʉ. 17Te Opɨ sòka ma be kirikiri díká fè má yɨ́ òkpo, ànɨyɨ̀ léti ma bʉ vɨɨ yɨ̀ eꞌyo àlá vɨɨ ɨ òlʉ́ àngʉ̀ drɨ́á alɨa, ꞌba júrú drʉ vɨɨ ɨnɨ ɨrɨ́ ɨ̀ndɨ̀, díká pa ma drà alɨa vɨɨ yɨ̀ kɨ̀le ꞌbanɨ ꞌba pale kàmì síá vɨɨ lé ꞌdɨ̀ ɨ. 18Opɨ nɨ ngaa ma paa eꞌyoonzɨ vɨɨ ɨnɨ alɨa díká ɨ̀rɨ ngaa ma jii kílílí drʉ kárí ꞌbùnɨ vɨɨ alɨa ra. Dìzà ɨ̀rɨ ovʉ ɨ̀rɨ be nánináni. Amena.
Zitaa àsìjʉ vɨɨ
19Mɨ zi Pirisila ɨnɨ Akula be díká orɨꞌba ovʉle Onesifora awo àkúá vɨɨ ɨbe. 20Erasito awɨ àkú ìmgbélé Korinitoa vɨɨ alɨa, díká ma kʉ Turofimoni àzo drʉ Miletoa. 21Mɨ òꞌbì así drɨ́á yɨ̀ mbele cajʉ ma bʉ nòa àle dèèngà mba àgù nɨ ambɨjʉ tʉ̀ vɨɨ caa kʉ. Yuboli zi mɨ cɨcɨ, díká Pudeni ɨnɨ Lino ɨbe, Kilaudia ɨbe àloo Kristiani àle vɨɨ ɨnɨ be drɨ́á zí mɨ pàbaa cɨ.
22Ma Opɨ nɨ zii kɨ́nɨ̀ ɨ̀rɨ ovʉ àmɨ orɨndɨ be ɨ̀ndɨ̀. Asíánzú ɨ̀rɨ awo vɨɨ ɨ̀rɨ ovʉ pàbaa àmɨ be ɨ̀ndɨ̀.
Currently Selected:
2 Timeteo 4: MADI-URL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved
