2 Koronito 6
6
1Àma nɨ àzí ngarɨa Orɨ ɨbe túàlʉ ꞌdɨ̀, àma kɨ̀sà àꞌíi àmɨ bʉ kɨ́nɨ̀, lè àmɨ òmvá asíndrɨ̀zà àmɨ nɨ isúlé Orɨ bʉ vɨɨ náni kʉ. 2Àrɨ̀yɨ̀kʉ Orɨ kɨ̀nɨ̀,
“Sawà ndráánɨ́ kílílí vɨɨ alɨa, ma ɨrɨ àmɨ ra,
díká oꞌdú pataa nɨ vɨɨ yɨ̀, ma ko àmɨ àzà ra.”#Isaya 49:8
Ma lè ꞌyo àmɨ yɨ́, sawà Orɨ nɨ fɨjʉ ꞌbá yɨ́ vɨɨ ca ace ꞌba, oꞌdú pataa nɨ vɨɨ ɨ̀rɨ ꞌdɨ̀ ɨ.
Càndɨ Paulo nɨ nyale vɨɨ
3Àma rɨ òpòri ovʉle léti koro kílílí yɨ̀, azílé àma ovʉ́ ꞌba àloo yɨ́ kúmù drʉ̀ kʉ ògajʉ eꞌyo Opɨ awo vɨɨ nìjʉ. 4Ɨ̀ndɨ̀a eꞌyo drɨ́á àma nɨ ꞌole vɨɨ ɨnɨ alɨa àma ɨ̀ce kɨ́nɨ̀ àma àzíꞌbá Orɨ awo nɨ, eꞌyo ti tazà yɨ̀, ɨnzamatara ti tazà yɨ̀, eꞌyo ɨ̀wa ti tazà yɨ̀, díká suzà ti tazà yɨ̀; 5cotaa ti tazà yɨ̀, lataa àrújóá vɨɨ tia tazàa yɨ̀ díká ngɨ̀rɨ̀ngɨ̀rɨ̀ ti tazà yɨ̀; àzí òkpo ti tazà yɨ̀, oꞌdú kozà àkò ti tazà yɨ̀ díká àbírí ti tazà yɨ̀; 6ovʉjʉ eꞌyo ada be, vàtaa be, así èꞌyere be díká asíánzú be; Orɨndɨ Àlátárá alɨa díká lètaa ada yɨ̀; 7eꞌyo ada nzezà yɨ̀ díká òkpo Orɨ awo vɨɨ yɨ̀; àma ꞌdu eꞌyo ꞌozà kílílí vɨɨ ànyàfa patí drʉ àma gíá àma àga tèjʉ àloo àꞌdí ꞌdijʉ ɨ; 8ìnzìtaa ale yɨ̀ díká ìnzìtaa àkò ale yɨ̀; rú ònyɨ̀be ale yɨ̀ díká rú ònzɨ ale yɨ̀; àma eꞌyo ada be te ꞌba ꞌbá àma ɨ̀nzòꞌba drʉ; 9àma ꞌba nìzà nɨ te ꞌbà ꞌbá kɨ́nɨ̀ ꞌba níí àma kʉ; káꞌdí ꞌbanɨ lèjʉ àma òkijʉ ra kpé te ngà àma kírí ɨdrɨ drʉ; ꞌbanɨ àma cojʉ ra kpé, ꞌba òkíí àma kʉ; 10àma càndɨ drʉ te àma àyɨ̀kò ꞌoo oꞌdú drɨ́á yɨ̀; àma aluu drʉ te àma fè ꞌba òꞌbɨ́ cá lonyɨ be; àma ɨꞌda àma bʉ àfa yʉ lé, te àma bʉ àfa drɨ́á cɨ́.
11Arɨ́màònyɨ Korinitoa vɨɨ ɨnɨ lá, àma nze àmɨ yɨ́ eꞌyo ada àma asíá vɨɨ zì kokò drʉ. 12Àma òzìi alè àma asíá àmɨ yɨ́ vɨɨ kʉ, te àmɨ òzì alè àmɨ asíá vɨɨ àma yɨ́ nɨ̀. 13Àma eꞌyo nze àmɨ yɨ́ kɨ̀le anzɨ àma ꞌyowa lé. Àmɨ ɨ̀ꞌdá àma yɨ́ alè kɨ̀le àma nɨ ɨ̀ꞌdale àmɨ yɨ́ vɨɨ lé. Àmɨ òzí àmɨ así kʉ.
Àmɨ ɨ̀cɨ àmɨ ꞌba àꞌɨ̀taako be vɨɨ ɨbe kʉ
14Àmɨ ɨ̀cɨ ti ꞌba eꞌyo Kristo awo vɨɨ àꞌɨ̀le kʉ vɨɨ ɨbe kʉ. Àrɨ̀yɨ̀kʉ eꞌyo ada ɨcó ànɨ ɨ̀cɨ eꞌyo ònzɨ be ngóni ngóni drʉ yà? Nòsɨ̀kʉ dìzà ɨ́ ɨco ànɨ ɨ̀cɨ dúmú be ngóni ngóni yà? 15Ɨrɨtaa ɨ ɨco ovʉ Kristo ɨnɨ ɨ̀sɨlɨa Beliali#6:15 Sitani. be ngóni ngóni yà? ꞌBa eꞌyo Kristo awo vɨɨ àꞌɨ̀le kʉ vɨɨ ɨcó ti ɨ̀cɨ ꞌba àꞌɨ̀le ra vɨɨ ɨbe ngóni ngóni yà? 16Orɨ jó ɨcó ànɨ ɨ̀cɨ kara orɨa ìnzìjʉ vɨɨ be ngóni ngóni yà? Àrɨ̀yɨ̀kʉ àma Orɨ jó Orɨ ɨdrɨ be vɨɨ awo vɨɨ ɨ. Kɨ̀le Orɨ nɨ ꞌyole ꞌba vɨɨ lé kɨ́nɨ̀, “Ma ngaa ovʉʉ ɨnɨ be díká acíi ɨnɨ àfatà yɨ̀, díká ma ngaa ovʉʉ Orɨ ꞌyowa vɨɨ ɨ, díká ɨnɨ ngaa ovʉʉ ꞌba ma awo vɨɨ ɨnɨ ɨ.”#Levi 26:26; Yeremia 32:38; Izekeli 37:27
17Ànɨyɨ̀ Opɨ kɨ̀nɨ̀, “Àmɨ da àmɨ ɨnɨ ɨ̀sɨlɨa vɨɨ yɨ̀ ra
díká àmɨ có àmɨ àfatà ɨnɨ be ra.
Àmɨ ꞌó ɨ̀zatà kʉ,
díká ma ngaa àmɨ àꞌíi ma bʉ ra.”#Isaya 52:11; Izekeli 20:34,41
18Opɨ kɨ̀nɨ̀, “Ma ngaa ovʉʉ Ata àmɨ ꞌyowa drʉ,
díká àmɨ ngaa ovʉʉ àguanzɨ díká odrʉanzɨ ma awo nɨ,
ma ɨ, Orɨ òkpo be tʉ̀ vɨɨ ꞌyo nɨ̀.”
Currently Selected:
2 Koronito 6: MADI-URL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved
