2 Koronito 5

Kara àma ꞌyowa ꞌbùa vɨɨ

1Ànɨ àma nìra kɨ́nɨ̀ rúá àma nɨ ovʉle alɨa nyawú drìa nòa vɨɨ tè nɨ àsʉʉ ra, àma ꞌyowa àkú ꞌbùa nánináni vɨɨ Orɨ bʉ cɨ, te jó ndee ꞌba síí ɨ̀rɨ gí yɨ̀ kʉ. 2Te vɨɨ dèè àma otaa lèjʉ tujʉ àkú àma ꞌyowa ꞌbùa ovʉjʉ vɨɨ ɨnɨ alɨa, 3àrɨ̀yɨ̀kʉ Orɨ te nga àma òsùu rúá oꞌdɨ alɨa ꞌba, àma Orɨndɨ ngaa ovʉ kɨ́kɨ́lɨ́ drʉ kʉ. 4Àma nɨ ovʉrɨa àkú ndee ꞌdɨ̀vɨɨ ɨnɨ alɨa, àma otaa ota díká àma eꞌyo ɨ̀wa drʉ alɨa. Àrɨ̀yɨ̀kʉ àma lèe ovʉ kɨ́kɨ́lɨ́ drʉ kʉ te àma lè àma òsu àfa àma ꞌyowa ꞌbùa vɨɨ ɨnɨ yɨ̀ ra, azílé rúá ngale ŋole ŋo vɨɨ ɨnɨ ngaa nɨ ojaa ɨdrɨ ovʉle nánináni vɨɨ drʉ benì. 5Ànɨ Orɨ ngʉlʉpɨ otʉ àma eꞌyo ꞌdɨ̀vɨɨ nɨ, díká ꞌbà àma drìa Orɨndɨ Àlátárá nɨ awo vɨɨ àfa ɨ̀ga òkò àmanɨ ovʉjʉ ɨ̀rɨ awo drʉ vɨɨ ꞌba.

6Ànɨyɨ̀ sawà drɨ́á yɨ̀ àma asíá òrì yʉ díká àma nì ra kɨ̀nɨ̀ àma nɨ ovʉrɨa ngà àkú ꞌdɨ̀vɨɨ alɨa rúá yɨ̀, àma Opɨ bʉ vàlà. 7Ànɨyɨ̀ àmá ovʉ ɨdrɨ drʉ àꞌɨ̀taa yɨ̀, ovʉʉ eꞌyo àma nɨ ndrèle mule yɨ̀ vɨɨ ɨnɨ yɨ̀ kʉ. 8Àma ngónde ovʉjʉ Opɨ be àkú ꞌbùa vɨɨ alɨa te ovʉjʉ rúá bʉ vɨɨ yɨ̀ vàlà. 9Ànɨ àma ꞌbà así àyɨ̀kò fèjʉ ɨ̀rɨ yɨ́, àma tè káꞌdí ovʉʉ àkú rúá yɨ̀ nòsɨ̀kʉ ɨ̀rɨ bʉ vɨɨ yɨ̀ vàlà ra kpé. 10Àrɨ̀yɨ̀kʉ lè àma cá drɨ́á ka so komɨ Kristo nɨ eꞌyo lijʉ vɨɨ drìlia ra. Ànɨ ꞌba àlʉàlʉ nɨ ngajʉ òya eꞌyo ɨ̀rɨ nɨ ꞌole ònzɨ nòsɨ̀kʉ àlá dèè ɨ̀rɨ nɨ ovʉrɨa rúá alɨa vɨɨ isújʉ benì.

