2 Timeteo 3

Oꞌdú àsìjʉ vɨɨ

1Te ma lè àmɨ ní eꞌyo ꞌdɨ̀vɨɨ kílílí drʉ; Oꞌdú àsìjʉ vɨɨ alɨa eꞌyo ɨ̀wa vɨɨ ɨnɨ gaa tree. 2ꞌBa drɨ́á nɨ ngaa ànɨ ngʉlʉpɨ lèe ɨ, ɨnɨ ngaa lonyɨ lèe ɨ, ɨnɨ ngaa ànɨ ɨ̀bʉ̀rɨɨ ɨ, ɨnɨ ngaa ovʉʉ àfʉ́ yɨ̀, ɨnɨ ngaa Orɨ nɨ ɨ̀dee ɨ̀de, ngáá otíꞌbá ti ɨrɨ kʉ, ngáá eꞌyo ònyɨ̀be ɨ̀pòyɨ kʉ, ɨnɨ ngaa ovʉʉ ꞌba asíònzɨ be drʉ, 3ɨnɨ ngaa ovʉʉ alè kodrʉ, trʉ̀taa kodrʉ, ɨ̀nzò be, àdrà be, ngáá àníàkò drì si kʉ, ɨnɨ ngaa ovʉʉ ꞌba eꞌyo ònyɨ̀be lèle kʉ vɨ́ɨvɨɨ ɨnɨ ɨ, 4ꞌba ꞌba òꞌdɨ nyaꞌba nɨ, así òká be nɨ, àfʉ́ be nɨ, ꞌba àyɨ̀kò lèle tʉ̀ ɨ̀gàtɨ Orɨ nɨ lèle vɨɨ ɨnɨ ra vɨɨ ɨ, 5ꞌba ànɨ ꞌbàle dínì alɨa te dèè ɨcóó àti òkpo dínì nɨ vɨɨ cɨ vɨ́ɨvɨɨ kʉ vɨɨ ɨnɨ ɨ. Ànɨ lè àmɨ ovʉ́ ɨnɨ be karaàlʉa kʉ.

6Àrɨ̀yɨ̀kʉ ɨnɨ ɨ̀sɨle alóo ɨ́ fɨ ꞌba alóo ꞌyowa àkúá díká ɨ́ òkpo isú àzítáá sijʉ zi òkpoko ovʉle ɨ̀zatà be angɨrɨ díká así ꞌbàle eꞌyo rúá nɨ vɨɨ drìa tʉ̀ vɨ́ɨvɨɨ ɨnɨ drìa, 7zi ndee ɨ́ le eꞌyo òni oꞌdú drɨ́á yɨ̀, te ɨcóó òndʉ̀a eꞌyo ada nɨ vɨɨ isú kʉ. 8Kɨ̀le Yanesi ɨnɨ nɨ Yamberesi be Musa tia eꞌyo vɨɨ gàle sɨ̀ vɨɨ lé, pàbaa ꞌba ꞌdɨ̀vɨɨ gá eꞌyo ada sɨ̀. ꞌBa òmvá ɨnɨ omɨ̀ ra díká ɨnɨ ꞌba aꞌdele àꞌɨ̀taa alɨa ra vɨ́ɨvɨɨ ɨnɨ ɨ. 9Te ngáá mu eꞌyo ꞌyowa vɨɨ be drìle kʉ àrɨ̀yɨ̀kʉ ꞌba drɨ́á nɨ ngaa nìi ɨnɨ ꞌba azazà nɨ vɨɨ ra, kɨ̀le ndráánɨ́ Yanesi ɨnɨ nɨ oꞌle Yamberesi be vɨɨ lé.

Eꞌyo Paulo nɨ azílé Timitayo yɨ́ vɨɨ

10Te mɨ òbɨ̀ ɨmbataa ma awo vɨɨ ɨnɨ buti drɨ́á rá, adrɨzà ma awo vɨɨ ɨnɨ be, asísílé ɨdrɨ ma awo vɨɨ alɨa vɨɨ ɨnɨ be, àꞌɨ̀taa ma awo vɨɨ ɨnɨ be, eꞌyo ti tazà ma awo vɨɨ ɨnɨ be, alè ma awo vɨɨ ɨnɨ be, asítezà ma awo vɨɨ ɨnɨ be, 11ɨnzamatara manɨ isúlé vɨɨ ɨbe, càndɨ manɨ isúlé vɨɨ ɨbe. Mɨ nì eꞌyo drɨ́á ànɨ ꞌole ma be Antiokia, Ikonia díká Lisitraa vɨɨ ɨnɨ ra, átà káꞌdí ɨnzamatara manɨ tia tale vɨɨ ɨbe. Te Opɨ pa ma eꞌyo ndee ɨnɨ alɨa drɨ́á rá. 12Adanɨa ꞌba drɨ́á lèle ovʉle ɨdrɨ Orɨ awo léti Kristo Yesu bʉ vɨɨ yɨ̀ vɨɨ ɨnɨ nga ɨnzamatara isúu ra, 13vɨɨ dèè ꞌba asíonzɨ be vɨɨ ɨnɨ ꞌba ꞌba oleꞌba vɨɨ ɨbe muu eꞌyo ònzɨ ꞌyowa vɨɨ ɨbe drìle drìle, ꞌba alóo ɨnɨ olejʉ díká ànɨ olejʉ cenɨ̀cenɨ̀. 14Te àmɨ mú nɨnɨ drìle eꞌyo ada àmɨ nɨ ònìle vɨɨ be, díká àmɨ nɨ àꞌɨ̀le òrìkokò drʉ vɨɨ lé, àrɨ̀yɨ̀kʉ àmɨ nì ndráánɨ́ ꞌba eꞌyo ndee ɨmbale àmɨ yɨ́ vɨɨ ɨnɨ ra, 15díká àmɨ ɨco ɨga ɨꞌdojʉ ndráánɨ́ ànzɨ̀ yɨ̀ àmɨ isú Eꞌyo Sɨ̀zà Àlá fèle cale àmɨ yɨ́ òndʉ̀ʉ̀ be, pataa isújʉ́ léti àmɨ nɨ Kristo Yesu nɨ àꞌɨ̀jʉ vɨɨ yɨ̀ vɨɨ ngóni ngóni drʉ yà vɨɨ ra. 16Eꞌyo Sɨ̀zà drɨ́á Orɨ zì létia nɨ̀ díká òròdría àma yɨ́ eꞌyo ada ɨmbajʉ, àma nɨ eꞌyo tàsìle kʉ ɨdrɨ àma ꞌyowa vɨɨ alɨa vɨɨ ɨnɨ otʉjʉ, ɨ̀zatà àma ꞌyowa vɨɨ ɨnɨ otʉjʉ díká ɨdrɨ àlátárá ɨmbajʉ, 17ànɨ azílé agú àzí ngale Orɨ awo vɨɨ nɨ ovʉjʉ sawà drɨ́á yɨ̀ ngónde àzí patí àzí ònyɨ̀be vɨɨ ngajʉ vɨɨ be benì.

Currently Selected:

2 Timeteo 3: MADI-URL

Highlight

Copy