Àzí ti ɨ̀cɨtaa nɨ vɨɨ

11Àmanɨ rʉtaa Opɨ nɨ rʉjʉ vɨɨ ɨkɨ́á nìle ra vɨɨ yɨ̀, àmá òꞌbi òꞌbɨ obe ɨ̀rɨ bʉ ꞌdɨ̀ ɨ. Te Orɨ nì ɨgataa àma drɨ́á rá, díká ma asíꞌbàzà be kɨ́nɨ̀ àmɨ nì pàbaa ma así àmɨ ꞌyowa vɨɨ alɨa kílílí drʉ ra. 12ꞌDònoo àma ipúú àma eꞌyo àmɨ drìlia ɨ kʉ, te ráaka àma àmɨ yɨ́ drìleba fèe àmɨ nɨ ovʉjʉ àma yɨ̀ àfʉ́ yɨ̀, azílé àmɨ òmvɨ́ zitaa ꞌba ovʉle àfʉ́ yɨ̀ ɨ̀ꞌdataa ndrèle mule yɨ̀ te ovʉʉ eꞌyo ɨnɨ asíá vɨɨ yɨ̀ kʉ vɨɨ ꞌyowa vɨɨ yɨ̀ benì. 13Àma tè eꞌyo ꞌo kɨ̀le àma omɨ̀ òmva nɨ ra lé, dèèna ɨ̀rɨ dìzà fèjʉ Orɨ yɨ́. Àma tè omɨ̀ àma ꞌyowa àlá vɨɨ alɨa, ɨ̀rɨ òròdrí drʉ àmɨ yɨ́. 14Àrɨ̀yɨ̀kʉ eꞌyo àmanɨ vɨɨ ɨnɨ àmá ꞌo alè Kristo awo vɨɨ yɨ̀, àrɨ̀yɨ̀kʉ àma àtì ra, kɨ̀nɨ̀ ꞌba àlʉ drà ꞌba drɨ́á eꞌyo yɨ̀ nɨ̀. Díká vɨɨ ɨ̀ce kɨ́nɨ̀ ꞌba drɨ́á òdra pàbaa ɨ̀ndɨ̀. 15Drà ꞌba drɨ́á eꞌyo yɨ̀, ànɨ lè ꞌba drɨ́á ovʉꞌba ɨdrɨ oꞌdɨ ɨ̀rɨ awo vɨɨ yɨ̀ vɨɨ ɨnɨ ovʉ́ àyɨ̀kò fèjʉ ànɨ ngʉlʉpɨ yɨ́ aꞌdúle kʉ, te ɨ̀rɨ eꞌyo yɨ̀ ɨ̀rɨ nɨ dràle ɨnɨ eꞌyo yɨ̀ vɨɨ yɨ̀ díká ɨ̀gàle ɨdrɨ drʉ ra vɨɨ yɨ̀.

16Ànɨ ɨꞌdojʉ àndrʉ̀ àma ngaa ꞌba àloo ni eꞌyo ꞌba ndépi nɨ ꞌyole ɨ̀rɨ drìa vɨɨ yɨ̀ kʉ. Káꞌdí àmanɨ ndráánɨ́ Kristo nɨ nìjʉ léti ꞌba ndépi eꞌyo ꞌyojʉ ɨ̀rɨ drìa vɨɨ yɨ̀ ra kpé, àma ngaa ꞌo ꞌdɨ̀vɨɨ lé díká kʉ. 17Ànɨyɨ̀ ꞌba àloo tè eꞌyo Kristo awo vɨɨ àꞌɨ̀ɨ ra, ɨ̀ ca ꞌbàzà drʉ oꞌdɨ drʉ. Ɨkɨ́a eꞌyo ɨ̀rɨ ɨdrɨ alɨa òku vɨɨ denɨ ꞌba, eꞌyo oꞌdɨ ɨ ɨꞌdo ace ɨ̀rɨ ɨdrɨ alɨa nɨ̀. 18Eꞌyo ꞌdɨ̀vɨɨ ɨnɨ drɨ́á ɨngajʉ Orɨ àma ɨ̀cɨle nɨ ɨbe túàlʉ Kristo yɨ̀ vɨɨ bʉ. Díká fè àma yɨ́ àzí ꞌba ti ɨ̀cɨjʉ nɨ be vɨɨ nga nɨ̀. 19Ànɨ Orɨ rɨ ti ɨ̀cɨtaa ji wúdrìkúrù ɨnɨ ɨ̀sɨlɨa nɨ ngʉlʉpɨ be léti Kristo bʉ yɨ̀, ovʉʉ ɨ̀zatà ꞌyowa vɨɨ làjʉ ɨnɨ drìa ɨ kʉ. Díká kʉ àma yɨ́ oꞌdúkó ti ɨ̀cɨtaa nɨ vɨɨ ɨ. 20Ànɨyɨ̀ àma kòndè Kristo awo nɨ, kɨ̀le Orɨ nɨ àma àyʉle eꞌyo nɨ awo vɨɨ òlʉ̀jʉ àmɨ yɨ́ vɨɨ lé. Àma eꞌyo ꞌdɨ̀vɨɨ ꞌyo Kristo kara ànɨ Orɨ ɨ̀rɨ oja àmɨ nɨ awo arípíònyɨ drʉ benì. 21Ànɨ Orɨ àyʉ Kristo ɨ̀zatàko vɨɨ dràjʉ ɨ̀zatà àma ꞌyowa vɨɨ yɨ̀, azílé léti ɨ̀rɨ bʉ vɨɨ yɨ̀ àma cá ꞌba Àlátárá drʉ ɨ̀rɨ mulia benì.

Currently Selected:

2 Koronito 5: MADI-URL

Highlight

Copy